Pono ea Bibele
Na Bibele e Khetholla Basali?
TERTULLIAN, setsebi sa thuto ea bolumeli sa lekholong la boraro la lilemo, o kile a hlalosa basali e le “khoro ea diabolose.” Ba bang ba sebelisitse Bibele ho hlahisa basali e se ba bohlokoa joaloka banna. Ka lebaka leo, batho ba bangata ba na le maikutlo a hore Bibele e khetholla basali.
Elizabeth Cady Stanton, pula-maliboho ea lekholong la bo19 la lilemo ea litokelo tsa basali United States, o ile a ba le maikutlo a hore “Bibele le Kereke e ’nile ea e-ba tšitiso e khōlō tokolohong ea basali.” Ha a bua ka libuka tse hlano tse qalang tsa Bibele, Stanton o kile a re: “Ha ho libuka tse ling tseo ke li tsebang tse rutang ka hohle-hohle hore basali ba hatelloe le ho khelloa tlaase joaloka tsena.”
Le hoja ba bang kajeno ba ka ’na ba e-ba le maikutlo a fetelletseng joalo, ba bangata ba ntse ba lumela hore likarolo tse ling tsa Bibele li tšehetsa ho khetholloa ha basali. Na qeto e joalo e ka ba le mabaka a e emelang?
Kamoo Basali ba Nkoang Kateng Mangolong a Seheberu
“U tla ba le takatso bakeng sa monna oa hao, ’me o tla u laola.” (Genese 3:16) Ba tšoaea-tšoaeang liphoso ba supa sena e le kahlolo eo Molimo a e fileng Eva ebile e le tumello ea hae hore banna ba hatelle basali. Leha ho le joalo, polelo ena hase morero oa Molimo, ha e le hantle ke polelo e bontšang liphello tse babang tsa sebe le ho hana bobusi ba Molimo. Ho hlekefetsoa ha basali ke phello e tobileng ea ho se phethahale ha motho, hase thato ea Molimo. Ke ’nete hore basali ba ’nile ba busoa ke banna ba bona litsong tse ngata, hangata e le ka lere la tšepe. Empa ona e ne e se morero oa Molimo.
Adama le Eva ba ne ba entsoe ka setšoantšo sa Molimo. Ho feta moo, ba ile ba fumana taelo e tšoanang e tsoang ho Molimo ea hore ba ngatafale, ba tlale lefatše ’me ba le buse. Ba ne ba lokela ho sebelisana hammoho. (Genese 1:27, 28) Ho hlakile hore nakong eo ho ne ho se ea hatellang e mong ka bokhopo. Genese 1:31 e re: “Molimo a bona ntho e ’ngoe le e ’ngoe eo a e entseng ’me, bonang! e ne e le molemo haholo.”
Litlalehong tse ling Bibele ha e bontše hore na maikutlo a Molimo ke afe tabeng. E ka ’na ea e-ba histori feela e phetoang. Tlaleho ea ha Lota a batla ho fa batho ba Sodoma barali ba hae e phetoa feela ho sa boleloe hore na Molimo o ne a ho amohela kapa o ne a ho nyatsa.a—Genese 19:6-8.
’Nete ke hore Molimo o hloile mefuta eohle ea tšoaro e mpe le ho hlekefetsa. (Exoda 22:22; Deuteronoma 27:19; Esaia 10:1, 2) Molao oa Moshe o ne o nyatsa peto le botekatse. (Levitike 19:29; Deuteronoma 22:23-29) Bofebe bo ne bo thibetsoe, ’me kahlolo e ne e le lefu bakeng sa batho ba babeli ba entseng bofebe. (Levitike 20:10) Ho e-na le ho khetholla basali, Molao o ne o ba phahamisa le ho ba sireletsa tšebelisong e mpe e neng e tloaelehile lichabeng tse neng li le haufi. Mosali oa Mojuda ea tšoanelehang o ne a hlomphuoa haholo ’me a nkoa e le oa bohlokoa. (Liproverbia 31:10, 28-30) Ho hlōleha ha Baiseraele ho latela melao ea Molimo ea ho hlompha basali e ne e le molato oa bona, e ne e se thato ea Molimo. (Deuteronoma 32:5) Qetellong, Molimo o ile a ahlola a ba a otla sechaba kaofela bakeng sa ho se mamele ha sona ho totobetseng.
Na ho Ikokobetsa ke ho Khetholloa?
Mokhatlo leha e le ofe o ka sebetsa hantle feela haeba o e-na le taolo. Sena se hloka hore ho be le ba tsamaisang lintho. Ho seng joalo e ne e tla ba pherekano feela. “Molimo hase Molimo oa ho hloka taolo, empa ke oa khotso.”—1 Bakorinthe 14:33.
Moapostola Pauluse o ile a hlalosa tokisetso ea bohlooho ka lapeng: “Hlooho ea monna e mong le e mong ke Kreste; hape hlooho ea mosali ke monna; hape hlooho ea Kreste ke Molimo.” (1 Bakorinthe 11:3) Motho e mong le e mong ntle ho Molimo o ikokobelletsa ea mo phahametseng. Na taba ea hore Jesu o na le hlooho e bolela hore oa khetholloa? Ha ho joalo! Taba ea hore ka Mangolong banna ba abetsoe hore e be bona ba etellang pele ka phuthehong le lapeng ha ho bolele hore basali baa khetholloa. E le hore katleho e be teng, lelapa le phutheho li hloka hore basali le banna ba phethe karolo ea bona ka lerato le ka tlhompho.—Baefese 5:21-25, 28, 29, 33.
Kamehla Jesu o ne a tšoara basali ka tlhompho. O ile a hana ho latela tloaelo le melao e neng e rutoa ke Bafarisi ea ho khetholla. O ile a bua le basali bao e neng e se Bajuda. (Matheu 15:22-28; Johanne 4:7-9) O ile a ruta basali. (Luka 10:38-42) O ile a sireletsa basali hore ba se ke ba lahloa kherehloa. (Mareka 10:11, 12) Mohlomong mohato o mocha o neng o sa tloaeleha mehleng ea hae e bile oa ha Jesu a amohela basali sehlopheng sa metsoalle ea hae e haufi-ufi. (Luka 8:1-3) E le mohlala o phethahetseng oa litšoaneleho tsohle tsa Molimo, Jesu o ile a bontša hore batho ba batona le ba batšehali ke ba bohlokoa ka ho lekana mahlong a Molimo. Ha e le hantle, har’a Bakreste ba pele, banna le basali ba ile ba fumana mpho ea moea o halalelang. (Liketso 2:1-4, 17, 18) Ho batlotsuoa ba nang le tšepo ea ho ba marena le baprista le Kreste, ho ke ke ha e-ba le phapang pakeng tsa ba batona le ba batšehali hang ha ba tsoselitsoe bophelong ba leholimo. (Bagalata 3:28) Mongoli oa Bibele, Jehova, ha a khetholle basali.
[Mongolo o botlaaseng ba leqephe]
[Setšoantšo se leqepheng la 28]
Ho fapana le batho ba bangata ba mehleng ea hae, Jesu o ile a tšoara basali ka tlhompho