Ke Hobane’ng ha U Lokela ho Tšaba Molimo oa ’Nete Hona Joale?
“Tšaba Molimo, u boloke litaelo tsa oona, hobane, ke eona tšoanelo eohle ea motho.”—MOEKLESIA 12:13.
1, 2. Ke hobane’ng ha tšabo e nepahetseng ea Molimo e le e loketseng?
TŠABO e ntle le e nang le boikokobetso ea Molimo e molemo ho motho. E, le hoja tšabo e ngata ea batho e le e ferekanyang maikutlo ebile e le e kotsi boiketlong ba rōna, ho molemo hore re tšabe Jehova Molimo.—Pesaleme ea 112:1; Moeklesia 8:12.
2 ’Mōpi o tseba sena. Ka lebaka la lerato bakeng sa pōpo ea hae, o laela bohle hore ba mo tšabe le hore ba mo rapele. Rea bala: “Ka bona lengeloi le leng le fofang mahareng a leholimo, le tšoere Evangeli ea ka mehla le mehla ho e bolella ba ahileng lefatšeng, le lichaba tsohle, le mefuta eohle, le lipuo tsohle, le merabe eohle; la re ka lentsoe le phahamileng: Tšabang Molimo, isang khanya ho oona, hobane nako ea ho ahlola ha oona e tlile; ’me le khumamele ea entseng leholimo, le lefatše.”—Tšenolo 14:6, 7.
3. Ke eng seo ’Mōpi a ileng a se etsetsa batsoali ba rōna ba pele?
3 Ka sebele ha rea tšoanela ho hlokomoloha ’Mōpi oa lintho tsohle, Mohloli oa bophelo, hobane ke mong’a rōna le lefatše lena. (Pesaleme ea 24:1) Ha a bontša lerato la hae le leholo, Jehova o ile a fa bana ba hae ba lefatšeng bophelo le ho ba lokisetsa sebaka se babatsehang hore ba phele ho sona—paradeise e ntle ea lefatšeng. Leha ho le joalo, mpho ena e hlollang e ne e behetsoe meeli. Ha e le hantle, e ne e fanoe e le letlotlo. Batsoali ba rōna ba pele ba ne ba lokela ho hlokomela lehae la bona le ho le atolosa ho fihlela ba ahile le ho busa lefatše lohle. Ba ne ba e-na le litokelo le boikarabelo mabapi le liphoofolo tse phelang moo ho omileng, linonyana, le litlhapi—libōpuoa tse ling kaofela tse phelang tse neng li tla kopanela lefatše le bona le bana ba bona. Ka lebaka la letlotlo lena le leholo, motho o ne a tla ikarabella.
4. Ke eng seo motho a se entseng pōpong ea Molimo?
4 Ho sa tsotellehe tšimoloho eo e hlollang, talima seo motho a se entseng ho senya lehae la hae le letle la lefatše! Ka ho hlokomoloha ka nyeliso hore Molimo ke mong’a letlotlo lena, batho ba silafalitse lefatše. Tšenyo ena e mothating oa ho sokela ho ba teng ha mefuta e mengata ka ho eketsehileng ea liphoofolo, linonyana, le litlhapi. Molimo oa rōna ea nang le toka le ea lerato ha a na ho mamella sena ka ho sa feleng. Ho senngoa ha lefatše ho biletsa ho ikarabella, e leng ntho eo ba bangata ba nang le lebaka la ho e tšaba. Ka lehlakoreng le leng, bakeng sa bao ka tlhompho ba tšepang Molimo, hoa tšelisa ho tseba se tlang ho etsahala. Jehova o tla batla hore ho ikarabelloe, ’me lefatše le tla nchafatsoa. Ka sebele tsena ke litaba tse molemo bakeng sa bohle ba lipelo li lokileng lefatšeng.
5, 6. Jehova o tla arabela joang ho seo motho a se entseng pōpong ea Hae?
5 Molimo o tla phethahatsa kahlolo ea hae ka mang? Ka Jesu Kreste, eo joale a lutseng teroneng e le Morena oa ’Muso oa leholimo oa Molimo. Ka Mora eo oa leholimo, Jehova o tla felisa tsamaiso ea hona joale e litšila, ea bofetoheli. (2 Ba-Thessalonika 1:6-9; Tšenolo 19:11) Ka tsela ena o tla fana ka phomolo ho ba mo tšabang ’me, ka nako e tšoanang, a lopolle le ho boloka lehae la rōna la lefatše.
6 See se tla etsahala joang? Bibele e bolela ka mahlomola a maholo a tlang a tla fihla sehlohlolong ntoeng ea Armageddone. (Tšenolo 7:14; 16:16) Ena e tla ba kahlolo ea Molimo khahlanong le tsamaiso ena ea lintho e silafalitsoeng hammoho le ba e silafatsang. Na ho na le batho leha e le bafe ba tla sala ba phela? E! E tla ba ba se nang tšabo e tepelletsang, e kotsi ea Molimo, empa ba nang le tšabo e nang le tlhompho le boikokobetso bakeng sa hae. Ba tla lopolloa.—Liproverbia 2:21, 22.
