“Na Litlhaloso Hase Tsa Molimo?”

JOSEFA o ne a tsamaea phasejeng e lefifi, a rotha mofufutso ka lebaka la ho sebetsa ka thata har’a mocheso. Ha motho a tsoela ka ntle ho teronko ea Egepeta, letsatsi le ne le bataola. Ho bonahala Josefa a ne a tseba teronko ena ka ntle le ka hare. Seeta ho ne ho lla sa hae. Ka sebele o ne a hlomphuoa haholo. Leha ho le joalo, e ne e le motšoaruoa.

E tlameha ebe hangata pelo e ne e-ea mafisa ha a nahana ka lithota le maralla a Hebrone e leng moo a neng a alosa mehlape ea ntate oa hae! O ne a ka ba lilemo li 17 ha ntat’ae Jakobo, a mo roma hore a nke leeto le lelelele. Ho ne ho le thata hore a nahane ka bolokolohi boo a kileng a ba le bona. Ka lonya baholoane ba Josefa ba ile ba mo fetohela ’me ba mo rekisa bokhobeng. O ile a isoa Egepeta, moo a ileng a sebetsa ntlong ea Potifaro. Potifaro o ne a mo tšepa ho fihlela ha mosali oa hae a mo qosa ka bohata ka hore o mo betile e leng sona se entseng hore a hlahleloe ntloana-tšoana.a—Genese, khaolo 37, 39.

Josefa o ne a se a le lilemo li 28, ’me e ka ba lilemo tse leshome e le lekhoba ebile e le motšoaruoa. O ne a sa nahana hore o tla phela ka tsela ena. Na o ne a tla ke a lokolloe? Na o ne a sa tla hlola a bona ntate oa hae kapa moena oa hae Benjamine eo a mo ratang? O ne a tla tjoatla nako e kae teronkong?

Na u kile ua ikutloa joaloka Josefa? Ka linako tse ling bophelo ha bo be joalokaha re ne re nahana ha re sa le bana. Ka sebele ho ka bonahala mathata a ntse a e-hloa manolo holimo, ’me ho sa bonahale hore a sa tla ke a ee moriting kapa hona hore re ka khona ho a mamella. A re ke re boneng hore na re ka ithuta’ng mohlaleng oa Josefa.

Josefa o ne a tseba hore Molimo oa hae Jehova a ke ke a mo lebala, ’me ha ho potang hore seo se ile sa mo thusa ho mamella. Esita leha a le chankaneng, Jehova o ile a ’na a mo hlohonolofatsa. Ke ka hona Bibele e reng: “Jehova a ’na a ba le Josefa ’me a ’na a mo bontša mosa o lerato ’me a lumella hore a fumane kamohelo mahlong a molaoli ea ka sehloohong oa ntlo ea chankana.” (Genese 39:21-23) Ha Josefa a ikitlaetsa mosebetsing, seo se ne se etsa hore Molimo a mo hlohonolofatse. Ruri ho ne ho mo khothatsa ho tseba hore Jehova o lula a e-na le eena!

Na Jehova o ne a batla hore Josefa a lule teronkong ho-ea-ho-ile? Josefa o ne a sa tsebe hantle, ’me e tlameha ebe o ne a rapella taba eo. Karabo e ile ea hlaha ka tsela eo a sa e lebellang joalokaha ho atisa ho ba joalo. Ho ile ha tsoha moferefere teronkong ha ho fihla batšoaruoa ba babeli bao e neng e le liofisiri tsa Faro. E mong e ne le e moapehi oa morena ha e mong e ne e le moqhatsetsi oa hae.—Genese 40:1-3.

