Na U ka Atolosa Lerato la Hao?

KETANE e tlammeng ankora ea sekepe e lokela ho tiea e le hore sekepe se se ke sa hoholeha. Leha ho le joalo, seo se ka etsahala hafeela tšepe e ’ngoe le e ’ngoe ea ketane eo e tiile ’me e le matla. Ho seng joalo ketane eo e tla khaoha.

Ho ka boleloa se tšoanang le ka phutheho ea Bokreste. E le hore phutheho e ka ba e matla le e phetseng hantle, litho tsohle li lokela ho ba ngatan’a ’ngoe. Li momahanngoa ke eng? Ke lerato, e leng tšusumetso e matla ka ho fetisisa e etsang hore ho be le bonngoe. Ha ho makatse hore ebe Jesu Kreste o ile a re ho barutuoa ba hae: “Ke le fa taelo e ncha, hore le ratane; le lōna le ratane feela joalokaha ke le ratile. Bohle ba tla tseba ka sena hore le barutuoa ba ka, haeba le e-na le lerato har’a lōna.” Ka sebele, Bakreste ba ’nete ba ratana ka lerato le fetang ho ba botsoalle le ho hlomphana feela. Ba hlaolela lerato le nang le boitelo.—Johanne 13:34, 35.

Ho Ananela Balumeli-’moho le Rōna

Liphutheho tse ngata li na le batho ba lilemo, merabe, lichaba, litso, lipuo le maemo a fapa-fapaneng. Setho ka seng se na le lintho tseo se li ratang le tseo se sa li rateng, lintho tseo se li lebeletseng le tseo se amehileng ka tsona, ’me hangata se seng le se seng se na le moroalo oo se o jereng—ebang ke ho kula kapa mathata a lichelete. Maemo ana a fapa-fapaneng a ka ’na a beha bonngoe ba Bokreste kotsing. Kahoo, ke’ng se ka re thusang hore re atolose lerato la rōna ’me re lule re le ngatan’a ’ngoe ho sa tsotellehe phephetso eo? Ho ananela bohle ka phuthehong e le kannete ho tla re thusa ho ratana ka lerato le tebileng.

Leha ho le joalo, ho ananela motho ho bolela’ng? Ho ea ka The New Shorter Oxford English Dictionary, “ho ananela” ho bolela “ho hlokomela kapa ho ameha ka ntho e itseng; ho e nka e le ea bohlokoa ka ho loketseng; ho talima ntho e le ea bohlokoa kapa e le ntle; ho ba motlotlo ka eona.” Haeba re ananela balumeli-’moho le rōna, hona ho bolela hore re ameha ka lintho tseo ba li hlokang, re ba nka e le ba bohlokoa, re lemoha botle ba bona, ’me re motlotlo hore ebe re kopanela le bona borapeling. Ka lebaka leo, lerato la rōna ho bona lea eketseha. Ho hlahloba hakhutšoanyane seo moapostola Pauluse a ileng a se ngolla Bakreste ba lekholong la pele la lilemo ba Korinthe, ho tla re thusa ho bona hore na ke joang re ka bontšang lerato la Bokreste ka ho feletseng.

Bakorinthe ba ne ba “Patisane Hoo ho Seng Sebaka”

Pauluse o ile a ngolla Bakorinthe lengolo la pele ka 55 C.E. ’me a ba ngolla la bobeli pele ho feta selemo. Mantsoe a hae a bontša hore ba bang ka phuthehong ea Korinthe ba ne ba sa ananele balumeli-’moho le bona. Pauluse o ile a hlalosa boemo boo ka mantsoe ana: “Melomo ea rōna e le ahlametse, Bakorinthe, lipelo tsa rōna li atolohile. Ha lea patisana ka ho rōna hoo ho seng sebaka, empa le patisane hoo ho seng sebaka leratong la lōna le mofuthu.” (2 Bakorinthe 6:11, 12) Pauluse o ne a bolela’ng ha a hlalosa hore ba ne ba “patisane hoo ho seng sebaka”?