Pontšo e Hlollang Haholo ea Matla
7. Ke hobane’ng ha Molimo a ile a kenella molemong oa Iseraele mehleng ea Moshe?
7 Khato ena e hapang tlhokomelo e nkoang ke Jehova Molimo e ile ea tšoantšetsoa ke ketso ea bonatla eo a ileng a e etsa molemong oa barapeli ba hae lilemong tse ka bang 1 500 pele ho Mehla e Tloaelehileng ea rōna. ’Muso o moholo oa sesole oa Egepeta o ne o entse basebetsi ba oona ba bajaki ba Baiseraele makhoba, o bile o leka ho timetsa morabe oohle oa bona ha ’musi oa oona, Faro, a laela hore ho bolaoe bana bohle ba batona ba sa tsoa tsoaloa ba Baiseraele. Tlhōlo ea Molimo holim’a Egepeta e ne e tla tlisetsa Iseraele tokoloho tsamaisong eo ea lipolotiki e hatellang, e, tokoloho sechabeng se silafalitsoeng ke borapeli ba melimo e mengata.
8, 9. Moshe le Baiseraele ba ile ba arabela joang ho kenelleng ha Molimo?
8 Exoda khaolo ea 15 e tlaleha karabelo ea Iseraele ha e lokolloa Egepeta. Ho hlahlobisisa tlaleho ena ho tla re thusa ho utloisisa ka ho feletseng kamoo Bakreste ba ka lopolloang kateng tsamaisong ea hona joale e silafetseng moeeng le nameng. A re hlahlobeng Exoda khaolo ea 15, re lebise tlhokomelo litemaneng tse khethiloeng hore re ithute hore na ke hobane’ng ha re lokela ho khetha ho tšaba Jehova, Molimo oa ’nete. Re qala ka litemana tsa 1 le 2:
9 “Eaba Moshe le bana ba Iseraele ba binela Jehova thoko ena; ba bina, ba re: Ke tla binela Jehova, hobane o itlotlisitse le ho itlotlisa; pere le mokalli oa eona o li lihetse leoatleng. Matla a ka le thoko ea ka ke Jehova, e bile eena ho pholoha ha ka.”
10. Ke eng se ileng sa lebisa ho timetseng ha Molimo lebotho la ntoa la Egepeta?
10 Ho pota lefatše batho ba tloaelane le tlaleho ea kamoo Jehova a ileng a lokolla Iseraele kateng Egepeta. O ile a tlisa likotlo holim’a ’muso oo o matla oa lefatše ho fihlela qetellong Faro a lumella Baiseraele ho tloha. Empa joale mabotho a ntoa a Faro a ile a lelekisa batho bana ba sitoang ho itšireletsa ’me ha bonahala a ba qabeletse lebōpong la Leoatle le Lefubelu. Le hoja ho ne ho bonahala eka kapele-pele bara ba Iseraele ba ne ba tla lahleheloa ke tokoloho e ncha eo ba e fumaneng, Jehova o ne a hopotse ho hong. Ka mohlolo o ile a bula tselana ho pholletsa le leoatle eaba o tlisa batho ba hae tšireletsehong. Ha Baegepeta ba latela, o ile a ba koahela ka Leoatle le Lefubelu ’me a etsa hore Faro le mabotho a hae a sesole ba khangoe ke metsi.—Exoda 14:1-31.
11. Phello ea khato eo Molimo a ileng a e nka khahlanong le Egepeta e ile ea e-ba efe?
11 Ho timetsa ha Jehova mabotho a sesole a Egepeta ho ile ha mo phahamisa mahlong a barapeli ba hae ’me ha etsa hore lebitso la hae le tsebahale ka ho pharaletseng. (Joshua 2:9, 10; 4:23, 24) E, lebitso la hae le ile la phahamisetsoa ka holimo ho melimo ea Egepeta e se nang matla, ea bohata, e ileng ea ipaka e sa khone ho lopolla barapeli ba eona. Ho tšepa ha ’ona melimo ea ’ona le motho ea shoang le matla a sesole ho ile ha lebisa ho soetseheng ho bohloko. (Pesaleme ea 146:3) Ha ho makatse hore ebe Baiseraele ba ile ba susumelletseha ho bina lithoriso tse bontšang tšabo e hloekileng ea Molimo ea phelang, eo ka bonatla a lopollang batho ba hae!
12, 13. Ke eng seo re lokelang ho ithuta sona tlhōlong ea Molimo Leoatleng le Lefubelu?
12 Ka ho tšoanang, re lokela ho hlokomela hore ha ho melimo ea bohata ea nakong ea rōna ’me ha ho ’muso o moholo, oo esita le ka lihlomo tsa nyutlelie, ho ka etsahalang hore o lekane le Jehova. A ka lopolla batho ba hae ’me o tla ba lopolla. “O etsa ka makhotla a leholimo le ka baahi ba lefatše kamoo a ratang kateng, ha ho e mong ea ka thibelang letsoho la hae, a re ho eena: U etsa’ng na?” (Daniele 4:35) Ha re utloisisa mantsoe ana ka botlalo, le rōna re susumelletseha ho bina lithoriso tsa hae ka thabo.
