Lipotso tse Tsoang ho Babali

Na e ka ba tšoanelo ho Mokreste ho kena khoebong le motho ea sa lumelang, kaha Bibele e re bolella hore: “Se sikareng joko e le ’ngoe le ba sa lumelang”?

Re fumana keletso eo ho 2 Ba-Korinthe 6:14-16: “Se sikareng joko e le ’ngoe le ba sa lumelang; hobane kopano ke efe ea ho loka le bokhopo? Kapa leseli le na le kopano efe le lefifi? Kreste o na le selekane sefe le Beliale? Kapa ea lumetseng o na le kabelo efe le ea sa lumelang? Tempele ea Molimo e na le tumellano efe le litšoantšo tse rapeloang?”

Ha ho na lebaka la ho lumela hore moapostola Pauluse o fane ka keletso ena ka sepheo sa ho theha lithibelo tse khethehileng, joaloka tsa ho ba khahlanong le ho ba ha Mokreste khoebong le motho ea sa lumelang. Leha ho le joalo, ruri keletso ea hae e ka tšoaneleha tabeng eo, haesita le likarolong tse ling tsa bophelo.

Pauluse o ngoletse baena ba hae ba Bakreste keletso eo Korinthe ea boholo-holo. Ho lula motseng oo ka ho khetheha o neng o senyehile, ba ne ba lokela ho hlōla boitšoaro le likotsi tsa moea letsatsi le letsatsi. Ntle le haeba ba ne ba ka ba hlokolosi, ho pepesehela litšusumetsong tse sa hloekang ho ne ho ka fokolisa hanyane ka hanyane boikemisetso ba bona ba ho ba sechaba se ikhethang, “morabe o khethiloeng, boprista ba borena, sechaba se halalelang, batho ba letlotlo le khethehileng.”—1 Petrose 2:9, NW.

Pele Pauluse a ngola se hlahang ho 2 Ba-Korinthe 6:14-16, o ne a ile a sebetsana le bothata bo tebileng har’a baena ba hae ba Korinthe. Ba ne ba lumeletse taba ea boitšoaro bo bobe bo tšabehang ho ba teng ka hare ho bona, kahoo Pauluse o ile a ba laela hore ba leleke, kapa ba khaole, moetsalibe ea sa bakeng. (1 Ba-Korinthe 5:1) Ketso e mpe ea motho eo e bontšitse hore litloaelano tse mpe kapa ho qoela ka mokhoa o sa sireletsehang boitšoarong bo tšabehang tikolohong ea lefatše ea boitšoaro ho ka ama Bakreste.

Bakreste ba Korinthe ba ne ba lokela ho qoba litloaelano le motho ea lelekiloeng, empa na seo se ne se bolela hore ba ne ba lokela ho ikarola ka ho feletseng bathong ba sa lumelang? Na ba ne ba lokela ho qoba hoo e batlang e le likamano tsohle kapa litšebelisano le bao eseng Bakreste, e e-ba mofuta oa sehlopha oa baitlami o ikarotseng, joaloka Bajode ba ileng ba ikhula ’me ba ea lula Qumran haufi le Leoatle le Shoeleng? A re arabelloeng ke Pauluse: “Ke le ngoletse lengolong la ka, hore le se ke la kopana le bafebi; e seng hore le ka khaohana ruri le bafebi ba lefatše lena . . . hobane hoja ho joalo, e be e ka khona le tsoe lefatšeng.”—1 Ba-Korinthe 5:9, 10.

Tlhaloso ea mantsoe ao e hlakile. Pauluse o ile a hlokomela hore Bakreste ba ne ba ntse ba le ka har’a polanete ena, ba phela ’me ba na le hoo e batlang e le likamano tsa letsatsi le letsatsi le batho ba sa lumelang bao boitšoaro ba bona bo neng bo theohile ’me le litekanyetso tsa bona li fapane. Kaha seo se ne se ke ke sa qojoa, Bakreste ba ne ba lokela ho ba hlokolosi mabapi le likotsi tsa likamano tse joalo.

