Karolo e Phethoang ke Moea o Halalelang Mabapi le ho Phethahatsa Morero oa Jehova
“Lentsoe la ka le tsoang molomong oa ka . . . le tla atleha ho seo ke le rometseng sona.”—ESA. 55:11.
1. Bontša phapang pakeng tsa moralo le morero.
NKA hore banna ba babeli ba itokisetsa ho nka leeto ka koloi. E mong o etsa ’mapa o bontšang lintlha tse tobileng le tse qaqileng tsa hore na o tla nka tsela efe e le hore a fihle moo a eang teng. E mong eena o tseba hantle moo a eang teng, empa o boetse o tseba litsela tse ling tse ngata tsa ho fihla moo. O ikemiselitse ho nka tsela esele haeba ho hlokahala. Ka litsela tse itseng, mekhoa e fapaneng e sebelisoang ke banna bana ba babeli e bontša phapang pakeng tsa moralo le morero. Moralo o ka ’na oa tšoantšoa le ha motho a etsa ’mapa oa hore na o tla tsamaea joang, athe morero o ka akarelletsa ho ba le sepheo se itseng, empa eseng hakaalo ho ba le tsela e khethehileng ea ho se finyella.
2, 3. (a) Morero oa Jehova o akarelletsa’ng, hona o ile a nka khato joang ka boemo bo ileng ba hlaha ha Adama le Eva ba ne ba etsa sebe? (b) Ke hobane’ng ha re lokela ho lula re ipapisitse le tsela eo morero oa Jehova o phethahalang ka eona?
2 Mabapi le ho phethahatsa thato ea hae, Jehova ha a na moralo o sa fetoheng, empa o na le morero o tla lula o ntse o phethahala. (Baef. 3:11) Morero ona o amana le seo a neng a se rerile qalong bakeng sa batho le lefatše—e leng hore lefatše lena e be paradeise eo ho eona batho ba phethahetseng ba ka phelang ka khotso le thabo ka ho sa feleng. (Gen. 1:28) Ha Adama le Eva ba ne ba etsa sebe, Jehova o ile a nka khato ka boemo boo ’me a etsa litokisetso tse hlokahalang e le hore morero oa hae o tle o phethahale. (Bala Genese 3:15.) Jehova o ile a etsa qeto ea hore mosali oa hae oa tšoantšetso o ne a tla hlahisa “peō,” kapa Mora, eo qetellong a neng a tla timetsa mohlohlelletsi, e leng Satane, a be a felise tšenyo eohle eo a e bakileng.—Baheb. 2:14; 1 Joh. 3:8.
3 Ha ho na matla afe kapa afe leholimong kapa lefatšeng a ka thibelang morero oo Molimo a o boletseng, hore o phethahale. (Esa. 46:9-11) Ke hobane’ng ha re ka rialo? Ke hobane ho ameha moea o halalelang oa Jehova. Matla ao a sa hlōloeng ke letho ke tiiso ea hore ‘ka sebele morero oa Molimo o tla atleha.’ (Esa. 55:10, 11) Re lokela ho lula re ipapisitse ka botlalo le tsela eo morero oa Molimo o phethahalang ka eona. Tšepo ea hore re tla phela nakong e tlang e itšetlehile ka hore o phethahale. Ho phaella moo, ho matlafatsa tumelo ho bona kamoo Jehova a sebelisang moea o halalelang kateng. Kahoo, a re ke re hlahlobeng karolo eo moea o e phethileng nakong e fetileng, eo o e phethang hona joale le eo o tla e phetha nakong e tlang—mabapi le ho phethahala ha morero oa Jehova.
