Jobo

18 Bildade Moshuha a araba a re:

 2 “Le tla qeta ho bua ka mor’a nako e telele hakae?

Le lokela ho utloisisa, e le hore ka mor’a moo re ka bua.

 3 Ke hobane’ng ha re lokela ho nkoa re le liphoofolo+

Re nkoe re sa hloeka mahlong a lōna?

 4 O rusolla moea oa hae likoto bohaleng ba hae.

Na lefatše le tla tloheloa ka lebaka la lōna,

Kapa lefika le tlohe sebakeng sa lona?

 5 Le leseli la ba khopo le tla tima+

Tlhase ea mollo oa hae e ke ke ea khanya.

 6 Ka sebele leseli le tla fifala ka tenteng+ ea hae,

Lebone la hae le tla tingoa ka ho eona.

 7 Mehato ea hae e mahlahahlaha e tla patisana.

Esita le morero oa hae o tla mo lahla.+

 8 Etsoe maoto a hae a tla mo kenya ka har’a letlooa,

O tla tsamaea letanteng.+

 9 Sefi se tla mo tšoara serethe;+

Leraba+ le ntse le mo tšoere.

10 O patetsoe thapo mobung,

O patetsoe sefi tseleng ea hae.

11 Ho pota-pota ka hohle, ka sebele matšabeho a tšohanyetso a etsa hore a qale ho tšoha,+

A mo lelekisa maotong a hae.

12 Mahlahahlaha a hae aa fela,

Koluoa+ e ema e loketse ho etsa hore a hlotse.

13 E tla ja likotoana tsa letlalo la hae;

Letsibolo la lefu le tla mo ja matsoho le maoto.

14 Kholiseho ea hae e tla tlosoa tenteng+ ea hae

A tla mo isa ho marena a matšabeho.

15 Ka tenteng ea hae ho tla lula ntho eo e seng ea hae;

Sebabole+ se tla hasanngoa sebakeng sa hae sa bolulo.

16 Metso ea hae e tla omella+ ka tlaase,

Holimo, lekala la hae le tla pona.

17 Ho boleloa ha hae ho tla timela lefatšeng,+

A ke ke a ba le lebitso seterateng.

18 Ba tla mo sutumeletsa lefifing a tsoa leseling,

Ba tla mo leleka naheng e behang.

19 A ke ke a ba le litloholo le bana har’a batho ba habo,+

Ho ke ke ha e-ba le mophonyohi sebakeng seo a lulang ho sona ka bojaki.

20 Batho ba Bophirimela ba tla sheba letsatsi la hae ka ho makala,

Ka sebele batho ba Bochabela ba tla tšoaroa ke ho tlakasela.

21 Tsena feela ke litabernakele tsa mofosi,

Sena ke sebaka sa ea sa kang a tseba Molimo.”