Zviitiko Zvinokosha Munhau Yomuzuva Razvino Uno Yezvapupu Zvajehovha

1870 Charles Taze Russell neboka rakabva kuPittsburgh neAllegheny, Pennsylvania, U.S.A., vanovamba fundo yakarongwa yeBhaibheri

1870-75 Russell nevaaifunda navo vanodzidza kuti apo Kristu anouyazve iye anofanira kuva asingaoneki nameso avanhu uye kuti chinangwa chokudzoka kwake chinobatanidza kukomborerwa kwemhuri dzose dzapasi

1872 Russell neboka rake refundo vanosvika pakunzwisisa mutengo worudzikinuro uyo Kristu akagovera nokuda kworudzi rwomunhu

1876 C. T. Russell anogamuchira kopi yeHerald of the Morning, muna January; anosangana naN. H. Barbour, mupepeti wenhau wacho, zhizha iroro muPhiladelphia, Pennsylvania

Nyaya yakanyorwa naC. T. Russell, yakabudiswa muchinyorwa chaOctober cheBible Examiner, muBrooklyn, New York, inonongedzera kuna 1914 somugumo weNguva dzaVamarudzi

1877 Bhuku rinonzi Three Worlds rinobudiswa, somugumisiro wenhamburiko dzokubatira pamwe dzaN. H. Barbour naC. T. Russell

C. T. Russell anobudisa bhukwana rinonzi The Object and Manner of Our Lord’s Return, pahofisi yeHerald of the Morning, muRochester, New York

1879 Russell anorega tsigiro yose kuHerald of the Morning, muna May, nemhaka yechimiro chendangariro chaBarbour kurudzikinuro

Chinyorwa chokutanga cheZion’s Watch Tower and Herald of Christ’s Presence, chakanyorwa musi waJuly 1879

1881 Maturakiti okutanga anobudiswa naVadzidzi veBhaibheri; 1914 asati asvika, kuparadzirwa kwamaturakiti kwegore negore kunoita hwerengedzo yamakumi amamiriyoni amakopi mumitauro 30

Zion’s Watch Tower Tract Society inorongwa; danidziro inopiwa “Vaparidzi 1 000 Vanodikanwa,” kuti vamwe vave macolporteur enguva dzose, vamwe kuti vape nguva ipi kana ipi yavanogona kukuparadzira zvokwadi yeBhaibheri

Kuparadzirwa kwamakopi 300 000 eFood for Thinking Christians kuvanoenda kuchechi vomumaguta makuru muBritain

1883 Nharireyomurindi inosvika kuChina; aichimbova mufundisi wePresbyterian anokurumidza kuvamba kupupura kune vamwe imomo

1884 Food for Thinking Christians rinosvika kuLiberia, Africa; mumwe muravi anoonga anonyora achikumbira makopi okuparadzira

Zion’s Watch Tower Tract Society inova nechata zviri pamutemo muPennsylvania; inonyorwa nehurumende pana December 15

1885 Zvinyorwa zveWatch Tower zviri kutoraviwa navamwe vanhu vane nzara yezvokwadi muNorth neSouth America, Europe, Africa, uye Asia

1886 The Divine Plan of the Ages rinobudiswa, vhoriyamu yokutanga yenhevedzano yainzi Millennial Dawn (yakazivikanwa gare gare seStudies in the Scriptures)

1889 Bible House inovakwa muArch Street, muAllegheny, Pennsylvania, sedzimbahwe reSosaiti

1891 Kuungana kwokutanga kwaVadzidzi veBhaibheri uko vanodana kuti kokorodzano, muAllegheny, Pennsylvania (April 19-25)

1894 Vatariri vanofambira avo pashure penguva yakati vakasvika pakuzivikanwa semapilgrim (nhasi, vatariri vematunhu nevemaruwa) vanotumwa maererano negadziriro yeSosaiti yokushanyira ungano

1900 Hofisi yebazu yokutanga yeWatch Tower Society inozarurwa, muLondon, England

Kupupura kwaVadzidzi veBhaibheri kwakaitwa munyika 28, uye shoko ravanoparidza rakasvika mudzimwe nyika 13

1903 Kuparadzirwa kukuru paimba neimba kwamaturakiti apachena pamaSvondo; pakuvamba zvikuru, kwakawanda zvikurusa kwokuparadzirwa kwamaturakiti kwaiitwa mumigwagwa pedyo namachechi

