Ba Ile Ba Etsa Thato Ea Jehova
Bohato ba ho Tšoarela bo Bula Tsela ea Poloko
BARA ba leshome ba Jakobo ba neng ba eme ka pel’a tona-khōlō ea Egepeta ba ne ba bolokile lekunutu le tšosang. Lilemo pele ho moo ba ne ba rekisitse Josefa, moen’a bona hore e be lekhoba, eaba ba rera ho bolella ntat’a bona hore o ne a bolailoe ke liphoofolo tse hlaha.—Genese 37:18-35.
Joale, lilemo tse ka bang 20 hamorao, tlala ea sekoboto e ne e qobeletse banna bana ba leshome hore ba tle Egepeta ho tla reka lijo-thollo. Empa litaba ha lia ka tsa tsamaea habonolo hakaalo. Tona-khōlō ea teng, eo e neng e boetse e le motsamaisi oa lijo, e ile ea ba qosa ka hore ke lihloela. Ea kenya e mong oa bona teronkong ’me ea laela hore ba bang kaofela ba khutlele hae ’me ba tlise moen’a bona e monyenyane, Benjamine. Ha ba se ba entse joalo, tona-khōlō e ile ea rera hore Benjamine a tšoaroe.—Genese 42:1–44:12.
Eaba Juda, e mong oa bara ba Jakobo, o etsa boipelaetso. A re: ‘Haeba re sa khutlele hae le Benjamine, ntate oa rōna o tla shoa.’ Joale ha etsahala ntho e ’ngoe eo Juda kapa metsoalle ea hae e tsamaeang le eena ba neng ba sa e lebella. Ka mor’a ho laela bohle hore ba tsoe ka kamoreng ntle le bara ba Jakobo, tona-khōlō e ile ea lla haholo. Joale, ha a qeta ho lla, o ile a re: “Ke ’na Josefa.”—Genese 44:18–45:3.
Ho Bontša Mohau le Poloko
Josefa o ile a botsa baholoane ba hae: “Ntate o sa phela na?” Ha se ke ha e-ba le ea arabang. Ka sebele, baholoane ba Josefa ba ne ba tlaletsoe. Na ba ne ba lokela ho tlala thabo, kapa ho tšoha haholo? Ha e le hantle, ba ne ba rekisitse monna enoa hore e be lekhoba lilemong tse 20 tse fetileng. Josefa o ne a e-na le matla a ho ba koalla chankaneng, a ho ba romela hae ba se na lijo, kapa—ho hobe le ho feta—o ne a ka ba ahlolela lefu! Ka lebaka le utloahalang, baholoane ba Josefa ba ile “ba sitoa ho mo arabela, hobane ba ne ba sisimoha ha ba ’mona.”—Genese 45:3
Kapele-pele Josefa o ile a etsa hore banna bana ba phutholohe. O ile a re: “Nkatameleng hle!” Eaba baa atamela. Joale a re: “Ke ’na Josefa, ngoan’abo lōna, eo le rekileng ka eena, ke tle ke isoe Egepeta. ’Me joale, le se ke la tsieleha, la itlhonamela kahoba la na la rekisa ka ’na, ka tla koano, hobane Molimo o nthomile ka pele ho Iōna hore ke tle ke le pholose.”—Genese 45:4, 5.
Mohau oa Josefa ha oa ka oa bontšoa ntle ho lebaka. O ne a se a hlokometse bopaki ba ho baka ha bona. Ka mohlala, ha Josefa a qosa baholoane ba hae ka hore ke lihloela, o ile a ba utloa ha ba buisana ba re: “Ka ’nete, ra na ra siteloa ngoan’abo rona . . . ke ka baka lena tlokotsi ena e re hlahelang.” (Genese 42:21) Hape, Juda o ne a ithaopetse hore e be lekhoba ho e-na le Benjamine, e le hore mohlankana eo a ka khutlisetsoa ho ntat’ae.—Genese 44:33, 34.
