Hlaolela ho Mamela ha Bofelo bo Ntse bo Atamela

‘Lichaba li tla mamela [Shilo].’—GENESE 49:10.

 1. (a) Nakong e fetileng, hangata ho mamela Jehova ho ’nile ha akarelletsa’ng? (b) Jakobo o ile a bolela boprofeta bofe mabapi le ho mamela?

HANGATA ho mamela Jehova ho ’nile ha bolela ho mamela baemeli ba hae. Ba kopanyelletsa mangeloi, bapatriareka, baahloli, baprista, baprofeta le marena. Esita le terone ea marena a Iseraele e ne e bitsoa terone ea Jehova. (1 Likronike 29:23) Leha ho le joalo, ka masoabi, babusi ba bangata ba Iseraele ha baa ka ba mamela Molimo, ba tlisa tlokotsi ho bona ka bobona le ho bafo ba bona. Empa Jehova ha aa ka a tlohela ba tšepahalang ba hae ba se na tšepo; o ile a ba tšelisa ka ho ba tšepisa hore o tla hlomamisa Morena ea ke keng a bola, eo ba lokileng ba neng ba tla thabela ho mo mamela. (Esaia 9:6, 7) Mopatriareka Jakobo ha a le makhatheng a lefu o ile a profeta ka ’musi enoa oa nakong e tlang, a re: “Lere la borena le ke ke la sutha ho Juda, leha e le lere la molaoli pakeng tsa maoto a hae, ho fihlela Shilo a tla; ’me lichaba li tla mo mamela.”—Genese 49:10.

 2. “Shilo” e bolela’ng, hona puso ea hae ea borena e tla kopanyelletsa’ng?

² “Shilo” ke lentsoe la Seheberu le bolelang “Eo e Leng ea Hae,” kapa “Eo e Ruiloeng ke Eena.” E, Shilo o ne a tla rua lefa la bobusi le tšoantšetsoang ke lere la borena, le matla a ho laela a emeloang ke lere la molaoli. Ho feta moo, puso ea hae ea borena e ne e ke ke ea kopanyelletsa lesika la Jakobo feela empa e ne e tla kopanyelletsa le “lichaba” tsohle. Sena se tumellanong le tšepiso ea Jehova ho Abrahama: “Peō ea hao e tla rua heke ea lira tsa eona. Ka sebele lichaba tsohle tsa lefatše li tla itlhohonolofatsa ka peō ea hao.” (Genese 22:17, 18) Jehova o ile a tiisa hore na “peō” ena ke mang ka 29 C.E. ha a tlotsa Jesu oa Nazaretha ka moea o halalelang.—Luka 3:21-23, 34; Bagalata 3:16.

’Muso oa Pele oa Jesu

 3. Jesu o ile a amohela bobusi bofe ha a nyolohela leholimong?

³ Ha Jesu a nyolohela leholimong, ha aa ka a busa lichaba tsa lefatše hang-hang. (Pesaleme ea 110:1) Leha ho le joalo, o ile a amohela “’muso” le bafo ba mo mamelang. Moapostola Pauluse o ile a tsebahatsa ’muso oo ha a ne a ngola, a re: “[Molimo] o ile a re lopolla [Bakreste ba tlotsitsoeng ka moea] matleng a lefifi ’me a re fetisetsa ’musong oa Mora oa hae ea ratoang.” (Bakolose 1:13) Topollo ena e qalile ka Pentekonta ea 33 C.E. ha moea o halalelang o ne o tšolleloa holim’a balateli ba Jesu ba tšepahalang.—Liketso 2:1-4; 1 Petrose 2:9.

 4. Barutuoa ba pele ba Jesu ba ile ba mamela ka litsela life, hona Jesu o ba tsebahalitse joang e le sehlopha?

⁴ Joaloka “manģosa a emeng bakeng sa Kreste,” barutuoa ba tlotsitsoeng ka moea ba ile ba mamela ’me ba qala ho bokella ba bang bao e neng e tla ba “baahi-’moho” le bona ’musong oo oa moea. (2 Bakorinthe 5:20; Baefese 2:19; Liketso 1:8) Ho feta moo, ba ne ba lokela ho lula ba “kopane ka ho loketseng kelellong e tšoanang le mokhoeng o tšoanang oa ho nahana” e le hore ba amoheloe ke Morena oa bona Jesu Kreste. (1 Bakorinthe 1:10) E le sehlopha, ba etsa “lekhoba le tšepahalang le le masene,” kapa sehlopha sa motsamaisi ea tšepahalang.—Matheu 24:45; Luka 12:42.

