Na U Batla Jehova ka Tieo?
MONNA e mong oa Mokreste o ne a labalabela ho buisana le bapalami-’moho le eena tereneng ka litaba tse molemo tse ka Bibeleng. (Mareka 13:10) Leha ho le joalo, tšabo e ne e mo sitisa ho bua. Na o ile a tela? Che, o ile a rapella taba ena ka tieo ’me a sebeletsa ho ithuta ho qalisa moqoqo. Jehova Molimo o ile a arabela kōpo ea monna enoa ’me a mo matlafalletsa ho paka.
Ho hlokahala hore re tiee joalo ha re batla Jehova le tlhohonolofatso ea hae. Moapostola Pauluse o ile a re: “Ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” (Baheberu 11:6) Ho batla Jehova feela ha hoa lekana. Leetsi la Segerike le fetoletsoeng e le “batlang ka tieo” le ka sebōpeho se fanang ka maikutlo a ho etsa ka matla le ho ikitlaetsa. Sena se akarelletsa pelo, kelello, moea le matla ’ohle a motho. Haeba re batla Jehova ka tieo, ha re itšoare ka ho se tsotelle, ka ho iqenehela, kapa ka monyebe. Ho e-na le hoo, re bonahatsa cheseho ea sebele ha re mo batla.—Liketso 15:17.
Ba Ileng ba Batla Jehova ka Tieo
Mangolo a na le mehlala e mengata ea ba ileng ba ikitlaelletsa ho batla Jehova. E mong oa bona ke Jakobo, ea ileng a betana le lengeloi la Molimo le tlileng ka ’mele oa motho ho fihlela mafube a hlaha. Ka lebaka leo, Jakobo o ile a rehoa Iseraele (Ea Loantšanang le Molimo) kaha o ile a ‘loana,’ kapa a phehella, a ikitlaetsa, a qophella Molimo. Lengeloi le ile la mo hlohonolofatsa ka lebaka la ho ikitlaetsa ha hae.—Genese 32:24-30.
E mong ke mosali oa Mogalilea ea sa boleloang ka lebitso eo ka lilemo tse 12 a ileng a khathatsoa ke phallo ea mali, e ileng ea mo bakela “bohloko bo boholo.” Ha a ne a le boemong bona, o ne a sa lokela ho ama batho ba bang. Leha ho le joalo, o ile a iteta sebete ho ea kopana le Jesu. O ile a ’na a ipolella hore: “Haeba nka ama liaparo tsa hae tsa ka ntle feela ke tla fola.” Ak’u nahane feela ha a fohla ‘bongata bo neng bo latela [Jesu] ’me bo mo petelitse.’ Hang ha a ama seaparo sa Jesu sa ka ntle, o ile a utloa hore “seliba sa hae sa mali [se pshele]”—lefu la hae le sa foleng le ne le phekotsoe! O ile a tšoha ha Jesu a botsa: “Ke mang ea amileng liaparo tsa ka tsa ka ntle?” Empa Jesu a re ho eena ka mofuthu: “Morali, tumelo ea hao e u folisitse. Tsamaea ka khotso, ’me u fole boloetseng ba hao bo bohloko.” Boiteko ba hae bo ile ba putsoa.—Mareka 5:24-34; Levitike 15:25-27.
Ketsahalong e ’ngoe hape, mosali oa Mofoenisia o ile a kōpa Jesu ka tieo hore a folise morali oa hae. Jesu o ile a araba ka hore ha hoa lokela ho fa lintjanyana lijo tsa bana. O ne a bolela hore o ne a ke ke a hlokomela batho bao e seng Baiseraele eaba o hlokomoloha Bajuda ba tšoanelehang. Leha ho le joalo, ha mosali eo a utloisisa se boleloang ke papiso ea hae, o ile a mo kōpa a re: “E, Morena; empa ha e le hantle lintjanyana li ja makumane a oang litafoleng tsa beng ba tsona.” Tumelo ea hae e matla le ho tiea ha hae li ile tsa susumelletsa Jesu hore a re: “Mosali, tumelo ea hao e khōlō; ho ke ho etsahale ho uena joalokaha u lakatsa.”—Matheu 15:22-28.
