Lulang le Falimehile, Tsoelang Pele ka Sebete!

Tlaleho ea Liboka Tse Khethehileng

KE MANG eo ka nepo a ka hanang hore re phela ‘linakong tse mahlonoko tseo ho leng thata ho sebetsana le tsona’? Re le Lipaki tsa Jehova, ha rea lokoloha likhatellong tsa ho phela “matsatsing a ho qetela.” (2 Timothea 3:1-5) Empa rea hlokomela hore batho ba hloka thuso. Ha ba utloisise se boleloang ke liketsahalo tsa lefatše. Ba hloka matšeliso le tšepo. Karolo ea rōna e ka sehloohong ke efe ha re thusa batho ba bang?

Re na le thōmo e fanoeng ke Molimo ea ho bolela litaba tse molemo tsa ’Muso oa Molimo o hlomiloeng. (Matheu 24:14) Ho hlokahala hore batho ba tsebe hore ’Muso ona oa leholimo ke oona feela tšepo bakeng sa moloko oa batho. Leha ho le joalo, molaetsa oa rōna ha o amoheloe hantle ka linako tsohle. Libakeng tse ling mosebetsi oa rōna o thibetsoe ’me barab’abo rōna ba ’nile ba hlorisoa. Leha ho le joalo, ha re tele. Ka tšepo e feletseng ho Jehova, re ikemiselitse ho lula re falimehile le ho tsoela pele ka sebete, re phatlalatsa litaba tse molemo re sa phetse.—Liketso 5:42.

Boikemisetso bona bo tiileng bo ile ba bonahala libokeng tse khethehileng tse ileng tsa tšoaroa ka October 2001. Ka Moqebelo oa la 6 October, ho ile ha tšoaroa seboka sa selemo le selemo sa Watch Tower Bible and Tract Society of Pennsylvania, Jersey City, New Jersey, Holong ea Kopano ea Lipaki tsa Jehova United States.a Letsatsing le hlahlamang, liboka tse tlatsetsang li ile tsa tšoareloa libakeng tse ’nè, tse tharo li ile tsa tšoareloa United States ’me se le seng sa tšoareloa Canada.b

Mantsoeng a hae a selelekela sebokeng sa selemo le selemo, molula-setulo Samuel F. Herd, setho sa Sehlopha se Busang sa Lipaki tsa Jehova, o ile a bua ka Pesaleme ea 92:1, 4 eaba o re: “Re lokela ho bontša teboho.” Ka sebele, ho ile ha fanoa ka mabaka a ho leboha litlalehong tse hlano tse tsoang lefatšeng ka bophara.

Litlaleho Tse Tsoang Hōle le Haufi

Mor’abo rōna Alfred Kwakye o ile a fana ka tlaleho ea khatelo-pele ea mosebetsi oa boboleli Ghana, eo pele e neng e tsejoa e le Gold Coast. Mosebetsi oa rōna o ile oa thibeloa naheng ena ka lilemo tse ngata. Mor’abo rōna Kwakye o hlalosa hore batho ba ne ba botsa: “Ke hobane’ng ha le thibetsoe? Le entse’ng?” Sena se ile sa bula menyetla ea ho fana ka bopaki. Ka 1991 ha thibelo e tlosoa, ho ne ho e-na le Lipaki tsa Jehova tse 34 421 Ghana. Ka August 2001, kakaretso e ne e le 68 152—keketseho ea karolo ea 98 lekholong. Ho ntse ho reroa kaho ea Holo ea Kopano e nang le litulo tse 10 000. Ka ho hlakileng, barab’abo rōna ba moea Ghana ba sebelisa tokoloho ea bona ea bolumeli hamolemo.

