Na Ua Ipuella ho ba Bang?

‘Ha ke tsotelle hore na batho ba bang ba nahana eng!’ Motsotsoaneng oa khalefo kapa pherekano, mohlomong u iphumane u bua joalo ka sebete. Empa hang ha ho phasoloha ka bothoto joalo ho kokobetse, u ka ’na ua ikutloa u tšoenyehile. Hobane’ng? Hobane bongata ba rōna re hlile rea tsotella hore na ba bang ba nahana eng ka rōna.

RURI re lokela ho tsotella maikutlo a ba bang. Haholo-holo rōna joaloka Bakreste, basebeletsi ba Jehova Molimo ba khethiloeng, ke ka nepo re tšoenyehang ka hore na ba bang ba re talima joang. Etsoe, ho lefatše re “sebonoang ka lebaleng la liketsahalo.” (1 Bakorinthe 4:9) Ho 2 Bakorinthe 6:3, 4, re fumana keletso ena e utloahalang ea moapostola Pauluse: “Ka tsela leha e le efe ha re fane ka sesosa leha e le sefe sa ho khoptjoa, e le hore bosebeletsi ba rōna bo se ke ba fumanoa bo e-na le molato; empa ka tsela e ’ngoe le e ’ngoe re ipuella re le basebeletsi ba Molimo.”

Leha ho le joalo, ho ipuella ho ba bang ho bolela’ng? Na ho bolela ho iphahamisa kapa ho lebisa tlhokomelo e sa hlokahaleng ho rōna le matleng a rōna a ho etsa lintho? Che. Empa ho hloka ho sebelisa mantsoe a 1 Petrose 2:12 a reng: “Bolokang boitšoaro ba lōna bo le botle har’a lichaba, e le hore . . . ka lebaka la mesebetsi ea lōna e metle eo tsona e leng lipaki tsa eona tse boneng ka mahlo li ka tlotlisa Molimo.” Bakreste baa ipuella ka ho etsa hore boitšoaro ba bona bo bue! Qetellong, sena se tlisa thoriso ho Molimo, eseng ho rōna. Leha ho le joalo, ho ipuella ha rōna ho ba bang ho ka ba ha re tsoela molemo. A re hlahlobeng libaka tse tharo tseo u ka etsahalloang ke sena ho tsona.

U le ea Lebeletseng ho ba Molekane oa Lenyalo

Ka mohlala, nahana ka taba ea lenyalo. Ke mpho e tsoang ho Jehova Molimo, “eo lelapa le leng le le leng leholimong le lefatšeng le nang le lebitso ka lebaka la hae.” (Baefese 3:15) Mohlomong u lakatsa ho kena lenyalong ka letsatsi le leng. Haeba ho joalo, u ipuella ho isa kae u le ea lebeletseng ho ba molekane oa lenyalo? E, u iketselitse botumo ba mofuta ofe u le moroetsana kapa mohlankana oa Mokreste?

Linaheng tse ling malapa a tšoenyeha ka sena haholo. Ka mohlala, Ghana, ha batho ba babeli ba lakatsa ho nyalana, ke tloaelo hore bana ba lebeletseng ho nyalana ba bolelle batsoali ba bona. Ka lehlakoreng le leng, batsoali ba bolella ba lelapa. Joale, ba lelapa la habo mohlankana ba qala ho etsa lipatlisiso ka botumo ba moroetsana enoa ho baahisani. Ha batsoali ba kholisehile hore moroetsana enoa oa tšoaneleha, ba tla tsebisa lelapa la habo moroetsana ka morero oa mora oa bona oa ho nyala morali oa bona. Joale lelapa la habo moroetsana le etsa lipatlisiso tsa hore na mohlankana enoa o na le botumo bofe pele le lumela hore lenyalo lena le tsoele pele. Kahoo, maele a Seghana a re, “Botsa telejane pele u kena lenyalong.”