Joale a re nahanisiseng hape ka lengolo la bobeli la Pauluse le eang ho Bakorinthe. O ile a bontša hore Bakreste ba tlotsitsoeng ba tšoanelehela ho ba basebeletsi ba Molimo, manģosa a emelang Kreste. O ile a ba bolella hore ba itebele khahlanong le sesosa leha e le sefe sa khopiso se ka etsang hore tšebeletso ea bona e nyatsuoe. (2 Ba-Korinthe 4:1–6:3) Ka ho toba Pauluse o ile a phehella baena ba hae ba Korinthe, bao e neng eka ke bana ba hae ba moea, ho atoloha kamehong ea bona. (2 Ba-Korinthe 6:13, NW) Ka mor’a moo o ile a phehella: “Se sikareng joko e le ’ngoe le ba sa lumelang.” O ile a sebelisa letoto la lipolelo tse fapaneng ho hatisa ntlha eo.

Taba e potolohileng litemana tsena e bontša hore Pauluse o ne a sa lebisa tlhokomelo likarolong tse itseng tse khethehileng tsa bophelo, joaloka khoebong le khirong, le ho rala molao o thata le o tlamang ntlheng ena. Ho e-na le hoo, o ne a fana ka keletso e pharaletseng, e utloahalang, le e thusang baena ba hae bao a ba ratang.

Na keletso ee e ne e ka sebetsa, ka mohlala, tabeng ea Mokreste ea neng a thahasella ho kena lenyalong? E. Lengolong la hae la pele, moapostola o elelitse Bakorinthe ba neng ba batla ho kena lenyalong ho etsa joalo “Moreneng feela.” (1 Ba-Korinthe 7:39, NW) O ile a hatisa bohlale ba mantsoe ao ka seo hamorao a ileng a se ngola, joalokaha se tlalehiloe ho 2 Ba-Korinthe 6:14-18. Haeba Mokreste a ne a ka nahana ka ho kena lenyalong le motho e mong eo e neng e se mohlanka oa Jehova ’me e se molateli oa Kreste, o ne a tla be a nahana ka ho ikopanya le motho ea sa lumelang. (Bapisa le Levitike 19:19; Deuteronoma 22:10.) Ka ho hlakileng, ho se tšoanelane ho ne ho tla mema mathata, ho akareletsa le a moea. Ka mohlala, nakong eo kapa hamorao motho ea sa lumelang a ka latela borapeli ba molimo oa bohata. Pauluse o ile a beha mabaka: “Kreste o na le selekane sefe le Beliale?”

Leha ho le joalo, ho thoe’ng ka karolong e ’ngoe ea bophelo—ho kena khoebong le motho ea sa lumelang? Mabakeng a mang Mokreste a ka ikutloa hore ho fumana mokhoa oa boipheliso le ho hlokomela lelapa la hae ho hloka ho kena likamanong tsa khoebo le e mong eo eseng Mokreste-’moho le eena. (1 Timothea 5:8) Nahanisisa ka hoo e mpang e le mehlala feela:

Mokreste a ka batla ho qala khoebo ea ho rekisa mofuta oa thepa, empa tsela feela e ka ba hore a amohele ho etsa selekane le motho ea fumanang lihlahisoa tse hlokahalang kapa thepa habobebe. Mokreste e mong o batla ho etsa temo (kapa ho rua liphoofolo); leha ho le joalo, ha ho tšimo e bulehileng, kahoo o tla lokela ho etsa selekane le e mong ea lakatsang ho mo hirisetsa tšimo e le hore ba arolelane phaello e itseng. Mohlomong Mokreste e mong ha a khone ho kena khoebong ea ho kenya lipeipi tsa metsi matlong hobane Sesare a fana ka lilaksense tse fokolang, ’me li se li nkuoe; tsela feela e ka ba hore a kopane le mong ka eena ea sa lumelang ea nang le laksense.—Mareka 12:17.

