Faamasino
11 O Iefata+ le Kiliata,+ o le toa malosi+ o ia, o ia foʻi o le tama a se fafine talitane,+ ma o Kiliata o le tamā o Iefata. 2 Na fanau mai pea e le avā a Kiliata o atalii mai iā te ia. Ina ua matutua le fanau a le avā a Kiliata, ona latou tuliesea lea o Iefata ma faapea atu iā te ia: “E lē tatau ona iai sou tofi i le aiga o lo matou tamā,+ auā o oe o le tama a le fafine ese.” 3 Ua sola ese Iefata ona o ona uso, ma ua nofo ai i le nuu o Topa.+ Ua ō mai foʻi iā Iefata o tagata e leai ni mea o faia, ma ua latou ō faatasi ma ia.+
4 Ua mavae sina taimi, ona siitaua mai lea o le fanauga a Amoni iā Isaraelu.+ 5 Ina ua tau le fanauga a Amoni ma Isaraelu,+ ona ō atu faavave lea o toeaina o Kiliata e aumai Iefata mai i le nuu o Topa.+ 6 Ona latou fai atu lea iā Iefata: “Inā sau ia e fai oe ma o matou taʻitaʻiʻau, ma ia tatou ō e tau ma le fanauga a Amoni.” 7 A ua fai mai Iefata i toeaina+ o Kiliata: “Pe e tou te leʻi ʻinoʻino mai ea iā te aʻu, ma outou tuliesea aʻu mai i le aiga o loʻu tamā?+ Aiseā la ua outou toe ō mai ai nei iā te aʻu, ina ua outou puapuagatia?”+ 8 Ona fai atu lea o toeaina o Kiliata iā Iefata: “O le mea lea ua matou toe ō mai+ ai nei iā te oe, ina ia tatou ō ma i matou e tau ma le fanauga a Amoni, ma avea oe ma ulu mo i matou o ē uma o loo nonofo i Kiliata.”+ 9 Ona fai mai lea o Iefata i toeaina o Kiliata: “Afai tatou te ō e tau ma le fanauga a Amoni, ma foaʻiina+ mai e Ieova i latou iā te aʻu, ona avea lea o aʻu ma o outou ulu!” 10 Ona tali atu lea o toeaina o Kiliata iā Iefata: “Ia faafofoga mai Ieova iā i tatou,+ pe afai matou te lē faia e tusa ma lau upu.”+ 11 Ona ō ai lea o Iefata ma toeaina o Kiliata, ua tofia foʻi o ia e tagata e avea ma ulu ma taʻitaʻiʻau+ iā i latou. Ua fai atu foʻi e Iefata ana upu uma i luma o Ieova+ i Mesepa.+
12 Ua aauina atu e Iefata o avefeʻau i le tupu o le fanauga a Amoni,+ ua faapea atu: “O le ā ea laʻu mea ua fai iā te oe,+ ina ua e siitaua mai ai iā te aʻu i loʻu laueleele?” 13 Ona fai mai lea o le tupu o le fanauga a Amoni i avefeʻau a Iefata: “Auā na faoa e Isaraelu oʻu laueleele ina ua latou ō aʻe mai i Aikupito,+ e amata mai i Arinona+ e oo atu i Iapoka, ma e oo atu lava i Ioritana.+ O lenei, ia toe faafoʻi mai ai ma le filemu.” 14 A ua toe aauina atu e Iefata o avefeʻau i le tupu o le fanauga a Amoni, 15 ua faapea atu iā te ia:
“O loo faapea mai Iefata, ‘E leʻi faoa e Isaraelu le laueleele o Moapi,+ ma le laueleele o le fanauga a Amoni.+ 16 Auā ina ua latou ō aʻe mai i Aikupito, na uia e Isaraelu le toafa e oo atu i le Sami Ulaula,+ ma oo atu ai i Katesa.+ 17 Ona aauina atu lea e Isaraelu o avefeʻau i le tupu o Etoma,+ e faapea: “Faamolemole, seʻi oʻu ui atu i lou nuu,” ae e leʻi faalogo le tupu o Etoma. Na latou aauina atu foʻi avefeʻau i le tupu o Moapi,+ ae e leʻi malie o ia. Na nonofo pea Isaraelu i Katesa.+ 18 Ina ua latou ui ane i le toafa, na latou faataamilo i le laueleele o Etoma+ ma le laueleele o Moapi, ma agaʻi atu ai i le mea e oso aʻe ai le lā i le nuu o Moapi,+ ma tolauapi ai i laueleele o Arinona; latou te leʻi sopoʻia le tuaoi o Moapi,+ auā o Arinona o le tuaoi lea o Moapi.+
