Na U Ithuta ho Morupeli oa Rōna e Moholo?
JULIO oa hlalosa: “Ke ile ka ithuta molao ka lilemo tse hlano ho e ’ngoe ea liunivesithi tse molemo ka ho fetisisa Spain. Empa seo ke ithutileng sona ha ke qala ho ithuta Bibele se ne se phahame haholo. Univesithi e ile ea nthuta tsela ea ho ithuta; Bibele e nthutile tsela ea ho phela.”
Ka Bibele re khona ho tseba menahano ea Molimo, melao-motheo ea hae, le litaelo tsa hae. Mangolo a hlalosa Jehova e le ‘Morupeli e Moholo’ hobane ke eena tichere e molemohali bokahohleng. (Esaia 30:20, NW) Ha e le hantle, taba e ngotsoeng ea Seheberu e Mo bitsa “barupeli”—bongata bo bontšang bophahamo. Sena se lokela ho re hopotsa hore ho rutoa ke Jehova ho phahametse ho rutoa ke tichere leha e le efe e ’ngoe.
Bohlale bo Sebetsang bo Tsoang ho Jehova
Ke hobane’ng ha thuto ea bomolimo e le molemo hakaale? Taba ea pele, ke ka lebaka la litaba tsa bohlokoahali tseo e li fupereng. Thuto ea Jehova e re fa “bohlale bo sebetsang.” Ho feta moo, bohlale bo tsoang ho Molimo “bo phelisa” ba bo sebelisang.—Liproverbia 3:21, 22, NW; Moeklesia 7:12.
Mohlophisi oa Pesaleme ea 119 o ile a hlokomela hore bohlale ba Jehova bo mo sirelelitse ho pholletsa le bophelo bohle ba hae. Ka mohlala, o ile a bina: “Molao o tsoileng molomong oa hao ho ’na o fetisa likete tsa lichelete tsa khauta le silefera. Hola molao oa hao o sa ka oa nthabisa, nka be ke felile bomalimabeng ba ka. Litaelo tsa hao li ntlhalefisa haholo ho fetisa lira tsa ka, hobane li na le ’na ka mehla. Ke na le kutloisiso e fetisang ea ba nthutang kaofela, hobane likeletso tsa hao ke nahano ea ka.”—Pesaleme ea 119:72, 92, 98, 99.
Hase mopesaleme feela ea neng a ka be a ‘felile bomalimabeng ba hae,’ hoja ea se ke ea e-ba ka molao oa Jehova. Rosa, mosali e mocha oa Spain, o kholisehile hore bophelo ba hae bo ile ba bolokeha hobane o ile a sebelisa melao-motheo ea bomolimo. Oa hopola: “Ha ke le lilemo li 26, ke ne ke se ke ile ka leka ho ipolaea ka makhetlo a mabeli.”
Rosa o ne a keneletse botekatsing, esita le ho lemalleng tahi le ho sebelisa lithethefatsi hampe. O re: “Ka letsatsi le leng, ha ke ne ke hlile ke tetebetse ho nyahameng, banyalani ba Lipaki ba ile ba buisana le ’na ka tsela eo Bibele e ka re thusang ho rarolla mathata a rōna. Ke ile ka qala ho ithuta Lentsoe la Molimo, e leng seo ke ileng ka fumana se thahasellisa. Ka nako e ka etsang khoeli ke ne ke na le matla a ho qalisa bophelo bo hloekileng bo bocha. Joale kaha ke ne ke e-na le morero bophelong, ke ne ke se ke sa hloke ho tšehetsoa ke tahi kapa lithethefatsi. ’Me kaha ke ne ke e-na le takatso e matla ea ho ba motsoalle oa Jehova, ke ne ke ikemiselitse ho phela ka litekanyetso tsa hae. Hoja ha e-ea ba ka bohlale bo sebetsang ba Lentsoe la Molimo, ka sebele nka be ke se ke ipolaile.”