Ena e mpa e le mehlala feela. Ha re leke ho ngola maemo ’ohle a ka amehang, kapa leha e le hona ho etsa polelo e amohelang kapa e nyatsang. Empa u ntse u hopotse mehlala eo, na u ka bona lebaka leo ka lona keletso e ho 2 Ba-Korinthe 6:14-18 e sa lokelang ho hlokomolohuoa?

Mokreste ea kenang khoebong le motho ea sa lumelang, ebang ke mong ka eena kapa che, a ka thulana le mathata a sa lebelloang le liteko. Mohlomong molekane oa hae khoebong o etsa qeto ea hore tsela ea ho fumana phaello e ntle ke ka ho se tlalehe chelete e kenngoang ke khoebo ena kapa ho se boloke tlaleho e hlokahalang ea basebetsi le meputso ea bona, leha e ba seo e le ho tlōla melao ea ’muso. A ka thabela ho lefa banna ba mo tlisetsang thepa ea bolotsana e sa thathamisoang ho invoice. Na Mokreste a ka ba le karolo leha e le efe nthong eo kapa ho etsa bolotsana bo tšoanang? ’Me ke eng seo Mokreste a tla se etsa ha nako e tla ea hore bona ka bobeli ba saene lipampiri tsa lekhetho kapa litokomane tse ling tsa molao tsa kamoo ba tsamaisang khoebo?—Exoda 23:1; Ba-Roma 13:1, 7.

Kapa molekane oa khoebo ea sa lumelang a ka batla thepa e rekisoang e amanang le matsatsi a phomolo a bohetene, a romella likarete tsa matsatsi a phomolo lebitsong la k’hamphani, ’me a khabisa khoebo bakeng sa matsatsi a phomolo a bolumeli. Pauluse o ile a botsa: “Tempele ea Molimo e na le tumellano efe le litšoantšo tse rapeloang? Hobane ke lōna le leng tempele ea Molimo o phelang.” Tlhaloso ee e loketse haholo hakaakang: “Ka baka leo, tsoang har’a bona, ’me le ikhethe, ho rialo Morena; le se ke la ama sesila; ’me ’na ke tla le amohela.” (2 Ba-Korinthe 6:16, 17) Ka ho sebelisa keletso eo e bohlale, Bakreste ba bangata ba khethile mefuta ea mesebetsi ea boipheliso e ka ba pepesetsang mathateng a fokolang haholo.—Ba-Heberu 13:5, 6, 18.

Phutheho ha e-ea laeloa ho lula e shebile kapa e etsa lipatlisiso ho seo Bakreste ba se etsang mesebetsing ea bona ea boipheliso, ho sa natsoe hore na ke bahiruoa kapa beng ba khoebo. Ho hlakile hore haeba ho tsebahala hore Mokreste o kopanela ketsong e mpe, joaloka ho ntšetsa pele borapeli ba bohata kapa mokhoa o mong oa ho bua leshano kapa ho utsoa, phutheho e tla lokela ho nka mehato ho tšehetsa litekanyetso tsa Jehova.

Leha ho le joalo, moelelo ke hore, keletso e bululetsoeng ea Pauluse, “Se sikareng joko e le ’ngoe le ba sa lumelang,” e ka thusa Bakreste ho qoba mathata le kahlolo leha e le efe ea baholo. Bakreste ba bohlale ba tla kenya keletso eo pelong ’me ha ba khethe ho kena maemong ao ba tla ba tlas’a khatello e eketsehileng ea ho sekisetsa melao-motheo ea Bibele. Haeba e mong a ikutloa hore o lokela ho kena khoebong le motho ea sa lumelang, ba bang ha baa lokela ho potlakela ho mo ahlola kapa ho mo nyatsa, ba ntse ba hlokomela hore o tla jara boikarabelo ba khetho ea hae. Ka ho hlakileng, Pauluse o ne a sa thehe molao o tlamang, o thata khahlanong le ho kena khoebong le motho ea sa lumelang. Ho ntse ho le joalo, keletso ea hae ha ea lokela ho hlokomolohuoa. Molimo o bululetse keletso eo ’me a etsa hore e tlalehoe ka Bibeleng molemong oa rōna. E ka ba bohlale ha re e ela hloko.