Karolo eo Moea o Halalelang o e Phethileng Nakong e Fetileng
4. Jehova o senotse morero oa hae joang hanyane ka hanyane?
4 Mehleng ea ha ho ne ho ngoloa Bibele, Jehova o ile a senola morero oa hae hanyane ka hanyane. Qalong, e ne e le ‘sephiri se halalelang’ hore na Peō e tšepisitsoeng ke mang. (1 Bakor. 2:7) Ka mor’a lilemo tse ka bang 2 000, ke hona moo Jehova a ileng a boela a bua ka peō. (Bala Genese 12:7; 22:15-18.) Jehova o ile a fa Abrahama tšepiso e neng e tla ba le phethahatso e khōloanyane. Mantsoe a reng, “ka peō ea hao” e ne e le pontšo e hlakileng ea hore Peō e ne e tla ba motho, setloholo sa Abrahama. Re ka kholiseha hore Satane o ne a shebeletse ka thahasello e khōlō ha ntlha ena e ne e senoloa. Ha ho pelaelo hore Sera seo se ne se batla feela ho timetsa kapa ho senya leloko la Abrahama ebe se nyopisa morero oa Molimo. Empa seo se ne se ke ke sa etsahala, kaha moea oa Molimo o sa bonahaleng o ne o sebetsa. Ka litsela life?
5, 6. Jehova o ile a sebelisa moea oa hae joang e le hore a sireletse batho ba leloko leo Peō e neng e tla hlaha ho lona?
5 Jehova o ile a sebelisa moea oa hae e le hore a sireletse batho ba leloko leo Peō e neng e tla hlaha ho lona. Jehova o ile a re ho Abrame (Abrahama): “Ke ’na thebe ea hao.” (Gen. 15:1) Eo e ne e se tšepiso ea lefeela. Ka mohlala, nahana ka se ileng sa etsahala hoo e ka bang ka 1919 B.C.E. ha Abrahama le Sara ba ne ba ahile ka nakoana Gerare. Kaha Abimeleke, morena oa Gerare, o ne a sa tsebe hore Sara e ne e le mosali oa Abrahama, o ile a mo nka ka morero oa hore a mo etse mosali oa hae. Na ebe Satane o ne a laola lintho a sa bonahale, a leka ho thibela Sara ho tsoala peō ea Abrahama? Bibele ha e hlalose. Empa seo e re hlalosetsang sona ke hore Jehova o ile a kenella. O ile a lemosa Abimeleke ka toro hore a se ke a ama Sara.—Gen. 20:1-18.
6 Ketsahalo eo e ne e se eona feela. Jehova o ile a lopolla Abrahama le litho tsa lelapa la hae ka makhetlo a ’maloa. (Gen. 12:14-20; 14:13-20; 26:26-29) Ka lebaka leo, tabeng ea Abrahama le litloholo tsa hae, mopesaleme o ile a re: “[Jehova] ha aa ka a lumella motho leha e le ofe hore a ba etsetse bolotsana, empa a khalemela marena ka lebaka la bona, a re: ‘Le se ke la ama batlotsuoa ba ka, le se ke la etsa letho le lebe ho baprofeta ba ka.’”—Pes. 105:14, 15.
7. Jehova o ile a sireletsa sechaba sa Iseraele ka litsela life?
7 Jehova o ile a sebelisa moea oa hae ho sireletsa sechaba sa boholo-holo sa Iseraele, seo Peō e tšepisitsoeng e neng e tla tsoalloa ho sona. Jehova o ile a sebelisa moea oa hae ho fa Baiseraele Molao oa hae, o ileng oa boloka borapeli ba ’nete ’me oa sireletsa Bajuda hore ba se ke ba silafala moeeng, boitšoarong le nameng. (Ex. 31:18; 2 Bakor. 3:3) Mehleng ea Baahloli, moea oa Jehova o ile oa matlafatsa banna ba itseng hore ba lopolle Baiseraele matsohong a lira tsa bona. (Baahl. 3:9, 10) Lilemong tse makholo pele ho tsoalo ea Jesu, e leng eena karolo e ka sehloohong ea peō ea Abrahama, e tlameha ebe moea o halalelang o ile oa sireletsa Jerusalema, Bethlehema le tempele—e leng libaka tseo kaofela ha tsona li neng li tla phetha karolo e itseng mabapi le ho phethahala ha boprofeta bo amanang le Jesu.
