Tlala e Bolaeang Nakong ea Nala
“Bahlanka ba ka ba tla ja, empa lōna le tla lapa.”—ESAIA 65:13.
1, 2. (a) Lichaba li loanela lefeela bothateng bofe? (b) Bibele e supa tšepo efe ea sebele?
LEFATŠE lohle le aparetsoe ke botšo ba tlala! Ha bo hlalosa ka tlokotsi ena, bohlophisi ba The Boston Globe bo itse: “Lefatše le nang le batho ba ka bang lekholo la limillione ba lintšing tsa ho shota le lokela ho fumana litsela tsa ho thusa lichaba tse futsanehileng ka ho fetisisa hore li thabele ho hong hoo e kang nala e kotuloang ke lichaba tse ruileng ka ho fetisisa.” Leha ho le joalo, le lichaba tseo ho thoeng ke tse tsoetseng pele mahlaleng a boqapi, li ke ke tsa bolela hore li lokolohile ka ho feletseng khaellong ea lijo. Le tsona tsena li hlōlehile ho hlaha ka lenaneo la ho tiisa hore baahi bohle ba tsona ba tla feptjoa. Batho ba amehileng ka boiketlo ba batho ba loana le bothata bo ntseng bo hōla. Na pheko e teng?
2 Taba ea bohlophisi e qotsitsoeng kaholimo e ile ea lumela hore: “Tšobotsi e nyahamisang ka ho fetisisa ea phepo e fosahetseng . . . ke hore lefatše le na le matla a totobetseng a hore le ka fepa e mong le e mong.” Leha ho le joalo, ho shota ho ntse ho e-ja setsi. Ke hobane’ng ha ho lokela hore ho be tjee? ’Mōpi oa rōna ea lerato o lokiselitse ho hongata bakeng sa libillione tse phetheselang lefatšeng. Ha a lokisetsa lefatše e le lehae la motho, o le entse le e-na le hona ho bea lijo ka bongata ho fepa bohle, ho be ho be le tse salang. (Pesaleme ea 72:16-19; 104:15, 16, 24) Le linakong tsena tsa matšoenyeho, re tiisetsoa hore Molokisetsi e Moholo oa rōna o tla fana ka lijo tse lekaneng bakeng sa ba talimang Mohloling o nepahetseng. Ka Eo a faneng ka eena e le Molaoli e Moholo oa Lijo, oa re bolella: “Le mpe le batle ’muso oa Molimo le ho loka [ha Molimo] pele; ’me lintho tseo tsohle [lintho tse bonahalang tse hlokahalang bophelong] le tla li ekeletsoa.”—Mattheu 6:33; 1 Johanne 4:14.
Tlala e Bolaeang
3. Tlala ea bohlokoa haholo ke efe, ’me e profetiloe joang?
3 Habohlokoa ka ho fetisisa lefatšeng kajeno ke tlala e sisimosang ea moea. E amana ka ho toba le ho haella ha khotso. Batho baa tlatselela, ba phopholetsa ka tsieleho tsela ea ho tsoa. Molimo o Matla ’Ohle o entse hore moprofeta oa oona a ngole ka boemo bona makholo-kholo a lilemo khale, a re: “Bonang, matsatsi a tla, ho itsalo Morena Jehova, ao ke tla romela ho lapa lefatšeng, e seng ho lapela bohobe, leha e le ho nyoreloa metsi; empa e leng ho lapela mantsoe a Jehova. Ba tla tsamaea ba e-tsoa leoatleng le leng, ba ea ho le leng; ba tla matha ba e-tsoa Leboea, ho isa Bochabela, ba ntse ba batla lentsoe la Jehova, empa ba ke ke ba le fumana.”—Amose 8:11, 12.
