Jeremia
18 Ana ke mantsoe ao Jehova a ileng a a bolella Jeremia: 2 “Ema, u theohele ntlong ea sebopi+ ’me ke tla u bolella mantsoe a ka moo.”
3 Kahoo, ka theohela ntlong ea sebopi ’me se ne se bopela holim’a mabili. 4 Empa sejana seo sebopi se neng se se etsa ka letsopa se ile sa senyeha ka letsohong la sona. Eaba sebopi se bopa letsopa leo, se etsa sejana se seng ka tsela eo se batlang.*
5 Jehova a re ho ’na: 6 “‘Na nka hloleha ho etsa ka lona kamoo sebopi se entseng ka letsopa, lona ba ntlo ea Iseraele?’ ke Jehova ea chong. ‘Bonang! Joaloka letsopa letsohong la sebopi, le lona le joalo letsohong la ka, lona ba ntlo ea Iseraele.+ 7 Neng kapa neng ha nka bua ka ho fothola, ho liha le ho senya sechaba kapa ’muso+ 8 ebe sechaba seo se tlohela bokhopo ba sona boo ke buileng ka bona, ke tla fetola maikutlo* ka tlokotsi eo ke neng ke rerile ho se tlisetsa eona.+ 9 Empa neng le neng ha ke bua ka ho haha le ho hloma sechaba kapa ’muso 10 ebe se etsa lintho tse fosahetseng mahlong a ka ’me ha se ’mamele, ke tla fetola maikutlo* ka molemo oo ke neng ke rerile ho se etsetsa oona.’
11 “Ke kopa u re ho banna ba Juda le ho baahi ba Jerusalema: ‘Jehova o re: “Ke ntse ke hlophisa* tlokotsi le ho nahana hore na ke tla le fa kotlo e joang. Ke kopa le furalle litsela tsa lona tse mpe ’me le lokise litsela tsa lona le litloaelo tsa lona.”’”+
12 Empa ba re: “Ha ho na thuso.+ Re tla latela menahano ea rona ’me e mong le e mong ka manganga o tla latela pelo ea hae e mpe.”+
13 Ka hona Jehova o re:
“Ka kopo, ipotsetseng har’a lichaba.
Ke mang ea utloileng ntho e kang ee?
Moroetsana oa Iseraele o entse ntho e tšabehang haholo.+
14 Na lehloa la lithaba tsa Lebanone lea qhibiliha mafikeng a tsona?
Kapa na metsi a pholileng a phallang a hlaha hole a ka psha?
15 Empa batho ba ka ba ntebetse.+
Ba etsetsa litšoantšo tse se nang thuso mahlabelo*+
Ebile ba kheloha litsela tsa bona, litsela tsa khale+
Hore ba tsamaee litseleng tse ka thoko tse sa batallang le tse tletseng makukuno*
16 E le ho etsa hore naha ea bona e be ntho e tšosang+
Le e letsetsoang mololi ho ea ho ile.+
E mong le e mong ea fetang pel’a eona o tla sheba a tšohile ’me a sisinye hlooho.+
17 Ke tla ba hasanya ka pel’a sera joalokaha moea oa bochabela o hasanya.
Ke tla ba furalla, ke ba patele sefahleho sa ka,* ka letsatsi la koluoa ea bona.”+
18 Eaba ba re: “Tloong, re etsetseng Jeremia ’mommori+ etsoe baprista ba rona ke bona ba tla tsoela pele ho re tsebisa molao,* ke banna ba bohlale ba tla re eletsa le baprofeta ba tla tsoela pele ho re bolella lentsoe. Tloong ’me re mo qose,* re se ke ra mamela hore na o re’ng.”
19 ’Mamele Jehova,
U utloe hore na bahanyetsi ba ka ba re’ng.
20 Na botle bo lokela ho buseletsoa ka bobe?
Ba chekile sekoti e le hore ba mpolaee.+
Hopola kamoo ke neng ke eme ka pel’a hao ho ba buella hantle
Hore u se ke oa ba halefela.
E se eka basali ba bona ba ka shoeloa ke bana le ke banna.+
E se eka banna ba bona ba ka bolaoa ke lefu la seoa le kotsi,
Bahlankana ba bona ba bolaoe ka sabole ntoeng.+
22 Ho ke ho utloahale sello ka matlung a bona,
Ha u ba tlisetsa sera ho ba futuhela ba sa lebella
Hobane ba chekile sekoti hore ba nkhape,
Ba nchehetse leraba hore ba ntšoase.+
U se ke oa tšoarela phoso ea bona
’Me u se ke oa iphapanyetsa sebe sa bona.