Ha ho a lekana ho bolella bana ba hao feela se nepahetseng le se fosahetseng. O ka boetse wa ba thusa ho itlhahloba ka dipotso tse kang: ‘Ke hobaneng ha Bibele e re hanela ho etsa dintho tseo re bonang eka di monate? Ke hobaneng ha ke kgodisehile hore melao ya Bibele e tla ntswela molemo?’ (Esa. 48:17, 18) Motswadi o lokela ho thusa ngwana ya batlang ho kolobetswa hore a utlwisise boikarabelo ba ho ba Mokreste ya kolobeditsweng. Mohlomong motswadi a ka mo botsa dipotso tse kang: ‘Ho kolobetswa ho tla o tlisetla melemo efe? O lebelletse ho kopana le mathata afe? O tseba jwang hore melemo eo o tla e fumana e feta hole mathata ao o tla kopana le ona?’ (Mar. 10:29, 30) Ho hlakile hore motho o tla kopana le mathata ka mora ho kolobetswa. Ke ka hoo ho leng bohlokwa hore a nahanisise ka dipotso tsena pele a kolobetswa. Ha bana ba thuswa ho utlwisisa dintlha tsena ka botebo, seo se tla ba thusa hore ba kgodisehe ka seo ba se dumelang. Ba tla kgodiseha hore ho latela melao ya Bibele ho tla ba tswela molemo ka dinako tsohle. w17.12 21 ¶14-15

Ba bangata ba lona bara le baradibabo rona ba ratehang le tshwarane le bothata ba ho kula. Athe ba bang le hoja le bona ba se ba ile dilemong, ba ntse ba hlokometse beng ka bona ba hodileng. Ka lehlakoreng le leng, ba bang bona ha ba kgone ho hlokomela malapa ka ditlhoko. Haeba Jehova a bontsha thahasello dinthong tse sa pheleng jwalo ka dinaledi, re ka inahanela feela hore na rona o re rata hakakaang, jwalo ka ha re mo sebeletsa ka ho rata! (Pes. 19:1, 3, 14) Ntate wa rona Jehova o tseba ntho e nngwe le e nngwe ka rona. O tseba le palo ya “moriri wa dihlooho” tsa rona. (Mat. 10:30) Bibele e re Jehova o tseba mathata ao batho “ba se nang molato” ba fetang ho ona. (Pes. 37:18) Ee, o tseba mathata ao o tobaneng le ona mme o tla o fa matla a hore o kgone ho a mamella. w18.01 7 ¶1; 8 ¶4

Taba ya hore ebe Petrose o ile a tsosa Tabitha e ile ya ama batho mme “ba bangata ya ba badumedi ho Morena.” Ba ile ba qala ho rorisa Morena le ho paka hore Jehova o kgona ho tsosa bafu. (Lik. 9:36-42) Ho na le tsoho e nngwe hape e ileng ya etsahala ha morao. Moapostola Pauluse o ne a fana ka puo sebokeng se neng se tshwaretswe mokatong wa boraro wa ntlo motseng wa Troase, oo hona jwale e seng e le karolo e ka leboya bophirima ya naha ya Turkey. O ile a bua ho fihlela hara mpa bosiu. Mohlankana e mong ya bitswang Eutikase o ne a mametse a dutse pela fenstere. Empa a kgaleha yaba o wela ka ntle ka fenstere mme a otlana fatshe. Ho ka etsahala hore ebe Luka, eo e neng e le ngaka, o ile a fihla pele ho Eutikase. Luka o tlaleha hore Eutikase o ne a sa lemala feela, empa o ne a hlokahetse! Pauluse o ile a theohela fatshe, a fihla a inama hodima setopo, yaba o makatsa batho ha a re: ‘O a phela.’ E tlameha ebe mohlolo oo o ile wa ama ba neng ba le teng hakakaang! Ke ka hoo Bibele e reng ba ile ba “tshediseha ho feta tekanyo.”—Lik. 20:7-12. w17.12 5 ¶10-11