Ho sa tsotellehe merusu ea lipolotiki, barab’abo rōna Ireland ba kopanela ka mafolofolo tšebeletsong, ’me baa hlomphuoa ka lebaka la ho se nke lehlakore ha bona. Mohokahanyi oa Komiti ea Lekala Peter Andrews o ile a re Ireland e na le liphutheho tse 115 lipotolohong tse tšeletseng. Mor’abo rōna Andrews o ile a pheta phihlelo ea Liam, moshanyana ea lilemo li leshome ea sa tšabeng ho paka sekolong. Liam o ile a tsamaisetsa liithuti-’moho le eena tse 25 le tichere ea hae Buka ea ka ea Lipale tsa Bibele, e hatisitsoeng ke Lipaki tsa Jehova. Liam o ne a batla ho kolobetsoa, empa motho e mong o ile a mo botsa hore na ha a monyenyane haholo. Liam o ile a araba: “Ntho e etsang hore ke tšoanelehe e lokela ho ba lerato la ka ho Jehova eseng lilemo tsa ka. Kolobetso ea ka e tla bontša hore na ke mo rata hakae.” Pakane ea Liam ke ho ba moromuoa.

Ka 1968 ho ne ho e-na le bahoeletsi ba litaba tse molemo ba 5 400 Venezuela. Empa mohokahanyi oa Komiti ea Lekala, Stefan Johansson o re hona joale ho na le ba 88 000. Hape ho na le monyetla oa keketseho e ’ngoe hobane ba fetang 296 000 ba ile ba e-ba teng Sehopotsong ka 2001. Ka December 1999, lipula tsa litloebelele li ile tsa baka seretse se ileng sa bolaea batho ba ka bang 50 000, ho kopanyelletsa le Lipaki tse ngata. Holo e ’ngoe ea ’Muso e ile ea tlala seretse ho fihlela ho setse halofo ea mithara ho fihla marulelong. Ha e mong a etsa tlhahiso ea hore ho tloheloe mohaho oo, barab’abo rōna ba ile ba re: “Le khale! Ena ke Holo ea rōna ea ’Muso, ’me ha re batle ho e tlohela hona joale.” Ba ile ba qala ho sebetsa, ba tlosa seretse se sengata le majoe le lithōle tse ling. Mohaho o ile oa tsosolosoa, ’me barab’abo rōna ba re hona joale o motle ho feta pele ho koluoa!

Mohokahanyi oa Komiti ea Lekala, Mor’abo rōna Denton Hopkinson o re ho na le lipuo le maleme a 87 Philippines. Selemong se fetileng sa tšebeletso, Phetolelo ea Lefatše le Lecha ea Mangolo a Halalelang e feletseng e ile ea lokolloa ka lipuo tse tharo tse khōlō tsa naha—e leng Secebuano, Seiloko le Setagalog. Mor’abo rōna Hopkinson o ile a pheta phihlelo ea moshanyana ea lilemo li robong ea ileng a bala buka ea Good News—To Make You Happy, e hatisitsoeng ke Lipaki tsa Jehova. O ile a fumana lingoliloeng tse ling lekaleng, tseo le tsona a ileng a li bala, empa lelapa labo le ne le mo hanyetsa. Lilemo tse ngata hamorao ha a le sekolong sa bongaka, o ile a iteanya le lekala ’me a kōpa thuto ea Bibele. O ile a kolobetsoa ka 1996 ’me ka potlako o ile a kenela tšebeletso ea nako e tletseng. Hona joale o sebeletsa le mosali oa hae ofising ea lekala.

Mohokahanyi oa Komiti ea Lekala Ronald Parkin o hlalosa hore ‘Puerto Rico e mosebetsing oa “thōmelo ea Lipaki.”’ Ho na le bahoeletsi ba ka bang 25 000 sehlekehlekeng sena, ’me palo ena ha ea fetoha ka lilemo tse ngata. Hobane’ng? Ho hakanyetsoa hore Puerto Rico “e romela” bahoeletsi ba ka bang 1 000 ka selemo United States, ba bang ba bona ba falla ka mabaka a moruo. Mor’abo rōna Parkin o ile a bua ka qeto ea bohlokoa ea lekhotla e amang Luis, Paki e lilemo li 17 e neng e e-na le kankere ea mali. Kaha Luis o ile a hana mali, taba ea hae e ile ea isoa khotla. Moahloli o ne a batla ho bua le eena ka ho toba, kahoo o ile a mo etela sepetlele. Luis o ile a mo botsa: “Ke ka lebaka la’ng hore ebe ha ke entse tlōlo e tebileng ea molao, le tla nkahlola joaloka motho e moholo, empa ha ke batla ho mamela Molimo le ntšoara joaloka ngoana?” Moahloli o ile a kholiseha hore ke ngoana ea hōlileng kelellong ea khonang ho iketsetsa qeto.