4, 5. (a) Ke hobane’ng ha ba bang ba sa fumane Molimo le hoja ba o phopholetsa? (b) Jesu o ile a fapana joang le baeta-pele ba bolumeli ba mehleng ea hae? (Mattheu 15:1-14)
4 Leha ho le joalo, na ho na le tsela ea ho tsoa qakeng ee? Moapostola Pauluse o arabela ka hore e, a re khothatsa ka mantsoe ana: “Molimo o entseng lefatše . . . o laetse mehla e laotsoeng ke oona, le meeli ea ho aha ha bona; e le hore ba batle Morena, mohlomong ba ke ba mo phopholetse, ba mo fumane, leha a se hole ho e mong le e mong oa rōna.”—Liketso 17:24-27.
5 Haeba Molimo “a se hole ho e mong le e mong oa rōna,” ke hobane’ng ha ba bangata ba o phopholetsa, empa ba sa o fumane? Ke hobane ba o batla libakeng lisele. Ke ba bakae ba ipitsang Bakreste bao ka bobona ba eang bukeng ea motheo ea ho ithuta ea Bokreste, Bibele e Halalelang? Ke ba bakae bao ho thoeng ke “balisa” ba sebelisang Lentsoe la Molimo ho ruta “linku”? (Bapisa Ezekiele 34:10.) Jesu o boleletse baeta-pele ba ikhohomosang ba bolumeli ba mehleng ea hae hore ha ba “tsebe Mangolo le matla a Molimo.” (Mattheu 22:29; Johanne 5:44) Leha ho le joalo, Jesu o ne a tseba Mangolo ’me a a ruta batho, bao a neng a ba utloela bohloko “hobane ba ne ba khathetse, ba saretsoe joale ka linku tse se nang molisa.”—Mattheu 9:36.
Ke Nako ea Nala Joang?
6. Mabapi le nala ea moea, Jehova o khothatsa bahlanka ba hae joang?
6 Jehova o lota le ho khothatsa ba mo batlang ka tieo. Ha a khalemela balisa ba bohata ba bolumeli, ka moprofeta oa hae Esaia, o re: “Bonang, bahlanka ba ka ba tla ja, empa lōna le tla lapa; bonang, bahlanka ba ka ba tla noa, empa lōna le tla nyoroa; bonang, bahlanka ba ka ba tla thaba, empa lōna le tla soaba.” (Esaia 65:13, 14) Empa Molimo o lokisetsa nala joang bakeng sa bahlanka ba oona? Re tlameha ho etsa joang ho kopanela ka thabo tokisetsong ea oona ea ho boloka bophelo, ho sa tsotellehe tlala ea kajeno ea moea?
7. Ke tšoantšiso efe ea boholo-holo e ileng ea fanoa ka lerato bakeng sa ho re khothatsa kajeno?
7 Kaha pholoho e itšetlehile ka ho feletseng ka hore re tsebe seo Molimo o se hlokang le ho nka bohato ka tumelo ka sona, ka thabo re lokela ho ea Lentsoeng la Molimo, re batla ho tseba thato ea oona bakeng sa rōna le ho lemoha mokhoa oo o sebelisanang le rōna ka oona. (Johanne 17:3) Ho fumana tsebo eo, joale re tla hlahloba tšoantšiso ea Bibele e lumellanang le lintho tse etsahalang kajeno. Motšoantšisi e moholo tšoantšisong ena ke mopatriareka Josefa. Joalokaha Jehova a ile a etsa tokisetso e bohlale bakeng sa batho ba hae ka Josefa, ka ho tšoanang ka lerato O tataisa ba Mo batlang kajeno.—Bapisa Ba-Roma 15:4; 1 Ba-Korinthe 10:11, tšupiso ho Reference Bible (*); Ba-Galata 4:24.
Josefa, ’Moloki oa Bophelo
8, 9. (a) Re fumana tšoano efe mehleng ea morao bakeng sa Josefa, Jakobo le Faro? (b) Ke joang rōna ka borōna re ka amehang phethahatsong?