1904 Mharidzo dzaC. T. Russell dzinovamba kuoneka nguva dzose mumapepanhau; mukati memakore gumi dziri kudhindwa nemapepa anenge 2 000

1909 Dzimbahwe reSosaiti rinotamisirwa kuBrooklyn, New York, muna April

1914 Kuratidzwa kwokutanga kwe“Photo-Drama of Creation,” muNew York, muna January; gore risati rapera, inoonwa navateereri vane hwerengedzo yavanopfuura 9 000 000 muNorth America, Europe, uye Australia

Pana October 2, mukamuri rokudyira repaBheteri kuBrooklyn, C. T. Russell anozivisa kuti, “Nguva dzaVamarudzi dzaguma”

Vadzidzi veBhaibheri vanoshingaira vachiparidza munyika 43; 5 155 vanogoverana mukupupura kune vamwe; vakapinda Chirangaridzo vakashumwa i18 243

1916 Rufu rwaC. T. Russell pamakore 64 ezera, pana October 31, apo akanga ari muchitima achipfuura nomuTexas

1917 J. F. Rutherford anova purezidhendi weSosaiti pana January 6, pashure pokunge dare rinoita zvisarudzo ravatatu ratarisira zvinhu zveSosaiti kweinenge mwedzi miviri

Bhuku rinonzi The Finished Mystery rinobudiswa kumhuri yeBheteri muBrooklyn pana July 17; vana avo vakanga vave vachibatira muboka ravatungamiriri veSosaiti vanorishora zvakasimba; pashure pacho ungano dzakawanda dzinokamuka

1918 Hurukuro inoti “Nyika Yaguma—Mamiriyoni Ari Kurarama Zvino Angasatongofa” inotanga kupiwa, pana February 24, muLos Angeles, California. Pana March 31, muBoston, Massachusetts, hurukuro yacho ine musoro unoti “Nyika Yaguma—Mamiriyoni Ari Kurarama Zvino Haasati Achizotongofa”

J. F. Rutherford navasonganiri vapedyo vanodudzwa mazita mumagwaro okusungwa ehurumende yomubatanidzwa akapiwa pana May 7; kutongwa kunovamba pana June 5; vanopiwa tongero pana June 21 (mumwe pana July 10) yenguva refu mutorongo rehurumende yomubatanidzwa

Dzimbahwe reBrooklyn rinopfigwa muna August, uye mabasa aro anodzorerwa kuPittsburgh kwerinopfuura gore

1919 Vakuru vakuru veSosaiti navasonganiri vanobudiswa vabhadhara bheroauti, pana March 26; pana May 14 dare rokukwirira rinochinja chisarudzo chedare rakaderera, uye kutongwa kutsva kunorayirwa; gore rakatevera, pana May 5, hurumende inobva mumhaka yacho, ichiramba kusunga

Sokuedza kwokuona kana basa raVadzidzi veBhaibheri richigona kumutsidzirwa, J. F. Rutherford anoronga kupa hurukuro yavose inoti “Tariro Yavanhu Vanotambudzika,” paClune’s Auditorium, muLos Angeles, California, pana May 4; boka racho harigoni kukwana rose, uye hurukuro yacho inofanira kupiwa kechipiri

Vadzidzi veBhaibheri vaiva nekokorodzano paCedar Point, Ohio, September 1-8; kubudiswa kwaitevera kwemagazini yeThe Golden Age (zvino inozivikanwa seMukai!) kunoziviswa

Bulletin (zvino inozivikanwa soUshumiri Hwedu hwoUmambo) inobudiswa sekurudziro kubasa romumunda

Mushumo wegore unoratidza Vadzidzi veBhaibheri 5 793 vanoparidza nokushingaira munyika 43; vapindi veChirangaridzo vakashumwa, 21 411

1920 Watch Tower Society inotanga kuita mabasa ayo imene okudhinda, muBrooklyn

1922 Redhiyo inotanga kushandiswa naJ. F. Rutherford, pana February 26, muCalifornia, kuparidza hurukuro yeBhaibheri

Kokorodzano yaVadzidzi veBhaibheri paCedar Point, Ohio, September 5-13; chikumbiro chinoitwa chokuti “Zivisai, zivisai, zivisai, Mambo noumambo hwake”

Vafundisi muGermany vanonyandura kuti mapurisa asunge Vadzidzi veBhaibheri apo ivava vanoparadzira pachena mabhuku eBhaibheri