Kahoo, ho ne ho loketse hore Josefa a bontše mohau. Ka sebele, o ile a hlokomela hore ho etsa joalo ho ne ho ka fella ka hore lelapa lohle labo le bolokoe. Ka lebaka leo, Josefa o ile a bolella baholoane ba hae hore ba khutlele ho ntat’a bona Jakobo, ’me ba re ho eena: “Mor’a hao, Josefa, o re: Molimo o nkentse morena oa Egepeta eohle; theoha, u tle ho ’na, u se ke ua lieha! U tla aha naheng ea Goshene, u be haufi le ’na, uena le bana ba hao, le bana ba bana ba hao, le manku a hao, le makhomo a hao, le tsohle tsee u nang le tsona. Ke tla u ōtla teng.”—Genese 45:9-11.
Josefa e Moholoanyane
Jesu Kreste a ka bitsoa Josefa e Moholoanyane, kaha ho na le ho tšoana ho hlollang pakeng tsa banna bana ba babeli. Joaloka Josefa, Jesu o ile a tšoaroa hampe ke barab’abo, litloholo tsa Abrahama hammoho le eena. (Bapisa le Liketso 2:14, 29, 37.) Leha ho le joalo, banna bao ka bobeli ba ile ba feta phetohong e fetang e tloaelehileng. Ka mor’a nako, boemo ba Josefa e le lekhoba bo ile ba fetoha hore e be tona-khōlō, e be eena feela ea hlahlamang Faro. Ka ho tšoanang, Jehova o ile a tsosa Jesu bafung ’me a mo phahamisetsa boemong bo phahameng “letsohong le letona la Molimo.”—Liketso 2:33; Bafilippi 2:9-11.
E le eena tona-khōlō, Josefa o ne a ka aba lijo ho bohle ba tlileng Egepeta ho tla reka lijo-thollo. Kajeno, Josefa e Moholoanyane o na le sehlopha sa lekhoba le tšepahalang le le masene lefatšeng seo ka sona a abang lijo tsa moea “ka nako e tšoanetseng.” (Matheu 24:45-47; Luka 12:42-44) Ka sebele, ba tlang ho Jesu “ha ba na ho hlola ba lapa leha e le ho nyoroa . . . hobane Konyana, e leng har’a terone, e tla ba lisa, ’me e tla ba tataisetsa lilibeng tsa metsi a bophelo.”—Tšenolo 7:16, 17.
Thuto ho Rōna
Josefa o fana ka mohlala o ikhethang oa mosa. Ho tšoarella ka thata-thata tokeng ho ne ho tla hloka hore a hlokofatse ba neng ba mo rekisitse hore e be lekhoba. Ho fapana le seo, maikutlo a ka be a mo susumelitse hore habonolo feela a hlokomolohe phoso ea bona. Josefa ha aa ka a etsa leha e le efe ea lintho tsena. Ho e-na le hoo, o ile a leka pako ea baholoane ba hae. Joale, eitse ha a bona hore ba soabile e le kannete, o ile a ba tšoarela.
Re ka etsisa Josefa. Ha motho e mong ea re sitetsoeng a bontša hore pelo ea hae e fetohile e le kannete, re lokela ho mo tšoarela. Ka ho hlakileng, le ka mohla ha rea lokela ho lumella maikutlo feela tjee ho re foufaletsa phoso e tebileng. Ka lehlakoreng le leng, ha rea lokela ho lumella maikutlo a ho khopeha hore a re foufatse hoo re sa boneng pako ea ’nete. Kahoo a re ‘tsoeleng pele re mamellana le ho tšoarelana ka bolokolohi.’ (Bakolose 3:13) Ka ho etsa joalo, re tla be re etsisa Molimo oa rōna, Jehova, ea ‘lulang a loketse ho tšoarela.’—Pesaleme ea 86:5, NW; Mikea 7:18, 19.