Tšenolo
9 Lengeloi la bohlano la letsa terompeta ea lona.+ Ka bona naleli+ e neng e oetse lefatšeng e tsoa leholimong, ’me ea fuoa senotlolo+ sa sekoti sa mohohlo.+ 2 Ea bula sekoti sa mohohlo, ’me mosi+ oa nyoloha ka sekoting joaloka mosi oa sebōpi+ se seholo, ’me letsatsi la fifatsoa,+ le oona moea, ke mosi oa sekoti. 3 Ho tsoa mosing litsie+ tsa tsoela lefatšeng; ’me tsa fuoa matla, matla a tšoanang le ao liphepheng+ tsa lefatše li nang le ’ona. 4 Tsa bolelloa hore li se ke tsa senya limela tsa lefatše kapa ntho leha e le efe e tala kapa sefate leha e le sefe, haese feela batho ba se nang tiiso ea Molimo liphatleng tsa bona.+
5 Litsie tsa nehoa hore li se ke tsa ba bolaea, empa hore ba hlokofatsoe+ ka likhoeli tse hlano, ’me tlhokofatso ea bona e ne e tšoana le tlhokofatso ea phepheng+ ha e loma motho. 6 Matsatsing ao batho ba tla batla lefu+ empa ho hang ba ke ke ba le fumana, ’me ba tla lakatsa ho shoa empa lefu le ntse le ba balehela.
7 Sebōpeho sa litsie se ne se tšoana le lipere+ tse lokiselitsoeng ntoa; ’me lihloohong tsa tsona ho ne ho e-na le ho bonahalang e le meqhaka e joaloka khauta, ’me lifahleho tsa tsona li ne li le joaloka lifahleho tsa batho,+ 8 empa li ne li e-na le moriri o kang moriri oa basali.+ Meno a tsona a ne a le joaloka a litau;+ 9 ’me li ne li e-na le litšireletso+ tsa sefuba tse joaloka litšireletso tsa sefuba tsa tšepe. Molumo oa mapheo a tsona o ne o le joaloka molumo oa likoloi+ tsa lipere tse ngata tse mathelang ntoeng.+ 10 Hape, li na le mehatla le metsu joaloka liphepheng;+ ’me mehatleng ea tsona ho na le matla a tsona a ho ntša batho kotsi ka likhoeli tse hlano. 11 Li na le morena ea li okametseng, lengeloi la mohohlo.+ Ka Seheberu lebitso la lona ke Abadone, empa ka Segerike lebitso la lona ke Apolione.+
12 Bomalimabe bo bong bo fetile. Bonang! Bomalimabe+ bo bong hape bo habeli boa tla ka mor’a lintho tsena.
13 Lengeloi+ la botšelela la letsa terompeta ea lona.+ Ka utloa lentsoe+ le leng le tsoang manakeng a aletare+ ea khauta e ka pel’a Molimo 14 le re ho lengeloi la botšelela, le neng le e-na le terompeta: “Tlamolla mangeloi+ a mane a tlamiloeng+ nōkeng e khōlō ea Eufrate.”+ 15 Mangeloi ao a mane a tlamolloa, a lokiselitsoeng hora le letsatsi le khoeli le selemo, hore a bolaee karolo ea boraro ea batho.
16 Palo ea mabotho a bapalami ba lipere e ne e le limiriade tse peli tsa limiriade: Ke ile ka utloa palo ea ’ona. 17 Ona ke mokhoa oo ka oona ke ileng ka bona lipere ponong, le ba li palameng: ba ne ba e-na le litšireletso tsa sefuba tse bofubelu ba mollo le boputsoa ba hyasinthe le bosehla ba sebabole; lihlooho tsa lipere li ne li le joaloka lihlooho tsa litau,+ ’me melomong ea tsona ho ne ho tsoa mollo le mosi le sebabole.+ 18 Karolo ea boraro ea batho e ile ea bolaoa ka likotlo tsena tse tharo, ka mollo le mosi le sebabole se neng se tsoa melomong ea tsona. 19 Etsoe matla a lipere a melomong ea tsona le mehatleng ea tsona; kaha mehatla ea tsona e joaloka linoha+ ’me e na le lihlooho, ’me li ntša kotsi ka eona.
20 Empa batho ba bang kaofela ba sa kang ba bolaoa ke likotlo tsena ha baa ka ba bakela mesebetsi ea matsoho a bona,+ e le hore ba se ke ba rapela bademona+ le litšoantšo tse rapeloang tsa khauta le silevera+ le koporo le lejoe le lehong, tse ke keng tsa bona kapa tsa utloa kapa tsa tsamaea;+ 21 ’me ha baa ka ba bakela lipolao+ tsa bona kapa liketso tsa bona tsa ho sebelisana le meea+ kapa bohlola ba bona kapa bosholu ba bona.