8. Ke eng e bontšang hore moea o halalelang o ile oa phetha karolo e tobileng bophelong ba Mora oa Molimo le tšebeletsong ea hae?
8 Moea o halalelang o ile oa phetha karolo e tobileng bophelong ba Jesu le tšebeletsong ea hae. Moea o halalelang o ile oa sebetsa ka pōpelong ea Maria eo e neng e le moroetsana, ’me oa finyella ntho e neng e e-s’o ka e etsahala pele ho moo le e e-s’o ka e etsahala ho tloha ka nako eo. O ile oa etsa hore mosali ea sa phethahalang a emole a be a belehe Mora ea phethahetseng, ea neng a se tlas’a kotlo ea lefu. (Luka 1:26-31, 34, 35) Hamorao moea oo o ile oa sireletsa Jesu ha e sa ntse e le lesea e le hore a se ke a shoa pele ho nako. (Mat. 2:7, 8, 12, 13) Ha Jesu a ne a le lilemo li ka bang 30, Molimo o ile a mo tlotsa ka moea o halalelang, a mo khetha hore e be mojalefa teroneng ea Davida a ba a mo laela hore a etse mosebetsi oa boboleli. (Luka 1:32, 33; 4:16-21) Moea o halalelang o ile oa matlafatsa Jesu hore a etse mehlolo, e neng e akarelletsa ho folisa batho ba kulang, ho fepa matšoele le ho tsosa bafu. Liketsahalo tse joalo tse matla e ne e le selelekela feela sa mahlohonolo ao re ka a lebellang pusong ea Jesu.
9, 10. (a) Moea o halalelang o ile oa bonahala joang hore o ne o sebetsa ho barutuoa ba Jesu ba lekholong la pele la lilemo? (b) Ke ketsahalo efe e amanang le ho phethahala ha morero oa Jehova e ileng ea senoloa lekholong la pele la lilemo C.E.?
9 Ho tloha ka Pentekonta ea 33 C.E., Jehova o ile a sebelisa moea oa hae ho tlotsa batho bao e leng karolo ea bobeli ea peō ea Abrahama, bao bongata ba bona e neng e se litloholo tsa Abrahama. (Bar. 8:15-17; Bagal. 3:29) Moea o halalelang o ile oa bonahala hore o ne o sebetsa ho barutuoa ba Jesu ba lekholong la pele la lilemo, oa ba thusa hore ba bolele litaba tse molemo ka cheseho, oa ba oa ba fa matla a hore ba etse mesebetsi e matla. (Lik. 1:8; 2:1-4; 1 Bakor. 12:7-11) Ka limpho tseo tsa mohlolo, moea o halalelang o ile oa senola ketsahalo ea bohlokoa haholo mabapi le ho phethahala ha morero oa Jehova. Jehova o ne a se a sa sebelise tokisetso ea borapeli e neng e sebelisitsoe ka makholo a lilemo, eo setsi sa eona e neng e le tempele e neng e le Jerusalema. O ne a se a sebelisana le phutheho ea Bokreste e neng e sa tsoa thehoa. Ho tloha ka nako eo, Jehova o ’nile a sebelisa phutheho eo ea batlotsuoa e le hore e phethe morero oa hae.
10 Ho sireletsa, ho matlafatsa, ho tlotsa—tsena ke litsela tse seng kae feela tseo ka tsona Jehova a ’nileng a sebelisa moea o halalelang mehleng ea ha ho ne ho ngoloa Bibele, e le ho tiisa hore morero oa hae o tla fela o phethahale. Mehleng ea rōna teng ho etsahala joang? Hona joale Jehova o sebelisa moea oa hae joang e le hore a tšehetse morero oa hae? Re lokela ho tseba, kaha re batla ho etsa lintho tse lumellanang le moea oo. Ka lebaka leo, a re ke re tšohleng litsela tse ’nè tseo Jehova a sebelisang moea oa hae ka tsona hona joale.