Mookameli oa balebeli o ile a re Josefa a hlokomele banna ba kileng ba e-ba maemong a phahameng.b Bosiung bo bong, e mong le e mong o ile a lora toro e thahasellisang le e tsietsang. Ha Josefa a ba bona hoseng, o ile a hlokomela hore ha baa thaba. Ka hona o ile ba botsa: “Lifahleho tsa lōna li soabisitsoe ke eng kajeno?” (Genese 40:3-7) Mohlomong tsela e mosa eo a ileng a ba botsa ka eona e ile ea etsa hore banna bao ba phutholohe ho mo bolella se ba tšoenyang. Josefa o ne a sa tsebe hore puisano ea hae le banna bao e ne e tla mo bulela khoro. Haeba Josefa a ne a sa bontša banna bao hore o amehile ka bona, mohlomong ba ka be ba sa ka ba buisana. Qeto ena ea hae e ka ’na ea etsa hore re ipotse, ‘Na ke bontša tumelo ea ka ho Molimo ka hore ke bontše batho ba bang hore kea ba thahasella?’

Banna bao ba ile ba bolela hore ba ferekantsoe ke litoro tseo ba li lorileng, le hore ha ho na motho ea ba hlalosetsang tsona. Baegepeta ba ne ba lumela hore ho na le seo litoro li se bolelang, ’me ba tlotla motho ea li hlalosang. Banna bao ba ne ba sa tsebe hore litoro tsa bona li tsoa ho Jehova e leng Molimo oa Josefa. Empa Josefa eena o ne a tseba. O ile a re: “Na litlhaloso hase tsa Molimo? Ka kōpo, mpheteleng eona.” (Genese 40:8) Mantsoe ao a Josefa e ntse e le a bohlokoa le kajeno ho batho ba ratang ho ithuta Bibele. E ka ba ntho e ntle hakaakang ha batho bohle ba ratang bolumeli ba ka bontša boikokobetso bo kang ba Josefa! Re lokela ho ikemisetsa ho qhelela boikhohomoso ka thōko ’me re tšepe hore ke Molimo feela ea ka re hlalosetsang Lentsoe la hae ka tsela e nepahetseng.—1 Bathesalonika 2:13; Jakobo 4:6.

Ho ile ha qala moqhatsetsi. A bolella Josefa hore o lorile sefate sa morara se nang le makala a mararo a ileng a beha masihla. Morara o ile oa butsoa, ’me moqhatsetsi a o tlhotlela senoelong sa Faro. Ka thuso ea Jehova, hang-hang Josefa o ile a utloisisa se boleloang ke toro eo. O ile a bolella moqhatsetsi hore makala a mararo a emela matsatsi a mararo ao ka mor’a ’ona Faro a neng a tla mo busetsa mosebetsing. Ha Josefa a bona ho re etlo! sefahlehong sa moqhatsetsi, o ile a mo kōpa a re: “Ka kōpo, u nketse ka mosa o lerato u be u mpolele ho Faro.” Josefa o ile a mo bolella hore o rekisitsoe bokhobeng ebile u tšoeroe ntle ho lebaka.—Genese 40:9-15.

Kaha moapehi o ile a utloa tlhaloso e khothatsang ea toro ea moqhatsetsi, o ile a kōpa Josefa hore a mo hlalosetse toro ea hae ea libaskete tse tharo tsa bohobe ’me ho ne ho e-na le linonyana tse jang lijo tse ka har’a e ’ngoe. Josefa o ile a senoleloa toro eo. Empa tlhaloso ea eona e ne e se monate. Josefa o ile a re: “Tlhaloso ea eona ke ena: Libaskete tse tharo ke matsatsi a mararo. Matsatsi a mararo ho tloha hona joale Faro o tla u khaola hlooho ’me ka sebele a u fanyehe thupeng; ka sebele linonyana li tla ja nama ea hao.” (Genese 40:16-19) Feela joaloka bahlanka ba bang ba tšepahalang ba Molimo, ka sebete Josefa o ile a phatlalatsa litaba tse monate tse tsoang ho Molimo hammoho le likahlolo tsa hae.—Esaia 61:2.

Mantsoe a Josefa a ile a phethahala ka mor’a matsatsi a mararo. Faro o ile a etsa mokete oa letsatsi la tsoalo e leng mokete oo bahlanka ba Molimo ba mehleng ea khale ba neng ba sa o keteke, ’me a phatlalatsa kahlolo ea hae khahlanong le bahlanka bao ba hae. Moapehi o ile a bolaoa feela joalokaha Josefa a ne a boletse, ’me moqhatsetsi a busetsoa mosebetsing. Ka masoabi, moqhatsetsi eo ea sa tsotelleng o ile a lebala Josefa.—Genese 40:20-23.

