Botona kapa Botšehali

Tlhaloso: Litho tsa libopuoa tsa lefatšeng tse sebeletsang e le mokhoa oa ho ikatisa ka ho kopana hoa batsoali ba babeli. Ho se tšoane pakeng tsa ba batona le ba batšehali ho na le liphello tse tebileng haholo bophelong ba batho. Kaha Molimo ka booona ke Mohloli oa bophelo hape kaha batho ba reretsoe ho bonahatsa litšobotsi tsa oona, matla a ho fetisa bophelo ka likamano tsa botona le botšehali a lokela ho tšoaroa ka hlompho e khōlō.

Na Bibele e ruta hore likamano tsa botona le botšehali ke sebe?

Gen. 1:28: “Molimo oa ba [Adama le Eva] hlohonolofatsa, ’me Molimo oa re ho bona: Ngatafalang, le ate, le tlale lefatšeng.” (Ho phethahatsa taelo ena ea bomolimo ho ne ho tla ba hloka hore ba be le likamano tsa botona le botšehali, na ha ho joalo? Ho etsa joalo e ne e ke ke ea e-ba sebe empa ho ne ho tla ba tumellanong le morero oa Molimo oa hore ho tlatsoe lefatše ka baahi. Batho ba bang ba ’nile ba nahana hore ‘tholoana e hanetsoeng’ Edeneng mohlomong e ne e le puo ea tšoantšetso feela thibelong ea bomolimo ea likamano tsa botona le botšehali ho Adama le Eva. Empa hoo ho hanana le taelo ea Molimo e boletsoeng kaholimo. Hape ho hanana le ’nete ea hore, le hoja Adama le Eva ba ile ba e-ja tholoana e hanetsoeng Edeneng, lekhetlo la pele leo ka lona ho boleloang hore ba bile le likamano tsa botona le botšehali ke kamor’a hore ba lelekoe Edeneng.—Gen. 2:17; 3:17, 23; 4:1.)

Gen. 9:1: “Eaba Molimo o hlohonolofatsa Noe le bara ba hae, oa re ho bona: Atang, le ngatafale, le tlale lefatšeng.” (Tlhohonolofatso ena e tsoetseng pele, hammoho le ho phetoa hoa taelo ea bomolimo ea ho ikatisa, e fanoe kamorao ho Moroallo oa lefatše oa mehleng ea Noe. Maikutlo a Molimo a ne a ntse a sa fetoha mabapi le likamano tsa botona le botšehali tsa molao.)

1 Ba-Kor. 7:2-5: “Ka baka la ho tšaba bofebe, monna ka mong a be le mosali eo e leng oa hae, le mosali ka mong a be le monna eo e leng oa hae. Monna a nee mosali seo e leng tšoanelo, le mosali a etse joalo ho monna oa hae. . . . Le se ke la timana, ha e se ka tumellano, ka nako e itseng, . . . Satane a tle a se ke a le leka ka takatso ea lōna.” (Ho bontšoa hore ho phoso ke bofebe, e seng likamano tsa botona le botšehali tse loketseng pakeng tsa monna le mosali.)

Na likamano tsa botona le botšehali pele ho lenyalo li fosahetse?

1 Ba-Thess. 4:3-8: “Ho rata ha Molimo ke hore . . . le tšabe bofebe, le hore e mong le e mong ho lōna a tsebe ho bolokela pitsa ea hae khalalelong le hlonephong, e seng litakatsong tse mpe, joale ka bahedene ba sa tsebeng Molimo. Hape, motho a se ke a hata ngoan’abo, leha e le ho mo senyetsa tabeng leha e le ’ngoe; hobane Morena ke mophetetsi oa ntho tsohle tse joalo, joale ka ha re se re kile ra le bolella pele ka komelo e tiileng. Hobane Molimo ha oa ka oa re biletsa litšileng, empa e le khalalelong. Ka baka leo, ea nyatsang tseo, ha a nyatse motho, empa o nyatsa Molimo, o kentseng le Moea oa oona o Halalelang ka ho lōna.” (Lentsoe la Segerike por·neiʹa, le fetoletsoeng e le “bofebe,” le bolela likamano tsa botona le botšehali pakeng tsa batho ba sa nyalanang, hape le likamano kathōko ho lenyalo ka lehlakoreng la batho ba lenyalong.)

