Jesosi bi abi tjalihati u sëmbë leti kuma hën Tata (Joh. 14:9). Dee soni dee a bi ta taki ku dee soni dee a bi ta du, bi ta lei taa hën Tata abi tjalihati u sëmbë, söseei taa a lobi de, nöö a kë heepi hiniwan u de u de kumutu a zöndu basu. Jesosi bi heepi sëmbë di bi du gaan zöndu u de ko abi di fii u bia du soni woto fasi, nöö de waka nëën baka (Luk. 5:27, 28). Jesosi bi saandi bi o pasa ku ën. Na wan kodo pasi nöö a bi piki dee bakama fëën taa de bi o sei ën, söseei taa de bi o pekëën kii a wan posu (Mat. 17:22; 20:18, 19). A bi sabi taa di dëdë fëën bi o puu zöndu a goonliba. Jesosi bi taki tu taa baka te a dëdë, nöö a „o sa hai hii pei föluku ko” nëën (Joh. 12:32). Sëmbë di bi du gaan zöndu bi sa mbei Jehovah wai ku de te de bi ta du soni u lei taa de ta biibi Jesosi, söseei te de bi ta mbei möiti u waka nëën baka. Te de bi ta du di soni dë nöö de bi o „ko fii kumutu a hogilibi basu” (Lom. 6:14, 18, 22; Joh. 8:32). Jesosi bi abi degihati, söseei a bi dë kabakaba u dëdë a wan hogihati fasi fuu sa ko fii.​—Joh. 10:17, 18. w24.08 bld. 5 pal. 11-12

Toona pakisei luku unfa i bi fii, di i bi ko sabi andi di Bëibel ta lei u tuutuu. I bi ko si taa di Tata fuu di dë a liba ala lobi i, söseei taa a kë fii ko dë wan u dee sëmbë u di wosudendu fëën. I bi ko si taa a paamusi u taa o tja wan kaba ko a fuka ku pena, söseei taa joo sa si fa dee sëmbë fii o weki ko a libi baka a di njunjun goonliba. Boiti di dë, i bi lei sömëni woto soni jeti (Maik. 10:29, 30; Joh. 5:28, 29; Lom. 8:38, 39; Ako. 21:3, 4). Dee soni dee i bi lei bi dou i hati seei (Luk. 24:32). I bi lobi de sö tee taa ja bi sa dë nöö ja konda soni u de da wotowan! (Luku Jelemia 20:9.) Te u lobi dee lei u Bëibel, nöö wa sa ta hoi de da wanwan. (Luk. 6:45) U ta fii kuma dee bakama u Jesosi fu awooten di bi taki taa: „Wa sa tjubi dee soni u wojo bi si ku dee u jesi bi jei” (Tjab. 4:20). U di u lobi di tuutuu lei gaanfa seei, mbei u kë konda soni fëën da hii dee sëmbë dee u sa. w24.05 bld. 15 pal. 5; bld. 16 pal. 7

U dee sëmbë u Jehovah ta peleiki da wotowan u di u lobi di Tata fuu a liba ala, söseei u di u kë heepi sëmbë u de ko sabi ën. Ma a ta taanga da so peleikima u du ën ku piizii. Faandi mbei? U di so u de ta sen gaanfa seei, söseei de ta si kuma de an saanfa u lei sëmbë soni. So u de an lo’ u go a sëmbë pisi söndö u de kai de. Wotowan ta fëëë taa sëmbë o gandji da de. A kan taa so u de an lo’ u du soni di sa mbei woto sëmbë hati boonu. A ta taanga da de dee baaa ku dee sisa aki u konda soni u di bunu buka da sëmbë di de an sabi. A ta taanga da i so juu u du di peleikiwooko ku piizii, u di i ta fii sö tu ö? Ee sö a dë, nöö na lasi hati. A kan taa di fii di i ta fii taa ja sa u lei sëmbë soni, ta lei taa i abi sakafasi, söseei taa ja kë sëmbë buta pakisei a i poi. A ta lei tu taa ja kë fia ku sëmbë. Na wan sëmbë lobi te de ta gandji dëën, möönmöön te a ta mbei möiti u du bunu soni da wotowan. Ma di Tata fii a liba ala sabi bumbuu unfa i ta fii, nöö a kë da i di heepi di i abi fanöudu.​—Jes. 41:13. w24.04 bld. 14 pal. 1-2