Ho thoe’ng ka linaha tsa Bophirimela, moo batho ka kakaretso ba lumelloang ho ikhethela balekane ba bona ba lenyalo? Le moo, e ka ba bohlale hore mohlankana kapa moroetsana oa Mokreste ea hōlileng tsebong a batle puello e tšepahalang ho ba tsebang hantle eo a lebeletseng hore e be molekane oa hae, ba kang batsoali kapa metsoalle e hōlileng tsebong. Ho latela buka ea Lekunutu la Thabo ea Lelapa, moroetsana a ka ’na a botsa: “‘Monna eo o na le botumo ba mofuta ofe? Metsoalle ea hae ke bo-mang? Na o bonahatsa boitšoaro? O tšoara batho ba hōlileng joang? O tsoa lelapeng la mofuta ofe? Na o sebelisana le lona? Boikutlo ba hae ke bofe ka chelete? Na o sebelisa lino tse tahang hampe? Na ke sefela-peloana, ebile o mabifi? O na le boikarabelo bofe ka phuthehong, hona o bo phetha joang? Na nka mo hlompha ka ho tebileng?’—Levitike 19:32; Liproverbia 22:29; 31:23; Baefese 5:3-5, 33; 1 Timothea 5:8; 6:10; Tite 2:6, 7.”a

Ka tsela e tšoanang mohlankana a ka rata ho batla boitsebiso bo mabapi le moroetsana ofe kapa ofe oa Mokreste eo a nahanang ho mo nyala. Ho latela Bibele, Boaze o ile a ba le thahasello e joalo ho Ruthe, e leng mosali eo a ileng a mo nyala hamorao. Ha Ruthe a ne a botsa: “Ho tla joang hore ke fumane kamohelo mahlong a hao hoo ke eloang hloko, le hoja ke le osele?” Boaze a re: “Ke ile ka tlaleheloa ka botlalo ka sohle seo u se entseng.” (Ruthe 2:10-12, NW) E, Boaze ha aa ka a sheba ka boeena feela hore Ruthe e ne e le mosali ea tšepahalang, ea inehetseng le ea sebetsang ka thata empa hape o ile a fumana litlhaloso tse khahlisang ho ba bang.

Ka ho tšoanang, boitšoaro ba hao bo tla ba le phello e itseng tabeng ea hore na ba bang ba u talima u le molekane oa lenyalo ea tšoanelehang. Ha e le hantle u ipuella joang ho ba bang tabeng ee?

U le Mohiruoa

Mosebetsing ke sebaka se seng seo ho sona ho ba le boitšoaro bo botle ho ka u ruisang molemo. Ho loanela mesebetsi ho ka ’na ha ipha matla. Basebetsi ba tsebahalang ka ho tella ba boholong, ba tloaetseng ho fihla ka mor’a nako le ba sa tšepahaleng hangata baa lelekoa. Lik’hamphani li ka ’na tsa leleka le basebetsi ba nang le phihlelo e le hore li fokotse litšenyehelo. Ha ba lahlehetsoeng ke mosebetsi ba batla mosebetsi o mocha, ba ka ’na ba hlokomela hore lik’hamphani li tla botsa bahiri ba bona ba pele hore li fumane hantle hore na ba sebetsa joang, ba na le maikutlo a mofuta ofe, le phihlelo efe. Bakreste ba bangata ba ’nile ba atleha ho ipuella ho bahiri ka boitšoaro ba bona bo bontšang tlhompho, ho apara ka tsela e itekanetseng, ponahalo ea bona e ntle le litšoaneleho tsa Bokreste tse ikhethang.

Botšepehi ke tšoaneleho e joalo—e etelletsoang pele ke bahiri ba bangata. Joaloka moapostola Pauluse, re batla ho “itšoara ka botšepehi linthong tsohle.” (Baheberu 13:18) K’hamphaning e ’ngoe ea lirafshoa Ghana, ho ile ha tlalehoa bosholu. Mookameli oa moo ho sebetsoang ka mechine e hloekisang tšepe, eo e leng Paki, ha aa ka a lelekoa ha ba bang ba ne ba lelekoa. Hobane’ng? Bookameli bo ne bo hlokometse botšepehi ba hae ho theosa le lilemo. O ne a boetse a tumme ka ho sebetsa ka thata le ho hlompha ba boholong. E, boitšoaro ba hae bo khabane bo ile ba sireletsa mosebetsi oa hae!