Ho Hlohonolofalletsoa ho Mamela “Motsamaisi”

 5. Ho tloha linakong tsa boholo-holo, Jehova o ’nile a ruta batho ba hae joang?

⁵ Ka linako tsohle Jehova o ’nile a fa batho ba hae mesuoe. Ka mohlala, ha Bajuda ba khutlile Babylona, Esdrase le banna ba bang ba ’maloa ba tšoanelehang ba ne ba sa balle sechaba Molao oa Molimo feela, ba ne ba ‘qaqisa’ molao oo, ‘ba o kenya moelelo le ho etsa hore ho utloisisoe’ Lentsoe la Molimo.—Nehemia 8:8.

6, 7. Ke joang sehlopha sa lekhoba se faneng ka lijo tsa moea tse nakong ka Sehlopha se Busang sa lona, hona ke hobane’ng ha ho loketse ho ipeha ka tlas’a sehlopha sa lekhoba?

⁶ Lekholong la pele la lilemo, ha ho phahama taba ea lebollo ka 49 C.E., sehlopha se busang sa sehlopha seo sa pele sa lekhoba se ile sa rapella tataiso ha se nahanisisa ka taba ena ’me sa etsa qeto e thehiloeng Mangolong. Ha se phatlalatsa qeto ea sona ka lengolo, liphutheho li ile tsa mamela tataiso e fanoeng ’me tsa fumana tlhohonolofatso e enneng ea Molimo. (Liketso 15:6-15, 22-29; 16:4, 5) Ka ho tšoanang kajeno, lekhoba le tšepahalang le Sehlopha se Busang sa lona le hlakisitse litaba tsa bohlokoa joaloka ho se nke lehlakore ha Bakreste, khalalelo ea mali le tšebeliso ea lithethefatsi le koae. (Esaia 2:4; Liketso 21:25; 2 Bakorinthe 7:1) Jehova o ile a hlohonolofatsa batho ba hae ha ba mamela Lentsoe la hae le lekhoba le tšepahalang.

⁷ Ka ho ipeha ka tlas’a sehlopha sa lekhoba, batho ba Molimo ba boetse ba bontša hore ba ipeha ka tlas’a Monghali, Jesu Kreste. Ho ipeha ka tlaase joalo ke habohlokoa le ho feta kajeno ka lebaka la bolaoli ba Jesu bo eketsehileng, joalokaha ho boletsoe esale pele boprofeteng boo Jakobo a ileng a bo bolela ha a le liphateng tsa lefu.

Shilo o Fetoha ’Musi ea Loketseng oa Lefatše

 8. Bolaoli ba Kreste bo ile ba eketsoa joang hona e le neng?

⁸ Boprofeta ba Jakobo bo ile ba bolela esale pele hore ‘lichaba li tla mamela’ Shilo. Ho hlakile hore bobusi ba Kreste bo ne bo tla fetela ka nģ’ane ho Iseraele ea moea. Bo ne bo tla akarelletsa’ng? Tšenolo 11:15 ea araba: “’Muso oa lefatše o fetohile ’muso oa Morena oa rōna le oa Kreste oa hae, ’me o tla busa e le morena ka ho sa feleng le kamehla.” Bibele e senola hore Jesu o ile a amohela bolaoli bona qetellong ea “linako tse supileng” tsa boprofeta—“linako tse behiloeng tsa lichaba”—ka 1914.a (Daniele 4:16, 17; Luka 21:24) Ka selemo seo, “ho ba teng” ho sa bonahaleng ha Kreste e le Morena oa Mesia ho ile ha qala, hammoho le nako ea hore a ‘qale ho busa har’a lira tsa hae.’—Matheu 24:3; Pesaleme ea 110:2.

