Kamoo U ka Finyellang Lipakane Tsa Hao Tsa Moea Kateng
1. Bakreste ba bangata ba bacha ba ipehetse lipakane life tsa moea?
1 Ha ho pelaelo hore joaloka mocha oa Mokreste, tsela eo u ratang Jehova ka eona le mantsoe a Jesu ho Bakreste bohle a reng ba “batle ’muso pele,” e ama lipakane tseo u ipehelang tsona bophelong. (Mat. 6:33) Mohlomong pakane ea hao ke ho ntlafatsa tšebeletso ea hao ka ho ba pula-maliboho kapa ka ho sebetsa moo ho hlokahalang baboleli ba ’Muso ba eketsehileng. Mohlomong ba bang ba nahana ka ho ithaopela mesebetsi ea kaho ea Liholo Tsa ’Muso, ho sebeletsa lekaleng kapa ho ba baromuoa. Ka sebele tseo ke lipakane tse ntle le tse babatsehang!
2. Ke eng e ka u thusang ho finyella lipakane tsa hao tsa moea?
2 Ntho e tla u thusa ho finyella lipakane tsa hao tsa moea ke ho li ngola fatše. Molula-Qhooa oa July 15, 2004 o itse: “Taba e bonahalang e le tšopholi e ka hlaka ea ba ea bonahala ka mokhoa o fapaneng ha [u] khetha mantsoe a ho e hlalosa. Kahoo, [u] ka ’na [ua] lakatsa ho ngola lipakane tsa [hao] fatše le leano leo [u] tla le sebelisa hore [u] li finyelle.” Ho feta moo, lipakane tsa nakoana li ka u thusa ho bona hore na u hatela pele joang hape li ka u thusa ho lula u nahanne ka ho hahamalla lipakane tsa hao tsa nako e telele.
3. Bolela lipakane tse ling tsa nako e khutšoanyane tse ka thusang motho hore a tšoanelehe bakeng sa ho kolobetsoa.
3 Lipakane Tsa Nako e Khutšoanyane: Haeba ha u e-s’o kolobetsoe, nahana ka seo u lokelang ho se etsa e le hore u finyelle pakane eo. Ho ka ’na ha hlokahala hore u utloisise lithuto tsa motheo tsa Bibele hantle. Haeba ho le joalo, iketsetse pakane ea ho ithuta ka botlalo buka ea Seo Bibele e se Rutang, u bale mangolo ’ohle a bontšitsoeng ho eona. (1 Tim. 4:15) Hape iketsetse pakane ea ho bala Bibele eohle ho tloha ho Genese ho ea ho Tšenolo, e leng se hlokahalang ho basebeletsi ba Bethele le liithuti tsa Gileade. Ka mor’a moo, lula u e-na le lenaneo la kamehla la ho bala Bibele letsatsi le letsatsi. (Pes. 1:2, 3) Nahana hore na ho etsa joalo ho ka u thusa hakaakang hore u hōle moeeng! Rapela ho tsoa botebong ba pelo pele le ka mor’a hore u bale Bibele le ho ithuta eona, ’me ka linako tsohle u loanele ho sebelisa seo u ithutang sona.—Jak. 1:25.
4. Mokreste eo pakane ea hae ea nako e telele e leng ho sebeletsa Bethele kapa ho ba moromuoa a ka ’na a ipehela lipakane life tsa nako e khutšoanyane?
4 Haeba u se u kolobelitsoe, ke lipakane life tse ling tseo u ka li hahamallang? Na ho hlokahala hore u ntlafatse tsebo ea hao ea ho ruta? Ka mohlala, na u ka ikemisetsa ho ntlafatsa tsela eo u sebelisang Lentsoe la Molimo ka eona tšebeletsong ea tšimo? (2 Tim. 2:15) U ka atolosa tšebeletso ea hao joang? Ipehele lipakane tse tobileng tsa nako e khutšoanyane tse lumellanang le lilemo tsa hao le maemo a hao le tse tla u thusa hore u finyelle lipakane tsa hao tsa nako e telele.
5. Ho ipehela lipakane tsa nako e khutšoanyane ho ile ha thusa mor’abo rōna e mong joang hore a finyelle pakane ea hae ea ho sebeletsa Bethele?
5 Phihlelo ea Motho ea Atlehileng: Ha Tony a ne a le lilemo li 19, o ile a etela ofising ea lekala ea Lipaki Tsa Jehova, ’me a ba le takatso ea ho sebeletsa Bethele. Leha ho le joalo, o ne a phela ka tsela e sa rateheng, a bile a e-s’o inehele ho Molimo. Tony o ile a etsa qeto ea ho phela ka melao-motheo ea Jehova eaba o ipehela pakane ea ho tšoanelehela ho kolobetsoa. Ha a se a finyeletse pakane eo, o ile a ikemisetsa ho ba pula-maliboho ea thusang le ho ba oa kamehla, ’me a ngola almanakeng ea hae matsatsi ao a neng a batla ho qala ka ’ona. Ak’u inahanele hore na o ile a thaba hakaakang, ha a bitsetsoa ho ea sebeletsa Bethele ka mor’a ho bula maliboho ka nako e itseng!
6. Ke eng e ka u thusang ho finyella lipakane tsa hao tsa moea?
6 Le uena u ka finyella lipakane tsa hao tsa moea ha u ntse u etelletsa mesebetsi e amanang le ’Muso pele. Rapela Jehova u mo tsebise “mesebetsi ea hao” ’me u loanele hore u li finyelle.—Liprov. 16:3; 21:5.