KHAOLO EA 56
Etsa Hore ho Lule ho E-na le Bonngoe ka Phuthehong
Ha re e-na le Bakreste-’moho re ikutloa joaloka Morena Davida ea ileng a re: “Bonang! Kamoo ho leng hotle le kamoo ho khahlisang kateng ha bara ba motho ba lula hammoho bonngoeng!” (Pesaleme ea 133:1) Ha ho iketsahalle feela hore ebe re na le bonngoe. Empa e mong le e mong oa rona o kenya letsoho hore bo be teng.
1. Ke’ng e ikhethang ka bahlanka ba Molimo?
Ha u ka ea libokeng naheng e ’ngoe, u tl’o ikutloa u phutholohile ebile u amohelehile le hoja u ka ’na oa se ke oa utloisisa puo e buuoang moo. Hobane’ng? Hobane re ithuta Bibele re sebelisa lingoloa tse tšoanang lefatšeng lohle. Hape re leka ka matla ho bontšana lerato. Ho sa tsotellehe hore na re lula hokae, kaofela ha rona re ‘ipiletsa lebitsong la Jehova, e le hore re mo sebeletse ka mahetla a bapileng’ kapa re momahane.—Sofonia 3:9.
2. U ka etsa’ng hore ho lule ho e-na le bonngoe?
“Le ratane ka matla haholo ho tloha pelong.” (1 Petrose 1:22) U ka sebelisa keletso ee joang? Sheba lintho tse ntle tseo batho ba bang ba li etsang eseng liphoso tsa bona. Ho e-na le hore u tloaelane feela le batho ba ratang lintho tseo u li ratang, leka ho tloaelana le bara le barali ba bo rona ba etsang lintho ka tsela e fapaneng le ea hao. Re ka boela ra sebetsa ka thata ho loantša maikutlo a khethollo ao e ka ’nang eaba re na le ’ona.—Bala 1 Petrose 2:17.a
3. U ka etsa’ng haeba ho bile le ho se utloane lipakeng tsa hao le Mokreste-’moho?
Le hoja re le bonngoeng, ha rea phethahala. Ka lebaka leo, ka linako tse ling re utloisana bohloko. Ke kahoo Lentsoe la Molimo le reng: “Tsoelang pele . . . le tšoarelana,” hape le re: “Joalokaha Jehova a ile a le tšoarela ka bolokolohi, le etse joalo le lona.” (Bala Bakolose 3:13.) Re utloisa Jehova bohloko hangata, leha ho le joalo oa re tšoarela. Kahoo o lebeletse hore le rona re tšoarele bara le barali ba bo rona. Ha u hlokomela hore u utloisitse motho e mong bohloko, etsa boiteko ba ho lokisa litaba le eena.—Bala Matheu 5:23, 24.b
ITHUTE LINTLHA TSE LING
Nahana hore na u ka etsa’ng hore u kenye letsoho hore ho be le khotso le bonngoe ka phuthehong.
U ka etsa’ng hore u bope khotso?
4. Qoba khethollo
Re batla ho rata bara le barali ba bo rona kaofela. Empa re ka ’na ra thatafalloa ke ho rata motho ea etsang lintho ka tsela e fapaneng le ea rona. Re ka thusoa ke’ng? Bala Liketso 10:34, 35 ebe le buisana ka lipotso tsena:
Jehova o amohetse batho ba mefuta eohle hore e be Lipaki tsa hae. Taba ee e lokela ho etsa hore u ikutloe joang ka batho ba etsang lintho ka tsela e fapaneng le ea hao?
Ke mefuta efe ea khethollo e teng sebakeng seo u lulang ho sona eo u batlang ho e qoba?
Bala 2 Bakorinthe 6:11-13 ebe le buisana ka potso ena:
U nahana hore u ka etsa’ng hore u rate bara le barali ba bo rona ba etsang lintho ka tsela e fapaneng le ea hao?
5. Tšoarela ka bolokolohi ’me u bope khotso
Jehova o re tšoarela ka bolokolohi le hoja ho se mohla a tla hloka hore re mo tšoarele. Bala Pesaleme ea 86:5 ebe le buisana ka lipotso tsena:
Jehova o re tšoarela haholo hakae?
Ke hobane’ng ha u ananela hore ebe oa re tšoarela?
Ke maemo afe a ka etsang hore ho be thata hore re utloane le batho ba bang?
Ke joang re ka etsisang Jehova ’me ra ba bonngoeng le bara le barali ba bo rona? Bala Liproverbia 19:11 ebe le buisana ka potso ena:
Haeba motho a u tena kapa a u utloisa bohloko, u ka etsa’ng hore u lokise boemo boo?
Ka linako tse ling re utloisa batho ba bang bohloko. Re lokela ho etsa’ng ha ho le joalo? Bapala VIDEO ebe le buisana ka potso e latelang.
Videong ee, morali oa bo rona o ile a etsa’ng hore a bope khotso?
6. Sheba lintho tse ntle tseo bara le barali beno ba li etsang
Ha re ntse re tloaela bara le barali ba bo rona, re hlokomela makhabane le mefokolo ea bona. Re ka etsa’ng hore re shebe makhabane a bona? Bapala VIDEO ebe le buisana ka potso e latelang.
Ke’ng e ka u thusang hore u shebe lintho tse ntle tseo bara le barali beno ba li etsang?
Jehova o sheba lintho tse ntle tseo re li etsang. Bala 2 Likronike 16:9a ebe le buisana ka potso ena:
Taba ea hore Jehova o sheba lintho tse ntle tseo u li etsang e etsa hore u ikutloe joang?
Esita le taemaneng e ntle u ntse u ka bona liphoso, empa e ntse e le ea boleng bo phahameng. Ka tsela e tšoanang, bara le barali ba bo rona kaofela ha baa phethahala empa ke ba bohlokoa ho Jehova
BATHO BA BANG BA RE: “Motho o lokela ho sebetsa ka thata pele nka mo tšoarela.”
Ke hobane’ng ha re lokela ho ikemisetsa ho tšoarela batho ba bang?
KAKARETSO
U ka etsa hore ho be le bonngoe ka phuthehong ka hore u tšoarele bara le barali beno le hore u ba rate kaofela.
Re Ithutile’ng?
U ka etsa’ng hore u se ke oa ba le khethollo?
U tla etsa’ng haeba ho bile le ho se utloane pakeng tsa hao le Mokreste-’moho?
Ke hobane’ng ha u batla ho etsisa mohlala oa Jehova ka hore u tšoarele batho ba bang?
BATLA
Bona kamoo e ’ngoe ea lipapiso tsa Jesu e ka u thusang kateng hore u se ke oa ahlola batho ba bang.
Na re lokela ho kopa tšoarelo le hoja re utloa eka ha ho na phoso eo re e entseng?
“Ho Kopa Tšoarelo ke Tsela e Atlehang ea ho Bopa Khotso” (Molula-Qhooa, November 1, 2002)
Hlokomela hore na batho ba bang ba thusitsoe ke’ng hore ba khaotse ho ba leeme.
Ithute hore na ke joang u ka rarollang bothata boo u nang le bona le motho e mong pele bo ka senya khotso ka phuthehong.
a Tlhaloso ea 6 e hlalosa kamoo lerato le etsang hore Bakreste ba qobe ho tšoaetsa batho ba bang haeba ba e-na le mafu a tšoaetsanoang.
b Tlhaloso ea 7 e hlalosa hore na u ka sebetsa litaba tsa molao kapa tsa khoebo joang.