 9. Jesu o ile a etsa’ng ha a amohela ’Muso oa hae, hona see se bile le phello efe e sa tobang ho moloko oa batho, haholo-holo barutuoa ba hae?

⁹ Ntho ea pele eo Jesu a ileng a e etsa ha a qeta ho behoa boreneng e bile ho lihela sebōpuoa se tsebahalang ka ho se mamele, Satane, hammoho le bademona ba hae “tlaase lefatšeng.” Ho tloha ka nako eo, meea ena e khopo e baketse moloko oa batho mahlomola ao ho seng a kileng a tšoana le ’ona le ho khothalletsa boemo bo etsang hore ho be thata haholo ho mamela Jehova. (Tšenolo 12:7-12; 2 Timothea 3:1-5) Ha e le hantle, bahlaseluoa ba ka sehloohong ntoeng ea Satane ea moea ke batlotsuoa ba Jehova, “ba bolokang litaelo tsa Molimo ’me ba e-na le mosebetsi oa ho paka ka Jesu,” le metsoalle ea bona ea “linku tse ling.”—Tšenolo 12:17; Johanne 10:16.

10. Ke joang ho phethahala ha boprofeta ba Bibele ho tiisang hore ntoa ea Satane khahlanong le Bakreste ba ’nete e hlōlehile?

¹⁰ Leha ho le joalo, ho hang Satane a ke ke a atleha, hobane lena ke ‘letsatsi la Morena,’ ’me ha ho letho le ka thibelang Jesu hore a “phethe tlhōlo ea hae.” (Tšenolo 1:10; 6:2) Ka mohlala, o tla etsa bonnete ba hore ho tiisoa ba ho qetela ho Baiseraele ba moea ba 144 000. Hape o tla sireletsa ‘bongata bo boholo, boo ho neng ho se motho ea khonang ho bo bala, bo tsoang lichabeng tsohle le melokong eohle le bathong bohle le malemeng ’ohle.’ (Tšenolo 7:1-4, 9, 14-16) Leha ho le joalo, ho fapana le metsoalle ea bona e tlotsitsoeng, bana ba tla fetoha bafo ba lefatšeng ba Jesu. (Daniele 7:13, 14) Boteng ba bona kajeno lefatšeng bo fana ka bopaki ba sebele ba hore ruri Shilo ke Morena oa “’muso oa lefatše.”—Tšenolo 11:15.

Ke Nako ea ho ‘Mamela Litaba Tse Molemo’

11, 12. (a) Ke bo-mang feela ba tla pholoha bofelo ba tsamaiso ea kajeno ea lintho? (b) Ba hemetsoeng ke “moea oa lefatše” ba bontša mekhoa efe?

¹¹ Bohle ba batlang bophelo bo sa feleng ba lokela ho ithuta ho mamela, etsoe Bibele e bolela ka ho hlakileng hore “ba sa tsebeng Molimo le ba sa mameleng litaba tse molemo tse mabapi le Morena oa rōna Jesu” ba ke ke ba pholoha letsatsi la Molimo la phetetso. (2 Bathesalonika 1:8) Leha ho le joalo, tikoloho ea kajeno e khopo le moea oa eona oa bofetoheli khahlanong le melao le melao-motheo ea Bibele li etsa hore ho be thata ho mamela litaba tse molemo.

¹² Bibele e hlalosa boikutlo bona ba ho hanyetsa Molimo e le “moea oa lefatše.” (1 Bakorinthe 2:12) Ha moapostola Pauluse a hlalosa phello ea oona ho batho, o ile a ngolla Bakreste ba lekholong la pele la lilemo Efese, a re: ‘Le ne le tsamaea ho ea ka tsamaiso ea lintho ea lefatše lena, ho ea ka ’musi oa matla a moea, moea oo hona joale o sebetsang ho bara ba ho se mamele. E, ka nako e ’ngoe kaofela re ile ra itšoara tumellanong le litakatso tsa nama ea rōna har’a bona, re etsa lintho tse ratoang ke nama le ke menahano, ’me ka tlhaho re ne re le bana ba khalefo esita le joaloka ba bang kaofela.’—Baefese 2:2, 3.

