Jobo

30 “Joale ba ntšehile,+

Ba banyenyane ho ’na ka matsatsi,+

Bao bo-ntat’a bona nka beng ke hanne

Ho ba beha le lintja tsa mohlape oa ka.

 2 Esita le matla a matsoho a bona—a ne a e-na le thuso efe ho ’na?

Ba feletsoe ke mahlahahlaha.+

 3 Ha ba na thuso ka lebaka la bohloki le tlala,

Ba kokona sebaka se se nang metsi,+

Moo maobane ho neng ho e-na le sefefo le lesupi.

 4 Ba ne ba kha setlama sa letsoai lihlahleng,

Metso ea lihlahla tsa lefielo e ne e le lijo tsa bona.

 5 Ba ne ba lelekoa motseng;+

Batho ba ne ba ba hoeletsa joalokaha eka ba hoeletsa lesholu.

 6 Ba lokela ho lula letsoapong la liphula tsa melapo e phoroselang,

Likoting tse fatše le mafikeng.

 7 Ba ne ba hooa har’a lihlahla;

Ba ne ba iketsa seqhoqho tlas’a bobatsi.

 8 Bara ba ea se nang kelello,+ le bara ba ea se nang lebitso,

Ba otliloe hore ba tsoe naheng.

 9 Joale ke fetohile sehlooho sa pina+ ea bona,

’Na ke sesomo+ ho bona.

10 Ba ntlhoile, ba luleletse hōle le ’na;+

Ha ba ithibe hore ba se ke ba ntšoela ka mathe.+

11 Etsoe o ile a lokolla khoele ea seqha sa ka ’me a nkokobetsa,

Ba tlohetse tōmo e lokolotsoe ka lebaka la ka.

12 Ba tsoha joaloka malinyane ka letsohong la ka le letona;

Ba tlohetse maoto a ka hore a tsamaee,

Empa ba nkahetse mekoallo+ ea bona e bakang koluoa.

13 Ba qhaqhile litsela tsa ka;

Molemo oa bona e bile tsietsi feela ho ’na,+

Ba se na mothusi leha e le ofe.

14 Ba ile ba tla joalokaha eka ba tsoa lekhalong le pharaletseng;

Ba hoholehile tlas’a sefefo.

15 Ke hlasetsoe ke matšabeho a tšohanyetso;

Ho ba seriti ha ka ho lelekisoa joaloka moea,

Poloko ea ka e fetile joaloka leru.

16 Joale moea oa ka oa tšoloha ka hare ho ’na;+

Matsatsi a mahloreho+ aa ntšoara.

17 Masapo+ a ka a phuntsoe bosiu ’me a tsoile ho ’na,

Bohloko bo nkokonang ha bo kokobele.+

18 Seaparo sa ka sea fetoha ka lebaka la matla a mangata;

Se ntlama joaloka molala oa seaparo sa ka se selelele.

19 O ntheoletse letsopeng,

Hoo ke iponahatsang ke le joaloka lerōle le molora.

20 Ke hoeletsa ho uena ho kōpa thuso, empa ha u nkarabe;+

Ke eme, e le hore u ka nkela hloko.

21 U iphetola hore u be ea sehlōhō ho ’na;+

U nkoetlela lehloeo ka matla a feletseng a letsoho la hao.

22 U mphahamisetsa moeeng, u mpalamisa oona;

Joale u nqhibilihisa ka molumo o lerata.

23 Etsoe kea tseba hore u tla etsa hore ke khutlele lefung,+

Le ntlong ea pokano bakeng sa e mong le e mong ea phelang.

24 Feela ha ho ea otlollang letsoho la hae khahlanong le qubu ea lithako,+

Leha e le hore ho ba le mohoo o kōpang thuso nakong ea ho felloa ha motho ke matla mabapi le lintho tseo.

25 Ka sebele ke lletse ea nang le letsatsi le boima;+

Moea oa ka o saretsoe ka lebaka la mofutsana.+

26 Le hoja ke letetse se molemo, empa leha ho le joalo ho ile ha tla bobe;+

Ka ’na ka letela leseli, empa ha tla botšo.

27 Mala a ka a ile a lubeha ’me ha aa ka a khutsa;

Ke ile ka tobana le matsatsi a mahloreho.

28 Ka tsamaea ke hlomohile+ ha ho se na khanya ea letsatsi;

Ka ema phuthehong, ka ’na ka hoeletsa ho kōpa thuso.

29 Ka fetoha mor’abo liphokojoe,

Le motsoalle oa malinyane a matšehali a mpshe.+

30 Letlalo la ka la ntšofala+ ’me la mumuha,

Masapo a ka a chesa ke ho oma.

31 Harepa ea ka ea e-ba ea ho siama feela,

Phala ea ka ea e-ba ea mantsoe a ba llang.