Lebaka Leo ka Lona Sejo sa Morena sa Mantsiboea se Bolelang ho Hong ho Uena

JESU KRESTE o ile a theha Sejo sa Morena sa Mantsiboea bosiung ba ho qetela ba bophelo ba hae e le motho. E ne e le ka Labone mantsiboea, March 31, ’me Jesu o ile a shoa ka Labohlano motšehare oa mantsiboea, April 1. Kaha matsatsi a almanaka ea Sejode a ne a qala mantsiboea a letsatsi le leng ho ea ho a letsatsi le latelang, Sejo sa Morena sa Mantsiboea le lefu la Jesu li etsahetse ka Nisane 14, 33 C.E.

Ke ka baka la’ng ha Jesu a ile a theha sejo see? Bohobe le veine tseo a ileng a li sebelisa li emela eng? Ke bo-mang ba lokelang ho noa le ho ja? Sejo see se lokela ho jeoa khafetsa hakae? ’Me ke joang se ka bolelang ho hong ho uena?

Ke Hobane’ng ha se ile sa Thehoa?

Mabapi le Sejo sa Morena sa Mantsiboea, Jesu o ile a bolella baapostola ba hae: “Le ’ne le etse hoo, e le ho nkhopola.” Ho latela phetolelo e ’ngoe o itse: “Etsang sena e le sehopotso sa ka.” (1 Ba-Korinthe 11:24; The New English Bible) Ha e le hantle, hangata Sejo sa Morena sa Mantsiboea se bitsoa Sehopotso sa lefu la Kreste.

Jesu o ile a shoa e le ’moloki oa botšepehi ea phahamisang bobusi ba Jehova ’me kahoo a paka hore Satane ke mosomi ea leshano ha ka tieo a bolela hore batho ba lokileng ba sebeletsa Molimo ka mabaka a boithati feela. (Jobo 2:1-5) Lefu la hae le thabisitse pelo ea Molimo.—Liproverbia 27:11.

Hape ka lefu la hae e le motho ea phethahetseng, Jesu ‘o ile a nehela sephefumolohi sa hae e le thekollo ea ba bangata.’ (Mattheu 20:28, NW) Ka ho siteloa Molimo, motho oa pele o ile a lahleheloa ke bophelo bo phethahetseng ba botho le litebello tsa bona. Empa “Molimo o ratile lefatše [moloko oa batho] hakalo, o bile oa le nea Mora oa oona ea tsoetsoeng a ’notši, hore e mong le e mong ea lumelang ho eena, a se ke a timela, a mpe a be le bophelo bo sa feleng.” (Johanne 3:16) E, “moputso oa sebe ke lefu; empa neo ea mohau ea Molimo ke bophelo bo sa feleng, ka Jesu Kreste, Morena oa rōna.”—Ba-Roma 6:23.

“Ke Amohetse ho Morena”

Moapostola Pauluse o fane ka kutloisiso tabeng ea ho keteka lefu la Kreste ka mantsoe ana: “Ke amohetse ho Morena seo ke le neileng sona, ke hoba Morena Jesu, ka bosiu boo a ekiloeng ka bona, o na a nke bohobe; ’me hobane a lebohe, a bo ngoatha, a re: Nkang, le je; hona ke [“ho bolela,” NW] ’mele oa ka o robeloang lōna; le etse hoo, le tle le nkhopole ka hona. Ka mokhoa o joalo, a nka senoelo, hobane ho lalloe, a re: Senoelo sena ke [“se bolela,” NW] selekane se secha maling a ka; etsang hoo, ka mehla eohle ha le e-noa, le tle le nkhopole ka hona. Efela ka mehla eohle, ha le e-ja bohobe boo, ’me le noela senoelong seo, etlaba le bolela lefu la Morena, a tle a be a fihle.”—1 Ba-Korinthe 11:23-26.

Kaha Pauluse o ne a le sieo ka Nisane 14, 33 C.E. ha Jesu a e-na le baapostola ba 11, ho hlakile hore boitsebiso bona o bo “amohetse ho Morena” ka tšenolo e bululetsoeng. Jesu o ile a theha Sehopotso “ka bosiu boo a ekiloeng ka bona” ke Judase ho lira tsa hae tsa baeta-pele ba bolumeli ba Bajode, ba ileng ba susumeletsa Baroma hore ba khokhothele Kreste. Ba nang le tokelo ea ho ja bohobe le ho noa veine tsa tšoantšetso ba ne ba tla etsa joalo ka morero oa ho mo hopola.

Se Ketekoe Hangata Hakae?

