Etsa Jehova Setšabelo sa Hao
“Uena, Jehova, ke u entse setšabelo.”—PESALEME EA 31:1, NW.
1. Ke joang Pesaleme ea 31 e bontšang tšepo matleng a Jehova a ho fana ka setšabelo?
LENTSOE le monate le bina pina e buang ka monna eo, le hoja a khathetse kelellong le ’meleng, a ipehang ho Jehova. Tumelo ea hlōla, ho bolela mantsoe a pina eo e halalelang. Liatleng tse bulehileng tsa Ea Matla ’Ohle, monna enoa o fumana moo a ka itšireletsang teng ho bahlorisi ba mo tsomang. Pesaleme ea hae e re: “Uena, Jehova, ke u entse setšabelo. E se eka le ka mohla nka se hlajoe ke lihlong. Mpholose ka lebaka la ho loka ha hao.”—Pesaleme ea 31:1, NW.
2. (a) Re ka tšepa Jehova joaloka qhobosheane ea rōna re itšetlehile ka litšiea life tse peli? (b) Jehova ke Molimo oa mofuta ofe?
2 Mopesaleme o na le setšabelo se le seng—se molemo ka ho fetisisa! Lintho tse ling li ka belaelloa, empa ’nete ena ea sala: Jehova ke setširelo sa hae, qhobosheane ea hae. O behile tšepo litšieeng tse peli tse tiileng. Ea pele, tumelo ea hae, eo Jehova a ke keng a etsa hore e mo hlabise lihlong, ’me ea bobeli, ho loka ha Jehova, ho bolelang hore le ka mohla a ke ke A lahla mohlanka oa Hae ka ho sa feleng. Jehova hase Molimo ea hlabisang bahlanka ba hae ba tšepahalang lihlong; hase ea sa phetheng litšepiso. Ho e-na le hoo, ke Molimo oa ’nete le moputsi oa ba behang tšepo ea bona ho eena ka tieo. Qetellong, tumelo e tla putsoa! Pholoho e tla ba teng!—Pesaleme ea 31:5, 6.
3. Mopesaleme o phahamisa Jehova joang?
3 Mopesaleme o fumana matla a ka hare ha a qapa ’mino oa hae o nang le meloli e sa tšoaneng ho tloha ho e nang le melumo e tebileng e bontšang ho sareloa le bomalimabe ho ea ho e phahameng e bontšang ho ba le tšepo. O phahamisa Jehova bakeng sa lerato la Hae le tšepahalang. Oa bina: “Ho bokoe Jehova, hobane o mphile mosa o lerato o tsotehang motseng o tlas’a khatello.”—Pesaleme ea 31:21, NW.
Sehlopha se Matla sa Libini tsa Baboleli ba ’Muso
4, 5. (a) Kajeno ke sehlopha sefe se seholo sa libini se rorisang Jehova, hona se entse seo joang selemong see se fetileng sa tšebeletso? (Bona chate ho maqephe 12-15.) (b) Palo ea ba bileng teng Sehopotsong e bontša joang hore ho na le batho ba eketsehileng ba ratang ho kenella sehlopheng sa libini tsa baboleli ba ’Muso? (Bona chate.) (c) Ke sehlopha sefe phuthehong ea lōna se ka bang boemong ba ho kenella sehlopheng sa libini?