Ka mor’a litlaleho tse tsoang linaheng tse hōle, Harold Corkern, oa Komiti ea Lekala ea United States, o ile a buisana le bahlanka ba Jehova ba bane ba nako e telele. Arthur Bonno o qetile lilemo tse 51 a le tšebeletsong ea nako e tletseng ’me hona joale o sebeletsa Komiting ea Lekala ea Ecuador. Angelo Catanzaro o qetile lilemo tse 59 tšebeletsong ea nako e tletseng, boholo ba tsona e le molebeli ea tsamaeang. Richard Abrahamson o ile a fuoa lengolo Sekolong sa Gileade ka 1953, ’me o ile a ba le tokelo ea ho hlokomela mosebetsi Denmark ka lilemo tse 26 pele a khutlela Bethele e Brooklyn. Qetellong, bohle ba ile ba thabela ho mamela Carey W. Barber ea lilemo li 96. Mor’abo rōna Barber o kolobelitsoe ka 1921, ’me o se a qetile lilemo tse 78 tšebeletsong ea nako e tletseng ’me e bile setho sa Sehlopha se Busang ho tloha ka 1978.

Lipuo Tse Susumetsang

Seboka sa selemo le selemo se ile sa kopanyelletsa lipuo tse ’maloa tse susumetsang motho hore a nahane ka botebo. Mor’abo rōna Robert W. Wallen o ile a bua sehloohong se reng “Batho Bakeng sa Lebitso la Hae.” Re batho bakeng sa lebitso la Molimo, ’me re fumanoa linaheng tse fetang 230. Jehova o re file “bokamoso le tšepo.” (Jeremia 29:11) Re lokela ho tsoela pele re phatlalatsa ’Muso oa Molimo, re fana ka molaetsa o hlollang oa matšeliso le khothatso. (Esaia 61:1) Mor’abo rōna Wallen o ile a phetha ka ho re, “E se eka letsatsi le leng le le leng, re ka tsoela pele re phelela lebitso leo re bitsoang ka lona, la Lipaki tsa Jehova.”—Esaia 43:10.

Karolo ea ho qetela ea lenaneo e bile neheletsano ea litho tse tharo tsa Sehlopha se Busang. E ne e e-na le sehlooho se reng “Joale ke Nako ea ho Lula re Falimehile, ho Ema re Tiile, le ho ba Matla.”—1 Bakorinthe 16:13.

Pele, Mor’abo rōna Stephen Lett o ile a bua sehloohong se reng “Lulang le Falimehile Kaha Metsotso e se e Jele Babeli.” Mor’abo rōna Lett o ile a hlalosa hore boroko ba sebele ke mpho. Boa re hlasimolla. Leha ho le joalo, ha ho mohla boroko ba moea bo leng molemo. (1 Bathesalonika 5:6) Joale, ke joang re ka lulang re falimehile moeeng? Mor’abo rōna Lett o ile a bolela “lipilisi” tse tharo tsa moea: (1) E-ba le ho hongata hoo u ka ho etsang mosebetsing oa Morena. (1 Bakorinthe 15:58) (2) Ela hloko tlhoko ea hao ea moea. (Matheu 5:3) (3) Amohela keletso e thehiloeng Bibeleng e le hore u etse ka bohlale.—Liproverbia 13:20.

