Na U Iponahatsa U le ea Lebohang?

Lehaeng la baromuoa le Afrika Bophirimela, ho kile ha e-ba le ntja e lebelang e neng e lula teng e bitsoang Teddy. Ha motho a ne a akhela Teddy leqa, e ne e le kometsa hang, e sa le latsoe, e sa le hlafune. Ha e ntse e hemesela letsatsing la naha e chesang e mongobo, e ne e letela hore e akheloe leqa le leng. Ha nama e fela, e ne e furalla e tsamaea.

Ha ho mohla Teddy e kileng ea leboha le hanyenyane bakeng sa seo e se fumaneng. Ha ho na motho ea neng a e lebeletse hore e lebohe. Etsoe, e ne e le ntja feela tjee.

TABENG ea teboho, hangata re lebella se sengata ho batho ho feta seo re se lebellang ho liphoofolo. Hangata rea soetseha. Batho ba bangata ba nka seo ba ka se nkang bophelong ’me ba lebella se eketsehileng. Sena le sona ha se makatse. Bibele e boletse esale pele hore matsatsing a ho qetela, batho e ne e tla ba ba sa leboheng.—2 Timothea 3:1, 2.

Leha ho le joalo, bahlanka ba Molimo ba na le moea o fapaneng. Ba nka ka botebo keletso ea moapostola Pauluse, ea ileng a eletsa balumeli-’moho le eena: “Le iponahatse le le ba lebohang.”—Bakolose 3:15.

Jehova o Iponahatsa e le ea Lebohang

Jehova Molimo o beha mohlala o phethahetseng tabeng ea ho bontša kananelo. Hlokomela kamoo a talimang bahlanka ba hae ba tšepahalang kateng. Pauluse, tlas’a pululelo, o ile a ngolla Bakreste ba Baheberu: “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae, ka hore le sebelelitse bahalaleli ’me le tsoela pele ho sebeletsa.”—Baheberu 6:10.

Mehlala ea ho ananela ha Jehova bahlanka ba hae ba tšepahalang e mengata haholo. O ile a hlohonolofatsa Abrahama ka ho atisa bana ba hae, hoo ba ileng ba e-ba “ka ka linaleli tsa maholimo, le lehlabathe le lebopong la leoatle.” (Genese 22:17) Ha a ananela botšepehi ba Jobo tlas’a teko, Jehova ha aa ka a buseletsa Jobo leruo la hae le leholo feela empa hape o ile a mo atisetsa “habeli tseo a neng a e-na le tsona pele.” (Jobo 42:10) Litšebelisano tsa Jehova le batho ho theosa le lilemo tse likete li pakile bonnete ba polelo ena: “Mahlo a Jehova a qamaka lefatšeng lohle hore a emele bao pelo tsa bona e leng tsa hae kaofela.”—2 Likronike 16:9.

Kananelo ea Molimo ho ba batlang ho etsa thato ea hae le takatso ea hae ea ho ba putsa ke litšobotsi tse ka sehloohong tsa botho ba hae. Ho hlokomela sena ke ntho ea bohlokoa tumelong ea Bokreste. Pauluse o ile a ngola: “Ka ntle ho tumelo ho ke ke ha khoneha ho mo khahlisa haholo, kaha ea atamelang Molimo o lokela ho lumela . . . hore e ba moputsi oa ba mo batlang ka tieo.”—Baheberu 11:6.

Ho e-na le hoo, haeba Jehova a ne a bonahatsa moea oa ho hloka kutloelo-bohloko, oa ho tšoaea liphoso, kaofela ha rōna re ne re tla ahloloa. Mopesaleme o ile a bua sena khale: “Ha u ka lotolotsa makhopo, ke mang ea ka emang pel’a hao, Morena?” (Pesaleme ea 130:3) Jehova hase ea hlokang kananelo leha e le hore ke ea tšoaeang liphoso. O nka ba mo sebeletsang e le ba bohlokoa. O iponahatsa e le ea lebohang.

Jesu—Motho ea Ananelang ka ho Tebileng

Ka ho bonahatsa litšoaneleho tsa Ntate oa hae oa leholimo ka ho phethahetseng, Jesu Kreste o ile a iponahatsa e le ea lebohang lintho tseo ba bang ba neng ba li etsa ka tumelo. Nahana ka se kileng sa etsahala tempeleng e Jerusalema: “Joale eare ha [Jesu] a phahamisa mahlo a bona barui ba akhela limpho tsa bona ka matloleng a polokelo ea matlotlo. Joale a bona mohlolohali ea itseng ea hlokang a akhela licheletana tsa tšepe tse peli tsa bohlokoa bo bonyenyane haholo moo, eaba o re: ‘Kannete kea le bolella, Mohlolohali enoa, le hoja e le mofutsana, o akhetse ho hoholoanyane ho feta hoo bohle ba ho akhetseng. Etsoe bana bohle ba akhetse limpho ho tsoa botlallong ba bona, empa mosali enoa ho tsoa bohloking ba hae o akhetse mokhoa oohle oa ho iphelisa oo a neng a e-na le oona.’”—Luka 21:1-4.

Ha o lekanyetsoa ka chelete, monehelo ona o ne o le monyenyane, haholo-holo ha o bapisoa le ea barui. Boholo ba ba neng ba le teng bo ne bo ke ke ba mo hlokomela. Empa Jesu o ile a bona mohlolohali eo. O ile a lemoha maemo a hae. Jesu a mo bona ’me a khahloa ke eena.

