Molimo o Ile a Pholosa Noe ka Lebaka Lefe?—Ke Hobane’ng ha ho le Bohlokoa Hore re Tsebe?

BONGATA ba rōna re sa hopola mohla re neng re utloa litaba tsa bohlokoa. Re hopola ka ho hlaka hore na re ne re le hokae, re etsa’ng kapa re ikutloa joang. Ha ho pelaelo hore Noe ha aa ka a lebala letsatsi leo Jehova Molimo, ’Musi oa pōpo eohle a ileng a bua le eena. Litaba tseo a ileng a mo bolella tsona e ne e le tsa bohlokoa ka ho fetisisa! Jehova o ile a mo bolella hore o entse qeto ea ho felisa “nama eohle.” Noe o ne a lokela ho haha areka ea tonanahali bakeng sa ho ipholosa le ho pholosa lelapa la hae le liphoofolo tsa mefuta eohle.—Genese 6:9-21.

Noe o ile a ikutloa joang? Na o ile a thabela litaba tseo kapa o ile a tletleba? O ile a tsebisa mosali oa hae le bana ba hae litaba tsee joang? Bibele ha e re bolelle. E re feela: “Eaba Noe o etsa ho ea ka sohle seo Molimo a mo laetseng sona. A fela a etsa joalo.”—Genese 6:22.

Ka sebele ena ke ntlha ea bohlokoa, hobane mantsoe ana a bolela e ’ngoe ea lintho tse ileng tsa etsa hore Noe a fumane kamohelo mahlong a Molimo; Noe o ne a ikemiselitse ho etsa seo Molimo a neng a re a se etse. (Genese 6:8) Ke eng hape e ileng ea etsa hore Molimo a amohele Noe? Karabo ea potso ena ke ea bohlokoa hobane re lokela ho tšoana le Noe e le hore re tle re pholohe ha Molimo a boela a felisa bokhopo lefatšeng. Leha ho le joalo, pele, a re ke re tšohleng kamoo Noe a neng a phela kateng pele ho Moroallo.

Bademona ba Tla Lefatšeng

Noe o phetse khale-khale. O hlahile lilemo tse ka bang sekete ka mor’a hore motho oa pele a bōptjoe. Ha ho joalokaha ba bang ba bolela hore ka nako eo batho ba ne ba lula mahaheng—e le libōpuoa tse makhisa, tse thotofetseng tse tsamaeang butle li iname li nkile melamu. Ho ne ho e-na le lithulusi tsa tšepe le tsa koporo, ’me ho ka etsahala hore ebe Noe o ile a li sebelisa ha a haha areka. Hape ho ne ho e-na le liletsa tsa ’mino. Batho ba ne ba nyala kapa ba nyaloa, ba hōlisa bana, ba lema ba bile ba ruile liphoofolo. Ba ne ba reka ba bile ba rekisa. Kahoo, bophelo ba mehleng eo bo ne bo tšoana le ba kajeno.—Genese 4:20-22; Luka 17:26-28.

Empa lintho tse ling li ne li fapane haholo le tsa kajeno. E ’ngoe ea tsona ke hore batho ba mehleng eo ba ne ba phela nako e telele. E ne e se mohlolo hore motho a phele lilemo tse fetang 800. Noe o ile a phela lilemo tse 950; Adama tse 930; ’me ntate-moholo oa Noe, e leng Methusela, eena a phela lilemo tse 969.a—Genese 5:5, 27; 9:29.

Phapang e ’ngoe e hlalosoa ho Genese 6:1, 2, e reng: “Eitse ha batho ba qala ho eketseha holim’a lefatše ’me ba tsoalloa barali, joale bara ba Molimo oa ’nete ba qala ho hlokomela barali ba batho, hore ba batle; eaba ba inkela basali, e leng, bohle bao ba ba khethileng.” “Bara [bana] ba Molimo oa ’nete” e ne e le mangeloi a tsoang leholimong a neng a ikentse batho ’me a solla lefatšeng mona. Hase Molimo ea neng a itse ba tle lefatšeng; ebile ba ne ba sa tla ka morero oa ho thusa batho. Ho e-na le hoo, ba ile ba ‘furalla sebaka sa bona sa bolulo se loketseng’ leholimong e le hore ba tle ba kopanele liphate le basali ba batle lefatšeng. Ba ile ba fetoha bademona.—Juda 6.