Ho ile ha feta lilemo tse peli. (Genese 41:1) U ka inahanela hore na Josefa o ne a nyahame hakaakang! E ka ’na eaba o ne a e-na le tšepo ea hore o tla lokolloa ka mor’a hore Jehova a mo thuse ho hlalosa toro ea moqhatsetsi le ea moapehi. Mohlomong hoseng ho hong le ho hong ha Josefa a tsoha o ne a nahana hore o tl’o lokolloa, empa meso e ne e ntse e tsoala mesoana. Ho ka etsahala hore ho ile ha e-ba thata hore Josefa a mamelle ka lilemo tsena tse peli. Leha ho le joalo, o ile a lula a tšepile Jehova. Ho e-na le hore a nyahame, o ne a ikemiselitse ho mamella, ’me ha teko eo e feta o ne a le matla le ho feta.—Jakobo 1:4.

Bohle re hloka ho ba le mamello ha re tobana le maemo a thata. E le hore re tobane le mathata a bophelo a sa feleng, re lokela ho ba le boikemisetso, mamello le khotso eo e leng Molimo feela ea ka fanang ka eona. Feela joalokaha a ile a etsa ka Josefa, a ka re thusa ho hlōla ho nyahama e le hore re be le tšepo.—Baroma 12:12; 15:13.

Le hoja e ka ’na eaba moqhatsetsi o ile a lebala Josefa, Jehova ha aa ka a mo lebala. Molimo o ile a etsa hore Faro a lore litoro tse peli tse sa lebaleheng. Torong ea pele, Faro o ile a bona likhomo tse nonneng tse supileng li nyoloha Nōkeng ea Nile, ’me li lateloa ke tse otileng tse supileng. Tse otileng li ile tsa ja tse nonneng. Hamorao Faro o ile a lora liqoapi tse supileng tsa lijo-thollo lehlakeng le le leng, li nonne ’me li le ntle. Empa ka mor’a tsona ho ile ha hōla liqoapi tse supileng tsa lijo-thollo, tse tšesaane le tse bajuoeng ka lebaka la moea, ’me tsa metsa liqoapi tse supileng tse nonneng. Faro o ile a tsoha a khathatsehile haholo ke litoro tseo, ’me a bitsa banna bohle ba hae ba bohlale le baprista ba sebelisanang le meea hore ba tl’o mo hlalosetsa tsona. Ba ile ba hlōleha. (Genese 41:1-8) Ha re tsebe hore na ba ile ba hlōleha ka tsela efe. Leha ho le joalo, seo re se tsebang ke hore Faro o ile a soetseha, empa o ne a hlile a batla ho tseba hore na toro ea hae e bolela’ng.

Qetellong moqhatsetsi o ile a hopola Josefa! Letsoalo le ile la mo tšetšetha, ’me a bolella Faro ka mohlankana e mong eo lilemong tse peli tse fetileng a ileng a hlalosa toro ea hae le ea moapehi. Ka ho panya ha leihlo, Faro o ile a laela hore Josefa a bitsoe.—Genese 41:9-13.

U ka inahanela hore na Josefa o ile a ikutloa joang ha manģosa a mo bolella hore morena oa mo bitsa. O ile a apara liaparo tse ling ka potlako a ba a beola kaha eo e ne e le tloaelo ea Baegepeta. Ha ho potang hore o ile a rapela Jehova ka tieo hore a mo thuse hore lintho li mo tsamaele hantle. O ile a iphumana a eme ka har’a lekhotla la morena e moholo. Bibele e re: “Joale Faro a re ho Josefa: ‘Ke lorile toro, empa ha ho ea e hlalosang. Joale ke utloile ho boleloa hore ha u utloile toro u ka e hlalosa.’” Karabo ea Josefa e ile ea boela ea bontša hore o ikokobelitse ebile o na le tumelo ho Molimo, ’me a re: “Ha ho hlokahale hore ho talingoe ho ’na! Molimo o tla tsebisa Faro boiketlo.”—Genese 41:14-16.

