Esekielu
30 Ua oo mai foʻi le afioga a Ieova iā te aʻu e faapea: 2 “Le atalii e o le tagata, ia e faia valoaga ma faapea atu,+ ‘O le fetalaiga lenei a le Alii Pule Silisili Ese o Ieova: “Ia outou uiō, ‘Oi auē o le a oo mai le aso!’+ 3 auā ua latalata mai le aso, ioe, ua lata mai le aso o Ieova.+ O le aso o le faamalumalu,+ o le taimi mo le faamasinoina o nuu.+ 4 O le a oo mai le pelu i Aikupito,+ e oo foʻi le tigā ogaoga iā Aitiope pe a paʻuʻū tagata ua fasiotia i Aikupito, ma e latou te faoa lona tamaoaiga ma lepeti i lalo ona faavae.+ 5 O Aitiope,+ o Futu,+ o Luti ma tagata uma+ mai i isi nuu, o Kupu ma fanau o le atunuu ua iai i le feagaiga, o le a fasiotia i latou faatasi ma i latou i le pelu.”’+
6 “O le fetalaiga lenei a Ieova, ‘E ao ona paʻuʻū o ē e lagolago iā Aikupito, ma e mavae atu foʻi lona malosi o loo mitamita ai.’+
“‘O le a feoti i latou i le pelu e amata mai i Mekatala+ e oo atu i Seveni,’+ ua fetalai mai ai le Alii Pule Silisili Ese o Ieova. 7 ‘E faatafunaina foʻi i latou e pei o isi atunuu ua faatafunaina, ma e faagaogaoina ona aai e pei o isi aai ua faagaogaoina.+ 8 O le a latou iloa ai o aʻu lava o Ieova pe a ou tutuina se afi i Aikupito ma fasiotia foʻi i latou uma ua fesoasoani iā te ia.+ 9 O lea aso, o le a ō atu ai avefeʻau mai i oʻu luma i vaa, ina ia gatete ai Aitiope faamaualuga.+ E oo iā i latou le tigā ogaoga i le aso e malaia ai Aikupito, auā faauta! e oo mai lava.’+
10 “O le fetalaiga lenei a le Alii Pule Silisili Ese o Ieova, ‘Ou te faaumatia le motu o tagata o Aikupito i le lima o Nepukanesa le tupu o Papelonia.+ 11 E aumaia o ia ma ona tagata faatasi ma ia, o pule sauā o nuu ina ia faafanoina ai le atunuu.+ E latou te tō aʻe a latou pelu e faasagatau atu ai iā Aikupito ma e faatumuina le atunuu i tagata ua fasiotia.+ 12 Ou te faia alāvai o le Naila+ ma eleele mātūtū ma faatau atu le fanua i lima o tagata amioleaga,+ ou te faatupuina foʻi le faatafunaina o le atunuu ma mea o tumu ai i lima o tagata ese.+ O aʻu o Ieova ua ou fai atu ai.’+
13 “O le fetalaiga lenei a le Alii Pule Silisili Ese o Ieova, ‘Ou te faatamaʻia tupua inosia+ ma faaiʻuina atua lē aogā mai i Nafi,+ ma e lē toe iai se taʻitaʻi mai i le atunuu o Aikupito; ou te faatupuina foʻi le mataʻu i Aikupito.+ 14 Ou te faatafunaina Patoro+ ma tutu se afi i Soana+ ma faaoo atu le faasalaga i No.+ 15 O le a ou sasaa atu loʻu ita+ tele iā Sina, le nofoaga malupuipuia o Aikupito ma fasiotia le motu o tagata o No.+ 16 Ou te tutuina le afi i Aikupito. O le a oo lava iā Sina tigā ogaoga, ma o le a maua No ona ua lepetia ona pā; e tusa ma Nafi, o le a iai fili i le ao! 17 A o tauleleʻa o Onu+ ma Pepeseta, e fasiotia i latou i le pelu ma o le a ave faapagota tagata o ia aai. 18 O le a pogisa le aso i Tapenesa+ pe a ou gausia amo a Aikupito.+ O le a faaiʻuina foʻi lona malosi lea e mitamita ai.+ A o ia, o le a ufitia o ia i ao,+ ma ave faapagota tagata o ona tamaʻi aai.+ 19 O le a ou faaoo le faasalaga i Aikupito;+ ona latou iloa ai lea o aʻu lava o Ieova.’”
20 Ua toe oo mai foʻi le afioga a Ieova iā te aʻu i le tausaga lona sefulu tasi, i le masina muamua, i le aso lona fitu o le masina e faapea: 21 “Le atalii e o le tagata, ou te gausia lava le lima o Farao le tupu o Aikupito,+ faauta! o le a lē fusifusia ina ia mālōlō ai e ala i le fusiina i se ʻie,+ ina ia toe malosi ai le lima ma uu se pelu.”
22 “O lea, o le fetalaiga lenei a le Alii Pule Silisili Ese o Ieova, ‘Ou te faasagatau atu iā Farao le tupu o Aikupito,+ ma o le a ou gagauina ona lima,+ o le lima malosi ma le lima ua gau,+ ou te faapogaia foʻi le paʻū ese o le pelu mai i lona lima.+ 23 Ou te faataapeapeina tagata Aikupito i nuu ma faasalalauina atu i latou i atunuu.+ 24 O le a ou faamalosia lima o le tupu o Papelonia+ ma tuuina atu laʻu pelu i lona lima,+ ou te gagauina lima o Farao ma o le a matuā ōi lava o ia ona ua toeitiiti a oti.+ 25 Ou te faamalosia lima o le tupu o Papelonia, ma e gagase ai lima o Farao; ma o le a latou iloa ai o aʻu lava o Ieova pe a ou tuuina atu laʻu pelu i le lima o le tupu o Papelonia, e na te faaloaloa atu foʻi lana pelu e faasagatau atu ai i le atunuu o Aikupito.+ 26 O le a ou faataapeapeina tagata o Aikupito i nuu+ ma faasalalauina atu i latou i atunuu; ona latou iloa ai lea o aʻu lava o Ieova.’”