Lengolo le Tsoang ho Sehlopha se Busang

“E SE eka le ka ba le mosa o sa tšoanelang le khotso e tsoang ho Molimo Ntate le Morena Jesu Kreste.” Ana ke mantsoe ao Pauluse a ileng a lumelisa ka ’ona mangolong a mangata ao a ileng a a ngolla liphutheho. A hlalosa hantle seo re se lakaletsang e mong le e mong oa lōna.—Baef. 1:2.

Ruri re ananela mosa o sa tšoanelang oo Jehova a re fileng oona ka sehlabelo sa Kreste Jesu sa thekollo! Re boemong bo amohelehang ka pel’a Molimo ka lebaka la thekollo eo. Re ne re ke ke ra finyella boemo boo ka boiteko ba rōna, ho sa tsotellehe hore na re khothalletse ho ithuta Bibele, ho bolela litaba tse molemo, kapa ho etsa mesebetsi e meng e molemo hakae. Re tšoareloa libe ebile re tšepisoa bophelo bo sa feleng e le mpho e bontšang mosa o sa tšoanelang oa Jehova ka Jesu Kreste, eseng e le moputso oa seo re se entseng.—Bar. 11:6.

Pauluse o ile a ngolla balumeli-’moho le eena, a re: “Re le kōpa ka tieo hore le se ke la amohela mosa o sa tšoanelang oa Molimo ’me la lahleheloa ke morero oa oona. Kaha o re: ‘Ke u utloile ka nako e amohelehang, ’me ka u thusa ka letsatsi la poloko.’ Bonang! Joale ke nako e amohelehang ka ho khethehileng. Bonang! Joale ke letsatsi la poloko.” Ho ile ha e-ba le “nako e amohelehang” lekholong la pele la lilemo pele Jerusalema e timetsoa. Batho ba tšepahalang ba neng ba rata Jehova ba ile ba bolokoa ka kutloisiso ea moea. Qetellong sena se ile sa etsa hore bohle ba tšepahalang ba ileng ba baleha Jerusalema pele e timetsoa ka selemo sa 70 C.E. ba bolokoe nameng.—2 Bakor. 6:1, 2.

Kajeno le rōna re phela ‘nakong e amohelehang’ eo hape e leng ea “letsatsi la poloko.” Bao Jehova a ba amohelang e le bahlanka ba hae le ba bolokoang ka kutloisiso ea moea ba na le tšepo ea ho bolokoa nameng ka “letsatsi le leholo la Jehova” le seng le atametse haholo.—Sof. 1:14.

Ho tla ha letsatsi la Jehova ho re jarisa boikarabelo bo tebileng. Re lokela ho lemosa batho ka lona le ho thusa ba lipelo li tšepahalang hore ba rue molemo moseng o sa tšoanelang oa Jehova e le hore le bona ba ka bolokoa. Pauluse o ne a nka boikarabelo bona ka ho teba. O ile a ngola a re: “Ho malimabe ’na haeba ke sa ka ka bolela litaba tse molemo!” O ile a boela a hlalosa tsela eo a ikutloang ka eona ha a re: “Ke na le molato . . . ho ba bohlale le ho ba se nang kelello: kahoo ke na le tabatabelo ea ho bolela litaba tse molemo.”—1 Bakor. 9:16; Bar. 1:14, 15.

Jehova o tla re nka re ikarabella haeba re hlokomoloha mosebetsi oa bohlokoa oa ho lemosa batho. Re tseba mantsoe ao Jehova a ileng a a bua ho moprofeta Ezekiele: “Mor’a motho, ke u entse molebeli ho ba ntlo ea Iseraele, u tla utloa polelo e tsoang molomong oa ka ’me u ba fe temoso e tsoang ho ’na. Ha ke re ho ea khopo, ‘Ka sebele u tla shoa,’ ’me u sa mo lemose le ho bua e le hore u lemose ea khopo tseleng ea hae e khopo ho mo boloka a phela, kahobane a le khopo, o tla shoa ka lebaka la phoso ea hae, empa mali a hae ke tla a batla letsohong la hao.”—Ezek. 3:17, 18.

Ho thata ho sebetsana le matsatsi ana a ho qetela. Ha ho bonolo ho etsa mosebetsi oa lelapa, oa boipheliso, oa phutheho le oa boboleli ka tsela e leka-lekaneng. Ho phaella moo, ba bangata ba lōna baa kula, ba tetebetse maikutlo, ba se ba hōlile, ebile ba bang baa hanyetsoa. Ba bangata ba lōna ‘ba imetsoe.’ Re lakatsa hore le tsebe hore re le utloela bohloko, tumellanong le mantsoe a Jesu a reng: “Tloong ho ’na, lōna bohle ba sehlang le ba imetsoeng, ’me ke tla le khatholla.” (Mat. 11:28) Re lakatsa ho le babatsa ka mofuthu lōna bohle ba ikitlaetsang hore le tsoele pele ho sebeletsa Jehova ka botšepehi mathateng le manolong.

Ka lebaka la boboleli ba lōna le ho ruta ha lōna ka cheseho le ka lebaka la tlhohonolofatso ea Jehova, ka karolelano ho kolobetsoa batho ba 4 762 beke le beke lefatšeng ka bophara. Selemong se fetileng sa tšebeletso, ho ile ha thehoa liphutheho tse ncha tse 1 375. Re tšepa hore buka e ncha ea Ha e le Hantle ke Eng Seo Bibele e se Rutang?, e fumanehang ka lipuo tse fetang 120, e tla thusa batho ba limilione hore ba rue molemo moseng o sa tšoanelang oa Jehova le khotsong eo Jehova a fanang ka eona nakong ena ea “letsatsi la poloko,” ebile ke sona seo re se rapellang.

Kholisehang hore Sehlopha se Busang sea le rata ebile sea le rapella. Re boetse re leboha lithapelo tseo le re etsetsang tsona.

Barab’abo lōna,

Sehlopha se Busang sa Lipaki Tsa Jehova