Ieremia
38 Ua faalogo Sefatia le atalii o Matana, o Ketalia le atalii o Pasura, o Iukali+ le atalii o Selemia, ma Pasura le atalii o Malakia+ i upu na tautala atu ai Ieremia i le nuu uma,+ e faapea: 2 “O le mea lenei ua fetalai mai ai Ieova, ‘O lē e nofo pea i lenei aai, o ia lea e oti i le pelu,+ i le oge,+ ma le faamaʻi.+ A o lē e alu atu i le ʻau Kaletaia, o ia lea e ola pea, e avea foʻi lona ola ma vete ma ola ai pea o ia.’+ 3 O le mea lenei ua fetalai mai ai Ieova, ‘E tuuina atu lava lenei nuu i lima o le ʻautau a le tupu o Papelonia, ma e na te faatoʻilaloina ai lava.’”+
4 Ua faapea atu perenise i le tupu: “Faamolemole, ia fasiotia lenei tagata,+ auā ua ia faavaivaia lima o tagata o le taua o ē o totoe i lenei aai, ma lima o le nuu uma, e ala i le tautala atu iā i latou e tusa ma nei upu.+ Auā e lē o saʻili lenei tagata i le filemu o lenei nuu a o le malaia.” 5 Ona fai mai lea o le Tupu o Setekaia: “Faauta! Ua i o outou lima o ia. Auā e lē mafai ona manumalo le tupu iā te outou.”+
6 Ona latou ave lea o Ieremia ma lafo o ia i le vaieli o Malakia+ le atalii o le tupu, sa i le Lotoā o le Leoleo.+ Na latou tuu ifo Ieremia i lalo i maea. E leai se vai i le vaieli, ae e na o le palapala; ma ua magoto ifo Ieremia i le palapala.+
7 Ua faalogo Epetemeleka le Aitiope,+ o le eunuka ma o lē sa iai i le fale o le tupu e faapea, ua latou tuu Ieremia i totonu o le vaieli; a o nofo le tupu i le Faitotoʻa o Peniamina.+ 8 Ona alu atu ai lea o Epetemeleka mai i le fale o le tupu, ma tautala atu i le tupu, e faapea: 9 “Loʻu alii e le tupu, ua faia e nei tagata se mea leaga tele i le perofeta o Ieremia, ua latou lafo o ia i totonu o le vaieli, ma e oti+ ai lava o ia i inā ona o le oge.+ Auā ua leai lava se meaʻai i le aai.”
10 Ona poloaʻi atu lea o le tupu iā Epetemeleka le Aitiope, e faapea: “Ia e ave ni tagata se toʻatolu sefulu mai i lenei mea i lau vaavaaiga, ma ia e ave aʻe le perofeta o Ieremia mai i le vaieli a o leʻi oti o ia.”+ 11 Ona ave lea e Epetemeleka o ia tagata i lana vaavaaiga, ma ō atu i le fale o le tupu i lalo ifo o le mea e teu ai oloa,+ ma aumai ai i inā ʻieʻie tuai masaesae ma fasi ʻie tuai masaesae, ma tuutuu ifo i lalo i le vaieli+ iā Ieremia e ala i maea. 12 Ua faapea atu Epetemeleka le Aitiope iā Ieremia: “Ia e tuu ʻieʻie tuai masaesae ma fasi ʻie i lalo o ou ʻaoʻao e afei ai maea.” Ona faapea lea ona faia e Ieremia.+ 13 Mulimuli ane, ua latou sisi aʻe Ieremia i maea ma aveese o ia mai i le vaieli. Ona nofo ai pea lea o Ieremia i le Lotoā o le Leoleo.+