8 Joaloka ’moloki oa bophelo, Josefa mora oa Jakobo o phethile karolo e hlollang. Na hona ho tšoantšetsa ho hong nakong ea moraonyana? Ha e le hantle, nahana ka mamello ea Josefa tšoarong e neng e sa mo lokela ea bana babo, ho mamella ha hae liteko le meleko naheng esele, tumelo ea hae e sa thekeseleng botšepehing le ho phahamisetsoa ha hae boemong ba hore e be molaoli ea bohlale ka nako ea tlala ea sekoboto. (Genese 39:1-3, 7-9; 41:38-41) Na ha re bone ho tšoana tseleng eo Jesu a phetseng ka eona?
9 Jesu e bile Bohobe ba Bophelo har’a maemo a bomalimabe lefatšeng le lapetseng ‘ho utloa mantsoe a Jehova.’ (Amose 8:11; Ba-Heberu 5:8, 9; Johanne 6:35) Likamanong tsa bona le Josefa, Jakobo le Faro ba re hopotsa Jehova le seo a se finyellang ka Mora oa hae. (Johanne 3:17, 34; 20:17; Ba-Roma 8:15, 16; Luka 4:18) Ho na le ba bang hape ba nkileng karolo tšoantšisong ena ea sebele bophelong, ’me re tla hlahloba likarolo tsa bona ka thahasello. Ntle ho pelaelo re tla hopotsoa ka ho itšetleha ha rōna ka Josefa e Moholoanyane, Kreste Jesu. Re leboha hakaakang hore e be o re boloka tlaleng e bolaeang ‘mehleng ena ea qetello’ e ntseng e senyeha ho ea pele!—2 Timothea 3:1, 13.
Tšoantšiso Ea Senoleha
10. (a) Josefa o ile a lokisetsoa karolo ea boikarabelo eo a neng a tla e phetha joang? (b) O ile a bontša litšoaneleho life qalehong ea bophelo?
10 Mehleng ea Josefa, ha ho motho ea ka beng a ile a tseba pele ho nako hore na Jehova o hopoletse batho ba Hae eng. Empa nakong ea ha Josefa a bitsoa ho phethahatsa karolo ea hae ea bohlokoa, Jehova o ne a se a mo koetlisitse le ho mo etsa ea phethahetseng litšoanelehong tsa hae. Mabapi le bophelo ba hae pejana, tlaleho e re: “Josefa o na a le lilemo tse leshome le metso e supileng; o na a ntse a alosa linku le banab’abo, ’me mohlankanyana eo o na a tsamaea le bara ba Bilha le bara ba Zilpa, basali ba ntat’ae; empa Josefa o na a ntse a sebela ntat’a bona tse mpe tsa bona.” (Genese 37:2) O bontšitse botšepehi lithahasellong tsa ntat’ae joalokaha Jesu a ne a sa thekesele botšepehing ba hae ba ho alosa mohlape oa Ntat’ae har’a “moloko o sa lumeleng, o khopo.”—Mattheu 17:17, 22, 23.
11. (a) Ke hobane’ng ha banab’abo Josefa ba ile ba mo hloea? (b) Ke boemo bofe bo tšoanang bo ileng ba ama Jesu?
11 Ntat’a Josefa, Iseraele, a mo rata ho feta bana babo kaofela ’me a mo hlompha ka ho mo etsetsa seaparo se selelele se mebala-bala. Ka lebaka la sena, banab’abo Josefa “ba mo hloea, ba sitoa ho bua le eena ka khotso.” Ba fumana lebaka le leng hape la ho mo hloea ha a lora litoro tse peli tseo ba ileng ba li toloka hore li bolela hore o ne a tla ba busa. Ka mokhoa o tšoanang, baeta-pele ba Bajode ba ile ba hloea Jesu ka lebaka la botšepehi ba hae, thuto ea hae e susumetsang le tlhohonolofatso e totobetseng ea Jehova ho eena.—Genese 37:3-11; Johanne 7:46; 8:40.