13. Ke joang Bakreste ba ka hanelang moea oa lefatše ka katleho, hona e le ka liphello life tse molemo?

¹³ Ho thabisang ke hore Bakreste ba Efese ha baa ka ba lula e le makhoba a moea ona oa ho se mamele. Ho e-na le hoo, ba ile ba fetoha bana ba mamelang ba Molimo ka ho ipeha ka tlas’a moea oa hae le ho kotula litholoana tse ngata le tse molemo tsa sena. (Bagalata 5:22, 23) Ka ho tšoanang kajeno, moea oa Molimo—matla a maholo ka ho fetisisa bokahohleng—o thusa ba limilione hore ba mamele Jehova, ’me phello ea sena ke hore ba tla fumana “kholiseho e feletseng ea tšepo ho fihlela bofelong.”—Baheberu 6:11; Zakaria 4:6.

14. Ke joang Jesu a ileng a lemosa Bakreste bohle ba phelang matsatsing a ho qetela mabapi le lintho tse tobileng tse neng li tla leka ho mamela ha bona?

¹⁴ U hopole hape hore re tšehelitsoe ka matla ke Shilo, eo hammoho le Ntate oa hae ba ke keng ba tlohella sera leha e le sefe—ebang ke modemona kapa motho—hore se leke ho mamela ha rōna ho feta kamoo re ka mamellang kateng. (1 Bakorinthe 10:13) Ha e le hantle, e le ho re thusa ntoeng ea rōna ea moea, Jesu o ile a hlalosa mathata a ’maloa a tobileng ao re neng re tla tobana le ’ona matsatsing ana a ho qetela. O entse sena ka mangolo a supileng, ao a ileng a a tsebisa moapostola Johanne ponong. (Tšenolo 1:10, 11) Ha ho pelaelo hore a bile le keletso ea bohlokoa ho Bakreste morao koo, empa a sebetsa haholo “letsatsing la Morena,” ho tloha ka 1914. Kahoo, ho loketse hakaakang hore re ele hloko melaetsa ee!b

Qoba ho Iphapanya, Boitšoaro bo Bobe, Lerato la Lintho Tse Bonahalang

15. Ke hobane’ng ha re lokela ho itebela khahlanong le bothata ba phutheho ea Efese, ’me re ka etsa see joang? (2 Petrose 1:5-8)

¹⁵ Lengolo la pele la Jesu le ne le e-ea phuthehong ea Efese. Ka mor’a ho babatsa phutheho bakeng sa mamello ea eona, Jesu o ile a re: “Leha ho le joalo, ke na le hona khahlanong le uena, hore u tlohetse lerato leo u neng u e-na le lona pele.” (Tšenolo 2:1-4) Kajeno, ka ho tšoanang, Bakreste ba kileng ba cheseha ba lahlehetsoe ke lerato le matla leo ba kileng ba rata Molimo ka lona. Ho lahleheloa ke lona ho ka fokolisa kamano ea motho le Molimo ’me ke taba eo ho lokelang hore ho sebetsanoe le eona hang-hang. Lerato le joalo le ka tsosolosoa joang? Ka thuto ea kamehla ea Bibele, ho ba teng libokeng, ho rapela le ho thuisa. (1 Johanne 5:3) Ke ’nete hore sena se hloka ‘boiteko bo tiileng,’ empa ho hang u ke ke ua ikoahlaea. (2 Petrose 1:5-8) Haeba ha u itlhahloba ka botšepehi u fumana hore lerato la hao le tapile, lokisa boemo hang-hang ’me u mamele khothatso ea Jesu: “Hopola hore na u oele ho eng, u bake ’me u etse liketso tsa pele.”—Tšenolo 2:5.

16. Ke litšusumetso life tse kotsi moeeng tse neng li le phuthehong ea Pergame le ea Thyatire, ’me ke hobane’ng ha mantsoe a Jesu ho tsona a loketse kajeno?