Mokreste a ka etsa lintho life tse ling ho ipuella mesebetsing? Ithute ho tseba hantle mosebetsi ofe kapa ofe oo u o fuoang. (Liproverbia 22:29) Khothala mosebetsing ’me u be seli. (Liproverbia 10:4; 13:4) Hlompha mohiri oa hao le mookameli oa hao. (Baefese 6:5) Ho fihla ka nako mosebetsing, ho tšepahala, tsebo ea mosebetsi le ho sebetsa ka thata ke litšoaneleho tseo bahiri ba li ananelang, ’me litšoaneleho tseo li ka u thusa ho fumana mosebetsi esita leha mesebetsi e fokola.

Litokelo ka Phuthehong

Hona joale ho feta leha e le neng, ho hlokahala banna ba hōlileng tsebong ba ka etellang pele ka phuthehong ea Bokreste. Ka lebaka lefe? Esaia o ile a profeta: “U atolose setša sa tente ea hao, u menolle masela a boaho ba hao.” (Esaia 54:2) Phethahatsong ea boprofeta bona, phutheho ea Jehova ea lefatše ka bophara e ntse e hōla.

Ka hona, haeba u monna oa Mokreste, u ka ipuella joang hore u e mong oa ba ka khetheloang ho sebeletsa boemong bo itseng? Nahana ka mohlala oa mohlankana Timothea. Luka o tlaleha hore Timothea “o ne a buuoa hantle ke barab’abo rōna Lystra le Ikoniamo.” E, ka lebaka la boitšoaro ba hae bo botle, mohlankana enoa o ile a ipuella ho ba bang metseng e ’meli e sa tšoaneng. Ka lebaka leo, Pauluse o ile a mema Timothea hore a sebetse le eena mosebetsing oa ho tsamaea.—Liketso 16:1-4.

Kajeno monna a ka “hahamalla boemo ba molebeli” joang ka tsela e loketseng, ea bomolimo? Ka sebele eseng ka ho etsa letšolo la ho khethoa empa ka ho hlaolela litšoaneleho tsa moea tse hlokahalang bakeng sa boikarabelo bo joalo. (1 Timothea 3:1-10, 12, 13; Tite 1:5-9) A ka boela a bontša hore o “lakatsa mosebetsi o motle” ka ho ba le karolo e feletseng mosebetsing oa ho bolela le ho etsa barutuoa. (Matheu 24:14; 28:19, 20) Ba ipuellang e le banna ba Bakreste ba nang le boikarabelo ba bontša thahasello ea sebele boiketlong ba bara babo bona ba moea. Ba latela keletso ea moapostola Pauluse e reng: “Arolelanang le bahalaleli ho ea ka tseo ba li hlokang. Latelang mokhoa oa kamohelo e mofuthu ea baeti.” (Baroma 12:13) Ka ho etsa lintho tse joalo, monna oa Mokreste ka sebele a ka ‘ipuella e le mosebeletsi oa Molimo.’

Ka Linako Tsohle

Ho ipuella ho ba bang ha ho bolele ho ikaketsa kapa ho ba “ba khahlisang batho.” (Baefese 6:6) Qetellong, ho bolela ho ipuella ho ’Mōpi oa rōna, Jehova Molimo, ka ho latela melao le litekanyetso tsa hae ka hloko. Haeba u ntlafatsa bomoea ba hao u bile u matlafatsa kamano ea hao le Jehova Molimo, ba bang ba tla hlokomela ntlafatso tseleng eo ka eona u sebelisanang le litho tsa lelapa la hao, basebetsi-’moho le uena le Bakreste-’moho le uena. Ba tla boela ba bone botsitso ba hao le ho leka-lekana, kahlolo ea hao e molemo, tsebo ea hao ea ho sebetsana le boikarabelo le boikokobetso ba hao. Sena se tla etsa hore ba u rate ba be ba u hlomphe ’me, habohlokoa le ho feta, se tla etsa hore u amoheloe ke Jehova Molimo hobane u ipuella ho ba bang!

[Mongolo o botlaaseng ba leqephe]

[Setšoantšo se leqepheng la 19]

Batsoali ba bangata ka bohlale ba batla boitsebiso bo mabapi le botumo ba motho eo mora kapa morali oa bona a thahasellang ho nyalana le eena

[Setšoantšo se leqepheng la 20]

Mor’abo rōna o ipuella bakeng sa litokelo tsa tšebeletso ka ho nahanela ba bang