14 Ona alu atu lea o le feʻau a le Tupu o Setekaia ma aumai le perofeta o Ieremia iā te ia,+ i le faitotoʻa lona tolu+ i le fale o Ieova,+ ona fai atu lea o le tupu iā Ieremia: “Ou te fesili atu iā te oe i se mea. Aua neʻi e natia se mea mai iā te aʻu.”+ 15 Ona fai mai lea o Ieremia iā Setekaia: “Afai ou te taʻuina atu iā te oe, pe e te lē fasiotia ai la aʻu? Afai foʻi ou te fautua atu iā te oe, e te lē faalogo mai iā te aʻu.”+ 16 Ona tautō ai lea o le Tupu o Setekaia iā Ieremia i le mea lilo, e faapea: “O loo soifua Ieova, o lē na foaʻiina mai iā i taʻua le ola,+ ou te lē fasiotia oe, ou te lē tuuina atu foʻi oe i lima o nei tagata o ē o loo saʻili e fasiotia oe.”+
17 Ona fai mai lea o Ieremia iā Setekaia: “O le mea lenei ua fetalai mai ai Ieova le Atua o ʻau,+ o le Atua o Isaraelu,+ ‘Afai e te alu atu i perenise a le tupu o Papelonia,+ o le a e ola pea ma e lē susunuina foʻi lenei aai i le afi, ma e ola pea oe ma lou aiga.+ 18 Ae afai e te lē alu atu i perenise a le tupu o Papelonia, e tuuina atu lenei aai i lima o le ʻau Kaletaia, ma latou te susunuina lava i le afi,+ a o oe e te lē sao lava mai i o latou lima.’”+
19 Ona fai atu lea o le Tupu o Setekaia iā Ieremia: “Ou te fefe i tagata Iutaia o ē na sosola atu i le ʻau Kaletaia,+ ina neʻi o latou tuuina atu aʻu i o latou lima ma latou faileagaina ai aʻu.”+ 20 A ua fai mai Ieremia: “E latou te lē faia se mea faapena. Ia e faalogo faamolemole i le siʻufofoga o Ieova i mea ua ou fai atu ai iā te oe, ona manuia ai lea o oe+ ma e ola ai pea. 21 Ae afai e te musu e te alu,+ o le mea lenei ua faailoa mai e Ieova iā te aʻu: 22 Faauta foʻi! o fafine uma na totoe i le fale o le tupu o Iuta,+ ua taʻitaʻiina atu i perenise a le tupu o Papelonia,+ ma ua latou faapea atu,
‘O tagata foʻi o loo tausisia pea le filemu ma oe,+ ua latou faatosina oe ma ua manumalo iā te oe.+
Ua latou faapogaia lou vae ia goto ifo i le palapala; ma ua tuumuli i latou.’+
23 E latou te avatua i le ʻau Kaletaia au avā uma ma au fanau, e lē sao foʻi oe mai i o latou lima,+ ae e puʻea oe e le lima o le tupu o Papelonia, ma e susunuina foʻi lenei aai i le afi ona o oe.”+
24 Ua fai atu Setekaia iā Ieremia: “Aua lava neʻi iloa e se isi nei mea, ona e lē oti ai lea. 25 Afai foʻi e faalogo perenise+ na ou talanoa atu iā te oe, ma latou ō mai iā te oe ma faapea atu, ‘Ia taʻu mai iā i matou faamolemole, O le ā le mea na e talanoa ai i le tupu? Aua lava neʻi e natia se mea mai iā i matou, ona matou lē fasiotia ai lea o oe. O le ā foʻi le tala a le tupu na fai atu iā te oe?’ 26 ia e faapea atu iā latou, ‘na ou talosaga atu ina ia alofa le tupu, e aua neʻi ona toe auina atu aʻu i le fale o Ionatana,+ neʻi oʻu oti ai i inā.’”
27 Ona ō mai ai lea o perenise uma iā Ieremia ma tuufesili iā te ia. Ona ia taʻu atu lea iā i latou e tusa ma nei upu uma na poloaʻi atu ai le tupu.+ Ona latou lē toe tautatala ai lea i ona luma, auā latou te leʻi lagona le tala na fai. 28 Ua nofo pea Ieremia i le Lotoā o le Leoleo+ seʻia oo i le aso na faatoʻilaloina ai Ierusalema.+ Na taunuu lava ina ua faatoʻilaloina Ierusalema.+