12. (a) Ke hobane’ng ha Jakobo a ne a amehile ka boiketlo ba bara ba hae? (b) Ke tšoano efe eo re e fumanang pakeng tsa bophelo ba Josefa le ba Jesu?
12 Kamorao ho nako banab’abo Josefa ba ne ba alositse linku haufi le Sikeme. Ntat’a Josefa o ne a amehile hantle hobane ke hona teng moo Sikeme a neng a sentse Dina, hoo Simeone le Levi le banab’abo bona, ba neng ba ile ba bolaea banna ba motse oo. Jakobo a kōpa Josefa hore a ee ’me a bone hore na ba phela joang le ho tla mo tlalehela. Ho sa tsotellehe lehloeo la banab’abo ho eena, Josefa a potlakela ho ea ba batla. Ka mokhoa o tšoanang, Jesu ka thabo o ile a amohela kabelo ea Jehova mona lefatšeng, le hoja ho ne ho tla bolela mahlomola a maholo nakong ea ha a etsoa ea phethahetseng joaloka Moemeli e Moholo oa poloko. Mamellong ea hae, Jesu e bile mohlala o motle hakaakang bakeng sa rōna bohle!—Genese 34:25-27; 37:12-17; Ba-Heberu 2:10; 12:1, 2.
13. (a) Banab’abo Josefa ba ile ba bontša lehloeo la bona joang? (b) Masoabi a Jakobo a ka tšoantšoa le eng?
13 Bana babo Josefa ba leshome ba ’mona a sa tla le hōle. Bohale ba bona ba mo tukela ka potlako ’me ba rera ho mo hleka tseleng. Pele ba rera ho ’molaea. Empa Rubene, ka lebaka la ho tšaba boikarabelo ba hae ba boholoane, a ba hlōla hore ba mpe ba lihele Josefa ka lemeneng le se nang metsi, a lebelletse hore hamorao o tla khutla ’me a mo lopolle. Ho sa le joalo, Juda a phehella banab’abo hore ba mo rekise e le lekhoba ho Baishmaele ba bang bao mokoloko oa bona oa likamele o neng o feta ka tsela. Bashemane bana joale ba nka seaparo se selelele sa Josefa eaba ba se qopetsa maling a phooko ’me ba se romela ho ntat’a bona. Ha Jakobo a se hlahloba, a re: “Seaparo sa mor’a ka! Selalome se mo jele; jo! Josefa o harotsoe, o harotsoe!” Jehova o tlameha a be a ile a utloa bohloko bo tšoanang ka mahlomola a Jesu ha a phethahatsa kabelo ea hae lefatšeng.—Genese 37:18-35; 1 Johanne 4:9, 10.
Josefa Egepeta
14. Tšoantšiso ee ea boholo-holo e ka re tsoela molemo joang kajeno?
14 Ha rea lokela ho etsa qeto ea hore phethahatso ea liketsahalo tsa tšoantšetso tse amang Josefa e etsahala hantle joalokaha liketsahalo tseo li ile tsa etsahala. Ho e-na le hoo, morao koo re fumana letoto la mehlala e etselitsoeng ho re ruta le ho re khothatsa kajeno. Joalokaha moapostola Pauluse a itse: “Taba tsohle tse ngoliloeng pele, li ngoliloe ho re ruta, hore, ka ho mamella le ka ho tšelisoa ke Mangolo, re tle re be le tšepo. Molimo oa mamello le oa tšeliso o ke o le nee ho ba le khopolo e le ’ngoe e mong ka ’nģa ho e mong, ho Jesu Kreste, bohle hammoho le tle le tlotlise Molimo, e leng Ntat’a Morena oa rōna Jesu Kreste, ka molomo o le mong.”—Ba-Roma 15:4-6.