Ruri, bohlale bo tsoang ho Jehova bo boloka bophelo. Kahoo, re ka rua molemo eseng feela tabeng ea bohlokoahali e fuperoeng ke thuto ea bomolimo empa re ka rua molemo le mekhoeng eo Jehova a e sebelisang bakeng sa ho rupela bahlanka ba hae. Kaha Mor’a Molimo, Jesu Kreste, o ile a re laela hore re be matichere le ba etsang barutuoa, re batla ho ithuta mekhoa e sebetsang ka ho fetisisa ea ho fetisa thuto.—Mattheu 28:19, 20.
Tšebeliso ea Jehova ea Litšoantšo
Kosepele ea Mareka e bolela hore “[Jesu] o na a se ke a ba bolella letho ha e se ka litšoantšo.” (Mareka 4:34) Tšobotsi ena e hlaheletseng ea thuto ea Jesu ha e makatse. O ne a mpa a etsisa e meng ea mekhoa eo melaetsa ea Jehova ea boprofeta e neng e fetisetsoa ho sechaba sa Iseraele ka eona. Ena e fupere litšoantšo tse nang le taba e hlakileng.—Esaia 5:1-7; Jeremia 18:1-11; Ezekiele 15:2-7; Hosea 11:1-4.
Ka mohlala, hlokomela kamoo Jehova a sebelisang setšoantšo se matla ho re ruta hore litšoantšo tse rapeloang ha li na thuso. Esaia 44:14-17 e re: “E mong a ithemele likedare, a nke le kiprese le eike, tsee a li khethang har’a lifate tsa moru; a jale pine, ’me . . . motho a be le see a ka se besang, a fele a roalle sefate ho ikomosa ka sona, a be a bese mollo, a apehe bohobe ka sona; a iketsetse le molimo ka sona, a ntoo o khumamela; a betle setšoantšo, a se rapele. O besa sekoto se seng sa sona; ka sekoto seo o apeha linama tsa hae, a bese nama ea hae, a khore . . . Ebe ka koto se setseng o etsa molimo, setšoantšo sa hae, o inama pel’a sona, oa se khumamela; oa se rapela, o re: Mpoloke, hobane u molimo oa ka.” Litšoantšo tse kang tsena ke likofuto tse matla bakeng sa ho thusa ba lipelo li tšepahalang ho hana borapeli ba litšoantšo le lithuto tsa bohata.
Lipotso tse Fatang Maikutlo
Bibele e boetse e fupere mehlala ea kamoo Jehova a ileng a lokisa monahano oa bahlanka ba bang ba hae ka lipotso tse susumetsang motho hore a nahane ka ho teba. Mopatriareka Jobo e ne e le e mong oa bona. Ka mamello Jehova o ile a mo thusa hore a lekanye bonyenyane ba hae ha a bapisoa le Molimo. Sena se ile sa etsoa ka letoto la lipotso, tseo Jobo a ileng a hlōleha ka tsela e nyahamisang ho li araba.
Jehova o ile a botsa Jobo: “U no u le kae, mohla ke theang lefatše? . . . Ke mang ea koaletseng leoatle ka menyako? . . . Na ke uena ea lohileng thapo e tlamileng Selemela, kapa u na le matla a ho lokolla senyepa sa Makolobe na? . . . A u na le letsoho le kang la Molimo?” Ho hlongoa lipotso hona ho kokobetsang ho ne ho akarelletsa potso ea bohlokoa haholo: “U rata ho ntsoa [Jehova] hore u itokafatse na?”—Jobo 38:4, 8, 31; 40:8, 9.
Lipotso tsena tse batlisisang li ile tsa etsa hore Jobo a hlokomele hore o ne a buile ka ho hloka kutloisiso. Kahoo, o ile a inyatsa ’me a baka. (Jobo 42:6) Joaloka tabeng ena, lipotso tse khethiloeng hantle li ka ’na tsa thusa ho lokisa monahano o fosahetseng oa bana ba rōna kapa liithuti tsa Bibele.
