Kamoo U ka Fumanang Lerato la Sebele

U ka etsa’ng hore u fumane lerato le ho ba motho ea ratehang, eseng feela leratong la batho ba babeli ba ratanang? Na u lokela ho ba morui? Na u lokela ho ntlafatsa ponahalo ea hao?

BA LAHLILOE ke tsa papatso le ho susumetsoa ke mecha ea litaba, hangata banna le basali ba ipehela lipakane tseo bakeng sa ho fumana lerato. Ke ’nete hore ke tlhaho ebile ho nepahetse hore re tsotelle tsela eo re shebahalang ka eona, empa botle—boo hangata e leng ntho ea nakoana—hase bona bo etsang hore batho ba tlamahane ka thata. Leruo le lona ha le etse seo. Ntho e thusang ke hore u bontše lerato le se nang boithati ho ba bang. Jesu o ile a ruta: “Itloaetseng ho fana, ’me batho ba tla le fa.” (Luka 6:38) Ka mantsoe a bonolo feela, haeba u batla ho ratoa, e-ba le lerato.

Re ka etsa seo joang? Ha a ngola tlas’a tataiso ea moea o halalelang oa Molimo, moapostola Pauluse o ile a araba potso eo. O ile a senola hore lerato le matla, ’me ha le bonahale ka maikutlo, empa le bonahala ka seo le se etsetsang ba bang le ka seo le qobang ho se etsa. Hlokomela mantsoe a Pauluse: “Lerato lea tiisetsa ’me le mosa. Lerato ha le boulele, ha le ithorise, ha le ikhohomose, ha le itšoare ka mokhoa o sa hlompheheng, ha le batle lithahasello tsa lona, ha le halefe. Ha le boloke tlaleho ea bobe. Ha le thabele ho se loke, empa le thabela ’nete. Le jara lintho tsohle, le lumela lintho tsohle, le tšepa lintho tsohle, le mamella lintho tsohle.”—1 Bakorinthe 13:4-7.

U ikutloa joang ha motho a u bontša mosa kapa a u amohela ho sa tsotellehe lintho tse fokolang tse khopisang tseo u ka li buang kapa ua li etsa? Na ha u khahloe ke motho eo ka botšepehi a amehileng ka uena, ea sa halefeng habonolo ’me a tšoarela a bile a tšepahala le hoja ho tšoarela le botšepehi e se lintho tse bonolo?

Joale etsa joalo ho ba bang. Jesu o itse: “Ka hona, lintho tsohle tseo le batlang hore batho ba le etse tsona, le lōna ka ho tšoanang le ba etse tsona.” (Matheu 7:12) Ha ho bonolo kamehla ho bontša lerato, empa ho etsa boiteko ba ho le bontša hoa putsa. U tla ratoa haholoanyane ke ba lelapa la hao, metsoalle, molekane oa hao kapa motho eo u tl’o nyalana le eena. Hape, u tla ba le thabo ha u etsa se nepahetseng, ha u itella batho ba bang. Ruri “ho fana ho tlisa thabo e khōlō ho feta ho amohela.”—Liketso 20:35.

Ithute Lerato ho Ea Phahameng ka ho Fetisisa

Jehova ke Molimo ea lerato, ke eena ea phahameng ka ho fetisisa ha ho tluoa tabeng ena. (1 Johanne 4:8) Lerato la hae le mo susumelletsa hore a rute tšobotsi ena ho bohle ba ikemiselitseng ho ruteha. Nahana ka mehlala e ’maloa ea melao-motheo ea Bibele e re thusang ho rata le ho ratoa.

