Moqoqo le Moahelani—Na Jesu ke Molimo?

LIPAKI TSA JEHOVA li thabela ho buisana ka Bibele le baahelani ba tsona. Na ho na le taba e itseng ka Bibeleng eo u eeng u ipotse ka eona? Na u rata ho tseba ho itseng ka tumelo ea Lipaki Tsa Jehova kapa tsela eo li etsang lintho ka eona? Haeba ho joalo, lekhetlong le tlang ha u kopana le Paki, u se ke ua qeaqea ho e botsa. E tla thabela ho tšohla taba eo le uena.

Moqoqo o latelang ke o tloaelehileng oo Paki ea Jehova e ka bang le oona le moahelani oa eona. A re nke hore Paki e bitsoang Moroesi e etetse ha ’mè ea bitsoang Lineo.

Na ke ’Nete Hore ha le Lumele ho Jesu?

Lineo: Moruti oa ka o re Lipaki Tsa Jehova ha li lumele ho Jesu. Na ke ’nete?

Moroesi: Seo nka u tiisetsang sona ke hore re lumela ho Jesu. Ha e le hantle, re lumela hore ho lumela ho Jesu ke habohlokoa e le hore re tle re pholohe.

Lineo: Le ’na ke seo ke se lumelang.

Moroesi: Kahoo, ntlheng ena ’na le uena rea lumellana. Pele ke lebala, ’na ke Moroesi. Uena u mang?

Lineo: ’Na ke Lineo. Ke thabela ho u tseba.

Moroesi: Le ’na ke thabela ho u tseba. Mohlomong ua ipotsa hore na, ‘Haeba kannete Lipaki Tsa Jehova li lumela ho Jesu, ke hobane’ng ha batho ba re ha re lumele ho eena?’

Lineo: Ehlile kea ipotsa ’me ke batla ho tseba lebaka.

Moroesi: Ka bokhutšoanyane feela Lineo, re lumela ho Jesu haholo, empa ha re lumele ntho e ’ngoe le e ’ngoe eo batho ba e buang ka eena.

Lineo: E kang efe?

Moroesi: Batho ba bang ba re Jesu e ne e le motho feela ea lokileng. Empa ha re lumellane le seo.

Lineo: Le ’na ha ke lumele.

Moroesi: Ho bolelang hore le tabeng ena rea lumellana. Mohlala oa bobeli ke hore Lipaki Tsa Jehova ha li lumellane le lintho tse rutoang ka Jesu tse hanyetsang seo eena a se buileng ka kamano ea hae le Ntate oa hae.

Lineo: U bolela’ng?

Moroesi: Malumeli a mangata a ruta hore Jesu ke Molimo. Mohlomong le uena u rutiloe joalo.

Lineo: Ho joalo, moruti oa ka o re Molimo le Jesu ke motho a le mong.

Moroesi: Leha ho le joalo, na u ka latola hore tsela e molemo ka ho fetisisa ea ho ithuta ’nete ka Jesu ke ho hlahloba hore na o itlhalosa joang?

Lineo: Che, nke ke ka latola.

Jesu o Ile a Itlhalosa Joang?

Moroesi: A re ke re tšohle temana ea Bibele e re thusang ho utloisisa taba ena. Ke kōpa u ele hloko seo re tla se bala ho Johanne 6:38. Jesu o itse: “Ha kea theoha leholimong ho tla etsa thato ea ka, empa ho etsa thato ea ea nthomileng.” Polelo eo e ne e tla makatsa haeba Jesu e ne e le Molimo.

Lineo: U bolela’ng?

Moroesi: Ke bolela hore Jesu o itse ha aa ka a theoha leholimong ho tla etsa thato ea hae.

Lineo: Kea utloa, o itse o tletse ho tla etsa thato ea Ea mo romileng.

Moroesi: Empa haeba Jesu ke Molimo, o ne a romiloe ke mang? Hona ke hobane’ng ha Jesu a ile a mamela Eo ea mo romang?

Lineo: Ekare kea utloa joale. Empa na temana ee e le ’ngoe feela e ka paka hore Jesu hase Molimo?

Moroesi: Hlokomela hape hore na ka lekhetlo le leng Jesu o ile a re’ng. O buile ntho e tšoanang khaolong e latelang ea Johanne. Ke kōpa u bale Johanne 7:16.