4 Kajeno, mantsoe a pesaleme eo a boetse a na le moelelo o eketsehileng. Lipina tsa thoriso ho Jehova li ke ke tsa sitisoa ke mohanyetsi ea khopo, ke koluoa leha e le efe ea tlhaho, kapa ke bomalimabe leha e le bofe ba moruo; ruri, mosa o lerato oa Jehova oa tsoteha ho batho ba hae. Lefatšeng lohle selemong se fetileng sa tšebeletso, sehlopha se seholo sa libini, se etsang tlhōrō ea ba 4 709 889 linaheng tse 231, se ile sa bina molaetsa oa ’Muso oa Molimo. ’Muso oa Jehova oa leholimo ka Kreste Jesu ke setšabelo se ke keng sa ba soabisa. Selemong se fetileng, baboleli bana ba ’Muso ba leng liphuthehong tse 73 070 ba sebelitse lihora tse 1 057 341 972 mosebetsing oa boevangeli. Sena se feletse ka hore batho ba 296 004 ba tšoantšetse boinehelo ba bona ho Molimo ka kolobetso ea metsing. ’Me bohle ba bileng teng Kopanong ea Machaba ea Thuto ea Bomolimo e neng e tšoaretsoe Kiev, Ukraine ba ile ba hlolloa hakaakang, ka August selemong se fetileng. Ba bone ketsahalo ea bohlokoa ka ho fetisisa historing, ba bona kolobetso e tlalehiloeng ea Bakreste ba ’nete ba bangata haholo eo ho seng e kileng ea tšoana le eona! Joalokaha ho profetiloe ho Esaia 54:2, 3, batho ba Molimo ba eketseha ka manane ao ho seng a kileng a lekana le ’ona.
5 Leha ho le joalo, bafo ba eketsehileng ba ratang ba ’Muso oa Molimo ba emetse ho fumana monyetla oa ho kenella sehlopheng sena sa libini. Selemong se fetileng, Sehopotsong sa lefu la Jesu ho bile teng kakaretso e hlollang ea batho ba 11 865 765. Re tšepa hore, ba bangata ba bona ba tla tšoaneleha bakeng sa ho bina pina ea ’Muso ka ntlo le ntlo selemong sena sa tšebeletso. Monyetla ona o tla halefisa sera sa ’nete, Satane Diabolose, hakaakang!—Tšenolo 12:12, 17.
6, 7. Hlalosa kamoo monna ea thahasellang a ileng a hlōla tlhaselo ea bademona ka thuso ea Jehova.
6 Satane o tla leka ho sitisa ba bang hore ba se ke ba kenyeletsa mantsoe a bona sehlopheng sena se seholo sa libini. Ka mohlala, bahoeletsi ba Thailand ba fumana hore batho ba bangata ba hlaseloa ke bademona. Leha ho le joalo, batho ba bangata ba tiileng, ba lokolotsoe ka thuso ea Jehova. Ka mor’a ho ea ngakeng ea methōkhō ka lebaka la bohele-hele, monna e mong o ile a ba tlas’a taolo ea bademona ka lilemo tse leshome. O ile a leka ka matla ho lokoloha taolong ea bona ka thuso ea moruti, empa haa ka a bona phetoho ea sebele. Mosebeletsi oa Lipaki tsa Jehova oa nako e tletseng o ile a qalisa thuto ea Bibele le monna enoa ’me a mo ruta ho tsoa Bibeleng tsela feela ea ho lokoloha taolong ea bademona—ho fumana tsebo e nepahetseng ea ’nete, ho lumela ho Jehova Molimo, le ho mo kōpa ka tieo thapelong.—1 Ba-Korinthe 2:5; Ba-Filippi 4:6, 7; 1 Timothea 2:3, 4.
7 Bosiung bo latelang puisano ena, monna enoa o ile a lora ntate oa hae ea shoeleng a mo etsetsa litšoso haeba a sa khutlele boemong ba ho buisana le meea. Lelapa la hae le ile la qala ho tšoenyeha. Kaha o ne a sa ikemisetsa ho khelosoa, monna enoa o ile a tsoela pele ka lithuto tsa hae tsa Bibele ’me a qala ho ba teng libokeng. Nakong ea e ’ngoe ea lithuto tseo, pula-maliboho e ile ea hlalosa hore ka linako tse ling lintho tse amanang le meea li ka neha bademona monyetla oa ho tšoenya batho ba lekang ho itokolla matleng a bona. Monna enoa o ile a hopola hore o na le oli eo a neng a e sebelisa e le setlhare. Joale o ile a hlokomela hore o tlameha ho e qhala. Haesale a e qhala, ha a e-s’o hlaseloe ke meea e khopo hape. (Bapisa le Ba-Efese 6:13; Jakobo 4:7, 8.) Eena le mosali oa hae ba tsoela pele hantle ka ho ithuta ha bona ’me ba ba teng ka mehla libokeng bakeng sa ho fumana taeo ea Bibele.
