Lipotso Tse Tsoang ho Babali

Melemo ea litšebeletso tsa boprista bo phahameng ba Kreste Jesu, e boletsoeng ho Ba-Heberu 4:15, 16 (NW), e sebetsa joang ho “linku tse ling” hona joale?

Bakreste ba nang le tšepo ea lefatšeng ba rua molemo le hona joale ka litšebeletso tsa boprista ba Jesu, le hoja karolo ea hae joaloka Moprista ea Phahameng e na le bohlokoa ba sehlooho ho ba tla ba le eena leholimong.

Ho tloha ka Adama, batho ba ’nile ba imeloa ke sebe. Re hlokofatsoa ke ho se phethahale hoo re ho futsitseng, joalokaha ho entse Baiseraele. Ba ile ba retelehela letotong le lelelele la baprista ba phahameng le la baprista ba bang, ba neng ba nyehela mahlabelo bakeng sa libe tsa bona haesita le bakeng sa tsa batho ba bang. Ka nako ea teng, Jesu o ile a tlotsoa e le moprista “ka mokhoa oa Melkisedeke.” Ka mora’ hore a tsosoe bafung, Jesu o ile a itlhahisa ka pel’a Jehova ho ea fana ka molemo oa sehlabelo se phethahetseng sa botho.—Pesaleme ea 110:1, 4.

See se bolela eng ho rōna kajeno? Lengolong la hae le eang ho Baheberu, Pauluse o ile a bua ka tšebeletso ea Jesu joaloka Moprista ea Phahameng. Ho Ba-Heberu 5:1, rea bala: “Moprista e moholo, leha e le ofe le ofe, ea nkoang har’a batho, o ee a beeloe batho linthong tsa tšebeletso ea Molimo, a tle a hlahise linyehelo le mahlabelo ka baka la libe.” Joale, temaneng ea bohlano le ea botšelela, Pauluse o bontšitse hore Jesu e ile ea e-ba moprista ea phahameng, e leng ho ka re tlisetsang melemo.

Ka mokhoa ofe? Pauluse o ile a ngola: “Leha e ne e le Mora, o ithutile kutlo ka tse bohloko tse mo hlahetseng. ’Me joale, ha a phethehile, o entsoe moetsi oa poloko e sa feleng ho bohle ba mo utloang.” (Ba-Heberu 5:8, 9) Ka lekhetlo la pele, temana eo e ka ’na ea etsa hore re nahane kamoo re tlang ho rua molemo kateng lefatšeng le lecha, ha boemo ba boetsalibe ba bohle ba tšepahalang ho Molimo le ho Jesu bo hlakotsoe ’me ba fumana bophelo bo sa feleng. Eo ke tebello e tiileng, e theiloeng molemong oa topollo ea sehlabelo sa Jesu ’moho le tšebeletso ea hae joaloka Moprista ea Phahameng.

Bonneteng, leha ho le joalo, re ka rua molemo hona joale ka karolo ea hae kapa tšebeletso ea hae joaloka Moprista ea Phahameng. Ela hloko Ba-Heberu 4:15, 16 (NW): “Re na le moprista ea phahameng, hase ea ke keng a utloela mefokolo ea rōna bohloko, empa ea lekiloeng ka litsela tsohle joaloka rōna, empa a se na sebe. Ka lebaka leo, a re atameleng terone ea mosa o sa tšoanelang ka bolokolohi ba puo, e le ho ka fihlela mohau ’me re fumane mosa o sa tšoanelang bakeng sa thuso ka nako e loketseng.” “Nako e loketseng” e ne e tla ba neng? Ke ha re hloka mohau le mosa o sa tšoanelang. Ka lebaka la ho se phethahale ha rōna, re lokela ho ikutloa re li hloka hona joale, kaofela ha rōna.

Ba-Heberu 4:15, 16 e hlakisa hore Jesu—joale e se e le moprista leholimong—hape e kile ea e-ba motho, kahoo, o tla khona ho ba le kutloelo-bohloko. Ho bo-mang? Ho rōna. Neng? Hona joale. Ha e ne e le motho oa nama, Jesu o ile a ba le maima le likhatello tse tloaelehileng ho batho. Ketsahalong e ’ngoe, Jesu o ne a lapile a bile a nyoriloe. ’Me ho sa tsotellehe ho phethahala ha hae, o ne a khathala. Hoo ho lokela ho re kholisa. Hobane’ng? Hobane Jesu o ile a ba le mokhathala oa tlhaho, o-oa tseba hore na hangata re ikutloa joang. Hopola hape hore Jesu o ile a lokela ho loantša lefufa le neng le baka khang har’a baapostola ba hae. (Mareka 9:33-37; Luka 22:24) E, o ile a khathala matla ka linako tse ling. Na hoo ha hoa lokela ho re fa tšepo ea hore o-oa utloisisa ha re soetseha, re nyahame? Ka sebele ho joalo.