Ho Haha Kholiseho
Ho thoe’ng haeba ho hlokahala hore re thuse e mong ea ikutloang a sa tšoanelehe kapa a sa khone? Tabeng ena puisano pakeng tsa Jehova le moprofeta oa hae Moshe e na le thuso. Ha Molimo a abela Moshe ho ba ’muelli oa hae ka pel’a Faro le Baiseraele, moprofeta enoa o ile a ikutloa a ke ke a khona ho etsa mosebetsi ona. O ile a re: “Ke motho ea molomo o boima, le ea leleme le boima.” Leha ho le joalo, Molimo o ile a araba: “Ke mang ea etselitseng motho molomo? . . . Na hase ’na Jehova na? Tsamaea he joale, ’me e tla ba ’na ke bang le molomo oa hao; ’me ke tla u ruta seo u tla se bolela.”—Exoda 4:10-12.
Jehova o ile a abela ngoan’abo Moshe Aarone ho ba ’muelli oa hae, ’me ba tsoela pele ho phetha mosebetsi oa bona Egepeta. (Exoda 4:14-16) Lipaki tsa Jehova tse ngata li bile le maikutlo a tšoanang le a Moshe a hore lia haelloa ha li etsa tšebeletso ea ntlo le ntlo kapa li paka seterateng ka lekhetlo la pele. Joaloka tabeng ea Moshe, ho tseba hore re tšehelitsoe ke Jehova le hore re tla ba le mosebeletsi ea nang le phihlelo ho etsa hore re hlōle ho tsila-tsila. Ka thuso ea Jehova le rōna re ka eketsa matla a ho bua feela joalokaha Moshe a bile le hona ho hlaolela kholiseho ho ea bohōleng ba ho beha lipuo tse matla tse fumanoang ho pholletsa le buka ea Bibele ea Deuteronoma.
Thuto e Nang le Mohlala o Sebetsang
Takatso e tiileng ea ho thusa ba bang le eona ke ea bohlokoahali. Eo ke tšoaneleho eo moprofeta Jonase a neng a e hloka. Jehova o ile a abela Jonase ho hlokomelisa batho ba Ninive ka timetso e atamelang ea motse oo. Ho sa lebelloa, batho ba Ninive ba ile ba baka. (Jonase 3:5) Phello e bile hore Jehova a chechise tlokotsi eo. Leha ho le joalo, ho e-na le hore a nyakallele katleho ea phutuho ea hae ea boboleli, Jonase o ile a ikutloa a halefile hore ebe seo a se boletseng esale pele se ne se ke ke sa phethahala. Jehova o ile a mo thusa joang ho ba le pono e nepahetseng?
Jehova o ile a sebelisa monyaku bakeng sa ho ruta Jonase bohlokoa ba ho tsotella ba bang. Semela sena se ile sa hōla ka mohlolo ka potlako ’me sa etsa moriti o monate bakeng sa Jonase ea neng a iketselitse lephephe mathōkong a Ninive. Jonase o ile a qala ho “thaba haholo” a thabisoa ke semela sena se pala. Eaba Jehova o etsa hore sebōkō se hlasele semela sena e le hore se omelle. A pepesetsehile letsatsing le moeeng o bohale, Jonase o ile a halefa ’me a re: “Ho leng molemo ho ’na ke ho shoa, e seng ho phela.” (Jonase 4:5-8) See sohle se ne se ruta eng?
Jehova o ile a bua le Jonase ’me a re: “Uena, u qenehetse monyaku oo u sa kang ua o khathalla, leha e le ho o melisa, o itlhahetseng ka bosiu bo le bong, oa ba oa timela ka bosiu bo le bong! ’Me ’na, u re, ke se ke ka qenehela Ninive, motse oo o moholo, o nang le batho ba fetang lekholo le nang le mashome a mabeli a likete, ba sa tsebeng ho khetha letsoho le letona la bona ho le letšehali, hape o nang le likhomo tse ngata!”—Jonase 4:9-11.