O ne a bolela hore lipelo tsa bona li ne li patisane ebile li se na kutloelo-bohloko. Setsebi se seng sa Bibele se nahana hore lerato la Bakorinthe ho Pauluse le ne le “thibeloa ke mathata a bakoang ke lipelaelo tse se nang mabaka . . . le ho nka hore ba tšoeroe ka leeme.”

Hlokomela keletso eo Pauluse a ileng a fana ka eona: “E le puseletso—ke bua joalokaha ho buuoa le bana—le lōna, le atolohe.” (2 Bakorinthe 6:13) Pauluse o ile a khothalletsa Bakorinthe hore ba atolose lerato leo ba ratang balumeli-’moho le bona ka lona. Sena se ne se tla hloka hore ba susumetsoe ke pono e ntle le kutloelo-bohloko, ho e-na le ho susumetsoa ke lipelaelo le lintho tsa bosaoana.

Ho Atolosa Lerato la Rōna Kajeno

Kajeno hoa thabisa ho bona kamoo barapeli ba ’nete ba Molimo ba etsang boiteko bo matla kateng ba ho atolosa lerato leo ba ratanang ka lona. Ke ’nete hore ho hlokahala hore re etse boiteko hore re atolose lerato la rōna. Hase ntho e lokelang ho buuoa ka molomo feela. Ho atolosa lerato la rōna ho hloka hore re itšoare ka tsela e fapaneng le ea batho ba sa pheleng ka melao-motheo ea Bibele. Hangata batho ba joalo ha ba na taba le batho ba bang. Ha ba tsotelle ba bang, ha ba hlomphe ebile baa phoqa. Ka lebaka leo, le ka mohla re se ke ra itumella hore re susumetsoe ke maikutlo a joalo. E ne e tla ba ho soabisang hakaakang ha lerato la rōna le ne le ka sitisoa ke lipelaelo, joaloka la Bakorinthe! Hona ho ka etsahala haeba re potlakela ho bona liphoso tsa mor’abo rōna oa Mokreste empa re lieha ho hlokomela litšobotsi tsa hae tse ntle. Ho ka boela ha etsahala haeba lerato la rōna le patisane hoo motho e mong a se nang sebaka lipelong tsa rōna hobane e le oa setso se fapaneng.

Ho fapana le hoo, mohlanka oa Molimo ea atolosang lerato la hae o ananela balumeli-’moho le eena e le kannete. O ba nka e le ba bohlokoa, o ba siela seriti ’me o ameha ka lintho tseo ba li hlokang. Esita leha a e-na le lebaka le utloahalang la ho belaela, o labalabela ho ba tšoarela ’me o hana ho boloka sekhopi. Ho e-na le hoo, o ipolella hore balumeli-’moho le eena ha ba etse lintho ka moea o mobe. Kutloelo-bohloko e mo thusa ho bontša lerato la mofuta oo Jesu a neng a nahanne ka oona ha a bolela tjena esale pele: “Bohle ba tla tseba ka sena hore le barutuoa ba ka, haeba le e-na le lerato har’a lōna.”—Johanne 13:35.

Atolosa Lerato la Hao ’me U be le Metsoalle e Mecha

Lerato le tebileng le tla re nolofalletsa hore re se ke ra ikamahanya le metsoalle ea rōna feela empa re tloaelane le batho bao re sa atamelanang hakaalo le bona ka phuthehong. Ebe batho bao e ka ba bo-mang? Bara le barali ba bang babo rōna ba Bakreste ba lihlong kapa ka mabaka a itseng ba na le metsoalle e seng mekae feela. Qalong re ka ’na ra ikutloa eka ha ho letho le lekaalo le re kopanyang le bona haese ho ba bolumeling bo le bong feela le bona. Empa na hase ’nete hore batho ba bang bao e neng e le metsoalle e haufi-ufi ka Bibeleng e ne e le batho bao ka pono ea mahlo ho neng ho bonahala ho se letho le lekaalo le ba kopanyang?