Mor’abo rōna Theodore Jaracz o ile a fana ka puo e susumetsang e nang le sehlooho se reng “Ema U Tiile Tlas’a Teko.” Ha Mor’abo rōna Jaracz a bua ka Tšenolo 3:10, o ile a botsa: “‘Hora ea teko’ ke efe?” Teko eo e tla “letsatsing la Morena,” e leng nako eo re phelang ho eona. (Tšenolo 1:10) Teko ena e ama tseko ea bohlokoa—na re emela ’Muso oa Molimo o thehiloeng kapa tsamaiso e khopo ea lintho ea Satane? Ho fihlela hora eo ea teko e fela, re tlamehile ho tobana le liteko kapa mathata. Na re tla lula re tšepahala ho Jehova le mokhatlo oa hae o hlophisitsoeng? Mor’abo rōna Jaracz o ile a re, ‘Re tla lokela ho bontša botšepehi bo joalo re le batho ka bomong.’

Qetellong, Mor’abo rōna John E. Barr o ile a bua sehloohong se reng “E-ba Matla U le Motho oa Moea.” Ha a bua ka Luka 13:23-25, o ile a bolela hore re lokela ho ikitlaetsa “ho kena ka monyako o moqotetsane.” Ba bangata baa hlōleha hobane ha ba mafolofolo ka ho lekaneng hore ba be matla. E le hore re be Bakreste ba hōlileng ka ho feletseng, re lokela ho ithuta ho sebelisa melao-motheo ea Bibele likarolong tsohle tsa bophelo. Mor’abo rōna Barr o ile a bua ka matla: “Ke kholisehile hore le tla lumela hore joale ke nako (1) ea ho beha Jehova ka pele-pele; (2) ea ho ba matla, le (3) ea ho ikitlaetsa ho etsa thato ea Jehova. Ka tsela ena re tla khona ho kena ka monyako o moqotetsane o isang bophelong bo hlollang bo sa feleng.”Ha seboka sa selemo le selemo se haba ho fela, ho ne ho ntse ho setse potso e le ’ngoe: Temana ea selemo bakeng sa selemo sa tšebeletso sa 2002 ke efe? Potso eo e ile ea arabeloa letsatsing le latelang.

Seboka se Tlatsetsang

Batho ba ne ba lebeletse lintho tse khōlō hoseng ka Sontaha ha lenaneo la seboka se tlatsetsang le qala. Le ile la qala ka kakaretso ea thuto ea beke eo ea Molula-Qhooa, e ileng ea lateloa ke puo e khutšoanyane e bontšang tse ling tsa lintlha tsa sehlooho tsa seboka sa selemo le selemo. Ka mor’a moo, bohle ba ile ba thaba ha ba utloa puo e thehiloeng temaneng ea selemo sa 2002: “Tloong ho ’na, . . . ’me ke tla le khatholla.” (Matheu 11:28) Puo ena e ne e thehiloe lihloohong tse ithutoang tse ileng tsa hlaha hamorao tokollong ea Molula-Qhooa oa December 15, 2001.

Ka mor’a moo, ba bang ba neng ba ile Likopanong tse khethehileng tsa “Mesuoe ea Lentsoe la Molimo” Fora le Italy ka August 2001 ba ile ba fana ka liphihlelo.c Qetellong, e le ntlha e khōlō lenaneong la letsatsi leo, libui tse etileng tse tsoang Bethele e Brooklyn li ile tsa fana ka lipuo tse peli tsa ho qetela.