8, 9. Ke litšitiso life tse ling tseo bahoeletsi ba bang ba ’Muso ba li hlōtseng?
8 Litšitiso tse ling li ka sitisa ho utloahala ha litaba tse molemo. Ka lebaka la boemo bo thata haholo ba moruo Ghana, basebetsi ba ’nile ba fokotsoa mesebetsing. Theko ea lintho e phahame haholo, e leng se etsang hore ho be thata ho fumana lintho tse seng kae feela tse hlokahalang bakeng sa ho phela. Batho ba Jehova ba ’nile ba tsoella joang? Ka ho tšepa Jehova eseng bona. Ka mohlala, ka letsatsi le leng monna e mong o ile a siea enfelopo e koetsoeng deskeng ea moo ho amoheloang baeti ofising ea lekala. Ka har’a enfelopo ena ho ne ho e-na le $200 (R660), kapa moputso o ka tlaase-tlaase o ka fumanoang ka likhoeli tse tharo. Enfelopo ena e ne e tsoa ho mofani ea sa itsebahatsang, empa sephutheloaneng ho ne ho ngotsoe sena: “Ke feletsoe ke mosebetsi, empa Jehova o mphile o mong. Ke ea mo leboha le Mora oa hae, Kreste Jesu. E le ho thusa tabeng ea ho hasa litaba tse molemo tsa ’Muso pele bofelo bo tla, ke kentse monehelo o monyenyane.”—Bapisa le 2 Ba-Korinthe 9:11.
9 Ho ba teng libokeng ho thusa ho koetlisa ba kenellang sehlopheng se seholo sa libini tse lebisang thoriso ho Jehova. (Bapisa le Pesaleme ea 22:22.) Ka hona, karolong e ka boroa ea Honduras, ho na le phutheho e bitsoang El Jordán. Ke eng se ikhethang hakaale ka sehlotšoana see? Ke ho ba teng ha bona libokeng ka botšepehi. Ho bahoeletsi ba 19, ba 12 ba tlameha ho tšela nōka e khōlō e le hore ba be teng libokeng beke le beke. Sena hase bothata bo boholo nakong ea ha pula e sa ne, kaha ba ka tšela nōka ka ho tsamaea holim’a majoe. Leha ho le joalo, nakong ea lipula, maemo aa fetoha. Seo pele e neng e le letangoana se fetoha nōka e liphororo e fielang ntho e ’ngoe le e ’ngoe e tseleng ea eona. E le hore ba ka hlōla bothata bona, baena le bo-khaitseli e tlameha ho ba lisesi tse hloahloa. Pele ba tšela, ba beha liaparo tsa bona tsa liboka ka har’a tina (bate ea tšepe) ebe ba e koahela ka mokotlana oa polasetiki. Sesesi se matla se sebelisa tina e le seikokotlelo ebe se etella sehlopha pele ha se tšela. Ha ba fihla ka mose ho nōka ba sireletsehile, baa iphumula, baa apara, ’me ba fihla Holong ea ’Muso ba le morolo ba bile ba hloekile!—Pesaleme ea 40:9.
Qhobosheane eo Re ka Lulang ho Eona
10. Ke hobane’ng ha re lokela ho retelehela ho Jehova linakong tsa khatello?
10 Ebang u hlasetsoe ka ho toba ke bademona kapa u hateletsoe ke lintho tse ling, Jehova e ka ba setširelo sa hao. Bitsa ho eena thapelong. O mamela ka hloko esita le mefehelo e utloahallang tlaase ea batho ba hae. Mopesaleme o ile a fumana hore sena ke ’nete ’me a ngola: “Phakisa u mpoloke! U be lefika ho ’na, le setšabelo, le qhobosheane ea poloko! Hobane u lefika la ka le qhobosheane ea ka; ’me ka baka la lebitso la hao, u tla mpontša tsela, u ntsamaise ho eona; u tla nkhula lerabeng lee ba nchehileng ka lona sephiring tlas’a maoto a ka, hobane u tšireletso ea ka.”—Pesaleme ea 31:2-4.