Jehova o rata batho ba ikokobelitseng le ba tšepahalang, ka hona, ha ho makatse hore o ile a thusa Josefa ho hlalosa toro ea morena. Josefa o ile a hlalosetsa Faro hore tlhaloso ea litoro tsa hae e ’ngoe. Hore ebe toro e phetiloe habeli ho Faro ho bolela hore Jehova o ‘e tiisitse ka thata,’ le hore e tla phethahala ho bata kapa ho chesa. Likhomo tse nonneng le liqoapi tse nonneng li ne li tšoantšetsa lilemo tse supileng tsa khora Egepeta, ha likhomo tse otileng le liqoapi tse otileng li ne li tšoantšetsa lilemo tse supileng tsa tlala tse neng li tla tla ka mor’a tse supileng tsa khora. Ha nako ea tlala e fihla ho ne ho ke ke ha bonahala hore ho kile ha e-ba le khora.—Genese 41:25-32.

Faro o ne a lumela hore Josefa o nepile. Empa o ne a tla etsa’ng? Josefa o ile a fana ka tlhahiso ea se ka etsoang. Faro o ne a lokela ho batla monna “ea masene le ea bohlale” hore a okamele mosebetsi oa ho bokella lijo tse setseng nakong ea lilemo tse supileng tsa khora hore li behoe melikong e le hore li ka abeloa mafutsana nakong ea tlala. (Genese 41:33-36) Phihlelo eo Josefa a neng a e-na le eona e ne e ka etsa hore a tšoanelehe bakeng sa mosebetsi oo, empa ha aa ka a iphahamisa. Kaha o ne a ikokobelitse ha aa ka a nahana ka ho iphahamisa; ’me tumelo ea hae e ile ea etsa hore a bone ho sa hlokahale hore a iphahamise. Haeba re e-na le tumelo ea sebele ho Jehova, ha ho hlokahale hore re iphahamise. Re ka ba le khotso haeba re tlohela lintho matsohong a Jehova.

Faro le bahlanka bohle ba hae ba ile ba hlokomela hore tlhahiso ea Josefa e ntle. Morena o ile a bona hore Molimo oa Josefa ke eena ea mo fileng bohlale. O ile a bua le bahlanka ba hae ba neng ba le khotla a re: “Na ho ka fumanoa monna e mong ea joaloka enoa eo moea oa Molimo o leng ho eena?” O ile a re ho Josefa: “Kaha Molimo o entse hore u tsebe sena sohle, ha ho ea masene le ea bohlale joaloka uena. U tla okamela ntlo ea ka, ’me batho bohle ba ka ba tla u mamela ka ho feletseng. Ke tla ba moholo ho uena tabeng ea terone feela.”—Genese 41:38-41.

Faro o ile a phetha tšepiso ea hae. Josefa o ile a apesoa line ea boleng bo botle. Faro a mo roesa sefaha sa khauta, a mo kenya lesale la tiiso letsohong, a mo palamisa koloing ea borena ’me a mo lokolla hore a tsamaee ka eona ho pholletsa le naha e le hore a phethe mosebetsi oa hae. (Genese 41:42-44) Ka ho panya ha leihlo Josefa o ile a lokolloa teronkong ’me ea e-ba motlatsi oa Faro. Seo se ile sa bontša hore Josefa o na le tumelo ho Jehova. Jehova o ne a bone hore mohlanka oa hae o ile a tšoaroa ka ho hloka toka ka lilemo tse ngata. O ile a sebetsana le taba eo ka nako e loketseng le ka tsela e nepahetseng. Jehova o ne a sa nahana feela ka ho rarolla mathata a Josefa empa o ne a batla le ho boloka sechaba sa ka moso sa Iseraele. Re tla bona hore na o ile a etsa seo joang sehloohong se latelang sa “Bontša Tumelo e Tšoanang le ea Bona.”

Haeba u tobana le mathata, mohlomong u tšoaroa ka ho hloka toka ka nako e telele, u se ke ua nyahama. Hopola mohlala oa Josefa. O ile a fa Jehova monyetla oa hore a mo hlohonolofatse kaha o ile a lula a le mosa, a ikokobelitse, a e-na le tumelo le mamello.