Ke’ng se boleloang ke mantsoe a Pauluse: “Ka mehla eohle, ha le e-ja bohobe boo, ’me le noela senoelong seo, etlaba le bolela lefu la Morena, a tle a be a fihle”? Bakreste ba tšepahalang ba tlotsitsoeng ba ne ba tla noa le ho ja litšoantšetso tsa Sehopotso “ka mehla” ho fihlela ba shoa, hamorao ba tsosetsoa bophelong ba leholimo. Kahoo ka mehla ba ne ba tla bolela tumelo ea bona tokisetsong ea Jehova ea sehlabelo sa Jesu pel’a Molimo le lefatše. Ka nako e kae? Pauluse o itse “a tle a be a fihle,” ho totobetse hore o ne a bolela hore ho ketekoa hona ho ne ho tla tsoela pele ho fihlela ha Jesu a fihla bakeng sa ho amohela balateli ba hae ba tlotsitsoeng leholimong ka tsoho nakong ea “ho ba teng ha hae.” (1 Ba-Thessalonika 4:14-17, NW) Sena se tumellanong le mantsoe a Kreste ho baapostola ba tšepahalang ba 11: “Etlare ha ke se ke ile, ke le lokiselitse bolulo, ke tla boela ke boee, ke le nkele ho ’na, hore moo ’na ke leng teng, le lōna le be teng.”—Johanne 14:3.

Na lefu la Kreste le lokela ho ketekoa letsatsi le leng le le leng kapa mohlomong beke e ’ngoe le e ’ngoe? Ha e le hantle, Jesu o ile a theha Sejo sa Morena sa Mantsiboea ’me a bolaoa ka Paseka, e neng e le mokete oa sehopotso sa ho lokolloa ha Baiseraele botlamuoeng Egepeta. Ha e le hantle, o bitsoa “paseka ea rōna, e leng Kreste” hobane ke Konyana e entsoeng sehlabelo bakeng sa Bakreste. (1 Ba-Korinthe 5:7) Paseka e ne e ketekoa hanngoe feela ka selemo, ka Nisane 14. (Exoda 12:6, 14; Levitike 23:5) Sena se bolela hore sehopotso sa lefu la Jesu se lokela ho ketekoa ka mehla ka makhetlo a lekanang hantle le a Paseka—hanngoe ka selemo, eseng letsatsi le leng le le leng kapa beke e ’ngoe le e ’ngoe.

Ka lilemo tse makholo a mangata ba bangata ba ipolelang hore ke Bakreste ba ne ba keteka sehopotso sa lefu la Jesu hanngoe ka selemo. Hobane ba ne ba etsa sena ka Nisane 14, ba ne ba bitsoa ma-Quartodeciman, e leng se bolelang “baboloki ba letsatsi la leshome le metso e mene.” Mabapi le bona, rahistori J. L. von Mosheim o ile a ngola: “Bakreste ba Asia Minor ba ne ba tloaetse ho keteka mokete ona o halalelang, ka morero oa ho hopola ho thehoa ha sejo sa Morena sa mantsiboea, le lefu la Jesu Kreste, ka nako e tšoanang le eo ka eona Bajode ba neng ba ja konyana ea bona ea Paseka, e leng mantsiboeeng a letsatsi la bo14 la khoeli ea pele [Nisane]. . . . Ba ile ba hlokomela mohlala oa Kreste oo ba neng ba ikutloa ba tlameha ho o latela joaloka molao.”

Se Emeloang ke Litšoantšetso

Pauluse o boletse hore Jesu “o na a nke bohobe; ’me hobane a lebohe, a bo ngoatha.” Senkhoa seo se qhetsohang habonolo se entsoeng ka phoofo ea bohobe le metsi se sa kenngoang tomoso (kapa, yeast) se ne se lokela ho qhetsoloa bakeng sa ho jeoa. Ka tsela ea tšoantšetso ea Bibele, tomoso e emela sebe kapa tšenyeho. Pauluse ha a khothaletsa Bakreste ba Korinthe hore ba leleke motho ea itšoereng hampe phuthehong, o itse: “Na ha le tsebe hoba tomoso e nyenyane e hohomosa hlama kaofela na? A le ke le tlose ho lōna litomoso tsa khale, le tle le be hlama e ncha, ha e le moo le le ba sa lomosoang; hobane Paseka ea rōna, e leng Kreste, e hlabetsoe rōna. A re etseng mokete ke hona, e seng ka litomoso tsa khale, kapa ka litomoso tsa lonya le tsa bobe, e mpe e be ka mahobe a se nang litomoso, a khabane le a ’nete.” (1 Ba-Korinthe 5:6-8) Joalokaha hlama e nyenyane e bolila e belisa hlama kaofela, kapa tekanyo e itseng, ea bohobe, ka ho tšoanang phutheho e ne e ka ba litšila mahlong a Molimo haeba tšusumetso e silafatsang ea motho oa moetsalibe e ne e sa tlosoe. Ho ne ho hlokahala hore ba tlose “tomoso” ka har’a bona, hantle feela joalokaha Baiseraele ba ne ba ke ke ba ba le tomoso ka matlong a bona nakong ea Mokete oa Mahobe a sa Lomosoang o neng o latela Paseka.