11. Hlalosa lebaka leo ka lona qhobosheane ea Jehova e seng sebaka sa nakoana feela.
11 Jehova ha a fane feela ka setšabelo sa nakoana empa o fana ka qhobosheane e ke keng ea hlaseloa moo re ka lulang ka tšireletseho. Ketello-pele ea hae le tataiso ha lia soetsa batho ba hae. Matla a Molimo a tla etsa hore maqiti ’ohle a bolotsana a Satane le balateli ba hae e be a se nang thuso. (Ba-Efese 6:10, 11) Ha re tšepa Jehova ka pelo eohle, o tla re hulela hōle le maraba a Satane. (2 Petrose 2:9) Lilemong tse ’nè tse fetileng, mosebetsi oa Lipaki tsa Jehova oa boboleli o ile oa qalisoa hape linaheng tse ka bang 35. ’Me, libakeng tsa lefatše moo maemo a bophelo, a moruo, kapa a lipolotiki a sitisang boboleli ba litaba tse molemo, batho ba bang ba kang linku ba ile ba fallela moo ba ka finyelloang habonolo. Japane ke se seng sa libaka tseo ba ileng ba fallela ho tsona.
12. Pula-maliboho e ’ngoe ea Japane e ile ea etsa Jehova setširelo sa eona joang?
12 Japane ho bile le tšubuhlellano ea basebetsi ba tsoang mose ho maoatle, ’me ho thehiloe liphutheho tse ngata tse buang lipuo lisele. Phihlelo ea moena ea leng phuthehong ea Sejapane e bontša kamoo tšimo ena ea batho basele e atlehang ka teng. O ne a batla ho ea sebeletsa moo tlhokahalo e leng khōloanyane. Leha ho le joalo, o ne a se ntse a khanna lithuto tsa Bibele tse leshome moo a neng a le teng. E mong oa metsoalle ea hae ka bosoasoi o ile a re: “Haeba u ea moo tlhokahalo e leng khōloanyane, u tla tlameha hore u khanne lithuto tsa Bibele tse 20 moo!” O ile a amohela kabelo ’me a ea Hiroshima. Leha ho le joalo, ka mor’a likhoeli tse ’nè, o ne a e-na le thuto e le ’ngoe feela ea Bibele. Ka letsatsi le leng o ile a etela monna ea tsoang Brazil ea neng a bua Sepotoketsi feela. Kaha moena o ne a ke ke a buisana le monna enoa, o ile a reka buka ea ho ithuta ea Sepotoketsi. Ka mor’a ho ithuta mantsoe a seng makae a bonolo a ho qala puisano, o ile a boela a etela monna enoa. Ha moena a mo lumelisa ka Sepotoketsi, monna enoa o ile a makala, ’me a bososela haholo, o ile a bula lemati haholo ’me a mo mema hore a kene ka tlung. Ho ile ha qalisoa thuto ea Bibele. Kapele moena o ne a khanna lithuto tse 22, tse 14 ka Sepotoketsi, tse 6 ka Sepanishe, le tse 2 ka Sejapane!