19 “‘Ua mavae ia mea, ona aauina atu lea e Isaraelu o avefeʻau iā Sekono le tupu o tagata Amorī, le tupu o Hesepona,+ ua faapea atu Isaraelu iā te ia: “Faamolemole, seʻi o matou ui ane lava i lou laueleele e oo atu ai i lo matou nuu.”+ 20 Ae e leʻi mautonu Sekono i le ui ane o Isaraelu i lona laueleele, ua faapotopoto faatasi foʻi e Sekono ona tagata uma ma tolauapi i Iaesa,+ ma siitaua iā Isaraelu.+ 21 Ona tuuina atu lea e Ieova le Atua o Isaraelu o Sekono ma ona tagata uma i lima o Isaraelu, ua latou fasia i latou, ma maua ai e Isaraelu le laueleele uma o tagata Amorī, o ē o loo nonofo i lea laueleele.+ 22 Ona latou maua ai lea o le laueleele uma o tagata Amorī, e amata mai i Arinona e oo atu i Iapoka, e amata mai foʻi i le toafa e oo atu i Ioritana.+
23 “‘O lenei, o Ieova le Atua o Isaraelu na tuliesea tagata Amorī mai i luma o Isaraelu+ lona nuu, a o oe, ua e tuliesea i latou. 24 O le fanua e avane e Kimosa lou atua iā te oe,+ pe e te lē taofia ea mo oe? O le fanua foʻi e aumai e Ieova lo matou Atua mo i matou, matou te taofia lava mo i matou.+ 25 O lenei, pe e sili ea oe iā Palako le atalii o Seporu le tupu o Moapi?+ Pe na ia finau ea ma Isaraelu, pe na ia tau ea ma i latou? 26 A o nonofo Isaraelu i Hesepona ma ona tamaʻi aai,+ i Aroeru+ ma ona tamaʻi aai, ma aai uma sa i tafatafa o le auvai o Arinona mo tausaga e tolu selau, aiseā na outou lē faoa ai mai i lenā taimi?+ 27 A o aʻu, ou te leʻi agasala iā te oe, a ua e agaleaga mai iā te aʻu ina ua e siitaua mai iā te aʻu. Ia fai Ieova le Faamasino,+ ma faamasino i le va o le fanauga a Isaraelu ma le fanauga a Amoni i le asō.’”
28 Ae e leʻi faalogo le tupu o le fanauga a Amoni i upu a Iefata na auina atu iā te ia.+
29 Ua oo nei iā Iefata le agaga o Ieova,+ ua ia ui ane i Kiliata ma Manase ma ui atu i Mesepa o Kiliata,+ ua ui ane foʻi mai i Mesepa o Kiliata i le fanauga a Amoni.
30 Ona faia lea e Iefata o se tautoga+ iā Ieova e faapea: “Afai e te tuuina mai lava le fanauga a Amoni i loʻu lima, 31 o lē e sau i fafo, e sau mai i le faitotoʻa o loʻu fale e faafeiloaʻi iā te aʻu, pe a ou foʻi mai ma le manuia+ i le taua ma le fanauga a Amoni, e fai o ia mo Ieova,+ ma ou te ofoina atu o ia o se taulaga mū.”+
32 Ona alu ane lea o Iefata i le fanauga a Amoni e tau ma i latou, ma ua tuuina atu i latou e Ieova i lona lima. 33 Ua ia fasia i latou i le fasiga tele e amata mai i Aroeru e oo atu lava i Meniti,+ o aai e lua sefulu, e oo atu foʻi i Apela-karame. Ona faatoʻilaloina lea o le fanauga a Amoni i luma o le fanauga a Isaraelu.
34 Ona alu atu lea o Iefata i Mesepa+ i lona fale, faauta! ua sau lona afafine e faafeiloaʻi o ia a o tāina le topa* ma siva!+ O lona afafine e toʻatasi o ia. E leai sona atalii po o sona afafine, ua na o ia lava. 35 Ina ua ia iloa atu o ia, ona ia saeia lea o ona ofu+ ma faapea atu: “Auē, loʻu afafine e! Ua e tuia loʻu fatu, ma o le a ou auina ese atu oe. Na ou tautō iā Ieova, e lē mafai foʻi ona ou toe faafoʻi mai.”+
36 A ua ia fai mai iā te ia: “Loʻu tamā e, afai ua e tautō iā Ieova, ia e faia iā te aʻu e pei ona e tautō ai,+ auā ua uma ona taui atu e Ieova mo oe o ou fili, le fanauga a Amoni.” 37 Ua ia fai mai i lona tamā: “Ia faia lenei mea iā te aʻu: Seʻi tuu mai aʻu ou te alu mo masina e lua, ma ou alu atu i luga o mauga, ou te tagi ai ona o loʻu tulaga taupou,+ o aʻu ma aʻu uō teine.”
38 Ua ia fai atu iā te ia: “Inā alu ia!” Ona ia auina atu lea o ia mo masina e lua; ma ua ō atu o ia ma ana uō teine, ua fetagisi i luga o mauga ona o lona tulaga taupou. 39 Ua oo i le faaiʻuga o masina e lua e toe foʻi ai o ia i lona tamā, e na te faataunuu ai lana tautoga na faia iā te ia.+ A o ia, e leʻi momoe lava ma se tane. Ua avea foʻi ma tū i Isaraelu: 40 I lea tausaga ma lea tausaga, e ō atu ai afafine o Isaraelu e faamālō i le afafine o Iefata le Kiliata, e taʻifā aso i le tausaga.+