-
“Ke Kentse Mantsoe a ka Molomong oa Hao”Molimo o Bua le Rōna ka Jeremia
-
-
6, 7. Ke hobane’ng ha re ka kholiseha hore Molimo o ne a thahasella Jeremia, ’me ho ne ho etsahala’ng Juda nakong eo a hlahang?
6 Monna le mosali ba lebeletseng hore lesea la bona le hlahe, hangata ba nahana ka mora (kapa morali) oa bona oa ka moso. Ebe o tla ba joang, o tla etsa’ng bophelong—o tla rata lintho life, a etse mosebetsi oa mofuta ofe, hona o tla fihlela lintho life bophelong? Ho ka etsahala hore ebe batsoali ba hao le bona ba ile ba nahana ka lintho tseo. E tlameha ebe le batsoali ba Jeremia ba ile ba nahana ka tsona. Leha ho le joalo, taba ea hae eona ea ikhetha. Hobane’ng? Hobane ka ho khetheha ’Mōpi oa leholimo le lefatše o ne a thahasella bophelo ba Jeremia le lintho tseo a neng a tla li etsa.—Bala Jeremia 1:5.
7 Ka sebele, pele Jeremia a tsoaloa, Molimo o ile a sebelisa tsebo ea Hae ea ho tseba lintho le pele li etsahala. O ile a thahasella ka ho khethehileng moshanyana ea neng a tla hlahela lelapeng la boprista le neng le lula ka leboea ho Jerusalema. Seo se etsahetse bohareng ba lekholo la bosupa la lilemo B.C.E., ’me ena e ne e se nako ea thabo Juda ka lebaka la puso e mpe ea Morena Manase. (Sheba leqephe la 19.) Boholo ba nako pusong ea hae ea lilemo tse 55, Manase o ile a etsa se sebe mahlong a Jehova. Ka mor’a moo, mora oa hae Amone le eena o ile a etsa se tšoanang. (2 Mar. 21:1-9, 19-26) Phetoho e khōlō e ile ea etsahala pusong ea morena oa Juda ea latelang. Ka sebele, Morena Josiase o ile a batla Jehova. Selemong sa bo18 sa puso ea hae, Josiase o ne a felisitse borapeli ba litšoantšo naheng eohle. E tlameha ebe seo se ile sa thabisa batsoali ba Jeremia, kaha Molimo o ile a roma mora oa bona nakong ea puso ea Josiase.—2 Likron. 34:3-8.
-
-
“Ke Kentse Mantsoe a ka Molomong oa Hao”Molimo o Bua le Rōna ka Jeremia
-
-
MOLIMO O KHETHA ’MUELLI
8. Jeremia o ile a rongoa hore e be eng, hona o ile a etsa joang?
8 Ha re tsebe hore na Jeremia o ne a le lilemo li kae ha Molimo a ne a re ho eena: ‘Ke u entse moprofeta ho lichaba.’ E ka ’na eaba o ne a habile lilemo tse 25, e leng lilemo tseo ka tsona moprista a neng a ka kena karolong e qalang ea tšebeletso ea hae ea boprista. (Num. 8:24) Ho sa tsotellehe hore na o ne a le lilemo li kae, Jeremia o ile a araba ka ho re: “Oho, ’Musi Morena Jehova! Bona! ha ke tsebe ho bua, etsoe ke sa le moshanyana.” (Jer. 1:6) O ne a le lesisitheho, mohlomong hobane a ne a nahana hore o sa le monyenyane haholo kapa hore o ne a sa tšoanelehe hore a ka jara boikarabelo boo bo boima le ho bua le sechaba phatlalatsa e leng seo ho neng ho hlokahala hore moprofeta a se etse.
-