15. Ke hobane’ng ha Josefa a ile a atleha le ntlo ea Potifaro?
15 Josefa o ile a isoa Egepeta, ’me teng a rekisetsoa Moegepeta ea bitsoang Potifaro, molaoli oa balebeli ba Faro. Jehova a ipaka hore o na le Josefa, ea ileng a tsoela pele ho phela ka melao-metheo e metle eo ntat’ae a neng a e kentse ka ho eena, le hoja a ne a le hōle le ntlo ea ntat’ae. Josefa ha a ka a furalla borapeli ba Jehova. Mong’a hae, Potifaro, a ananela litšoaneleho tse hlahelletseng tsa Josefa ’me a ’mea moalosi oa ntlo eohle ea hae. Jehova a ’na a hlohonolofatsa ntlo ea Potifaro ka lebaka la Josefa.—Genese 37:36; 39:1-6.
16, 17. (a) Josefa o ile a thulana le teko e ’ngoe ea botšepehi joang? (b) Phihlelo ea Josefa chankaneng e bontša tsamaiso efe ea litaba?
16 Ke hona moo mosali oa Potifaro a ileng a leka ho eka Josefa. Josefa a ’na a mo hana. Ka letsatsi le leng mosali enoa a tšoara Josefa ka seaparo, empa Josefa a baleha, a se siea matsohong a hae. Mosali enoa a nģosa Josefa ho Potifaro ka hore o ne a mo fereha, ’me Potifaro a etsa hore Josefa a kenngoe chankaneng. O ile a tlangoa ka nakoana ka mahlaahlela a tšepe. Empa ka tse mpe tse mo hlahetseng chankaneng, Josefa a ’na a ipaka hore ke monna ea tšepahalang. Kahoo, molebeli oa chankane a ’mea moalosi oa batlamuoa bohle.—Genese 39:7-23; Pesaleme ea 105:17, 18.
17 Kamorao ho nako, molaoli oa baqhatsetsi ba Faro le molaoli oa baapeheli ba mo halefisa eaba ba kenngoa chankaneng. Josefa a abeloa ho ba sebeletsa. Hape, Jehova a tsamaisa litaba. Bahlanka bana ba babeli ba lekhotla ba lora litoro tse ileng tsa ba tšoenya. Kamor’a ho hatisa hore “liphuthullo li tsoa ho Molimo,” Josefa a ba hlalosetsa litoro tsa bona. ’Me joalokaha Josefa a ne a bontšitse, matsatsi a mararo hamorao (mohla letsatsi la tsoalo ea Faro) moqhatsetsi a khutlisetsoa mosebetsing oa hae, empa molaoli oa baapeheli a fanyehoa.—Genese 40:1-22, NW.
18. (a) Josefa o ile a hopoloa joang? (b) ’Moko-taba oa toro ea Faro e ne e le eng?
18 Le hoja Josefa a ne a ile a bokollela molaoli oa baqhatsetsi hore a mo buelle ho Faro, ho ile ha feta lilemo tse peli pele monna eo a hopola Josefa. Le ka nako eo, hona ho etsahetse feela hobane Faro a ile a lora litoro tse peli tse tšoenyang ka bosiu bo le bong. Ha ho se lea mong oa baprista ba linohe ba morena ea neng a ka hlalosa seo litoro li se bolelang, moqhatsetsi a bolella Faro hore Josefa a ka hlalosa litoro. Ka hona Faro a romela hore ho latoe Josefa, eo ka boikokobetso a ileng a supa Mohloli oa liphuthullo tsa ’nete, a re: “Molimo ke oona o ka arabelang Faro ka karabo ea khotso.” Eaba ’musi oa Egepeta o phetela Josefa litoro, ka tsela e latelang:
“Ke ne ke eme lebōpong la nōka. Eaba ho tsoa nōkeng likhomo tse supileng tsa lithole, tse nonneng, tse ntle ho talingoeng, ’me tsa ’na tsa fula mohlakeng. Ka boela ka bona ho e-tsoa likhomo tse ling tse supileng kamora’ tsona, e le meketa, li le mpe haholo ha li talingoa, li otile linama; ke ne ke e-so ho ka ke bona tse mpe hakalo lefatšeng lohle la Egepeta. Likhomo tse otileng tsa meketa, tsa e-ja likhomo tse supileng tsa pele, tse nonneng. Eitse hobane li li metse, ha lia ka tsa bonahala hoba li li koentse kahare, tsa mpa tsa sala li le mpe ho talingoeng joale ka pele. . . .