Puo ea pele e ne e e-na le sehlooho se reng “Ho Tšepa Jehova ka Sebete Linakong Tsena Tse Mahlonoko.” Sebui se ile sa tšohla lintlha tse latelang tsa bohlokoa: (1) Kamehla ho ’nile ha hlokahala hore batho ba Molimo ba tšepe Jehova ka sebete. Bibele e na le mehlala e mengata ea ba ileng ba bontša sebete le tumelo ho sa tsotellehe khanyetso. (Baheberu 11:1–12:3) (2) Jehova o re fa lebaka le utloahalang la hore re mo tšepe ka ho feletseng. Mesebetsi ea hae le Lentsoe la hae li re tiisetsa hore o hlokomela bahlanka ba hae le hore le ka mohla a ke ke a ba lebala. (Baheberu 6:10) (3) Haholo-holo kajeno ho hlokahala sebete le tšepo. Re ‘hloiloe,’ joalokaha Jesu a boletse esale pele. (Matheu 24:9) E le hore re mamelle, ho hlokahala hore re itšetlehe ka Lentsoe la Molimo, re tšepe hore moea oa hae o ho rōna, ’me re be sebete ho tsoela pele re phatlalatsa litaba tse molemo. (4) Mehlala e bontša hore hona joale re tobane le khanyetso. Bohle ba ile ba angoa ka botebo ke ha sebui se bolela mathata ao barab’abo rōna ba a mamellang Armenia, Fora, Georgia, Kazakhstan, Russia le Turkmenistan. Ka sebele, ena ke nako ea ho bontša sebete le ho tšepa Jehova!

Sebui sa ho qetela se ile sa tšohla sehlooho se reng “Ho Tsoela Pele re le Bonngoeng le Mokhatlo o Hlophisitsoeng oa Jehova.” Puo ena e ile ea akaretsa lintlha tse ngata tse nakong. (1) Khatelo-pele ea batho ba Jehova e bonoa lefatšeng ka bophara. Mosebetsi oa rōna oa boboleli le likopano tsa rōna li etsa hore batho ba re thahaselle. (2) Jehova o thehile mokhatlo o hlophisitsoeng o bonngoeng. Ka 29 C.E., Jesu o ile a tlotsoa ka moea o halalelang ka morero oa hore a tlise “lintho tsohle”—e leng ba nang le tebello ea ho phela leholimong esita le ba nang le tšepo ea ho phela lefatšeng—lelapeng la Molimo le bonngoeng. (Baefese 1:8-10) (3) Likopano ke pontšo e hlaheletseng ea bonngoe ba machaba. Sena se ile sa totobala ka ho hlakileng likopanong tse khethehileng tse neng li tšoeroe Fora le Italy selemong se fetileng ka August. (4) Ho ile ha amoheloa qeto e susumetsang Fora le Italy. Sebui se ile sa tšohla lintlha tse seng kae ho tsoa qetong eo. Qeto e feletseng e hlaha tlaase mona.

Ha puo ea ho qetela e fela, sebui sa moeti se ile sa bala tsebiso e amang maikutlo e entsoeng ke Sehlopha se Busang. Karolo e ’ngoe ea eona e ne e re: “Joale ke nako ea ho lula re falimehile le ho lula re lebetse, re lemoha kamoo liketsahalo tsa lefatše li tsoelang pele kateng. . . . Re lakatsa ho le tsebisa hore Sehlopha se Busang se amehile ka lōna ka lerato le ka batho bohle ba Molimo. E se eka a ka le hlohonolofatsa ka ho enneng ha le etsa thato ea hae ka moea oohle.” Hohle batho ba Jehova ba ikemiselitse ho lula ba falimehile linakong tsena tse mahlonoko le ho tsoela pele ka sebete le mokhatlo o hlophisitsoeng oa Jehova o bonngoeng.

[Mongolo o botlaaseng ba leqephe]

[Lebokose/Litšoantšo tse leqepheng la 29-31]

Qeto

Ka August 2001, ho ile ha tšoaroa Likopano tse khethehileng tsa “Mesuoe ea Lentsoe la Molimo” Fora le Italy. Likopanong tseo, ho ile ha fanoa ka qeto e susumetsang. Qeto ena e hlaha tlaase mona.