Ketsahalong e ’ngoe ho ne ho ameha mosali ea ruileng, Maria. Ha Jesu a ntse a otlile ka lehlakore lijong, o ile a tšela oli e monko o monate e theko e boima haholo maotong a Jesu le hloohong ea hae. Ba bang ba ile ba nyatsa ketso ea hae, ba pheha khang ea hore oli eo e ka be e rekisitsoe ’me chelete ea eona e sebelisitsoe bakeng sa ho thusa mafutsana. Jesu o ile a arabela joang? O ile a re: “Mo tloheleng. Ke hobane’ng ha le leka ho mo etsetsa khathatso? O entse ketso e ntle ho ’na. Kannete ke re ho lōna, Kae kapa kae moo litaba tse molemo li boleloang lefatšeng lohle, seo mosali enoa a se entseng le sona se tla boleloa e le seo a hopoloang ka sona.”—Mareka 14:3-6, 9; Johanne 12:3.

Jesu ha aa ka a tletleba ka mokhoa o tšoaeang liphoso ka hore ebe oli ena ea bohlokoa ha ea sebelisoa ka tsela e ’ngoe. O ile a ananela pontšo e mosa ea lerato la Maria le tumelo. Ketsahalo ena e tlalehiloe ka Bibeleng e le khopotso ea ketso ea hae e ntle. Litlaleho tsena le tse ling li bontša hore Jesu e ne e le motho ea nang le kananelo e tebileng.

Haeba u mohlanka oa Molimo, u ka tiiseha hore Jehova Molimo le Jesu Kreste ba ananela ka ho teba boiteko ba hao ba ho ntšetsa pele borapeli bo hloekileng. Tsebo e joalo e re atametsa ho bona ’me e re susumelletsa ho ba etsisa ka ho ipaka re le ba lebohang.

Moea oa Satane oa ho Tšoaea Liphoso

Joale a re hlahlobeng mohlala oa motho ea iponahatsang e le ea sa leboheng—Satane Diabolose. Ho hloka teboho ha Satane ho ile ha tlatsetsa ho etelleng pele ha hae bofetoheli bo senyang khahlanong le Molimo.

Ha a se a hōlisitse moea oa ho tšoaea liphoso oa ho se khotsofale ka ho eena, Satane o ile a qala ho o jala ka ho ba bang. Nahana ka liketsahalo tsa tšimong ea Edene. Jehova o ne a bōpile monna le mosali ba pele, o ne a ba behile tšimong eo boemo ba eona e leng ba paradeise, ’me o ne a ba boleletse: ‘Ha e le lifate tsohle tsa tšimo, le tla li ja.’ Empa ho ne ho e-na le thibelo e le ’ngoe feela. Molimo o ile a re: “Ha e le sefate sa ho tseba botle le bobe, u se ke ua se ja, hobane mohla u se jang, u tla shoa.”—Genese 2:16, 17.

Leha ho le joalo, kapele Satane o ile a qholotsa botšepehi ba Jehova. Ho ea bohōleng bo itseng, o ne a batla ho etsa hore Eva e be ea sa leboheng Jehova hoo a neng a tla susumelletseha ho mo fetohela, joalokaha Satane ka boeena a ne a ile a mo fetohela. Satane o ile a botsa: “A efela Molimo o itse: Le se ke la ja lifate tsohle tsa tšimo na?” (Genese 3:1) Moelelo o hlakileng e ne e le hore Molimo o ne a hanela Eva ntho e ’ngoe ea bohlokoa, e neng e tla bula mahlo a hae ’me e etse hore a tšoane le Molimo. Ho e-na le ho iponahatsa e le ea lebohang litlhohonolofatso tse ngata tseo Jehova a neng a mo file tsona ka bongata, Eva o ile a qala ho lakatsa se neng se hanetsoe.—Genese 3:5, 6.

Liphello tse senyang li tsebahala haholo. Le hoja a fuoe lebitso Eva “kahobane e le ’m’a ba utloang bohle,” ka kutloisiso e ’ngoe e ile ea e-ba ’m’a bohle ba shoang. Batho bohle ba futsitse sebe se tlisang lefu ho Adama.—Genese 3:20; Baroma 5:12.

Etsisa Molimo le Kreste

Nahana ka phapang pakeng tsa Satane le Jesu. Satane o hlalosoa e le “moqosi oa barab’abo rōna . . . , ea ba qosang motšehare le bosiu ka pel’a Molimo oa rōna.” (Tšenolo 12:10) Jesu “o khona le ho pholosa ka ho feletseng ba atamelang Molimo ka eena, hobane o phela ka mehla ho ba kōpela ka tieo.”—Baheberu 7:25.

Satane o qosa bahlanka ba Molimo. Jesu oa ba ananela ’me o etsa kōpo e tiileng bakeng sa bona. E le baetsisi ba Kreste, Bakreste ba lokela ho leka ka matla ho batla se molemo e mong ho e mong, ba ananelane le ho nkana e le ba bohlokoa. Ha ba etsa joalo, ba iponahatsa e le ba lebohang ea behang mohlala o phahameng ka ho fetisisa oa kananelo, Jehova Molimo.—1 Bakorinthe 11:1.

[Setšoantšo se leqepheng la 17]

Jesu o ile a ananela ketso e ntle ea Maria