Karolo eo Moea o Halalelang o e Phethang Hona Joale
11. Ke eng e bontšang hore moea o halalelang ke oona o thusang batho ba Molimo hore ba hloeke, hona u ka bontša joang hore u sebelisana le moea oo?
11 Ntlha ea pele, moea o halalelang ke oona o thusang batho ba Molimo hore ba hloeke. Batho bao ho nang le karolo eo ba e phethang morerong oa Jehova, ba tlameha ho hloeka boitšoarong. (Bala 1 Bakorinthe 6:9-11.) Batho ba bang bao e bang Bakreste ba ’nete, pele ba ne ba etsa boitšoaro bo bobe bo joaloka bohlola, bofebe le bosodoma. Litakatso tse tsoalang liketso tsa boetsalibe li ka mela ka metso. (Jak. 1:14, 15) Leha ho le joalo, batho ba joalo ‘ba hlatsoitsoe hore ba hloeke,’ e leng se bontšang hore ba entse liphetoho tse hlokahalang bophelong ba bona e le hore ba ka khahlisa Molimo. Ke eng e thusang motho ea ratang Molimo hore a atlehe ho hanela tšusumetso ea hore a latele litakatso tse fosahetseng? Bakorinthe ba Pele 6:11 e re ke “moea oa Molimo oa rōna.” Ha u lula u hloekile boitšoarong, u bontša hore u lumella moea oo hore e be oona o laolang bophelo ba hao.
12. (a) Ho ea ka pono ea Ezekiele, Jehova o tataisa mokhatlo oa hae joang? (b) U ka bontša joang hore u sebetsa tumellanong le moea?
12 Ntlha ea bobeli, Jehova o sebelisa moea oa hae ho tataisa mokhatlo oa hae hore o ee moo a batlang hore o ee teng. Ponong ea Ezekiele, karolo e leholimong ea mokhatlo oa Jehova e tšoantšoa le koloi ea leholimo e tsamaeang e sa thijoe ke letho ha e phethahatsa morero oa Jehova. Koloi ee e susumetsoa ke’ng hore e ee nģa e itseng? Ke moea o halalelang. (Ezek. 1:20, 21) A re hopoleng hore mokhatlo oa Jehova o entsoe ka likarolo tse peli, e ’ngoe e leholimong ’me e ’ngoe e lefatšeng. Haeba karolo e leholimong e laoloa ke moea o halalelang, e tlameha ebe le karolo e lefatšeng e laoloa ke oona. Ha u mamela u bile u tšepahalla tataiso e tsoang karolong e lefatšeng ea mokhatlo oa Molimo, u bontša hore u tsamaisana le koloi ea leholimo ea Jehova ebile u sebetsa tumellanong le moea oa hae o halalelang.—Baheb. 13:17.
13, 14. (a) ‘Moloko oo’ o boletsoeng ke Jesu ke bo-mang? (b) Fana ka mohlala o bontšang hore moea o halalelang o re thusa ho utloisisa linnete tsa Bibele. (Sheba lebokose le nang le sehlooho se reng, “Na U Khema le Leseli le Ntseng le Eketseha?”)
13 Ntlha ea boraro, moea o halalelang o re thusa ho utloisisa linnete tsa Bibele. (Liprov. 4:18) Ke khale “lekhoba le tšepahalang le le masene” le sebelisa makasine ena e le mocha o ka sehloohong oa ho senola linnete tsa Bibele hanyane ka hanyane. (Mat. 24:45) Ka mohlala, nahana ka tsela eo ka eona re utloisisang hore na “moloko ona” o boletsoeng ke Jesu ke bo-mang. (Bala Matheu 24:32-34.) Jesu o ne a bua ka moloko ofe? Sehlooho se reng “Ho ba Teng ha Kreste—Ho Bolela Eng ho Uena?” se ile sa hlalosa hore Jesu o ne a sa bue ka batho ba khopo, empa o ne a bua ka barutuoa ba hae, ba neng ba tla tloha ba tlotsoa ka moea o halalelang.a Balateli ba Jesu ba tlotsitsoeng, ba lekholong la pele la lilemo le ba mehleng ea rōna, ke bona ba neng ba ke ke ba bona pontšo feela empa ba ne ba tla be ba utloisise seo e se bolelang—e leng hore Jesu “o haufi, o menyako.”