Ho Bolela ka Kholiseho
13. Ke hobane’ng ha ho se motho ea lokelang ho leka ho re hlabisa lihlong hobane re sebeletsa Jehova?
13 Batho ba Jehova ka kholiseho ba bina pina ea ’Muso ka tumelo e feletseng ea hore Jehova ke setšabelo sa bona. (Pesaleme ea 31:14) Ba ke ke ba hlabisoa lihlong—Jehova a ke ke a ba soabisa, hobane o tla phethahatsa lentsoe la hae. (Pesaleme ea 31:17) Diabolose le mahlahana a hae a bademona ba tla hlabisoa lihlong. Kaha batho ba Jehova ba laetsoe ho bolela molaetsa o sa hlabiseng lihlong, batho ba bang ha ba ba hlabise lihlong ha ba bolela. Hase tsela eo Jehova, kapa Mora oa hae, a susumetsang batho ba hae hore ba Mo rapele ka eona. Ha lipelo tsa batho li tletse tumelo le kananelo bakeng sa molemo oa Jehova le mosa oa hae o lerato, ke boemo bo botle ba lipelo tsa bona bo susumetsang melomo ea bona hore e bue. (Luka 6:45) Ka hona, ho sa tsotellehe hore na re qeta nako e kae tšebeletsong khoeli ka ’ngoe, haholo-holo haeba nako eo e le se molemohali seo re ka se etsang, e molemo, ha e hlabise lihlong. Na Jesu le Ntate oa hae ha baa ka ba ananela cheletana ea mohlolohali?—Luka 21:1-4.
14. U ka etsa litlhahiso life mabapi le mosebetsi oa bopula-maliboho? (Bona chate hape.)
14 Bakeng sa bahoeletsi bao palo ea bona e ntseng e eketseha, ho ba ka sephefumolohi sohle borapeling ba bona ho kopanyeletsa ho kenela bopula-maliboho—tlhōrō ea ba 890 231 ho feta selemong se fetileng! Haeba ho ka etsoa khatelo-pele e tšoanang le ea selemong se fetileng, ho ka etsahala hore palo ena e fete 1 000 000. Phihlelo e latelang e bontša kamoo khaitseli oa Nigeria a ileng a kenela bopula-maliboho. Oa ngola: “Ha ke le haufi le ho qeta sekolong se phahameng, ke ile ka ea thusa ho phehela ba tlileng sekolong sa bo-pula-maliboho sa Lipaki tsa Jehova. Moo ke ile ka teana le bo-khaitseli ba babeli ba neng ba le baholo ho nkhono oa ka. Ha ke hlokomela hore ke bo-pula-maliboho ba tlileng sekolong, ke ile ka inahana, ‘Haeba ba babeli bao ba ka bula maliboho, ’na nka sitoa ke’ng?’ Kahoo ka mor’a ho qeta sekolong, le ’na ke ile ka ba pula-maliboho ea ka mehla.”
15. Bopaki bo sa reroang bo ka nolofaletsa ba bang hore ba khone ho etsa Jehova setšabelo joang?
15 Hase bohle ba ka kenelang bopula-maliboho, empa bohle ba ka paka. Belgium khaitseli ea lilemo li 82 o ile a ea reka nama. O ile a hlokomela hore mosali oa raselakha o tšoenyehile haholo ka lebaka la merusu e neng e sa tsoa ba teng ea lipolotiki. Kahoo khaitseli o ile a kenya pampitšana Ke Eng Seo Lipaki tsa Jehova li se Lumelang? ka har’a chelete ha a lefa molato oa hae. Ha khaitseli a khutlela selakheng, mosali oa raselakha, ka ntle le ho senya nako, o ile a botsa hore na Bibele e re’ng ka monyetla oa ho qhoma ha ntoa ea boraro ea lefatše. Khaitseli o ile a mo tlisetsa buka ea Khotso ea ’Nete le Tšireletseho—U Ka Li Fumana Joang? Matsatsi a seng makae hamorao, ha khaitseli enoa ea hōlileng a kena ka selakheng, mosali oa raselakha o ne a e-na le lipotso tse eketsehileng tseo a batlang ho ’motsa tsona. Khaitseli o ile a utloela mosali enoa bohloko; ke feela hore o ne a tlameha ho ithaopela ho mo khannela thuto ea Bibele, ’me o ile a e amohela. Hona joale, mosali oa raselakha o batla ho kolobetsoa. Ho thoe’ng ka raselakha? O ile a bala pampitšana ’me hona joale le eena o ithuta Bibele.