1924 WBBR (nhepfenyuro yokutanga yeWatch Tower Society) inovamba kuparidza pana February 24

1925 Nharireyomurindi yechiNgezi yaMarch 1, mukukurukura kuberekwa kwoUmambo hwaMwari muna 1914, inoratidza kuti kune masangano maviri akatsaukana neanorwisana—raJehovha neraSatani

1926 Kuparidza paimba neimba nemabhuku musi weSvondo kunokurudzirwa neSosaiti

1928 Vadzidzi veBhaibheri vanosungwa muNew Jersey (U.S.A) nokuda kwokuparadzira mabhuku sorutivi rwokuparidza kwavo paimba neimba; mukati memakore gumi, mune kusungwa kwakadaro kunopfuura 500 pagore muUnited States

1931 Zita rokuti Zvapupu zvaJehovha rinogamuchirwa kupfurikidza nechisarudzo pakokorodzano muColumbus, Ohio, pana July 26, uye pashure pacho pakokorodzano kupota pasi rose

1932 Vindication, Bhuku 2, rinotsanangura chikonzero nei uporofita hweBhaibheri hwokudzorera huchishanda kwete kuvaJudha vokunyama asi kuna Israeri womudzimu

Gadziriro ya“vakuru vanosarudzwa” inogumiswa, mutsinhirano netsananguro iri muzvinyorwa zveNharireyomurindi yechiNgezi zvaAugust 15 naSeptember 1

1933 Zvapupu zvaJehovha zvinorambidzwa muGermany. Mukati mechitambudzo chakakomba kuburukira kumugumo weHondo Yenyika II, 6 262 vanosungwa, uye nguva yavo yakabatanidzwa yokupinzwa mutorongo inoita hwerengedzo yamakore 14 332; 2 074 vanotumirwa kumisasa yevasungwa, uko kuchengetwa kwavo kunoita hwerengedzo yamakore 8 332

Michina yokurekodha (mimwe yakaiswa pamotokari) inoshandiswa neZvapupu kuparidza hurukuro dzeBhaibheri munzvimbo dzavose

1934 Magiramufomu anotakurika anoshandiswa neZvapupu kuridzira vanofarira hurukuro pfupi dzakarekodwa

1935 Mune imwe hurukuro yekokorodzano paWashington, D.C., pana May 31, “vazhinjizhinji” vanozivikanwa seboka rapasi; vanhu 840 vanobhapatidzwa paiyi kokorodzano; tariro youpenyu husingagumi muparadhiso yapasi nokuda kwavabatiri vakatendeka vaMwari vari kurarama zvino inosimbiswa nenzira inofambira mberi

Nzvimbo yemisangano, kwenguva yokutanga, inodanwa kunzi Horo yoUmambo, muHonolulu, Hawaii

1936 Zvikwangwani zvokuzivisa zvinotanga kupfekwa navaparidzi voUmambo kuzivisa vanhu nezvehurukuro dzeBhaibheri

Kurudziro inopiwa yokutanga fundo navanhu vanofarira, vachishandisa bhuku reSosaiti rinonzi Riches pamwe chete neBhaibheri; idzodzi kazhinji kazhinji ifundo dzeboka

1937 Magiramufomu anotakurika anoshandiswa neZvapupu kuridza hurukuro dzeBhaibheri dzakarekodwa pamasitepisi chaipo emasuo emisha

1938 Gadziriro dzoubati ushe hwaMwari dzokusarudza vatariri muungano dzinotsiva miitiro yokusarudza kwevoruzhinji, mutsinhirano nechinyorwa chechiNgezi cheNharireyomurindi chaJune 1 necha15

Magungano ezoni (zvino anozivikanwa samagungano edunhu) anorongwa nokuda kwamapoka eungano

1939-45 MuUmambo hweBritain hwose neCommonwealth yeBritain, nyika 23 dzinorambidza Zvapupu zvaJehovha kana kuti dzinorambidza mabhuku azvo eBhaibheri

1940 Kuparadzirwa mumigwagwa kweNharireyomurindi neConsolation kunova rutivi rwenguva dzose rwomubato weZvapupu zvaJehovha

Chisarudzo cheDare Gurusa reUnited States, pana June 3, chaitsigira kukwazisa mureza kwokumanikidza pasinei zvapo nechitendero chorudzidziso chinoparira masimba masimba emhomho yomunyikayo mose mukurwisana neZvapupu zvaJehovha

1941 Zvapupu zvinoshingaira zvinopfuura 100 000, zvichisvika nhamba yapamusoro ye109 371 munyika 107, pasinei zvapo neidi rokuti Hondo Yenyika II yafukidza Europe uye iri kupararira muAfrica neAsia