Mangeloi ana a marabele, a tsoileng tseleng, a nang le matla le bohlale bo fetang ba batho a ile a susumelletsa batho bobeng. Ho ka etsahala hore a ne a laola batho a bile a ba hatella. A ne a sa sebetse ka sekhukhu joaloka senokoane seo e leng khale se li bona se etsang mesebetsi e mebe se ipatile. Ho e-na le hoo, a ne a hanyetsa Molimo pepenene a se na lihlong.

Bara bana ba Molimo ba mangeloi ba ile ba kopanela liphate le basali, ’me basali bao ba tsoala bana ba ileng ba ba matla a lifefo. Ba ile ba tsejoa ka lebitso la Seheberu la “Banefilime.” Re bolelloa sena: “Banefilime ba ne ba le teng lefatšeng matsatsing ao, le ka mor’a moo, ha bara ba Molimo oa ’nete ba tsoela pele ho kopanela liphate le barali ba batho ’me ba ba tsoalla bara, e ne e le banna ba khale ba matla, ba tummeng.” (Genese 6:4) Banefilime ba ne ba tšajoa haholo. Lentsoe “Banefilime” le bolela “Balihi,” ba lihang batho ba bang. E ne e le babolai bao liketso tsa bona tse mabifi mohlomong li neng li tšoana le tsa bahale ba boleloang litšōmong tsa boholo-holo.

Mahlomola a ba Lokileng

Bibele e re bobolu ba batho ba mehleng eo bo ne bo jele setsi. E re: “Bobe ba motho bo [ne bo le] bongata lefatšeng ’me tšekamelo eohle ea menahano ea pelo ea hae e [le] mpe feela ka linako tsohle. . . . Lefatše le ne le tletse pefo. . . . Nama eohle e ne e sentse tsela ea eona lefatšeng.”—Genese 6:5, 11, 12.

Noe o ne a phela lefatšeng le joalo. O ne a sa tšoane le batho ba bang, “e ne e le motho ea lokileng” ea neng “a tsamaea le Molimo oa ’nete.” (Genese 6:9) Ha ho bonolo hore motho ea lokileng a phele ka har’a batho ba sa lokang. E tlameha ebe seo batho ba neng ba se bua le ho se etsa se ne se utloisa Noe bohloko haholo. Mohlomong o ne a ikutloa joaloka Lota, e leng motho e mong ea lokileng ea phetseng ka mor’a Moroallo. Lota, ea neng a lula har’a baahi ba Sodoma ba mekhoa e litšila, o ne “a ba mahlomoleng haholo ke ho inehella boitšoaro bo hlephileng ha batho ba nyelisang molao,” ’me ka lebaka la “seo a neng a se bona le ho se utloa ha a ntse a lula har’a bona letsatsi le letsatsi o ne a hlokofatsa moea oa hae o lokileng ka lebaka la liketso tsa bona tse sa eeng ka molao.” (2 Petrose 2:7, 8) E tlameha ebe le Noe o ne a ikutloa joalo.

Na u tšoenngoa ke lintho tse tšosang tse hlahang litabeng kapa ke boitšoaro ba batho ba sa tšabeng Molimo? Haeba ho joalo, u tla utloisisa hore na Noe o ne a ikutloa joang. Ak’u nahane kamoo e tlamehang ebe ho ne ho le thata kateng hore a mamelle ho phela lefatšeng la batho ba sa lokang ka lilemo tse 600, etsoe o ne a le lilemo li kaalo ha Moroallo o fihla. E tlameha ebe o ne a labalabela hore bokhopo bo fele.—Genese 7:6.