“RE LE LIPAKI TSA JEHOVA, rōna kaofela ba kopaneng Kopanong ena ea ‘Mesuoe ea Lentsoe la Molimo’ re rupetsoe ka thuto ea bohlokoa ka ho fetisisa. Mohloli oa thuto ena o boletsoe ka ho hlaka. Thuto ena ha e simolohe ho motho. E tsoa ho Ea hlalosoang ke moprofeta oa boholo-holo Esaia hore ke ‘Morupeli e Moholo.’ (Esaia 30:20) Hlokomela khopotso ea Jehova joalokaha e boletsoe ho Esaia 48:17: ‘’Na, Jehova, ke Molimo oa hao, ke ’na Ea u rutang hore u itsoele molemo, Ea etsang hore u tsamaee tseleng eo u lokelang ho tsamaea ka eona.’ O finyella see joang? Tsela e ka sehloohong ke ka buka e fetoletsoeng ’me ea abuoa ka ho fetisisa lefatšeng, Bibele, moo re bolelloang ka ho hlaka: ‘Lengolo lohle le bululetsoe ke Molimo ’me le molemo.’—2 Timothea 3:16.

“Kajeno, moloko oa batho o leqemeng la thuto e joalo e molemo. Ke hobane’ng ha ho ka boleloa joalo? Ha batho ba nahanang ba hlahloba boemo ba lefatše lee bo ntseng bo fetoha, le bo tsietsang, ekaba ba re’ng? Ba bua sena: Le hoja ba limilione ba rutiloe ke litsamaiso tsa lefatše tsa thuto, ho na le khaello e utloisang bohloko ea lintho tsa bohlokoa le ho hlōleha ho khetholla pakeng tsa se nepahetseng le se fosahetseng. (Esaia 5:20, 21) Ho se tsebe Bibele ho atile. Le hoja theknoloji e etsa hore ho be bonolo ho fumana boitsebiso bo bongata ka lik’homphieutha, na ho na le likarabo tsa lipotso tsa bohlokoa tse kang, Morero oa bophelo ke ofe? Re lokela ho utloisisa liketsahalo tsa nakong ea rōna joang? Na ho na le tšepo e tiileng bakeng sa bokamoso? Na ho tla ke ho etsahale hore khotso le tšireletseho e be lintho tsa sebele? Ho feta moo, lilaebraring ho fumanoa libuka tse limilione tsa litšupiso tse buang ka taba e ’ngoe le e ’ngoe e etsoang ke motho. Ho sa tsotellehe sena, moloko oa batho o pheta liphoso tsa nakong e fetileng. Tlōlo ea molao e jele setsi. Mafu ao ho neng ho nahanoa hore a ntšitsoe ka metso a boea sekoele, ha a mang a kang AIDS, a ata ka mokhoa o makatsang. Bophelo ba lelapa bo senyeha ka lebelo le tšosang. Tšilafalo e senya tikoloho. Bokhukhuni le libetsa tse bolaeang batho ba bangata li sokela khotso le tšireletseho. Mathata a ntse a hloa manolo holimo. Karolo ea rōna e nepahetseng ke efe ho thuseng batho ba bang linakong tsee tse mahlonoko? Na ho na le thuto e hlalosang lebaka la ho tsieleha ha moloko oa batho ’me e sa bontše feela tsela e isang bophelong bo molemo ka ho fetisisa hona joale empa hape e fana ka tšepo e khanyang, e tiileng bakeng sa bokamoso?

“Thōmo ea rōna ea Mangolo ke ho ‘ea ’me re etse batho ba lichaba tsohle barutuoa, re ba rute ho boloka lintho tsohle tseo Kreste a re laetseng tsona.’ (Matheu 28:19, 20) Thōmo ena e ile ea ntšoa ke Jesu Kreste ka mor’a lefu la hae le tsoho, ha a fuoa bolaoli bohle leholimong le lefatšeng. E feta mesebetsi eohle e khothaletsoang ke batho. Ho latela pono ea Molimo, thōmo ea rōna e lebisitseng tlhokomelo litlhokong tsa moea tsa ba lapetseng ho loka, e tla pele. Re na le mabaka a utloahalang a Mangolo a hore re nke thōmo ena ka botebo.