14 Tlhaloso ee e re bolella’ng? Le hoja re ke ke ra lekanya ka ho toba hore na “moloko ona” o fella ho kae, re lokela ho hopola lintho tse ’maloa mabapi le lentsoe “moloko”: Hangata le bolela batho ba lilemo tse fapa-fapaneng ba phelang ka nako e itseng; ha o nke nako e telele haholo; ebile o na le qetello. (Ex. 1:6) Joale, re lokela ho utloisisa mantsoe a Jesu a buang ka “moloko ona” joang? Ho hlakile hore o ne a bolela hore batlotsuoa ba neng ba le teng ha pontšo e ne e qala ho bonahala ka 1914, ba ne ba tla phela ka nako e itseng le batlotsuoa ba bang ba neng ba tla bona ha matšoenyeho a maholo a qala. Moloko oo o bile le qalo, ’me ha ho pelaelo hore o tla ba le qetello. Ho phethahala ha likarolo tse sa tšoaneng tsa pontšo ho bontša ka ho hlaka hore e tlameha ebe matšoenyeho ao a haufi. Ha u lula u hopola hore metsotso e se e jele babeli u bile u lula u lebetse, u bontša hore u khema le leseli le ntseng le eketseha ebile u latela tataiso ea moea o halalelang.—Mar. 13:37.
15. Ke eng e bontšang hore moea o halalelang ke oona o re fang matla a hore re phatlalatse litaba tse molemo?
15 Ntlha ea bone, moea o halalelang o re fa matla a hore re phatlalatse litaba tse molemo. (Lik. 1:8) Ruri ha ho na ntho e ’ngoe e neng e ka etsa hore ebe litaba tse molemo li boletsoe lefatšeng lohle, haese moea o halalelang! Nahana feela. Mohlomong ka lebaka la lihlong kapa letsoalo, u e mong oa ba neng ba nahana hore, ‘Le ka mohla nke ke ka khona ho bolela ka ntlo le ntlo!’ Empa hona joale u kopanela ka cheseho mosebetsing oo.b Lipaki tse ngata tsa Jehova tse tšepahalang li ’nile tsa bolela litaba tse molemo ho sa tsotellehe khanyetso kapa mahloriso. Ke moea o halalelang oa Molimo feela o ka re fang matla a hore re hlōle litšitiso tse khōlō re be re etse lintho tseo re neng re ke ke ra li khona ka matla a rōna feela. (Mik. 3:8; Mat. 17:20) Ha u ikakhela ka setotsoana mosebetsing oa boboleli, u bontša hore u sebelisana le moea oo.
Karolo eo Moea o Halalelang o Tla e Phetha Nakong e Tlang
16. Ke hobane’ng ha re ka kholiseha hore Jehova o tla sireletsa batho ba hae nakong ea matšoenyeho a maholo?
16 Nakong e tlang, Jehova o tla sebelisa moea oa hae o halalelang ka litsela tse tsotehang e le hore a phethahatse morero oa hae. Nahana pele ka taba ea tšireletso. Joalokaha re bone, nakong e fetileng Jehova o ile a sebelisa moea oa hae hore a sireletse batho ka bomong hammoho le sechaba sa Iseraele ka kakaretso. Kahoo, re na le mabaka a utloahalang a ho lumela hore o tla sebelisa moea oona oo o matla hore a sireletse batho ba hae matšoenyehong a maholo a ntseng a atamela. Ha rea lokela ho noha hore na hantle-ntle Jehova o tla re hlokomela joang ka nako eo. Ho e-na le hoo, re ka lebella bokamoso ka sebete, re tseba hore le ka mohla batho ba ratang Jehova ba ke ke ba pateha hoo a ke keng a ba bona kapa ba e-ba moo moea oa hae o halalelang o ke keng oa fihla teng.—2 Likron. 16:9; Pes. 139:7-12.