‘Letlotlo la Molemo’
16. Jehova o beheletse ka thōko letlotlo la molemo bakeng sa batho ba hae joang?
16 Linakong tsena tsa bofelo tse bakang khatello, na Jehova ‘haa fana ka mosa o hlollang o lerato’ ho ba mo entseng setšabelo sa bona? Joaloka ntate ea lerato, ea sireletsang, Jehova o beheletse ka thōko letlotlo la molemo bakeng sa bana ba hae ba lefatšeng. O ’nile a ba thabisa haholo ka pel’a bashebelli bohle, joalokaha mopesaleme a re: “Le leholo hakakang lereko leo u le boloketseng ba u tšabang, leo u le hlahisetsang ba itšepetseng uena pontšeng ea bana ba batho.”—Pesaleme ea 31:19, 21.
17-19. Ghana, ke molemo ofe o ileng oa hlahisoa ke hore monna ea seng a hōlile a ngolise lenyalo la hae ka molao?
17 Ka hona, batho ba lefatše ba bona botšepehi ba batho ba rapelang Jehova, ’me baa tsota. Ka mohlala, Ghana monna ea lilemo li 96 o ile a ea ofising ea mongolisi oa lenyalo ’me a kōpa hore lenyalo la hae le sa ngolisoang ka molao la lilemo tse 70 joale le ngolisoe. Mongolisi oa lenyalo o ile a tšosoa ke sena ’me a botsa: “Na u kholisehile hore ke sona seo u batlang ho se etsa? Lilemong tsa hao?”
18 Monna enoa o ile a hlalosa: “Ke batla ho ba e mong oa Lipaki tsa Jehova le ho kopanela mosebetsing oa bohlokoa ka ho fetisisa pele ho bofelo ba lefatše—mosebetsi oa ho bolela litaba tse molemo tsa ’Muso oa Molimo. Mosebetsi ona o isa bophelong bo sa feleng. Lipaki tsa Jehova li utloa melao ea ’muso, ho kopanyeletsa le molao o amang ho ngolisoa ha lenyalo. Kahoo ke kōpa hore u ngolise la ka.” Ofisiri ena e ile ea makala haholo. E ile ea ngolisa lenyalo la monna enoa, ’me monna enoa ea hōlileng o ile a tsamaea a thabetse hore joale o nyetse ka molao.—Bapisa le Ba-Roma 12:2.
19 Ka mor’a moo, mongolisi oa lenyalo o ile a nahana ka lintho tseo a li utloileng. “Lipaki tsa Jehova . . . mosebetsing oa bohlokoa ka ho fetisisa . . . bofelo ba lefatše . . . ’Muso oa Molimo . . . bophelo bo sa feleng.” A makalitsoe ke hore na ebe sena sohle se bolelang bophelong ba motho ea lilemo li 96, o ile a rera ho batla Lipaki hore a hlahlobe taba ena ka ho eketsehileng. O ile a amohela thuto ea lehae ea Bibele ’me a etsa tsoelo-pele e potlakileng. Kajeno, mongolisi enoa oa lenyalo ke Paki e kolobelitsoeng. Ka hona, ha re utloa Jehova esita le ho seo ba bang ba ka nkang hore ke lintho tse fokolang, ho ka fella ka molemo o mongata ho rōna le ho ba hlokomelang boitšoaro ba rōna.—Bapisa le 1 Petrose 2:12.