“Ho loreng ha ka ka bona liqoapi tse supileng li melile lehlakeng le le leng, li nonne, li le ntle. Ka ba ka bona liqoapi tse supileng tse phutsitseng, tse otileng, tse cheleng ke moea oa Bochabela, li e-tsoa kamora’ tseo; ’me liqoapi tse otileng tsa metsa liqoapi tse supileng tse ntle. Ke boleletse linohe, empa ha ho motho ea mphuthullelang.”—Genese 40:23–41:24.
19. (a) Josefa o bontšitse boikokobetso joang? (b) Tlhaloso ea litoro e fetisitse molaetsa ofe?
19 A litoro tsa mohlolo! Ke mang ea neng a ka li hlalosa? Josefa o ile a li hlalosa, empa e se hore a itlotlise. A re: “Toro ea Faro e ’ngoe. Molimo o tsebisitse Faro seo o eang ho se etsa.” Eaba Josefa o tsoela pele ho senola molaetsa o matla oa boprofeta oa litoro tseo, a re:
“Ho tla lilemo tse supileng tsa nala e kholo naheng eohle ea Egepeta: ’me ho tla hlaha lilemo tse supileng tsa tlala kamora’ tsona, ’me nala kaofela e tla lebaloa lefatšeng la Egepeta, tlala e qete naha. . . . Ha toro e kile ea pheteloa Faro habeli, ke ho re, ke taba e tiisitsoeng ke Molimo, ’me Molimo o tla phakisa o e phethe.”—Genese 41:25-32.
20, 21. (a) Faro o ile a itšoara joang ha a lemosoa? (b) Ntlheng ena, Josefa le Jesu ba ka bapisoa joang?
20 Faro o ne a tla etsa joang ka tlala ee e haufi? Josefa a khothalletsa hore Faro a etse tokisetso ka ho bea monna ea masene le ea bohlale hore a okamele naha a tle a phuthe lijo tse saletseng tsa lilemo tsa nala. Ka nako ena Faro o ne a hlokometse makhabane a Josefa. A ntša lesale la hae la monoana la tiiso letsohong la hae ’me a le roesa Josefa, kahoo Faro a mo khethela hore e be mookameli holim’a naha eohle ea Egepeta.—Genese 41:33-46.
21 Josefa o ne a le lilemo li 30 ha a ema ka pel’a Faro, lilemo tse tšoanang le tsa Jesu Kreste ha a ne a kolobetsoa ’me a qala tšebeletso ea hae e phelisang. Sehlooho se latelang se tla bontša kamoo Josefa a ileng a sebelisoa ke Jehova ho tšoantšetsa ‘Moemeli e Moholo le ’Moloki e Moholo’ oa Jehova nakong ea tlala ea moea e neng e tšoaea ka ho khethehileng mehla ea rōna.—Liketso 3:15; 5:31.
U Araba Joang?
◻ Tlala ke tšokelo ka litsela life tse peli kajeno?
◻ Ke litšoaneleho life tse ntle tseo Josefa a li hlaoletseng ha a sa na le banab’abo?
◻ Re ka ithuta eng liphihlelong tsa pejana tsa Josefa Egepeta?
◻ Kameho ea Jehova ka Josefa le batho ba lapileng e re tiisetsa eng?
[Lebokose le leqepheng la 13]
Sengoli se seng ho The Sunday Star (Toronto, la 30 Tlhakubele, 1986) se itse ka hoo ho thoeng ke likereke tse khōlō: “Moo li hlōlehang haholo ke ho lokiseng litaba le tlala e tebileng ea moea ea banna, basali le bacha ba kajeno”