Ha u nyahame, ke eng seo u ka se etsang? Na Pauluse o ile a re u lokela ho ema ho fihlela ha, lefatšeng le lecha, Moprista oa hao ea Phahameng, Jesu, a u thusa hore u phethahale kelellong le ’meleng? Che. Pauluse o itse: “Re ka fihlela mohau ’me ra fumana mosa o sa tšoanelang bakeng sa thuso ka nako e loketseng,” ’me hoo ho kopanyelletsa le hona joale. Ho feta moo, ha Jesu e ne e le motho oa nama, o ile a ba le mahlomola le litsietsi, a “lekoa nthong tsohle joaloka rōna.” (Mongolo o tšekaletseng ke oa rōna.) Kahoo, ha re tobana le lintho tsa mofuta oo, o itokiselitse ho re thusa, motheong oa kutloisiso eo a nang le eona bakeng sa seo re tobanang le sona. Na hoo ha ho u hulele haufi le eena?

Joale hlokomela temana ea 16. Pauluse o re rōna—’me sena se kopanyelletsa batlotsuoa le ba bongata bo boholo—re ka atamela Molimo ka bolokolohi ba puo. (Johanne 10:16) Moapostola o ne a sa bolele hore lithapelong tsa rōna re ka bua ntho leha e le efe eo re e ratang, esita le lintho tse halefisang tse sa hlompheng. Ho e na le hoo, motheong oa sehlabelo sa Jesu le karolo ea hae joaloka Moprista ea Phahameng, re ka atamela Molimo ho sa tsotellehe boetsalibe ba rōna.

Tsela e ’ngoe eo re ka ruang molemo le hona joale litšebeletsong tsa Moprista oa rōna ea Phahameng, Jesu Kreste, e akarelletsa libe tsa rōna, kapa liphoso. Ka sebele ha rea lebella hore tsamaisong ena ea hona joale Jesu o tla sebelisa bokhabane ba sehlabelo sa hae ho rōna ka ho feletseng. Le haeba a ne a ho entse, re ne re ntse re sa tl’o fumana bophelo bo sa feleng. Na u sa hopola ketsahalo e tlalehiloeng ho Luka 5:18-26, e amang monna ea neng a shoele litho ea ileng a kenngoa ka liphate tsa hae le lesobeng le phuntsoeng marulelong? Jesu o ile a ’molella: “Motho, libe tsa hao u li tšoaretsoe.” Hoo ho ne ho sa bolele libe tse itseng tseo ka ho khetheha li neng li entse hore monna eo a omelle litho. E tlameha ebe ho ne ho bolela libe tsa monna eo ka kakaretso, ’me ho ea bohōleng bo itseng ho akarelletsa le ho se phethahale hoo a ho futsitseng, ho bakang mahlomola.

Motheong oa sehlabelo seo a neng a tla fana ka sona, Jesu o ne a tla hlakola libe tsa motho eo, joalokaha pōli ea Azazele e ne e tlosa libe tsa Iseraele ka Letsatsi la Lipheko. (Levitike 16:7-10) Leha ho le joalo, monna ea omeletseng litho e ne e ntse e le motho oa nama. O ne a tla etsa libe hape, ’me ka mor’a nako o ile a shoa, joalokaha baetsalibe ba tlameha ho shoa. (Ba-Roma 5:12; 6:23) Seo Jesu a ileng a se bua se ne se sa bolele hore monna eo o fumana bophelo bo sa feleng ka nako eona eo. Empa monna eo o ne a hlohonolofalitsoe ka tekanyo e itseng ea tšoarelo ka nako eo.

Joale nahana ka boemo ba rōna. Joaloka batho ba sa phethahalang, re sitoa letsatsi le leng le le leng. (Jakobo 3:2) Re ka etsa eng ka seo? Ha e le hantle, re na le Moprista ea Phahameng ea mohau leholimong eo ka eena re ka atamelang Jehova ka thapelo. E, joalokaha Pauluse a ngotse, bohle re ka “atamela terone [ea Molimo] ea mosa o sa tšoanelang ka bolokolohi ba puo, e le ho ka fihlela mohau ’me ra fumana mosa o sa tšoanelang bakeng sa thuso ka nako e loketseng.” Ka lebaka leo, kajeno bohle bao e leng ba linku tse ling ruri ba rua melemo e tsotehang, ho kopanyelletsa le letsoalo le hloekileng, e tsoang litšebeletsong tsa boprista bo phahameng ba Kreste.

Bakreste bohle ba nang le tšepo ea lefatšeng ba ka lebella melemo e meholoanyane lefatšeng le lecha le atamelang. Joale Moprista oa rōna ea Phahameng oa leholimo o tla sebelisa bokhabane ba sehlabelo sa hae ka ho feletseng, se lebisang tšoarelong e feletseng ea libe. O tla boela a atolosa melemo e meholoanyane ka ho hlokomela bophelo ba ’mele le ba moea ba batho. ’Me Jesu o tla atolosa thuto ea batho ba Molimo haholo lefatšeng, kaha ho ruta Molao e ne e le boikarabelo bo ka sehloohong ba baprista Iseraeleng. (Levitike 10:8-11; Deuteronoma 24:8; 33:8, 10) Kahoo, ha re ntse re fumana molemo hona joale litšebeletsong tsa boprista ba Jesu, ho hongata ka ho fetisisa ho sa re letetse!