Ho ne ho tla etsahala’ng ka batho bao haeba ba ne ba sa ka ba phehella boitekong ba bona? Na ba ne ba tla hlohonolofatsoa haeba ba ne ba ile ba tela ha ba tobana le tšitiso ea pele, kapa ba latoleloa? Che! Mehlala ena e hlakisa hantle ntlha eo Jesu a neng a e ruta, e leng ea hore ‘ho qophella ho sebete’ ho loketse ebile hoa hlokahala ha motho a batla Jehova.—Luka 11:5-13.
Ho ea ka Thato ea Hae
Na liketsahalong tse boletsoeng ka holimo tsa ba ileng ba phekoloa ka mohlolo, ho ne ho hlokahala ho tiea feela hore ba phekoloe? Che, seo ba se kōpang se ne se lokela ho lumellana le thato ea Molimo. Jesu o ne a filoe matla a ho etsa mehlolo e le ho fana ka bopaki bo ikhethang ba hore ke Mora oa Molimo, Mesia ea tšepisitsoeng. (Johanne 6:14; 9:33; Liketso 2:22) Ho feta moo, mehlolo eo Jesu a ileng a e etsa e ile ea fana ka tlhase ea litlhohonolofatso tse khōlō tse tla ba teng lefatšeng tseo Jehova a tla li tšollela ho moloko oa batho nakong ea Puso ea Kreste ea Lilemo Tse Sekete.—Tšenolo 21:4; 22:2.
Ha e sa le thato ea Molimo hore ba bolumeling ba ’nete ba be le matla a ho etsa mehlolo, a kang matla a ho folisa le a ho bua ka maleme. (1 Bakorinthe 13:8, 13) Thato ea hae mehleng ea rōna e akarelletsa ho phatlalatsa litaba tse molemo tsa ’Muso lefatšeng lohle ‘e le hore batho ba mefuta eohle ba fihle tsebong e nepahetseng ea ’nete.’ (1 Timothea 2:4; Matheu 24:14; 28:19, 20) Ka nepo bahlanka ba Molimo ba ka lebella hore lithapelo tsa bona tse tiileng li utluoe haeba ba leka ka tieo ho etsa se tumellanong le thato ea hae.
Ba bang ba ka ’na ba ipotsa, ‘Ke hobane’ng ha re lokela ho ikitlaetsa empa morero oa Molimo oona o tla ’ne o phethahale qetellong?’ Le hoja e le ’nete hore Jehova o tla finyella morero oa hae ho sa tsotellehe boiteko ba batho, oa thaba ha batho ka bomong ba kopanela ho etseng thato ea hae. Jehova a ka ’na a tšoantšoa le motho ea hahang ntlo. Sehahi se na le moralo o feletseng oa mohaho, empa se khetha thepa ea ho haha thepeng e fumanehang sebakeng seo. Ka ho tšoanang, Jehova o na le morero oo a lokelang ho o finyella kajeno ’me o thabela ho sebelisa bahlanka ba hae, ba itlhahisang ka ho rata.—Pesaleme ea 110:3; 1 Bakorinthe 9:16, 17.
Nahana ka phihlelo ea Toshio e mocha. Ha a fihla sekolong se phahameng, o ne a batla ho fana ka bopaki bo pharaletseng ka hohle kamoo ho ka khonehang kateng tšimong ea hae e ikhethang. O ne a lula a e-na le Bibele ’me a leka ka hloko ho ba Mokreste ea behang mohlala o motle. Ho elella qetellong ea selemo sa hae sa pele sekolong seo, ho ile ha hlaha monyetla oa hore a fane ka puo sehlopheng. Toshio o ile a rapella thuso ea Jehova ’me a thaba ha a bona bohle ba sehlopheng ba mametse ka hloko puo ea hae e nang le sehlooho se reng, “Pakane ea Ka ea ho Kenela Mosebetsi oa Bopula-maliboho.” O ile a hlalosa hore o batla ho ba mosebeletsi oa nako e tletseng oa Lipaki Tsa Jehova. Seithuti se seng se ile sa lumela ho ithuta Bibele le eena ’me sa tsoela pele ho fihlela se kolobetsoa. Boiteko ba Toshio bo tiileng hammoho le lithapelo tsa hae li ile tsa putsoa ka ho enneng.
U Tiile Hakae?