20. Myanmar, botšepehi ba khaitseli e mong e monyenyane bo ile ba lebisa bopaking bo botle joang?
20 Batho ba hōlileng ba lumellang ’nete hore e ba etse batho ba tšepahalang ba beha mohlala o motle bakeng sa bacha lefatšeng lena le sa tšepahaleng. Myanmar ho lula khaitseli ea joalo e mocha. O tsoa lelapeng le futsanehileng le le tlaase la bana ba leshome. Ntate oa hae, ea pensheneng, ke pula-maliboho ea ka mehla. Ka letsatsi le leng sekolong, khaitseli enoa o ile a thola reng ea daemane, eo ka potlako a ileng a e isa ho tichere ea hae. Ha sehlopha se kopana hape letsatsing le latelang, tichere e ile ea bolella sehlopha hore na reng e thotsoe joang ’me ea tlisoa hore e khutlisetsoe ho mong’a eona. Eaba o kōpa khaitseli e monyenyane hore a eme ka pel’a sehlopha sohle ’me a hlalose hore na ke hobane’ng ha a ile a etsa sena, le hoja a tseba hore bana ba bang ba ka be ba khethile ho ipolokela eona. Khaitseli enoa o ile a hlalosa hore ke Paki ea Jehova le hore Molimo oa hae ha a rate bosholu kapa mofuta leha e le ofe oa ketso ea ho se tšepahale. Sekolo sohle se ile sa tseba taba ena, ’me sena se ile sa neha khaitseli oa rōna e monyenyane monyetla o motle oa ho pakela matichere le liithuti ka ho tšoanang.
21. Ha bacha ba tšepa Jehova, boitšoaro ba bona bo mo hlahisa joang?
21 Belgium tichere e ile ea bua taba e thahasellisang ka tlelaseng mabapi le Lipaki tsa Jehova. O ne a hlokometse boitšoaro ba e mong oa liithuti tsa hae, eo le eena e leng khaitseli e mocha lilemong, ’me a re: “Maikutlo a ka a fetohile ka Lipaki tsa Jehova. Leeme le ne le entse hore ke nahane hore ke batho ba se nang mamello ka ho fetisisa. Ba ipakile e le batho ba nang le mamello e fetisisang, empa ba sa sekisetseng litekanyetso tsa bona.” Selemo se seng le se seng matichere a fa liithuti tsa ’ona tse molemo ka ho fetisisa meputso. Moputso o mong ke oa thuto ea litekanyetso tsa boitšoaro. Ka lilemo tse tharo tse latellanang, tichere ena e ile ea fana ka meputso ho bana ba Lipaki tsa Jehova ba fumaneng matšoao a mararo a ka holimo-limo. Ke sona seo hangata se etsahalang ho ba tšepang Jehova.—Pesaleme ea 31:23.
22. Qetello e bontšang tlhōlo ea Pesaleme ea 31 ke efe, hona seo se re thusa joang qetellong ea mehla ee ea tsamaiso ea lintho?
22 Pesaleme ea 31 e phetha ka molumo o bontšang tlhōlo: “Betang lipelo, le tiee, lōna kaofela ba itšepelang Jehova.” (Pesaleme ea 31:24) Ka hona, ha re tobane le bofelo ba tsamaiso ea lintho e khopo ea Satane, ho e-na le ho re lahla, Jehova o tla atamela haufi-ufi le rōna ’me a re kenye matla a hae. Jehova oa tšepahala ’me ha a hlōlehe. Ke setšabelo sa rōna; ke tora ea rōna.—Liproverbia 18:10.
Na U sa Hopola?
◻ Ke hobane’ng ha ka kholiseho re ka etsa Jehova setšabelo sa rōna?
◻ Ke bopaki bofe bo teng ba hore sehlopha se seholo sa libini se bina thoriso ea ’Muso ka sebete?
◻ Ke hobane’ng ha re ka kholiseha hore leraba la Satane le ke ke la tšoasa batho ba Jehova?
◻ Jehova o beheletse letlotlo lefe ka thōko bakeng sa ba mo etsang setšabelo sa bona?
[Chate e leqepheng la 12-15]
TLALEHO EA SELEMO SA TŠEBELETSO SA 1993 EA LIPAKI TSA JEHOVA LEFATŠENG LOHLE
(Sheba boitsebiso bo hlophisitsoeng hantle khatisong)
[Litšoantšo tse leqepheng la 16, 17]
Ba etsang Jehova setšabelo ba etsa sehlopha se seholo sa libini sa baboleli ba ’Muso—ba matla ba 4 709 889!
1. Senegal
2. Brazil
3. Chile
4. Bolivia