Khaolo ea 3

Ea Entseng Lintho Tsohle

HO NA le ntho e ’ngoe e ntle eo ke e tsebang. Na u batla ho e utloa?— Sheba letsoho la hao. Koba menoana ea hao. Ebe u thonaka ntho fatše. Letsoho la hao le ka etsa lintho tse ngata, ’me le khona ho li etsa hantle. Na ua tseba hore na ke mang ea entseng matsoho a rōna?—

E, e ntse e le Eena ea entseng melomo ea rōna, linko tsa rōna le mahlo a rōna. Ke Molimo, Ntate oa Mosuoe e Moholo. Na ha re thabe hore ebe Molimo o re file mahlo?— Re khona ho bona lintho tse ngata ka ’ona. Re khona ho bona lipalesa. Re khona ho bona joang bo botala le leholimo le leputsoa. Re ka ba ra bona le malinyane a nonyana a jang joaloka ao re a bonang setšoantšong mona. Na ka sebele hase ho babatsehang hore ebe re khona ho bona lintho tsee?—

Empa ke mang ea entseng lintho tsee? Na li entsoe ke batho ba itseng? Che. Batho ba ka haha ntlo. Empa ha ho motho ea ka etsang hore joang bo mele. Batho ha ba khone ho etsa lelinyane la nonyana, palesa kapa ntho leha e le efe e phelang. Na u ne u tseba seo?—

Ke Molimo ea entseng lintho tsena kaofela. Molimo o entse maholimo le lefatše. Ke eena hape ea entseng batho. O bōpile monna oa pele le mosali oa pele. Jesu, Mosuoe e Moholo, o rutile sena.—Matheu 19:4-6.

Jesu o ile a tseba joang hore Molimo o bōpile monna le mosali? Na Jesu o ile a bona ha Molimo a ba bōpa?— E, o ile a bona. Jesu o ne a e-na le Molimo ha Molimo a bōpa monna le mosali. Jesu ke eena motho oa pele eo Molimo a mo bōpileng. Jesu e ne e le lengeloi, o ne a phela le Ntate oa hae leholimong.

Bibele e re bolella hore Molimo o ile a re: “A re etse motho ka setšoantšo sa rōna.” (Genese 1:26) Na ua tseba hore na Molimo o ne a bua le mang?— O ne a bua le Mora oa hae. O ne a bua le motho eo hamorao a ileng a tla lefatšeng ’me ea e-ba Jesu.

Na seo ha se u thabise? Ak’u nahane feela! Ha re mamela Jesu, re rutoa ke motho ea neng a e-na le Molimo ha Molimo a bōpa lefatše le lintho tse ling tsohle. Jesu o ithutile lintho tse ngata ka ho sebetsa le Ntate oa hae leholimong. Ke kahoo Jesu e leng Mosuoe e Moholo!

Na u nahana hore Molimo o ne a sa thaba ha a ne a phela a le mong pele a bōpa Mora oa hae?— Che, o ne a thabile. Joale, haeba o ne a thabile, ke hobane’ng ha a ile a bōpa lintho tse ling tse phelang?— O li bōpile hobane e le Molimo ea lerato. O ne a batla hore batho ba bang ba phele ’me ba thabele bophelo. Re lokela ho leboha Molimo ka hore o re file bophelo.

Lintho tsohle tseo Molimo a li entseng li bontša hore o lerato. Molimo o entse letsatsi. Letsatsi lea re khantšetsa le ho re futhumatsa. Ntho e ’ngoe le e ’ngoe e ne e tla bata ’me ho ne ho sa tl’o ba le bophelo lefatšeng haeba re ne re se na letsatsi. Na ha u thabe hore ebe Molimo o entse letsatsi?—

Hape Molimo o nesa pula. Ka linako tse ling u ka ’na ua se ke ua rata pula hobane ha e na e u sitisa ho ea bapalla ka ntle. Empa pula e thusa lipalesa hore li hōle. Kahoo ha re bona lipalesa tse ntle, re lokela ho leboha mang ka tsona?— Re lokela ho leboha Molimo. ’Me re lokela ho leboha mang ha re e-ja litholoana le meroho e monate?— Re lokela ho leboha Molimo hobane ke letsatsi la hae le pula ea hae tse etsang hore lintho tsena li hōle.

Ha re re motho e mong oa u botsa, ‘Na ke Molimo ea bōpileng batho le liphoofolo?’ U tla mo araba u re’ng?— Karabo e nepahetseng ke e reng: “E, ke Molimo ea bōpileng batho le liphoofolo.” Empa ho thoe’ng haeba motho e mong a sa lumele hore e hlile ke Molimo ea bōpileng batho? Teng ho thoe’ng haeba a re batho ba tsoa liphoofolong? Bibele ha e rute thuto eo. E re Molimo o bōpile lintho tsohle tse phelang.—Genese 1:26-31.