Mabapi le bohobe ba Sehopotso bo sa lomosoang, Jesu o itse: “Hona ho bolela ’mele oa ka oo le o fuoang.” (1 Ba-Korinthe 11:24, NW) Bohobe bo emela ’mele oa Jesu oa nama o phethahetseng, oo Pauluse ha a ngola ka ’ona a itseng: “Mohla [Jesu] a tla tla lefatšeng, o itse: Ha ua ka ua rata sehlabelo, leha e le nyehelo, empa u ntokiselitse ’mele. Ha ua ka ua khahlisoa ke licheso le ke mahlabelo a etsoang ka baka la sebe.” Eaba ke re, “Bona, Molimo, ke tlile ho etsa thato ea hao; joale ka ha ho ngoliloe taba tsa ka bukeng. . . . Ke ka eona thato eo re halalelitsoeng ka sehlabelo sa ’mele oa Jesu Kreste se entsoeng hang.” (Ba-Heberu 10:5-10) ’Mele o phethahetseng oa Jesu o ne o se na sebe ’me o sebeletsa e le sehlabelo sa thekollo ea moloko oa batho.—Ba-Heberu 7:26.

Ka mor’a ho rapella senoelo sa veine e khubelu e sa lomosoang, Jesu o itse: “Senoelo sena ke [“se bolela,” NW] selekane se secha maling a ka.” (1 Ba-Korinthe 11:25) Phetolelo e ’ngoe e re: “Senoelo sena se bolela selekane se secha seo mali a ka a entseng hore se sebetse.” (Moffatt) Hantle feela joalokaha mali a lipoho le lipoli tse entsoeng sehlabelo a ile a etsa hore selekane sa Molao pakeng tsa Molimo le sechaba sa Iseraele se sebetse, ka ho tšoanang mali a Jesu a tšolotsoeng lefung a ile a etsa hore selekane se secha se sebetse. Taba ea hore ho buuoe ka selekane se secha e re thusa ho hlokomela batho ba loketseng ho ja litšoantšetso tsa Sehopotso.

Ke Bo-mang ba Lokelang ho Ja?

Ka ho loketseng balateli ba Jesu ba tlotsitsoeng, ba leng selekaneng se secha, ba ja litšoantšetso tsa Sehopotso. Selekane sena se entsoe pakeng tsa Molimo le Iseraele oa moea. (Jeremia 31:31-34; Ba-Galata 6:16) Empa qetellong selekane se secha se tla tlisa litlhohonolofatso molokong ’ohle oa batho ba utloang, ’me u ka ba har’a ba fumanang litlhohonolofatso tseo.

Ba jang litšoantšetso tsa Sehopotso ba lokela ho ba selekaneng sa botho sa ’Muso seo Jesu a ileng a se hloma. Ha Jesu a theha sejo sena, o ile a bolella baapostola ba hae ba tšepahalang: “Ke etsa selekane le lōna, feela joalokaha Ntate oa ka a entse selekane le ’na, bakeng sa ’muso.” (Luka 22:29, NW) Selekane sa ’Muso se entsoeng ke Molimo le Morena Davida se ne se supa pele ho tleng ha Jesu, ea neng a tla busa ka ho sa feleng ’Musong oa leholimo. Ba 144 000 ba Iseraele oa moea, ba tlang ho kopanela pusong le eena, ba hlalosoa ba le Thabeng ea Sione ba na le Konyana, Jesu Kreste. Ha ba se ba tsositsoe, ba tla busa hammoho le Kreste e le marena le baprista. (2 Samuele 7:11-16; Tšenolo 7:4; 14:1-4; 20:6) Ke feela ba leng selekaneng se secha le selekaneng sa botho le Jesu ba lokelang ho ja litšoantšetso tsa Sejo sa Morena sa Mantsiboea.