Ka mohlala, Ruthe le Naomi ba ne ba siana haholo ka lilemo, e ne e le batho ba lichaba le litso tse fapaneng, ba ne ba bile ba bua lipuo tse fapaneng. Leha ho le joalo, ho se tšoane hoo ha hoa ka ha ama botsoalle ba bona. Jonathane o ne a hōlisitsoe e le khosana, ’me Davida a hōlisitsoe e le molisana. Ba ne ba siana haholo ka lilemo, empa ke ba bang ba batho bao e neng e le metsoalle e haufi-ufi har’a ba boletsoeng ka Mangolong a Halalelang. Setsoalle seo se ile sa etsa hore ba thabe ’me ba tšehetsane moeeng.—Ruthe 1:16; 4:15; 1 Samuele 18:3; 2 Samuele 1:26.

Esita le kajeno Bakreste ba ’nete ba lilemo tse fapaneng kapa bao maemo a bona a bophelo a fapaneng ka ho feletseng e ba metsoalle e haufi joalo. Ka mohlala, Regina ke ’mè oa bana ba babeli ba lilemong tsa bocha ’me ha a na molekane.a O lula a le maphathaphathe ’me ha a na nako e ngata ea ho thabela botsoalle. Harald le Ute ke banyalani ba se nang bana ’me ba pencheneng. Ha motho a sheba malapa ana a mabeli a ka ’na a bona ho se na letho le lekaalo le a kopanyang. Empa Harald le Ute ba ile ba sebelisa keletso ea Bibele ea hore ba atolose lerato la bona. Ba ile ba batla menyetla ea ho akarelletsa Regina le bana ba hae linthong tse ngata tseo ba li etsang, ba sebetsa le bona tšebeletsong ea phatlalatsa ’me ba ithabisa hammoho.

Na re ka atolosa botsoalle ba rōna hore bo akarelletse ba bang ntle le metsoalle ea rōna e tloaelehileng? Ke hobane’ng ha u sa leke ho tloaelana le balumeli-’moho le uena ba sechaba se seng, ba setso se seng kapa ba lilemo tse fapaneng?

Ho Thusa ba Bang ka Lintho Tseo ba li Hlokang

Kutloelo-bohloko e tla re susumelletsa ho ameha ka lintho tseo ba bang ba li hlokang. Ke lintho tsa mofuta ofe? Hlahloba litho tsa phutheho ea Bokreste. Bacha ba hloka tataiso, ba hōlileng ba hloka khothatso, basebeletsi ba nako e tletseng ba hloka pabatso le tšehetso ’me balumeli-’moho le rōna ba nyahameng ba hloka motho ea ka ba mamelang. Motho e mong le e mong o na le lintho tseo a li hlokang. Re batla ho ba thusa ka hohle kamoo re ka khonang kateng ka lintho tseo ba li hlokang.

Ho atolosa lerato la rōna ho boetse ho bolela hore re utloisise batho ba nang le litlhoko tse khethehileng. Na ho na le motho eo u mo tsebang ea tšoeroeng ke lefu le sa foleng kapa ea tobaneng le teko ea mofuta o itseng bophelong? Ho atolosa lerato la hao le ho hlaolela kutloelo-bohloko ho tla u thusa ho utloisisa le ho tšehetsa batho ba hlokang.

Ha boprofeta ba Bibele bo phethahala haufinyane, ntho ea bohlokoa haholo e tla ba maqhama a matla a bonngoe ka phuthehong ho feta matlotlo, bokhoni kapa lintho tse finyeletsoeng. (1 Petrose 4:7, 8) E mong le e mong oa rōna a ka thusa hore phutheho ea habo e be ngatan’a ’ngoe ka hore a atolose lerato leo a ratang balumeli-’moho le eena ka lona. Re ka kholiseha hore Jehova o tla re hlohonolofatsa ka ho enneng ha re phela tumellanong le mantsoe a Mora oa hae, Jesu Kreste, ea itseng: “Ena ke taelo ea ka, hore le ratane feela joalokaha ke le ratile.”—Johanne 15:12.

[Mongolo o botlaaseng ba leqephe]

[Ntlha e Qolotsoeng e leqepheng la 10]

Ho ananela bara le barali babo rōna ho bolela hore re ba nka e le ba bohlokoa, re ba siela seriti ’me re ameha ka lintho tseo ba li hlokang