Mibvunzo Inobva Kuvaravi

Maria uyo akava mai vaJesu akanga atova napamuviri here apo akashanyira hama yake yokunyama Erisabhete?

Hungu, iye sezviri pachena akanga anapo.

Muna Ruka ganhuro 1, tinotanga kurava pamusoro pokuva napamuviri kwaErisabhete, mudzimai womuprista Zekaria, uyo akabereka Johane (Mubhapatidzi). Apo Erisabhete akanga ari mu“mwedzi wechitanhatu mutumwa Gabrieri” akashanyira Maria kuti amuzivise kuti aizova napamuviri ndokubereka “Mwanakomana woWokumusoro-soro.” (Ruka 1:26, 30-33) Asi Maria akava napamuviri rini?

Nhauro yaRuka inopfuurira kurondedzera kuti Maria ipapo akaenda Judha kundoshanyira hama yake yokunyama yaiva napamuviri Erisabhete. Apo vakadzi vaviri vakasangana, mucheche aiva munhumbu yaErisabhete (Johane) akakwakuka. Erisabhete akanongedzera ku‘chibereko chenhumbu yaMaria,’ uye akadana Maria kuti “mai vaShe wangu.” (Ruka 1:39-44) Mhedziso ine mufungo naizvozvo ndeyokuti Maria akanga atonamba, kuti akanga ava napamuviri apo akaenda kunoona Erisabhete.

Ruka 1:56 inorava, kuti: “Maria akagara naye mwedzi inenge semitatu, akadzokera kumusha kwake.” Ndima ino haisi kupa kuverenga chaikwoikwo kusvikira kuzuva chairoiro rekarenda. Iyo inoti “mwedzi inenge semitatu,” uko kwaizoisa Erisabhete mumwedzi wake wechipfumbamwe wokuva napamuviri.

Pashure pokuva webetsero kuna Erisabhete mukati morutivi rwokupedzisira rwokuva kwake napamuviri, Maria akaenda kumusha kwake muNazareta. Sezvinobvira Maria akaziva kuti Erisabhete angobereka bedzi (Johane), kungava navashanyi vazhinji, vamwe vavo vachitova hama dzokunyama. Ikoko kwaigona kuva kwakaoma kana kuti kunonyadzisa nokuda kwomukadzi muduku asina kuroorwa uyo iye amene akanga ane pamuviri. Maria akanga ava nenguva refu sei ane pamuviri apo akaenda kuNazareta? Sezvo akanga aina Erisabhete “mwedzi inenge semitatu,” Maria zvimwe angava aive mukupedzisira kwemwedzi wechitatu kana kuti pakuvamba mumwedzi wechina wokuva kwake napamuviri apo akadzokera kuNazareta.