¹⁶ Bakreste ba Pergame le Thyatire ba ile ba babatsoa ka botšepehi ba bona, mamello le cheseho. (Tšenolo 2:12, 13, 18, 19) Leha ho le joalo, ba ne ba susumetsoa ke ba bang ba neng ba bontša moea o khopo oa Balame le Jezebele, bao e ileng ea e-ba tšusumetso e mpe ho Baiseraele ba boholo-holo ka ho sebelisa boitšoaro bo bobe le borapeli ba Baale. (Numere 31:16; 1 Marena 16:30, 31; Tšenolo 2:14, 16, 20-23) Empa ho thoe’ng nakong ee ea rōna—“letsatsing la Morena”? Na litšusumetso tse mpe tjee lia bonahala? E, hobane boitšoaro bo bobe esale bona bo itlhommeng pele har’a mabaka a etsang hore batho ba Molimo ba khaoloe. Kahoo, ke habohlokoa hakaakang hore re qobe botsoalle le batho bohle—ka hare le ka ntle ho phutheho—bao tšusumetso ea bona e senyang boitšoaro! (1 Bakorinthe 5:9-11; 15:33) Ba batlang ho ba bafo ba mamelang ba Shilo le bona ba tla qoba boithabiso bo belaetsang esita le boitsebiso bo libukeng kapa bo ho Internet bo tsosang takatso ea boitšoaro bo bobe.—Amose 5:15; Matheu 5:28, 29.

17. Pono ea batho ba Sarda le Laodisia le boikutlo ba bona li ne li fapana joang le pono ea Jesu ka boemo ba bona ba moea?

¹⁷ Kantle ho batho ba seng bakae, phutheho ea Sarda ha ea ka ea babatsoa ho hang. E ne e e-na le “lebitso,” kapa ponahalo ea hore ea phela, empa e ne e iphapantse moeeng hoo ho Jesu e neng e “shoele.” Ho mamela litaba tse molemo ho ne ho etsoa ka tloaelo feela. Ke qoso e mpe hakaakang! (Tšenolo 3:1-3) Phutheho ea Laodisia e ne e le boemong bo tšoanang. E ne e ithorisa ka leruo, e re, “Ke ruile,” leha ho le joalo, ho Kreste e ne e le ‘sōtō ’me e haula ebile e futsanehile ’me e hlobotse.’—Tšenolo 3:14-17.

18. Ke joang motho a ka qobang ho ba foofo moeeng mahlong a Molimo?

¹⁸ Kajeno, le bao e kileng ea e-ba Bakreste ba tšepahalang ba oetse mokhoeng o tšoanang oa ho se mamele. Mohlomong ba lumeletse moea oa lefatše hore o fokotse boikutlo ba bona ba hore metsotso e jele babeli, kahoo ba na le boikutlo bo foofo tabeng ea thuto ea Bibele, thapelo, liboka tsa Bokreste le tšebeletso. (2 Petrose 3:3, 4, 11, 12) Ke habohlokoa hakaakang hore ba joalo ba mamele Kreste ka ho etsa matsete a maruo a moea—e, ba ‘reke ho [Kreste] khauta e hloekisitsoeng ka mollo’! (Tšenolo 3:18) Maruo a joalo a ’nete a kopanyelletsa ‘ho rua mesebetsing e metle, ho ba seatla se bulehileng, ho itokisetsa ho arolelana.’ Ka ho etsa matsete ka matlotlo ana a bohlokoa e le kannete, re ‘ipolokela ka mokhoa o sireletsehileng motheo o motle bakeng sa ka moso e le hore re ka tšoara ka tieo bophelo ba sebele.’—1 Timothea 6:17-19.