17. Jehova o tla sebelisa moea oa hae o halalelang joang lefatšeng le lecha?
17 Jehova o tla sebelisa moea oa hae o halalelang joang lefatšeng le lecha le tlang? Moea oo ke oona o tla tsamaisa mosebetsi oa ho ngola meqolo e mecha e tlang ho phetloa ka nako eo. (Tšen. 20:12) Ho tla be ho ngotsoe’ng meqolong eo? Ha ho pelaelo hore ho tla be ho ngotsoe melao e qaqileng eo Jehova a tla beng a lebeletse hore re e boloke lilemong tse sekete. Na u labalabela ho hlahloba se tla beng se ngotsoe meqolong eo? Re lebeletse lefatše leo le lecha ka tjantjello. Re haelloa ke mantsoe a ho hlalosa hore na ho tla ba joang ho phela nakong eo e thabisang ea ha Jehova a tla be a sebelisa moea oa hae o halalelang ho phethahatsa morero oa hae ka lefatše le batho ba phelang ho lona.
18. Boikemisetso ba hao bo tiileng ke bofe?
18 Le ka mohla re se ke ra lebala hore joang kapa joang morero oa Jehova o tsoelang pele ho senoleha o tla atleha, kaha Jehova o sebelisa moea oa hae o halalelang—e leng matla a maholo ka ho fetisisa bokahohleng—hore a o phethahatse. Ua ameha morerong oo. Ka lebaka leo, ikemisetse ka tieo ho kōpa Jehova hore a u fe moea oa hae ’me u sebetse tumellanong le tataiso ea oona. (Luka 11:13) Ka tsela eo u ka ba le tšepo ea ho phela kamoo Jehova a neng a rerile hore batho ba phele kateng—ka ho sa feleng lefatšeng la Paradeise.
[Mongolo o botlaaseng ba leqephe]
b E le hore u fumane mohlala oa motho ea neng a le lihlong haholo empa a ile a li hlōla a ba a chesehela tšebeletso, sheba Molula-Qhooa oa September 15, 1993, leqepheng la 19.
Na U sa Hopola?
• Jehova o ile a sebelisa moea oa hae o halalelang joang mehleng ea ha ho ne ho ngoloa Bibele e le hore morero oa hae o ka lula o tsoela pele?
• Jehova o sebelisa moea oa hae joang hona joale?
• Jehova o tla sebelisa moea oa hae joang nakong e tlang e le hore a phethahatse morero oa hae?
[Lebokose le leqepheng la 10]
Na U Khema le Leseli le Ntseng le Eketseha?
Jehova o tsoela pele ho khantšetsa batho ba hae leseli. Lintlafatso tse ling tse ’nileng tsa hatisoa Molula-Qhooeng ke life?
▪ Papiso ea Jesu ea tomoso e totobatsa thuto efe e molemo mabapi le khōlo ea moea? (Mat. 13:33)—July 15, 2008, leqepheng la 19-20.
▪ Ho bitsetsoa ha Bakreste tšepong ea ho ea phela leholimong ho khaotsa neng?—May 1, 2007, leqepheng la 30-31.
▪ Ho rapela Jehova “ka moea” ho bolela’ng? (Joh. 4:24)—July 15, 2002, leqepheng la 15.
▪ Bongata bo boholo bo sebeletsa lebaleng lefe? (Tšen. 7:15)—May 1, 2002, leqepheng la 30-31.
▪ Ho aroloa ha linku le lipōli ho etsahala neng? (Mat. 25:31-33)—October 15, 1995, leqepheng la 18-28.