Noe o ne a sa Tšabe ho ba Mokhelo

Noe “o ne a se na molato har’a batho ba mehleng ea hae.” (Genese 6:9) Hlokomela hore Bibele e re o ne a se na molato har’a batho ba mehleng ea hae, eseng mahlong a bona. Ka mantsoe a mang, Noe o ne a se na molato mahlong a Molimo, empa ho batho ba mehleng ea pele ho Moroallo, e ne e le motho ea makatsang. Ha ho pelaelo hore o ne a sa ee le bongata, a bile a sa kopanele menateng e sa hlompheng Molimo ea mehleng eo. Ak’u nahane hore na batho ba ile ba ba le maikutlo afe ka eena ha a qala ho haha areka! Mohlomong ba ne ba mo tšeha, ba mo soma. Ba ne ba sa mo nkele hloohong.

Ho feta moo, Noe o ne a e-na le tumelo e matla ’me a bolella ba bang ka eona. Bibele e re e ne e le “’moleli oa ho loka.” (2 Petrose 2:5) Ha ho potang hore Noe o ne a tseba hore batho ba tla mo hanyetsa. Ntat’a ntat’ae-moholo Enoke e ne e le motho ea lokileng ea ileng a profeta hore Molimo o ne a tla ahlola ba khopo. Ho totobetse hore sena se ile sa etsa hore Enoke a hlorisoe, le hoja Molimo a sa ka a lumella bahanyetsi ba hae hore ba mo bolaee. (Genese 5:18, 21-24; Baheberu 11:5; 12:1; Juda 14, 15) Kaha Noe o ne a hanyetsoa ke Satane, bademona, Banefilime ’me batho ba bangata ba sa thahaselle molaetsa oa hae ba bile ba mo hanyetsa, ho ne ho hlokahala hore Noe a be sebete ’me a be le tumelo ea hore Jehova a ka khona ho mo sireletsa.

Kamehla batho ba sebeletsang Molimo ba ’nile ba hanyetsoa ke ba sa mo sebeletseng. Esita le Jesu Kreste o ne a hlouoe, hammoho le balateli ba hae. (Matheu 10:22; Johanne 15:18) Noe o ne a le sebete ho sebeletsa Molimo, le hoja batho ba bang ba ne ba sa rate ho etsa joalo. O ne a utloisisa hore ho amoheloa ke Molimo e ne e le habohlokoa ho feta ho amoheloa ke batho ba Mo hanyetsang. Noe o ne a amoheloa ke Molimo.

Noe o Ile a Ela Hloko

Joalokaha re bone, ka sebete Noe o ile a bolella ba bang litaba tse molemo. Ba ile ba etsa joang ha ba li utloa? Bibele e re pele ho Moroallo batho “ba ne ba ja ’me ba noa, banna ba nyala ’me basali ba nyalisoa, ho fihlela letsatsing leo Noe a ileng a kena ka arekeng ka lona; ’me ba se ke ba elelloa ho fihlela moroallo o tla ’me o ba hohola bohle.” Ha baa ka ba mamela temoso.—Matheu 24:38, 39.

Jesu o itse le kajeno ho tla ba joalo. Ka lilemo tse fetang lekholo, Lipaki Tsa Jehova li ’nile tsa lemosa hore Jehova o tla nka mehato e matla hore a phethahatse tšepiso ea hae ea ho etsa lefatše le lecha la ho loka. Le hoja baahi ba lefatše ba limilione ba etse temoso eo hloko, ba libilione ha baa e ela hloko. “Ho ea ka takatso ea bona,” ha ba batle ho lumela hore Moroallo o bile teng le hore o na le seo o se bolelang.—2 Petrose 3:5, 13.