“Sena se hloka hore re boloke mosebetsi ona o le ka pele bophelong ba rōna. Ka tlhohonolofatso le thuso ea Molimo, mosebetsi ona o tla etsoa, ho sa tsotellehe litšusumetso tse ngata tse ferekanyang, litšitiso le khanyetso e tsoang ho batho ba bolumeli le ba lipolotiki, e reretsoeng ho sitisa khatelo-pele ea lenaneo lena la thuto la lefatšeng ka bophara. Re kholisehile ’me re na le tumelo ea hore mosebetsi ona o tla tsoela pele ho atleha ’me o fihle sephethong sa oona se seholo. Ke hobane’ng ha re ka kholiseha hakaalo? Hobane Morena Jesu Kreste o ile a tšepisa hore o tla ba le rōna tšebeletsong ena ea rōna e fanoeng ke Molimo ho fihlela bofelong ba tsamaiso ena ea lintho.

“Nako e se e lekane motinyane bakeng sa moloko oa batho o mahlomoleng. Thōmo ea rōna ea hona joale e lokela ho phethoa pele bofelo bo tla. Kahoo, re le Lipaki tsa Jehova, re etsa qeto ea hore:

“Ntlha ea pele: Re le basebeletsi ba inehetseng, re ikemiselitse ho beha lithahasello tsa ’Muso pele bophelong ba rōna le ho tsoela pele re hōla moeeng. E le hore re finyelle sena, thapelo ea rōna e lumellana le mantsoe a ho Pesaleme ea 143:10: ‘Nthute ho etsa thato ea hao, etsoe u Molimo oa ka.’ Sena se hloka hore re be liithuti tse hloahloa, re leke ho bala Bibele letsatsi le leng le le leng, re be le thuto ea botho ’me re etse lipatlisiso. E le hore tsoelo-pele ea rōna e bonahale ho batho bohle, re tla etsa boiteko bohle bo khonehang hore re lokisetse re be re rue molemo ka botlalo thutong ea puso ea Molimo e fanoang libokeng tsa phutheho, likopanong tsa potoloho le tsa setereke, tsa sechaba le tsa machaba.—1 Timothea 4:15; Baheberu 10:23-25.

“Ntlha ea bobeli: E le hore re rutoe ke Molimo, re tla iphepa feela tafoleng ea hae ’me ka hloko re ele hloko temoso ea Bibele mabapi le lithuto tse khelosang tsa bademona. (1 Bakorinthe 10:21; 1 Timothea 4:1) Re tla ela hloko ka ho khetheha hore re qobe lintho tse kotsi, tse kopanyelletsang mashano a bolumeli, mabaka a sa utloahaleng, boitšoaro bo soabisang ba ho kopanela liphate, seoa sa litšoantšo tsa bootsoa, boithabiso bo hlephisang boitšoaro le ntho e ’ngoe le e ’ngoe e seng ‘tumellanong le thuto e phelisang hantle.’ (Baroma 1:26, 27; 1 Bakorinthe 3:20; 1 Timothea 6:3; 2 Timothea 1:13) Ka lebaka la ho hlompha ‘limpho tseo e leng banna,’ ba tšoanelehang hore ba rute lintho tse hahang, ka sebele re tla hlompha boiteko ba bona ’me ka pelo eohle re sebelisane le bona ho bolokeng litekanyetso tsa Lentsoe la Molimo tse hloekileng le tse lokileng boitšoarong le moeeng.—Baefese 4:7, 8, 11, 12; 1 Bathesalonika 5:12, 13; Tite 1:9.

“Ntlha ea boraro: Re le batsoali ba Bakreste, boiteko ba rōna bo tlohang pelong e tla ba ho rupela bana ba rōna eseng feela ka lentsoe empa hape le ka mohlala. Kameho ea rōna e ka sehloohong ke ho ba thusa ho tloha boseeng hore ba ‘ithute lingoliloeng tse halalelang tse tla ba hlalefisetsa poloko.’ (2 Timothea 3:15) Re tla lula re hopola hore ho ba hōlisetsa taeong le kelellong e laoloang ke Jehova ho tla ba fa monyetla o molemo ka ho fetisisa oa ho latsoa tšepiso ea Molimo ea hore ‘ba tla tsoella hantle ’me ba phele ka nako e telele lefatšeng.’—Baefese 6:1-4.

