1 Samuelu
5 Ua avatu e Filisitia le atolaau+ a le Atua moni mai i Epenesa i Asetota.+ 2 Ua fetagofi Filisitia i le atolaau a le Atua moni ma avatu i le fale o Takono, ma tuu i tafatafa o Takono.+ 3 Ona fealapō lea o tagata Asetota i le aso na sosoo ai, ma vaai ua paʻū faō i le eleele le faatagata o Takono i luma o le atolaau a Ieova.+ Ona latou fetagofi lea iā Takono ma toe faatū i le mea na tū ai.+ 4 Ina ua latou feala i le taeaopō o le isi aso, vaai! ua paʻū faō i le eleele le faatagata o Takono i luma o le atolaau a Ieova, ua motu ese le ulu o Takono ma ona tapulima e lua i le faitotoʻa o le fale.+ E na o le ogātino* na totoe ai iā te ia. 5 O le mea lea ua lē solia ai le faitotoʻa o le fale o Takono i Asetota, e ositaulaga ma i latou uma e ō atu i le fale o Takono e oo mai i aso nei.
6 Ua mamafa le aao o Ieova+ i tagata o Asetota, ua ia faatupuina foʻi lo latou popole, ma taia i latou i silailalo,+ o Asetota ma ona itu uma. 7 Ua iloa e tagata Asetota le mea ua faia, ma ua latou faapea ane: “Aua neʻi tuua iā i tatou le atolaau a le Atua o Isaraelu, auā ua mamafa lona aao iā i tatou atoa ma Takono lo tatou atua.”+ 8 Ona latou aauina lea ma faapotopoto o alii uma ua pule faatasi o Filisitia iā i latou ma faapea atu: “O le ā se mea e tatou te faia i le atolaau a le Atua o Isaraelu?” Ua latou faapea mai: “Ia faataamilo atu i Kata+ le atolaau a le Atua o Isaraelu.” Ona latou ave faataamilo lea o le atolaau a le Atua o Isaraelu i inā.
9 Ina ua uma ona latou ave faataamilo le atolaau i inā, ona oo mai lea o le aao o Ieova+ i le aai ma ua matuā fenuminumiaʻi ai, ua ia fasia foʻi tagata o le aai e mai i tamaiti e oo lava i tagata matutua, ma ua feosofi ai silailalo+ iā i latou. 10 Ona latou auina atu lea o le atolaau a le Atua moni i Ekerona.+ Ina ua oo le atolaau a le Atua moni i Ekerona, ona alalaga ai lea o tagata Ekerona ma faapea mai: “Ua latou aumai faataamilo iā te aʻu le atolaau a le Atua o Isaraelu, ina ia fasiotia ai aʻu ma loʻu nuu!”+ 11 Ona latou aauina lea ma faapotopoto o alii uma ua pule faatasi o Filisitia, ma faapea atu: “Inā outou auina ese atu ia le atolaau a le Atua o Isaraelu ma ia toe faafoʻi atu i lona nuu, ina neʻi fasiotia ai aʻu ma loʻu nuu.” Auā ua matataʻu le aai atoa ina neʻi latou feoti;+ ua matuā mamafa foʻi le aao o le Atua moni i inā,+ 12 o tagata foʻi e leʻi feoti, na taia i latou i silailalo.+ Ua alu aʻe pea i le lagi le alaga+ a le aai mo se fesoasoani.