‘O Ana Galuega e Mulimuli i a te Ia’

I LE 8:50 i le taeao o le Aso Tofi, Iulai 28, 1994, na faaiuina ai le auaunaga i le lalolagi a George D. Gangas. E 98 tausaga o lona soifuaga. O ia o sē ua faauuina, ma sa avea George Gangas ma se tasi o le Vaega Pule o Molimau a Ieova talu mai Oketopa 15, 1971.

O i latou uma o ē na masani lelei ma le uso o Gangas, sa latou iloa lelei lona alofa i le amiotonu ma le inoino i le amioleaga. Latou te manatua lelei lona faamatalaina soo o Satani o sē e matuaʻi lē migao, e amioleaga matuia, ma e talapepelo inosia. I le faaeseesega, na ia taʻua Ieova o se Atua alofa, e agalelei, e agaalofa, e faapelepele, ma o se Tamā e manatu mai. E toatele foi latou te manatua lona fiafia e faia fesili faale-Tusi Paia. I so o se talanoaga, e tatau lava ona ia faatutu ni fesili—o nisi e faigofie, a o nisi e fai si faigata. O le mea moni, sa naunau tele o ia i le upu moni o le Tusi Paia.

Na papatisoina le uso o Gangas i a Iulai 15, 1921. Na amata lana auaunaga i le faiva faataimi atoa (paeonia) i a Mati 1928. O lea, sa iai o ia i le auaunaga faataimi atoa mo le aofaiga o tausaga e 66. Na avea o ia ma sē tasi o ē galulue i le ofisa ulu o le Watch Tower Bible and Tract Society i Brooklyn i a Oketopa 31, 1928.

O le talaaga o lona olaga o loo i le Watchtower i le lomiga o Oketopa 15, 1966. O loo faamatalaina ai se tagata o le Atua e naunau tele i mea faaleagaga. O lena mataupu, na ia taʻua ai se faamatalaga faamafanafana loto e faapea: “Ou te naunau i le ola ma ou te manao ia maua e oʻu uso le ola. Ua pei aʻu o le aposetolo o Pauro i le manatu ‘ua le aogā mea uma lava ona o le silisili ese o le poto i la Keriso Iesu.’”—Filipi 3:8.

Sa faaalia e le uso o Gangas i ana galuega le moni o lona naunau i le ola, ma sa ia faaoo atu ma le maelega i isi lona “poto i la Keriso Iesu.” O le a misia o ia, ae maeu lo tatou olioli ona o lea ua ia maua lona taui i le lagi! O lenei la, ‘ua ia mālōlō i ana galuega tiga, auā o ana galuega foi e mulimuli i a te ia.’—Faaaliga 14:13, New International Version.