Lineo: Ho lokile. “Jesu, le eena, a ba araba ’me a re: ‘Seo ke se rutang hase sa ka, empa ke sa ea nthomileng.’”

Moroesi: Kea leboha. Ho latela temana ee, na Jesu o ne a ruta maikutlo a hae?

Lineo: Che, o itse seo a se rutang se tsoa ho Ea mo romileng.

Moroesi: U nepile. Re ka boela ra ipotsa: ‘Ke mang ea neng a romme Jesu? Hona linnete tseo a neng a li ruta li ne li tsoa ho mang?’ Na re ne re ke ke ra lebella hore motho eo a be moholo ho Jesu? Etsoe ea romang o moholo ho ea rongoang.

Lineo: Ha ho ’nete e fetang eo. Ke qala ho utloa temana ena.

Moroesi: Hape, nahana ka mantsoe a Jesu a ho Johanne 14:28: “Le utloile hore ke itse ho lōna, kea tsamaea ’me ke khutlela ho lōna. Haeba le ne le nthata, le ne le tla thabela hore ke ea ho Ntate, hobane Ntate o moholo ho ’na.” Ho latela temana ee, u ka re Jesu o ne a nka hore o amana joang le Ntate?

Lineo: O re, Ntate o moholo ho eena. Kahoo, ke nahana hore o ne a nka hore Molimo o moholo ho eena.

Moroesi: Hantle haholo. Mohlala o mong ke ona, hlokomela seo Jesu a ileng a se bolella barutuoa ba hae ho Matheu 28:18. Temana ena e re: “Ke filoe matla ’ohle leholimong le lefatšeng.” Na Jesu o re haesale a e-na le matla ’ohle?

Lineo: Che, o itse o a filoe.

Moroesi: Haeba Jesu ke Molimo, o ne a ka fuoa matla a eketsehileng joang? Hona o a filoe ke mang?

Lineo: Che, kea bona joale.

O ne a Bua le Mang?

Moroesi: Ho na le taba e ’ngoe e makatsang haeba kannete Jesu ke Molimo.

Lineo: Ke efe?

Moroesi: Ke eo re e balang ka kolobetso ea Jesu. Hlokomela tlaleho e ho Luka 3:21, 22. Ke kōpa u e bale.

Lineo: “Joale ha batho bohle ba kolobetsoa, Jesu le eena a kolobetsoa ’me, ha a ntse a rapela, leholimo la buleha ’me moea o halalelang oa theohela holim’a hae o le sebōpehong sa ’mele se joaloka leeba, ’me lentsoe la tsoa leholimong: ‘U Mora oa ka, ea ratoang; ke u amohetse.’”

Moroesi: Na u hlokometse hore na Jesu o ne a ntse a etsa’ng ha a kolobetsoa?

Lineo: O ne a ntse a rapela.

Moroesi: Ke ’nete. Empa re ka ’na ra ipotsa, ‘Haeba Jesu ke Molimo, o ne a rapela mang?’

Lineo: Ua tseba le ’na kea ipotsa. Empa ke tla botsa moruti oa ka.

Moroesi: Hona ntlheng eo, hlokomela hore ka mor’a hore Jesu a tsoe ka metsing, ho na le motho ea ileng a bua a le leholimong. Na u hlokometse hore na motho eo o ile a re’ng?

Lineo: O itse Jesu ke Mora oa Hae, Oa mo rata ebile O mo amohetse.

Moroesi: U nepile. Empa haeba Jesu ke Molimo, ke mang ea buileng lintho tseo a le leholimong?

Lineo: Ha ke e-s’o nahane taba ena ka tsela eo.

Ke Hobane’ng ha e Mong e le “Ntate” e Mong e le “Mora”?

Moroesi: Nahana ka sena hape: Re balile hore Jesu o itse Molimo ke Ntate oa hae ea leholimong. Ebile ha Jesu a kolobetsoa, motho ea ileng a bua ho tsoa leholimong o ile a re Jesu ke Mora oa Hae. Ha e le hantle, Jesu ka boeena o ne a ipitsa Mora oa Molimo. Joale, haeba u ne u batla ho ntlhalosetsa hore batho ba babeli baa lekana, u ne u ka etsa mohlala ka bo-mang ka lapeng?