1942 J. F. Rutherford anofa pana January 8, muSan Diego, California

N. H. Knorr anova purezidhendi wechitatu weSosaiti pana January 13

Hwerengedzo yokudhindwa kweNharireyomurindi nokuda kwegore racho mumitauro yose i11 325 143

Kosi Inofambira Mberi muUshumiri Hwoubati Ushe hwaMwari inotangwa nokuda kwavashandi vapadzimbahwe reSosaiti, pana February 16

Watch Tower Society inodhinda Bhaibheri rakazara, King James Version, pamuchina wokudhinda wayo imene (web rotary)

1943 Kirasi yokutanga yeWatchtower Bible School of Gilead inovamba kufunda kwayo pana February 1

Kosi muUshumiri Hwoubati Ushe hwaMwari (zvino inonzi Chikoro Choushumiri Choubati Ushe hwaMwari) yeungano dzeZvapupu zvaJehovha inosumwa pamagungano muna April

Dare Gurusa reUnited States rinoita zvisarudzo zvakanakira Zvapupu zvaJehovha mumhaka 20 kubva mu24; Dare Rapamusoro muAustralia rinobvisa chirambidzo paZvapupu imomo, pana June 14

1945 Kuvambira pana October 1, boka ravatungamiriri reSosaiti harichasarudzwi navavhoteri vanokwanirisa nemhaka yemipiro yemari

Avhareji yenhamba yefundo dzeBhaibheri dzapamusha dziri kuitiswa mwedzi mumwe nomumwe zvino yava 104 814

1946 Mukati memakore manomwe akatangireri, vanopfuura 4 000 veZvapupu zvaJehovha muUnited States uye 1 593 muBritain vakasungwa ndokutongerwa nhambo dzomutorongo dzaivambira pamwedzi mumwe kusvikira kumakore mashanu nemhaka yokusatora rutivi kwavo kwechiKristu

Muiri gore rokutanga pashure peHondo Yenyika II, 6 504 vari kugoverana mubasa renguva yakazara samapiyona

Magazini yeMukai! (mutsivi weThe Golden Age neConsolation) inovamba kubudiswa; hwerengedzo yokudhinda yemakopi 13 934 429 nokuda kwegore racho

Zvapupu zvinopfuura 470 zvinoendeswa pamberi pamatare muGreece nemhaka yokugoverana dzidziso dzeBhaibheri navamwe

1947 MuQuebec, Canada, mhaka 1 700 dzinobatanidza basa rokuparidza evhangeri reZvapupu zvaJehovha dzakamirira mumatare

Nhamba yeungano zvino inopfuura 10 000, ichisvika hwerengedzo ye10 782 munyika yose

1950 New World Translation of the Christian Greek Scriptures inobudiswa muchiNgezi, pana August 2, pakokorodzano muNew York

1953 Gadziriro huru yokurovedzwa kweZvapupu zvaJehovha mukuparidza paimba neimba inovamba, September 1

1957 Munyika 169, maawa 100 135 016 anopiwa neZvapupu zvaJehovha kukuzivisa Umambo hwaMwari nokuitisa fundo dzeBhaibheri dzapamusha vanhu vachangobva kufarira

1958 Gungano Ramarudzi Akawanda Rokuda kwaMwari, muNew York, rinokweva vapindi 253 922 vakabva munyika 123; vane 7 136 vanobhapatidzwa

1959 Marusando okutanga eChikoro Choushumiri hwoUmambo, achitanga pana March 9, kuSouth Lansing, New York, akagadzirirwa vatariri veungano navatariri vanofambira

1961 Boka rokutanga ravatariri vemapazu eSosaiti rinopinda kosi chaiyo yerovedzo yemwedzi gumi kuBrooklyn, New York, nomurangariro wokubatanidzwazve kwebasa reZvapupu zvaJehovha munyika yose

New World Translation of the Holy Scriptures, Bhaibheri rakazara muvhoriyamu imwe, inobudiswa muchiNgezi

1963 New World Translation of the Christian Greek Scriptures inobudiswa mumimwe mitauro mitanhatu (chiDutch, chiFrench, chiGerman, chiItalian, chiPutukezi, uye chiSpanish), nemimwe yaizouya mumakore apashure

Vanopfuura miriyoni imwe veZvapupu zvaJehovha zvino vanoshingaira munyika 198; nhamba yapamusoro yavaparidzi yegore racho i1 040 836; vamwe 62 798 vanobhapatidzwa