U ka bontša ka litsela tse sa tšoaneng hore u batla Jehova ka tieo le litlhohonolofatso tsa hae. Ea pele, ho na le lintho tsa motheo tseo u ka li etsang, tse kang ho lokisetsa liboka tsa Bokreste hantle. U bonahatsa cheseho eo u batlang Jehova ka eona ka ho fana ka litlhaloso tse lokiselitsoeng hantle, lipuo tse susumetsang le ho etsa lipontšo tse atlehang. U ka boela ua bonahatsa ho tiea ha hao ka ho ntlafatsa boleng ba tšebeletso ea hao. Ho ka ba joang ha u ka leka ho ba botsoalle haholoanyane ha u buisana le mong’a ntlo le ho sebelisa likenyelletso tse lokelang tšimo ea lōna? (Bakolose 3:23) Ha monna oa Mokreste a ikitlaetsa ka pelo eohle a ka ’na a khona ho amohela likabelo tse itseng ka phuthehong, tse kang ho sebeletsa e le mohlanka ea sebeletsang kapa moholo. (1 Timothea 3:1, 2, 12, 13) Ka ho ithaopa, u ka fumana thabo e tlisoang ke ho fana. U ka ’na ua khona ho etsa kōpo ea ho sebeletsa morerong oa kaho ea lekala kapa ofising ea lekala ea Lipaki Tsa Jehova. Haeba u mor’abo rōna oa lesoha ea tšoanelehang, u ka ’na ua lakatsa ho ea Sekolong sa ho Koetlisetsoa Bosebeletsi, se hlomellang banna ba moea ho ba balisa ba molemo. Haeba u le lenyalong, mohlomong tsela eo ka eona u ka bontšang takatso ea hao e tiileng ea ho sebeletsa Jehova ka ho eketsehileng ke ka ho ba tšebeletsong ea boromuoa. Monyetla o mong oo u ka bang le oona e ka ’na ea e-ba oa ho fallela moo ho nang le tlhokahalo e khōloanyane ea baboleli ba ’Muso.—1 Bakorinthe 16:9.
Sa bohlokoa ka ho fetisisa ke boikutlo boo u phethang kabelo ka bona. Ho sa tsotellehe hore na u fuoe kabelo efe, e etse ka ho ikitlaetsa, ikakhele ho eona ka setotsoana “ka pelo e tšepahalang.” (Liketso 2:46; Baroma 12:8) U lokela ho talima kabelo e ’ngoe le e ’ngoe e le monyetla oa ho bonahatsa ho ikemisetsa ha hao ho rorisa Jehova. Lula u rapella thuso ea Jehova, ’me u etse sohle seo u ka se khonang. U tla kotula moputso o moholo.
Boiteko bo Tiileng Boa Putsoa
Na u sa hopola monna eloa oa Mokreste ea ileng a rapella ho hlōla tšabo ea hae e le hore a pakele bapalami-’moho le eena? Jehova o ile a hlohonolofatsa boiteko ba hae bo tiileng. Mor’abo rōna o ile a sebeletsa ho qoqa hamonate le batho, a khetha lintlha tse ’maloa tseo a neng a ka qalisa moqoqo ka tsona. O ile a khona ho sebelisa Bibele ka katleho ho pakela monna e mong ea neng a amehile ka likamano tse tepeletsang tsa batho. Maeto a ’maloa a ho boela ka tereneng a ile a lebisa thutong ea Bibele. Ka sebele, Jehova o ile a mo hlohonolofatsa ka lebaka la boiteko ba hae bo tiileng!
U ka kotula litholoana tse tšoanang haeba u tsoela pele ho batla Jehova ka tieo. Haeba u phehella ka boikokobetso ’me ka pelo eohle u etsa mosebetsi leha e le ofe oa puso ea Molimo oo u o abetsoeng, Jehova o tla u sebelisa tumellanong le merero ea hae ’me a tšollele tlhohonolofatso ea hae e enneng ho uena!
[Setšoantšo se leqepheng la 26]
Ho ka be ho ile ha etsahala’ng ka mosali eo haeba a ne a sa ka a phehella?
[Setšoantšo se leqepheng la 27]
Na ua phehella ha u kōpa tlhohonolofatso ea Jehova?
[Litšoantšo tse leqepheng la 28]
U ka bontša joang hore u batla Jehova ka tieo?