Lesine, May 14
Utawehlulela umhlaba ngekulunga, nebantfu abehlulele ngekwetsembeka kwakhe.—Hla. 96:13.
Jehova utalikhatimulisa njani libito lakhe esikhatsini lesitako? Utawehlulela. Ngekushesha utawubhubhisa iBhabhulona Lenkhulu ngenca yekutsi ihlambalate libito lakhe lelingcwele. (Semb. 17:5, 16; 19:1, 2) Labanye labatawubona nakubhujiswa iBhabhulona Lenkhulu kungenteka bacale kukhonta Jehova kanye natsi. Ekugcineni nge-Amagedoni, Jehova utawubhubhisa lelive laSathane, asuse bonkhe labamelene naye nalabahlambalata libito lakhe kodvwa asindzise bonkhe labo labamtsandzako, labamlalelako nalabakujabulelako kumnika ludvumo. (Mak. 8:38; 2 Thes. 1:6-10) Ngemuva kweluvivinyo lwekugcina lolutawulandzela Iminyaka Leyinkhulungwane Yekubusa KwaKhristu, Jehova utawube sekalingcwelise ngalokuphelele libito lakhe. (Semb. 20:7-10) Ngaleso sikhatsi, “umhlaba utawugcwala lwati lwenkhatimulo yaJehova njengemanti lagcwalisa lwandle.” (Hab. 2:14) Kutawuba yinjabulo lenkhulu ngesikhatsi Jehova akhatimulisa libito lakhe lelikufanele kunikwa ludvumo! w25.01 7 ¶15-16
Lesihlanu, May 15
Kufanele nicinisele ngobe lena yindlela leniyalwa ngayo.—Heb. 12:7.
Yini lebeyitawusita emaKhristu langemaHebheru kutsi abeketelele kuphatfwa kabi? Umphostoli Pawula bekati kutsi bekudzingeka abe nembono lokahle ngetinkinga tawo. Ngako wawachazela kutsi Nkulunkulu angahle avumele kukholwa kwemKhristu kutsi kuvivinyeke kuze acecesheke. Lokuceceshwa kungamsita umKhristu kutsi abe nebuntfu bebuKhristu lobubalulekile futsi abutfutfukise. Nangabe bekatawunaka umphumela loletfwa nguletinkinga, bekutawuba melula kutsi acinisele. (Heb. 12:11) Pawula wakhutsata lamaKhristu langemaHebheru kutsi abe nesibindzi futsi angapheli emandla nakabhekana netinkinga. Bekafanele kukusho loko. Njengobe bekake wawaphatsa kabi emaKhristu, bekayati indlela lebekatawuphatfwa kabi ngayo. Bekakwati nekubeketelela kuphatfwa kabi. Ngetulu kwako konkhe, waphatfwa kabi ngetindlela letehlukahlukene nasekangumKhristu.—2 Khor. 11:23-25. w24.09 12-13 ¶16-17
UMgcibelo, May 16
Hlalani nilindzile.—Mat. 25:13.
Kushona kwelilanga ngalinye kuwenta uphutfume kakhulu umsebenti wekushumayela. Kwentiwa yini loko? Ngobe sikhatsi sesiya ngekuphela. Cabanga ngaloko Jesu lakuphrofetha ngemsebenti wekushumayela kulamalanga ekugcina njengobe kubhalwe kuMakho 13:10. Ngekusho kwaMatewu, Jesu watsi tindzaba letimnandzi betitawushunyayelwa emhlabeni wonkhe ngaphambi kwekutsi “kuphela” kufike. (Mat. 24:14) Ligama lelitsi kuphela lisho kucedvwa ngalokuphelele kwelive lelibi laSathane. Jehova sewulibekile ‘lilanga neli-awa’ latawukwenta ngalo loku. (Mat. 24:36; Imis. 1:7) Lilanga ngalinye lisisondzeta kakhulu kuleso sikhatsi. (Rom. 13:11) Kodvwa njengobe kuphela kusengakefiki, kufanele sichubeke sishumayela. Njengobe senta umsebenti wekushumayela, sifuna kutibuta nangu umbuto lobalulekile: Yini leyenta sishumayele tindzaba letimnandzi? Kamelula nje, lutsandvo. Nasishumayela sikhombisa kutsi siyatitsandza tindzaba letimnandzi, siyabatsandza bantfu, futsi ngetulu kwako konkhe siyamtsandza Jehova kanye nelibito lakhe. w24.05 14-15 ¶2-3