1965 Horo yeMagungano yokutanga, horo yemitambo yakagadziridzwa, inoshandiswa neZvapupu zvaJehovha muNew York

1967 Kutambudzwa kwenguva refu nekweutsinye kweZvapupu zvaJehovha kunopararira muMalawi uye kunopfuurira kwamakore akati pashure pacho

1969 Fundo dzeBhaibheri dzapamusha dzinopfuura miriyoni; mushumo unoratidza avhareji ye1 097 237

1971 Mutumbi Unodzora unokudzwa; pana October 1, usachigaro hunovamba kutenderera pakati pemitezo yawo pahwaro hwegore negore

1972 Ungano dzeZvapupu zvaJehovha dzinova mutarisiro yomunzvimbomo yomutumbi wavakuru, panzvimbo pomunhu mumwe, kuvambira pana October 1

1974 Nhamba yapamusoro yavaparidzi munyika yose inosvika 2 021 432; mapiyona anowedzera kubva pa94 604, muna 1973, kusvikira ku127 135

1975 Mutumbi Unodzora unorongwazve; pana December 4, mutoro webasa zhinji unogoverwa kumatare matanhatu, ayo anovamba kushanda pana January 1, 1976

1976 Mahofisi amapazu eWatch Tower Society imwe neimwe inova mutarisiro yedare ravarume vatatu kana kuti vanopfuura vakakura mumudzimu, panzvimbo pomutariri mumwe, kuvambira pana February 1

1977 Chikoro Chebasa Roupiyona chinovamba kugovera rovedzo chaiyo nokuda kwamakumi ezviuru zvamapiyona munyika yose

1984 Fundo dzeBhaibheri dzapamusha dziri kuitiswa neZvapupu zvaJehovha zvino dzinoita avhareji ye2 047 113

1985 Gadziriro yavazvipiri vamarudzi akawanda inotangwa, ichitsinhanisa iri padzimbahwe basa rokuvaka reSosaiti remunyika yose

Mushumo unoratidza 3 024 131 vanogoverana mubasa rokuparidza Umambo munyika 222; mapiyona zvino anoita avhareji ye322 821; 189 800 vakabhapatidzwa gore rino

1986 Matare Okuvaka Omunharaunda anogadzwa kubetsera kutsinhiranisa kuvakwa kweHoro dzoUmambo

1987 Basa rokuita vadzidzi rinopfuurira kukura, sezvo fundo dzeBhaibheri zvino dziri kuitwa navanhu vamwe navamwe 3 005 048 namapoka emhuri, dzakawanda vhiki nevhiki; kubhapatidzwa nokuda kwegore racho kunoita hwerengedzo ye230 843

Chikoro Chokurovedza Vashumiri chinotanga kushanda pana October 1, nekirasi yokutanga paCoraopolis, Pennsylvania

1989 Mamirire ezvinhu anochinja muEastern Europe anobetsera kuita kuti kokorodzano huru mbiri dzamarudzi akawanda dzibvire muPoland, uye ipapo mudzimwe nyika mumakore akatevera

1990 Kubviswa kweganhuriro paZvapupu zvaJehovha munyika dziri muAfrica neEastern Europe kunopfavisa kuparidzwa kweevhangeri pakati pavanhu vokuwedzera 100 000 000

Vaparidzi voUmambo vanosvika nhamba itsva yapamusoro ye4 017 213; mapiyona anowedzera kusvikira ku536 508; hwerengedzo yemaawa 895 229 424 inopiwa kubasa rekukurumidzira rokuziviswa kwoUmambo

1991 Zvirambidzo zvinobviswa muEastern Europe neAfrica zvinoita kuti kuve nyore kusvika vamwe vanhu vane 390 000 000 namashoko akanaka oUmambo hwaMwari

1992 Nharireyomurindi ine avhareji yokudhindwa ye15 570 000 mumitauro 111; Mukai!, inowanika mumitauro 67, ine avhareji yokubudiswa ye13 110 000

Uchapupu hukurusa hwati hwambopiwa, sezvo 4 472 787 vanogoverana mukuzivisa Umambo munyika 229; avhareji yomwedzi nomwedzi yamapiyona 605-610; maawa 1 024 910 434 anopiwa kukupupura pachena; fundo dzeBhaibheri 4 278 127 dzinoitiswa; vadzidzi vatsva 301 002 vanobhapatidzwa