Ba-Ef. 5:5: “Mofebi, leha a le mong, le ea litšila, le ea ratang leruo, e leng motho ea sebeletsang melimo ea bohata, ha ba na kabelo ’musong oa Kreste le Molimo.” (Hona ha ho bolele hore eo e kileng ea e-ba mofebi a ke ke a thabela mahlohonolo a ’Muso oa Molimo, empa o tlameha ho khaotsa ho phela ka tsela eo e le hore Molimo o ka mo amohela. Bona 1 Ba-Korinthe 6:9-11.)

Na Bibele e lumella hore batho ba phele hammoho joaloka monna le mosali ntle ho lenyalo la molao?

Bona maqephe 231, 232, tlas’a sehlooho “Lenyalo.”

Bibele e re’ng ka bosodoma?

Ba-Roma 1:24-27: “Molimo o ba lesitse ho sebetsa litšila, litakatsong tsa lipelo tsa bona, ba tle ba tlotlollane ’mele ea bona; . . . Molimo o ba neeletse litakatsong tse lihlong; hobane har’a bona basali ba fetotse mokhoa oa bona oa hlaho, ho etsa ka oo e seng oa hlaho. Ka mokhoa o joalo le bona banna ba lesitse ho etsa le mosali ka mokhoa oa teng, ’me ba chesitsoe ke ho lakatsana; banna ba etsa manyala le banna ba bang, ’me ba amohela ka ho bona moputso o loketseng bolahlehi ba bona.”

1 Tim. 1:9-11: “Molao ha oa etsetsoa ea lokileng, empa o etselitsoe ba khopo le ba hanang ho utloa, le ba hanang litaba tsa Molimo le baetsalibe, . . . le bafebi le basodoma . . . leha e le hofe le hofe ho furallanang le thuto ea pholoho, e leng ka Evangeli e khanyang ea Molimo o lehlohonolo.” (Bapisa Levitike 20:13.)

Juda 7: “Sodoma le Gomorrha, le metse e ka mathōko a teng, . . . ka ho khelohela ho batla nama esele; metse eo eohle e beiloe hore e be temoso, ha e ntse e le kotlong ea mollo o sa feleng.” (Lebitso Sodoma le fetohile motheo oa lentsoe “bosodoma,” le atisang ho hlalosa mokhoa oa ho re banna ba robale hammoho. Bapisa Genese 19:4, 5, 24, 25.)

Boikutlo ba Bakreste ba ’nete ke bofe ho ba nang le pale ea bosodoma?

1 Ba-Kor. 6:9-11: “Ha e le ba litšila, ha e le ba rapelang litšoantšo, ha e le babōki le bafebi, leha e le basodoma, . . . ba ke ke ba rua lefa la ’muso oa Molimo. ’Me ke seo ba bang ho lōna le neng le le sona; empa le hlatsoitsoe, empa le halalelitsoe, empa le beiloe ba lokileng ka lebitso la Morena Jesu, le ka Moea oa Molimo oa rōna.” (Ho sa tsotellehe bophelo bo joalo ba nakong e fetileng, haeba hona joale batho ba furalla mekhoa ea bona ea pele e litšila, ba sebelisa litekanyetso tse lokileng tsa Jehova, ’me ba lumela tokisetsong ea hae ea ho tšoarela libe ka Kreste, ba ka thabela ho ema ba hloekile kapel’a Molimo. Hoba ba bake, ba ka amoheloa ka phuthehong ea Bokreste.)