‘Potlakela ho utloa, u liehe ho bua.’ (Jakobo 1:19) Phuputso e entsoeng banyalaning ba 20 000 e bontšitse hore ba thabileng ka ho fetisisa ke bao balekane ba bona e leng ba tsebang ho mamela. Puisano e ntle ke ea bohlokoa kamanong eo batho ba nang le eona. Moprofesa oa thuto ea kahisano o ngotse: “Haeba u batla ho ikutloa eka u lahlehile, e-ba le kamano le motho ea se nang le leselinyana la hore na u tlas’a boemo bofe bo thata. Kapa ho hobe le ho feta, e-ba le kamano le motho ea tsebang hore na u tlas’a boemo bofe empa a sa utloisise hore na hantle-ntle u utloisoa bohloko ke eng hona moo.” O phaella ka hore esita le haeba batho ba babeli ba sa tšoane ka litsela tse ngata, “haeba molekane ka kutloelo-bohloko a ela hloko tsela eo u nkang lintho ka eona le lintho tse u hlahelang bophelong, joale le ho se tšoane hoo le nang le hona ha e be ntho e kaalo.”

“Le patisane hoo ho seng sebaka leratong la lōna le mofuthu. . . . Le atolohe.” (2 Bakorinthe 6:12, 13) Re rua molemo ha re atolosa lerato la rōna ho ba bang. Khatiso ea Sekolo sa Bongaka sa Harvard e re: “Liphuputso tse ngata li bontšitse hore batho ba nang le tšehetso e ntle bophelong—ke hore, ba nang le likamano tse ntle le ba lelapa, metsoalle le batho ka kakaretso—ba thabile, ha ba na maloetse a mangata-ngata ’me ba phela nako e telele.”

“A re nahanelaneng hore re susumeletsane leratong le mesebetsing e metle.” (Baheberu 10:24, 25) Re susumetsoa ke batho bao re tloaelaneng le bona. Ha u qeta nako le batho ba bontšang lerato la ’nete la Bokreste, u tla bona ha tšobotsi ena e sebelisoa ho uena ’me u tla ithuta hore na u ka e sebelisa joang bophelong. Lipaki Tsa Jehova li leka ka matla ho bontša lerato le joalo har’a tsona, kaha lia tseba hore ke letšoao le khethollang barutuoa ba ’nete ba Jesu. (Johanne 13:35) U tla amoheloa ka mofuthu ha u ea libokeng tsa bona tsa Bokreste.

Haeba u ikutloa u sa ratoe, u se ke ua nyahama kapa ua ikahlola hampe. Hopola hore Jehova o bona boemo boo u leng ho bona. Na u sa hopola Lea eane eo ho builoeng ka eena sehloohong se qalang? Jehova o ile a lemoha boemo boo a leng ho bona, ’me o ile a ba le bara ba tšeletseng le morali a le mong—tlhohonolofatso e khōlō mehleng eo ea ha bana ba ne ba nkoa e le letlotlo le tšabehang! Ho feta moo, bara bohle ba Lea e bile baholo-holo ba meloko ea Iseraele. (Genese 29:30-35; 30:16-21) E tlameha ebe kameho e lerato ea Molimo e ile ea tšelisa Lea hakaakang!

Lefatšeng le lecha leo Mangolo a le tšepisang, ha ho na motho ea tla ikutloa a sa ratoe. Ho e-na le hoo, batho kaofela ba tla ba le lerato la ’nete. (Esaia 11:9; 1 Johanne 4:7-12) Ka hona, a re bontšeng esale hona joale hore re batla ho ba moo, ka ho hlaolela lerato leo Bibele e rutang ka lona le le bontšitsoeng ke Mongoli oa eona. Ka sebele thabo ea ’nete ha ea itšetleha feela ka ho ratoa, empa e itšetlehile le ka ho rata ba bang ka tsela e se nang boithati.—Matheu 5:46-48; 1 Petrose 1:22.

[Ntlha e Qolotsoeng e leqepheng la 8]

“Ho fana ho tlisa thabo e khōlō ho feta ho amohela.”—Liketso 20:35

[Setšoantšo se leqepheng la 8]

Haeba u batla ho ratoa, e-ba le lerato