Empa motho e mong a ka ’na a u bolella hore ha a lumele ho Molimo. Joale teng u tla re’ng?— Ke hobane’ng ha u sa mo bontše ntlo? Ebe ua mo botsa: “Ke mang ea entseng ntlo eo?” Motho e mong le e mong oa tseba hore ho na le motho ea e entseng. Ka sebele ntlo eo ha ea iketsa!—Baheberu 3:4.

Joale isa motho eo serapeng sa lipalesa ’me u mo bontše palesa. Ebe ua mo botsa: “Ke mang ea entseng palesa ee?” Ha ea etsoa ke motho. Feela joalokaha ntlo e sa iketsa, palesa ena le eona ha ea iketsa. Ho na le ea e entseng. E entsoe ke Molimo.

Kōpa motho eo hore a ke a thōle ’me a mamele ha nonyana e bina. Ebe ua mo botsa: “Ke mang ea entseng linonyana a ba a li ruta ho bina?” Ke Molimo. Ke Molimo ea entseng maholimo le lefatše le lintho tsohle tse phelang! Ke Eena ea fanang ka bophelo.

Empa, motho e mong a ka ’na a re eena o lumela feela ntho eo a e bonang. A ka ’na a re: ‘Haeba ke sa bone ntho e itseng, nke ke ka e lumela.’ Kahoo batho ba bang ba re ha ba lumele hore Molimo o teng hobane ha ba mo bone.

Ke ’nete hore re ke ke ra bona Molimo. Bibele e re: ‘Ha ho motho ea ka bonang Molimo.’ Lefatšeng mona ha ho monna, mosali, kapa ngoana ea ka bonang Molimo. Kahoo ha ho motho ea lokelang ho leka ho etsa setšoantšo sa Molimo. Molimo o bile o re bolella hore re se ke ra etsa setšoantšo sa hae. Kahoo, Molimo ha a rate hore re be le lintho tse kang tseo malapeng abo rōna.—Exoda 20:4, 5; 33:20; Johanne 1:18.

Empa haeba re ke ke ra bona Molimo, re tseba joang hore Molimo o hlile o teng? Ak’u nahane ka sena. Na u ka bona moea?— Che. Ha ho motho ea ka bonang moea. Empa u ka bona lintho tseo moea o li etsang. U khona ho bona makhasi a sisinngoa ke moea o fokang makaleng a lifate. Kahoo ua lumela hore moea o teng.

Le lintho tseo Molimo a li entseng u khona ho li bona. Ha u bona palesa e phelang kapa nonyana, u bona ntho e ’ngoe e entsoeng ke Molimo. Kahoo ua lumela hore Molimo o hlile o teng.

Motho e mong a ka ’na a u botsa, ‘Ke mang ea entseng letsatsi le lefatše?’ Bibele e re: “Molimo o ile a bōpa maholimo le lefatše.” (Genese 1:1) E, Molimo o bōpile lintho tsena kaofela tse babatsehang! U ikutloa joang ka seo?—

Na ho phela ha ho monate? Re khona ho utloa lipina tse monate tsa linonyana. Re khona ho bona lipalesa le lintho tse ling tseo Molimo a li bōpileng. Hape re khona ho ja lijo tseo Molimo a re fileng tsona.

Re lokela ho leboha Molimo ka lintho tsena tsohle. Ka holim’a tsohle, re lokela ho mo leboha ka hore o re file bophelo. Haeba re hlile re ananela seo Molimo a re etselitseng sona, re tla etsa ho hong. Re tla etsa’ng?— Re tla mamela Molimo, ’me re tla etsa seo a re bolellang sona ka Bibeleng. Ka tsela eo re tla bontša hore re rata Ea entseng lintho tsohle.

Re lokela ho leboha Molimo ka sohle seo a re etselitseng sona. Joang? Bala se ngotsoeng ho Pesaleme ea 139:14; Johanne 4:23, 24; 1 Johanne 5:21; le Tšenolo 4:11.

[Setšoantšo se leqepheng la 21]

Ke mang ea entseng lintho tsohle tse phelang?

[Litšoantšo tse leqepheng la 22, 23]

Kaha ntlo e entsoe ke motho, ke mang ea entseng lipalesa, lifate le liphoofolo?

[Setšoantšo se leqepheng la 25]

U tseba joang hore moea o teng?