Bakreste ba ’nete baa tseba hore le tsona litakatso tse mpe tse metseng ka metso, ho akarelletsa tse ka ’nang tsa bakoa ke lefutso kapa tse bakoang ke ’mele kapa mabaka a tikoloho, hase pharela bakeng sa batho ba batlang ho khahlisa Jehova ka tieo. Ka tlhaho boikutlo ba batho ba bang bo phahame haholo. Mohlomong nakong e fetileng ba ne ba halefa ka bolokolohi; empa ho tseba thato ea Molimo, takatso ea ho mo khahlisa, le thuso ea moea oa oona li ba nolofaletsa ho hlaolela boitšoaro. Motho a ka ’na a lemalla tahi, empa, ka tšusumetso e nepahetseng, a ka ’na a tlohela ho noa ka hona a qoba ho fetoha letahoa. Ka ho tšoanang, motho a ka ’na a ikutloa a hoheloa ka matla ke batho ba batona kapa ba batšehali joaloka eena, empa ka ho ela hloko keletso ea Lentsoe la Molimo a ka lula a hloekile mekhoeng ea bosodoma. (Bona Ba-Efese 4:17-24.) Jehova ha a re lumelle hore re ’ne re nahane hore boitšoaro bo bobe ha bo hlile ha bo etse phapang ea letho; ka mosa empa e le ka tieo o re lemosa ka liphello tsa bona ’me o fana ka thuso e ngata bakeng sa ba batlang ho ‘hlobola botho ba khale le liketso tsa bona, ’me ba ikapese ka botho bo bocha.’—Ba-Kol. 3:9, 10, NW.

Na mohlomong pono ea Bibele mabapi le botona le botšehali e tsofetse ’me e thiba-thibela ka ho sa hlokahaleng?

1 Ba-Thess. 4:3-8: “Ho rata ha Molimo ke hore . . . le tšabe bofebe. . . . Ka baka leo, ea nyatsang tseo, ha a nyatse motho, empa o nyatsa Molimo, o kentseng le Moea oa oona o Halalelang ka ho lōna.” (Pono ea Bibele ka botona kapa botšehali hase ntho e iqapetsoeng feela ke batho ba itseng ba phetseng lilemong tse ngata tse fetileng. E tsoa ho ’Mōpi oa batho; e hlakisa se hlokoang e le hore motho a amohelehe ho eena; hape e fana ka tataiso e tlatsetsang malapeng a tsitsitseng le likamanong tse hahang le tse thabileng kantle ho lelapa. Ba sebelisang keletso ena ba itšireletsa maomeng a tebileng a boikutlo le maloetseng a nyonyehang a tsamaeang le boitšoaro bo bobe. Keletso ea Bibele e nakong haholo ha e tobana le litlhoko tsa ba batlang letsoalo le hloekileng ka pel’a Molimo le bophelo bo lokolohileng tsielehong e sa hlokahaleng.)

Haeba e Mong a Re—

‘Boikutlo ba hao ke bofe ka bosodoma?’

U ka ’na ua arabela: ‘Ke maikutlo a hlalosoang mona Bibeleng. Ke lumela hore seo e se buang ke sa bohlokoa ho feta pono leha e le efe ea motho, hobane hona ho re fa maikutlo a ’Mōpi oa batho. (1 Ba-Kor. 6:9-11) U tla hlokomela hore ba bang ho bao e bileng Bakreste e ne e le basodoma pele. Empa ka lebaka la lerato la bona ho Molimo, le ka thuso ea moea oa oona, ba ile ba fetoha.’

Kapa u ka re: ‘Ha ke arabela potso ea hao, nka re ke hlokometse hore ba bangata ba ikutloang hore tsela eo basodoma ba phelang ka eona e se ke ea suptjoa ka monoana, ha ba lumele hore Bibele ke Lentsoe la Molimo. Nke ke u botse hore na u talima Bibele e le eng?’ Haeba motho a hlile a ipolela hore o lumela Bibele, mohlomong u ka eketsa: ‘Bosodoma hase khang e ncha. Bibele e ngotse pono e sa fetoheng ea Jehova Molimo ka puo e hlakileng haholo. (Mohlomong u ka sebelisa taba e maqepheng a 114, 115.)’ Haeba motho a bolela hore o belaela hore Molimo o teng kapa a belaela Bibele, u ka eketsa: ‘Haeba Molimo o ne o le sieo, ka ho utloahalang re ne re ke ke ra ikarabella ho oona ’me kahoo re ne re tla phela kamoo re ratang. Ka hona potso ea sebele ke ena, Na Molimo o teng hona na ke phela ka lebaka la oona [hape, mohlomong, Na Bibele e bululetsoe ke Molimo]? (Sebelisa maikutlo a maqepheng a 329-336 kapa 54-63.)’