Ba Babaletsoa ho Mamela

19. Ke pabatso efe le keletso tseo Jesu a ileng a li fa Bakreste ba Smyrna le ba Filadelfia?

¹⁹ Phutheho ea Smyrna le ea Filadelfia ke mehlala e hlaheletseng ea ho mamela, hobane mangolo ao Jesu a a ngoletseng liphutheho tsena a ne a se na khalemelo. Ho ba leng Smyrna o ile a re: “Ke tseba matšoenyeho le bofutsana ba hao—empa u ruile.” (Tšenolo 2:9) Ke phapang e kaakang ho ba leng Laodisia ba neng ba ithorisa ka maruo a lefatše empa ha e le hantle ba ne ba futsanehile! Ho hlakile hore Diabolose o ne a sa thabela ho bona batho ba bontšang botšepehi ho Kreste le ba mo mamelang. Kahoo, Jesu o ile a lemosa: “U se ke ua tšaba lintho tseo u leng haufi le ho utloisoa bohloko ke tsona. Bona! Diabolose o tla ’ne a lahlele ba bang ba lōna chankaneng e le hore le ka lekoa ka ho feletseng, le hore le ka ba le matšoenyeho ka matsatsi a leshome. U tšepahale esita le ho isa lefung, ’me ke tla u fa moqhaka oa bophelo.” (Tšenolo 2:10) Ka ho tšoanang, Jesu o ile a babatsa ba leng Filadelfia, a re: “U ile ua boloka lentsoe la ka [kapa ua ’mamela] ’me u bile le ’nete lebitsong la ka. Ke tla kapele. U ’ne u tšoare ka tieo seo u nang le sona, e le hore ho se ke ha e-ba le ea ka nkang moqhaka oa hao.”—Tšenolo 3:8, 11.

20. Ke joang ba limilione kajeno ba bolokileng lentsoe la Jesu, ’me ho sa tsotellehe maemo afe?

²⁰ “Letsatsing la Morena,” le qalileng ka 1914, masala a tšepahalang le metsoalle ea ’ona ea linku tse ling eo hona joale e baloang ka limilione, le ’ona a bolokile lentsoe la Jesu ka ho kopanela ka cheseho tšebeletsong le ka ho khomarela botšepehi ba ’ona. Joaloka barab’abo bona ba lekholong la pele la lilemo, ba bang ba utloisitsoe bohloko ka lebaka la ho mamela Kreste, esita le ho kenngoa lichankaneng le likampong tsa mahloriso. Ba bang ba bolokile lentsoe la Jesu ka ho lula ba e-na le ‘leihlo le talimileng nģa e le ’ngoe,’ ho sa tsotellehe ho pota-potoa ke maruo le meharo. (Matheu 6:22, 23) E, tikolohong e ’ngoe le e ’ngoe le boemong bo bong le bo bong, Bakreste ba ’nete, ka ho mamela, ba tsoela pele ho thabisa pelo ea Jehova.—Liproverbia 27:11.

21. (a) Sehlopha sa lekhoba se tla tsoela pele ho phetha boikarabelo bofe ba moea? (b) Re ka bontša joang hore re batla ho mamela Shilo e le kannete?

²¹ Ha re atamela mahlomola a maholo, “lekhoba le tšepahalang le le masene” le sa ntsane le ikemiselitse ho se sekisetse ho mamela Monghali oa lona, Kreste. Sena se kopanyelletsa ho lokisetsa ba ntlo ea Molimo lijo tsa moea tse nakong. Kahoo, a re tsoeleng pele ho ananela mokhatlo oa Jehova o babatsehang o hlophisitsoeng oa puso ea Molimo le seo o fanang ka sona. Ka tsela ena, re bontša hore re ipeha ka tlas’a Shilo, ea tla putsa bafo bohle ba hae ba mamelang ka bophelo bo sa feleng.—Matheu 24:45-47; 25:40; Johanne 5:22-24.

[Mongolo o botlaaseng ba leqephe]

Na U sa Hopola?

• Jesu o ne a lokela ho phetha karolo efe joalokaha ho boletsoe esale pele boprofeteng boo Jakobo a ileng a bo bolela ha a le liphateng tsa lefu?

• Re bontša joang hore rea amohela hore Jesu ke Shilo, ’me re lokela ho qoba moea ofe?

• Ke keletso efe e loketseng mehla ea rōna e fumanoang mangolong a ngoletsoeng liphutheho tse supileng tsa Tšenolo?

• Re ka etsisa ba leng phuthehong ea boholo-holo ea Smyrna le ea Filadelfia joang?

[Litšoantšo tse leqepheng la 18]

Jehova o hlohonolofatsa batho ba hae ka ho mamela “motsamaisi” ea tšepahalang

[Litšoantšo tse leqepheng la 19]

Tšusumetso ea Satane e etsa hore ho be thata haholo ho mamela Molimo

[Litšoantšo tse leqepheng la 21]

Ho ba le kamano e matla le Jehova ho re thusa hore re mo mamele