Lineo: Ke ne ke tla etsa mohlala ka bara ba babeli ba motho.

Moroesi: Hantle haholo—mohlomong u ne u ka etsa mohlala le ka mafahla. Empa Jesu o itse Molimo ke Ntate ’me eena ke Mora. Kahoo, u nahana hore Jesu o ne a bolela’ng?

Lineo: Kea utloa hore na u bolela’ng. Jesu o hlalosa hore motho e mong o moholo ebile o na le matla ho feta e mong.

Moroesi: Hantle haholo. Nahana ka sena: U nahanne ka papiso e loketseng hantle ea batho ba lekanang, ea bara ba motho kapa ea mafahla. Haeba kannete Jesu e ne e le Molimo, na ha u nahane hore joaloka Mosuoe e Moholo, a ka be a ile a nahana ka papiso eona ee—kapa e ’ngoe e hlakileng le ho feta e bontšang hore baa lekana?

Lineo: A ka be a nahanne ka eona.

Moroesi: Empa, ho e-na le hoo, o sebelisa mantsoe “Ntate” le “Mora” ha a hlalosa kamano ea hae le Molimo.

Lineo: U hlahisa ntlha ea bohlokoa.

Balateli ba Jesu ba Pele ba Ile ba Re’ng ka Taba Ee?

Moroesi: Pele ke tsamaea, ke rata ho bua ka ntlha e ’ngoe hape tabeng ena, haeba u ntumella.

Lineo: Ho lokile, ke sa na le nakonyana.

Moroesi: Haeba kannete Jesu ke Molimo, na ha u nahane hore barutuoa ba Jesu ba ka be ba boletse seo ka ho hlaka?

Lineo: Ke nahana joalo.

Moroesi: Empa ha ho kae kapa kae Bibeleng moo re utloang ho thoe ba rutile seo. Ho fapana le moo, hlokomela seo e mong oa balateli ba pele ba Jesu, e leng moapostola Pauluse, a ileng a se ngola. Ho Bafilipi 2:9, o hlalosa seo Molimo a ileng a se etsa ka mor’a lefu la Jesu le tsoho ea hae, o re: ‘Molimo o ile a phahamisetsa Jesu boemong bo phahameng ’me ka mosa a mo fa lebitso le ka holimo ho mabitso a mang ’ohle.’ Temana ee e re Molimo o ile a beha Jesu boemong bofe?

Lineo: E re Molimo o ile a mo phahamisetsa boemong bo phahameng.

Moroesi: Ho joalo. Empa haeba Jesu o ne a lekana le Molimo pele a e-shoa ’me hamorao Molimo a mo phahamisetsa boemong bo fetang boo a neng a le ho bona, na seo se ne se tla etsa hore Jesu a phahame ho feta Molimo? Motho e mong a ka phahamela Molimo joang?

Lineo: Eo hase ntho e ka etsahalang.

Moroesi: Ke lumellana le uena. Joale, ka mor’a bopaki boo boo re bo tšohlileng, na u ka re Bibele e ruta hore Jesu ke Molimo?

Lineo: Che, ha ho bonahale joalo. Bibele e re ke Mora oa Molimo.

Moroesi: U nepile. Leha ho le joalo, Lineo, tseba hore Lipaki Tsa Jehova li hlompha Jesu haholo. Re lumela hore lefu la hae joalokaha e ne e le Mesia ea tšepisitsoeng, le buletse batho bohle ba tšepahalang tsela ea ho pholoha.

Lineo: Le ’na ke lumela hore ho joalo.

Moroesi: Empa e ka ’na eaba ua ipotsa: ‘Re ka bontša Jesu joang hore re ananela hore ebe o re teletse bophelo ba hae?’a

Lineo: Ke ’nile ka ipotsa seo.

Moroesi: Ho ka ba joang ha nka khutla e le hore re arabe potso eo ka Bibele. Na u tla be u le teng lapeng ka nako ee bekeng e tlang?

Lineo: E, ke tla be ke le teng.

Moroesi: Ho lokile, ke tla u bona bekeng e tlang.

[Mongolo o botlaaseng ba leqephe]