E enjte, 17 gusht
Të punojnë për të mirën, . . . që të rrokin jetën e vërtetë.
Si mund të përgatitemi që tani për jetën në botën e re të Perëndisë? Ta zëmë se po planifikojmë të transferohemi në një vend tjetër. Si të përgatitemi për këtë ndryshim? S’do të ishte keq të mësonim pak gjuhën dhe zakonet e atij vendi. Ndoshta mund të provojmë disa nga ushqimet tradicionale. Mund të jetojmë deri diku sikur të banonim atje. Në fund të fundit, kjo do të jetë jeta jonë kur të transferohemi. Po ashtu, mund të përgatitemi për jetën në botën e re duke jetuar që tani, me aq sa kemi në dorë, sikur të ishim në atë kohë. Edhe pse disa e shohin si gjë të lavdërueshme të jesh i pavarur e të mos heqësh dorë kurrsesi nga preferencat personale, kjo sjell pasoja të hidhura. Mospranimi i drejtimit të Perëndisë ka shkaktuar vuajtje, mjerim e madje tragjedi. (Jer. 10:23) Sa me padurim e presim kohën kur i gjithë njerëzimi t’i nënshtrohet sovranitetit të dashur të Jehovait! w15 15/
E premte, 18 gusht
Mos u futni nën të njëjtën zgjedhë me jobesimtarët.
Dëshmitarët beqarë që duan të martohen duhet të tregojnë akoma më tepër kujdes kur zgjedhin shoqërinë. Bibla i nxit të martohen «vetëm në Zotërinë» ata shërbëtorë të Perëndisë që kërkojnë shokun a shoqen e jetës. Kjo do të thotë të martohen vetëm me një adhurues të Jehovait të kushtuar e të pagëzuar që jeton sipas mësimeve biblike. (1 Kor. 7:39) Duke u martuar me bashkëbesimtarë, do të kenë në krah një shok a shoqe të kushtuar ndaj Jehovait, që do t’i ndihmojë t’i qëndrojnë besnikë Atij. Jehovai e di se ç’është më e mira për shërbëtorët e vet dhe nuk e ka ndryshuar kurrë pikëpamjen për martesën. Urdhri që i dha Izraelit nëpërmjet Moisiut ishte i qartë si drita e diellit. Ai u tha izraelitëve për banorët e kombeve përqark, të cilët nuk i shërbenin Jehovait: «Mos lidh krushqi me ta. . . . Sepse do t’i largonin bijtë e tu nga unë dhe ata do t’u shërbenin perëndive të tjera.»
E shtunë, 19 gusht
Të siguroheni për gjërat më të rëndësishme, në mënyrë që të jeni të patëmetë e të mos pengoni të tjerët.
Si mund ta stërvitim ndërgjegjen? Mënyrat kryesore janë: ta studiojmë rregullisht Biblën duke iu drejtuar Jehovait në lutje, të meditojmë dhe pastaj t’i zbatojmë gjërat që mësojmë. S’diskutohet, kjo nuk përfshin vetëm të grumbullojmë fakte e të mësojmë rregulla. Falë studimit të Biblës, dalëngadalë duhet të shohim një tablo gjithnjë e më të qartë të Jehovait, të personalitetit, të cilësive të tij dhe se çfarë i pëlqen e çfarë jo. Kështu, ndërgjegjja jonë bëhet më e ndjeshme ndaj udhëve të Perëndisë Jehova. Kjo duhet të na prekë e të na zgjojë në zemër dëshirën që t’i ngjajmë gjithnjë e më shumë. Megjithatë, nëse nuk e kuptojmë vendimin që ka marrë një bashkëbesimtar sipas ndërgjegjes së vet për një çështje personale, nuk duhet të ngutemi ta gjykojmë e as të mendojmë se duhet t’i bëjmë presion që të ndërrojë mendje. Ndoshta ndërgjegjja e tij është akoma ‘e dobët’ dhe i duhet ta stërvitë më tej, ose është tepër e ndjeshme për disa gjëra.