“Ntlha ea bone: Ha re tobana le matšoenyeho kapa mathata a tebileng, pele ho tsohle, re tla ‘tsebisa Molimo likōpo tsa rōna tse matla,’ re kholisehile hore ‘khotso ea Molimo e fetang monahano oohle’ e tla re sireletsa. (Bafilipi 4:6, 7) Kaha re kene tlas’a joko ea Kreste, re tla khatholoha. Kaha rea tseba hore Molimo oa re hlokomela, re ke ke ra ba leqe ho lahlela matšoenyeho a rōna ho eena.—Matheu 11:28-30; 1 Petrose 5:6, 7.

“Ntlha ea bohlano: E le ha re bontša teboho ea rōna ho Jehova bakeng sa tokelo ea ho ba mesuoe ea Lentsoe la hae, re tla nchafatsa boiteko ba rōna ba ho ‘tšoara lentsoe la hae la ’nete ka nepo’ le ‘ho phetha bosebeletsi ba rōna ka botlalo.’ (2 Timothea 2:15; 4:5) Kaha re lemoha ka botlalo se amehang, takatso ea rōna e tlohang pelong ke ho batla ba tšoanelehang le ho hlaolela peō e jetsoeng. Ho feta moo, re tla ntlafatsa mokhoa oa rōna oa ho ruta ka hore re khanne lithuto tse eketsehileng tsa mahae tsa Bibele ka katleho. Sena se tla etsa hore re lumellane ka ho eketsehileng le thato ea Molimo ea hore ‘batho ba mefuta eohle ba pholohe ’me ba fihle tsebong e nepahetseng ea ’nete.’—1 Timothea 2:3, 4.

“Ntlha ea botšelela: Ho pholletsa le lekholo le fetileng la lilemo ho fihlela ho lena, Lipaki tsa Jehova linaheng tse ngata li hanyelitsoe tsa ba tsa hlorisoa ka mekhoa e sa tšoaneng. Empa Jehova o bontšitse hore o na le rōna. (Baroma 8:31) Lentsoe la Hae le sa foseng le re tiisetsa hore ‘sebetsa leha e le sefe se tla etsoa khahlanong le rōna’ ho sitisa, ho fokotsa, kapa ho emisa mosebetsi oa rōna oa ho bolela ka ’Muso le oa ho ruta se ke ke sa atleha. (Esaia 54:17) Ebang ke nakong e tšoanelang kapa e likhathatso, re ke ke ra khaotsa ho bua ’nete. Boikemisetso ba rōna ke ho phetha thōmo ea rōna ea boboleli le ho ruta, ka potlako. (2 Timothea 4:1, 2) Pakane ea rōna ke ho bolella batho ba lichaba tsohle litaba tse molemo tsa ’Muso oa Molimo ka hohle kamoo ho ka khonehang. Kahoo, ba tla tsoela pele ba fumana monyetla oa ho ithuta ka tokisetso ea ho fumana bophelo bo sa feleng lefatšeng le lecha le lokileng. Re le letšoele le kopaneng la mesuoe ea Lentsoe la Molimo, boikemisetso ba rōna ke ho tsoela pele ho latela mohlala oa Mosuoe e Moholo, Jesu Kreste, le ho bonahatsa litšoaneleho tsa hae tsa bomolimo. Re tla etsa sena sohle tlotlisong le thorisong ea Morupeli oa rōna e Moholo le Monehi-Bophelo, Jehova Molimo.

“Bohle ba leng teng kopanong ena ba lumelang hore re amohele qeto ena, ka kōpo e-reng E!”

Ha potso ena e phethang ea qeto e ne e botsoa ba 160 000 ba kopaneng likopanong tse tharo Fora le ba 289 000 ba libakeng tse robong Italy, ho ile ha utloahala mohoo ha ba re “E” ka mantsoe a matla ka lipuo tse ngata tse neng li buuoa ke ba tlileng kopanong.