Moea oa Molimo o pakela moea oa batlotsuoa hore ke bana ba Hae le majalefa hammoho le Kreste. Pauluse o ile a ngola: ‘Le oona moea o emelana le moea oa rōna, hore re bana ba Molimo. ’Me ha re le bana, re majalefa: majalefa a Molimo, le majalefa hammoho le Kreste, ha re fela re utloa bohloko le eena, re tle re neoe khanya le eena.’ (Ba-Roma 8:16, 17) Moea o halalelang oa Molimo, kapa matla a sebetsang, o haha ka hare ho batlotsuoa tiisetso ea hore ba khethetsoe bophelo ba leholimo. Ba talima lintho tsohle tseo Mangolo a li buang ka bophelo ba leholimo e le tse tobisitsoeng ho bona ’me ba rata ho tela lintho tsohle tsa lefatše, ho akareletsa le bophelo ba botho. Le hoja bophelo Paradeiseng e tla ba bo hlollang, ha ba na tšepo eo. (Luka 23:43) Tšepo ea leholimo e tiileng le e ke keng ea fetoha e sa thehoang mehopolong ea bohata ea bolumeli e etsa hore e be ba tšoanelehang bakeng sa ho ja litšoantšetso tsa Sehopotso.

Jehova a ke ke a thaba haeba motho a ipolela hore o bitsitsoe ho ea ba morena le moprista leholimong a se na pitso e joalo. (Ba-Roma 9:16; Tšenolo 22:5) Molimo o ile a ahlola Kore ka baka la hore ka boikhohomoso a batle ho ba moprista. (Exoda 28:1; Numere 16:4-11, 31-35) Kahoo, ho thoe’ng haeba maikutlo a matla kapa likhopolo tsa bolumeli tseo motho a neng a na le tsona nakong e fetileng li ile tsa etsa hore ka phoso a je litšoantšetso tsa Sehopotso? Joale o lokela ho khaotsa ho ja ’me ka boikokobetso a rapele Molimo hore a mo tšoarele.—Pesaleme 19:13.

Kamoo u Amehang ka Teng

Ha ho hlokahale hore motho a je litšoantšetso tsa Sehopotso e le hore a ka fumana molemo sehlabelong sa Jesu sa thekollo le ho fumana bophelo bo sa feleng lefatšeng. Ka mohlala, Bibele ha e bontše hore batho ba tšabang Molimo joaloka Abrahama, Sara, Isaaka, Rebeka, Boaze, Ruthe le Davida ba tla ke ba je litšoantšetso tsena. Empa bona le bohle ba lakatsang bophelo bo sa feleng lefatšeng lena ba lokela ho sebelisa tumelo ho Molimo le Kreste le tokisetsong ea Jehova ea sehlabelo sa Jesu sa thekollo. (Johanne 3:36; 14:1) Sehopotso sa lefu la Kreste se ketekoang selemo le selemo se sebeletsa e le khopotso ea sehlabelo seo se seholo.

Bohlokoa ba sehlabelo sa Jesu bo ile ba bonahatsoa ha moapostola Johanne a re: “Ke le ngolla taba tseo, le tle le se ke la etsa sebe. Ekare ha motho a entse sebe, re na le moemeli pel’a Ntate: ke Jesu Kreste ea lokileng. Ke eena e leng pheko ea libe tsa rōna; e seng ea tsa rōna feela, empa e le le ea tsa lefatše lohle.” (1 Johanne 2:1, 2) Bakreste ba tlotsitsoeng ba ka bolela hore Jesu ke “pheko ea libe tsa [bona].” Leha ho le joalo, hape ke sehlabelo sa libe tsa lefatše lohle, se etsang hore ho be bonolo hore moloko oa batho ba utloang o phele Paradeiseng lefatšeng eo hona joale e leng haufi haholo!

Ka ho ba teng moketeng oa sehopotso sa lefu la Kreste, u tla rua molemo puong ea Bibele e susumetsang monahano. U tla hopotsoa hore na Jehova Molimo le Jesu Kreste ba re etselitse lintho tse ngata hakae. E tla ba ho putsang moeeng ho bokana le ba nang le tlhompho e tebileng ho Molimo le Kreste le bakeng sa sehlabelo sa Jesu sa thekollo. Ketsahalo ena e ka matlafatsa takatso ea hao ea ho amohela mosa o sa tšoanelang oa Molimo, o isang bophelong bo sa feleng. Re u mema ka pelo eohle hore u kopanele le Lipaki tsa Jehova ka mor’a hore letsatsi le likele ka April 6, 1993, bakeng sa sehopotso sa lefu la Jesu Kreste hobane Sejo sa Morena sa Mantsiboea se ka bolela ho hoholo ho uena.