VaHebheru
13 Kudanana kwenyu sehama ngakupfuurire.+ 2 Musakanganwa kugamuchira vaeni zvakanaka,+ nokuti nokuita izvozvo, vamwe vakagamuchira ngirozi+ vasingazvizivi. 3 Rambai muchifunga vaya vakasungwa nezvisungo zvomujeri+ sokunge kuti makasungwa pamwe chete navo,+ nevaya vari kuitirwa zvakaipa,+ imiwo zvamuchiri mumuviri wenyama. 4 Kuroorana ngakukudzwe navose, mubhedha wevakaroorana ngaurege kusvibiswa,+ nokuti Mwari achatonga zvifeve nemhombwe.+ 5 Mararamiro enyu ngaave okusada mari,+ muchigutsikana+ nezvinhu zvinenge zviripo.+ Nokuti iye akati: “Handingambokuregerei kana kumbokusiyai.”+ 6 Kuti tive vakashinga+ kwazvo tichiti: “Jehovha ndiye mubatsiri wangu; handingatyi. Munhu angandiitei?”+
7 Yeukai vaya vari kukutungamirirai,+ vakakutaurirai shoko raMwari, uye sezvamunocherechedza kuti mufambiro wavo unoguma sei, tevedzerai+ kutenda kwavo.+
8 Jesu Kristu anogara akadaro zuro nanhasi, uye nokusingaperi.+
9 Musatsauswa nedzidziso dzakasiyana-siyana uye dzisingazivikanwi;+ nokuti zvakanaka kuti mwoyo usimbiswe nomutsa usina kukodzera kuwanwa,+ kwete nezvokudya,+ izvo zvisina kubatsira vaya vanozvibatikanisa nazvo.
10 Tine atari iyo vaya vanoita basa dzvene patende vasina simba rokudyira pairi.+ 11 Nokuti mitumbi yemhuka dziya dzine ropa rinopinzwa munzvimbo tsvene nomupristi mukuru nokuda kwechivi, inopisirwa kunze kwomusasa.+ 12 Nokudaro Jesuwo akatamburira kunze kwegedhi,+ kuti atsvenese+ vanhu neropa rake.+ 13 Naizvozvo, ngatiendei kwaari kunze kwomusasa, takatakura ruzvidzo rwaakatakura,+ 14 nokuti pano hatina guta rinoramba riripo,+ asi tiri kutsvaka nomwoyo wose riya richauya.+ 15 Ngatigarei tichipa Mwari chibayiro chokurumbidza+ nokwaari, icho chibereko chemiromo+ iyo inozivisa pachena zita rake.+ 16 Zvakare, musakanganwa kuita zvakanaka+ nokugoverana zvinhu nevamwe, nokuti Mwari anofadzwa kwazvo nezvibayiro zvakadaro.+
17 Teererai vaya vari kukutungamirirai,+ muzviise pasi,+ nokuti ivo vari kurinda mweya yenyu sevanhu vachazozvidavirira;+ kuti vaite izvi nomufaro kwete nokugomera, nokuti izvi zvaizokukuvadzai.+
18 Rambai muchitinyengeterera,+ nokuti tinovimba kuti tine hana yakatendeseka, zvatinoda kuva vakatendeseka muzvinhu zvose.+ 19 Asi ndinokurayirai kwazvo kuti muite izvi, kuti ini ndikurumidze kudzorerwa kwamuri.+
20 Zvino Mwari worugare,+ akamutsa mufudzi mukuru+ wemakwai+ kubva kuvakafa,+ iye Ishe wedu Jesu, neropa resungano isingaperi,+ 21 ngaakushongedzei nezvinhu zvose zvakanaka kuti muite zvaanoda, achiita matiri zvinomufadza+ kwazvo pamberi pake achishandisa Jesu Kristu; kukudzwa ngakuve kwaari nokusingaperi-peri.+ Ameni.
22 Zvino ndinokurayirai, hama, kuti mushivirire panoverengwa shoko iri rokukurudzira, nokuti, chokwadi, ndakakunyorerai tsamba nemashoko mashoma.+ 23 Zivai kuti hama yedu Timoti+ yakasunungurwa, uye kana ikakurumidza kuuya, ndichauya kuzokuonai pamwe chete nayo.
24 Ndikwazisireiwo vose vaya vari kukutungamirirai+ nevamwe vatsvene vose. Vaya vari muItari+ vari kukukwazisai.