E bile thuto e matla hakaakang e nang le mohlala o sebetsang! Jonase o ne a thahasella monyaku haholo ho feta batho ba likete-kete. Le hoja kameho bakeng sa karolo leha e le efe ea pōpo ea Molimo e thoholetsoa, ho thusa ho boloka bophelo ba batho ke mosebetsi oa rōna oa bohlokoa ka ho fetisisa.
Ho Rupela ka Mamello
Joalokaha Jonase a ile a hlokomela, hase kamehla ho phetha tšebeletso ea rōna ho leng bonolo. (2 Timothea 4:5) Leha ho le joalo, maikutlo a bonahatsang mamello mabapi le ba bang a tla thusa.
U itšoara joang ha e mong oa liithuti tsa hao tsa Bibele a lieha ho utloisisa kapa e batla e le sethoto? Morupeli oa rōna e Moholo o re ruta tsela ea ho sebetsana le mathata a joalo. O ile a bontša mamello e fetang e tloaelehileng ha Abrahama a mo hloma lipotso a sa khaotse mabapi le kahlolo e atamelang ea Sodoma le Gomorrha. Abrahama o ile a botsa: “Hleka u ka timetsa ea lokileng hammoho le ea bolotsana na?” Abrahama o ile a kōpa ka tieo: “Ekaba ba lokileng ba mashome a mahlano ba teng motseng; hleka u ka timetsa motse, u sa o baballe ka baka la ba lokileng ba mashome a mahlano ba ho oona na?” Karabo ea Jehova e ile ea susumetsa Abrahama ho tsoela pele a kōpa ka tieo ho fihlela lenane le theohela ho ba leshome. Jehova o ne a tseba hore ke ba lelapa la Lota feela ba neng ba tšoaneleha bakeng sa ho bolokoa, ’me tokisetso e ne e entsoe mabapi le seo. Empa Molimo ka mamello o ile a lumella Abrahama ho tsoela pele a mo botsa ho fihlela a utloisisa boholo ba mohau oa Jehova.—Genese 18:20-32.
Jehova o ile a nahanela kutloisiso e lekanyelitsoeng ea Abrahama le ho ikutloa ha hae a amehile. Haeba le rōna re utloisisa likhaello tsa seithuti sa rōna, ho tla re thusa hore re bontše mamello ha se leka ho utloisisa thuto e itseng kapa ho hlōla tloaelo e metseng ka metso.
Tsoela Pele ho Ithuta ho Jehova
Ha ho pelaelo hore Jehova Molimo ke Morupeli e Moholo. Ka mamello o fetisa kutloisiso ka litsela tse kang litšoantšo, lipotso, le lithuto tse nang le mehlala e sebetsang. Ho isa bohōleng boo re etsisang mekhoa ea hae ea ho ruta, rōna ka borōna re tla ba matichere a molemo haholoanyane.
Kaha ba rutang ba bang ha baa lokela ho hlokomoloha ho ithuta, re tlameha ho tsoela pele ho ‘rutoa ke Jehova.’ (Esaia 54:13, NW) Esaia o ile a ngola: “Mahlo a lōna e tla ba mahlo a bonang Morupeli oa lōna e Moholo. ’Me le tla utloa ka litsebe tsa lōna lentsoe ka mor’a lōna le reng: ‘Tsela ke eona ena. Tsamaeang ho eona‚’ e se re la ea ka ho le letona kapa ka ho le letšehali.” (Esaia 30:20, 21, NW) Ka ho tsoela pele ho tsamaea tseleng ea Jehova le ho thusa ba bang ho etsa joalo, re ka ba le tokelo e khethehileng ea ho ithuta ka ho sa feleng ho Morupeli oa rōna e Moholo.
[Setšoantšo se leqepheng la 28]
Jehova o ile a botsa Jobo: “A ke ka taelo ea hao ntsu e phahamang, e ee ho haha ntlo ea eona phahameng na?”
[Setšoantšo se leqepheng la 28]
Ka monyaku, Jehova o ile a ruta Jonase ho ameha haholoanyane ka batho