Leha ho le joalo, Noe eena o ile a ela hloko. O ile a lumela seo Jehova Molimo a neng a mo boleletse sona. Ho mamela ho ile ha etsa hore a pholohe. Moapostola Pauluse o ile a re: “Ka tumelo Noe, ka mor’a ho fuoa temoso ea bomolimo ea lintho tse e-s’o bonoe, o ile a bontša tšabo ea bomolimo eaba o haha areka bakeng sa ho pholosa ba ntlo ea hae.”—Baheberu 11:7.

Mohlala oo re Lokelang ho o Etsisa

Noe o ile a haha areka ea tonanahali—e khōlō ho feta lebala la bolo ea maoto le e phahameng ho feta mohaho o mekato e meraro. E ne e le telele ho feta sekepe sa Wyoming ka limithara tse 30, seo e leng sekepe se seholo ka ho fetisisa se entsoeng ka lehong. Ke ’nete hore areka e ne e se sekepe; ho ne ho mpa ho hlokahala hore e phaphamale ka holim’a metsi. Leha ho le joalo, ho ne ho hlokahala hore ho sebelisoe mekhoa e tsoetseng pele ea kaho. Hape e ne e lokela ho koaheloa ka sekontiri ka hare le ka ntle. E ka ’na eaba e hahiloe ka lilemo tse fetang 50.—Genese 6:14-16.

Hase oona feela mosebetsi oo Noe a neng a lokela ho o etsa. O ne a lokela ho bokella lijo tsa selemo sohle bakeng sa lelapa la hae le liphoofolo. Pele ho Moroallo, ho ne ho hlokahala hore liphoofolo li bokelloe li be li kenngoe ka arekeng. “Noe a etsa ho ea ka sohle seo Jehova a mo laetseng sona.” E tlameha ebe Noe o ile a utloa le litsebeng ha ntho e ’ngoe le e ’ngoe e se e lokile ’me Jehova a koala monyako oa areka.—Genese 6:19-21; 7:5, 16.

Ka mor’a moo Moroallo o ile oa fihla. Pula e ile ea na ka matsatsi a 40 le masiu a 40. Batho le lintho tsohle ba ile ba lokela ho lula ka arekeng selemo kaofela ho fihlela metsi a kokobela. (Genese 7:11, 12; 8:13-16) Bohle ba khopo ba ile ba timela. Ke Noe le lelapa la hae feela ba ileng ba pholohela lefatšeng le hloekileng.

Bibele e re Moroallo oa lefatše lohle oa mehleng ea Noe ke “mohlala oa lintho tse tlang ho tla.” Ka tsela efe? E re: “Maholimo le lefatše tse teng hona joale li boloketsoe mollo ’me li ntse li bolokiloe ho fihlela letsatsing la kahlolo le la timetso ea batho ba se nang bomolimo.” Leha ho le joalo, joaloka mehleng ea Noe, ho na le batho ba tla pholoha. Kholiseha hore “Jehova o tseba ho lopolla batho ba boinehelo ba bomolimo tekong.”—2 Petrose 2:5, 6, 9; 3:7.

Noe o ne a inehetse ho Molimo, a lokile ka har’a batho ba khopo. O ne a mamela Molimo ka botlalo. O ne a le sebete ho etsa se nepahetseng esita leha a ne a tseba hore batho ba sa rateng ho sebeletsa Molimo ba ne ba tla mo nyelisa ’me ba mo hloee. Haeba re etsisa Noe ka litsela tsena, le rōna re tla amoheloa ke Molimo ’me re be le tšepo ea ho pholosetsoa lefatšeng le lecha le seng le le haufi.—Pesaleme ea 37:9, 10.

[Mongolo o botlaaseng ba leqephe]

[Ntlha e Qolotsoeng e leqepheng la 5]

Liketso tsa Banefilime tse mabifi mohlomong li ne li tšoana le tsa bahale ba boleloang litšōmong tsa boholo-holo

[Setšoantšo se leqepheng la 7]

Haeba re etsisa tumelo ea Noe, re ka amoheloa ke Molimo

[Tlhaloso ea Moo Setšoantšo se Nkiloeng Teng e leqepheng la 5]

Alinari/Art Resource, NY