13 Pina ea tlhōlo Leoatleng le Lefubelu e tsoela pele: “Jehova ke mohale, Jehova ke lebitso la hae.” Ka hona, Mohlabani enoa ea sa hlōloeng hase ntho e ’ngoe e sa tsejoeng e iqapetsoeng ke monahano oa motho. O na le lebitso! Ke ‘Ea etsang hore ho be teng,’ Moetsi e Moholo, Eo ‘lebitso la hae e leng Jehova, . . . Ea Phahameng ka ho Fetisisa holim’a lefatše lohle.’ (Exoda 3:14, NW; 15:3-5; Pesaleme ea 83:18, NW) Na ha u lumele hore ho ka be ho bile bohlale hore Baegepeta bao ba boholo-holo ba be le boikutlo ba tšabo bo nang le kahlolo e molemo le tlhompho ho Ea Matla ’Ohle ho e-na le ho mo hanyetsa?
14. Bohlokoa ba tšabo ea bomolimo bo ile ba bontšoa joang Leoatleng le Lefubelu?
14 Joaloka Moqapi oa lefatše, Moetsi oa leoatle o na le taolo e feletseng holim’a metsi a mangata. (Exoda 15:8) Ha a boetse a sebelisa ho laola ha hae moea, o ile a finyella se neng se bonahala eka ke se ke keng sa etsahala. O ile a arola boliba ba metsi ntlheng e itseng ’me a a qobella hore a khutle ka litsela tse fapaneng e le hore a hlahise phaseje e entsoeng ke metsi hore batho ba hae ba fete. Nahana ka pono eo: lithane tse limilione tsa metsi a leoatle li bokellane ho ea fihla holimo e le marako a bapileng, li entse tsela e sireletsehileng ea ho pholoha bakeng sa Iseraele. E, ba ileng ba bonahatsa tšabo e ntle ea Molimo ba ile ba fumana tšireletso. Joale Jehova o ile a lokolla metsi, a a lumella hore a phalle hape e le moroallo o matla, a koahele mabotho a ntoa a Faro le lihlomo tsohle tsa ’ona. Eo e ne e le pontšo e kaakang ea matla a bomolimo holim’a melimo e se nang thuso le matla a batho a sesole! Ka sebele, Jehova ke eena ea lokelang ho tšajoa, na ha ho joalo?—Exoda 14:21, 22, 28; 15:8.
Ho Bontša Tšabo ea Rōna ea Molimo
15. Karabelo ea rōna e lokela ho ba efe liketsong tsa Molimo tse matla tse pholosang?
15 Hoja ebe re ne re eme le Moshe ka ho sireletsehileng, ka sebele re ka be re ile ra susumelletseha ho bina: “Ke mang har’a melimo ea tšoanang le uena, Uena Jehova? Ke mang ea tšoanang le uena, u ipakang u le matla khalalelong? Ea lokelang ho tšajoa ka lipina tsa thoriso, Ea etsang mehlolo.” (Exoda 15:11, NW) Maikutlo a joalo a ’nile a phetoa ho pholletsa le makholo a lilemo ho tloha ka nako eo. Bukeng ea ho qetela ea Bibele, moapostola Johanne o hlalosa sehlopha sa bahlanka ba tšepahalang ba tlotsitsoeng ba Molimo: “Ba bina sefela sa Moshe, mohlanka oa Molimo, le sefela sa Konyana.” Pina ee e khōlō ke efe? “E meholo, ea babatseha, mesebetsi ea hao, Morena Molimo o matla ’ohle! Oho, Morena oa lichaba, litsela tsa hao li lokile hakakang, ke ’nete feela! Ea sa tl’o u tšaba ke ha e le mang, Morena? Ea sa tl’o tlotlisa lebitso la hao ke mang? Hobane ea halalelang ke uena u ’notši.”—Tšenolo 15:2-4.
16, 17. Ke tsoelo-pele efe e hlollang eo re bonang e etsahala kajeno?
16 Kahoo le kajeno ho na le barapeli ba lokolotsoeng ba ananelang, e seng feela mesebetsi ea Molimo ea pōpo, empa le melao-taelo ea hae. Batho ba tsoang lichabeng tsohle ba lokolotsoe moeeng, ba arotsoe lefatšeng lena le silafetseng hobane ba hlokomela ’me ba sebelisa melao-taelo e lokileng ea Molimo. Selemo le selemo, ba makholo a likete ba baleha lefatšeng lena le senyehileng hore ba tl’o lula le mokhatlo o hlophisitsoeng o hloekileng, o lokileng oa barapeli ba Jehova. Kapele, ka mor’a hore ho lihuoe likahlolo tsa Molimo tse bohale khahlanong le bolumeli ba bohata le karolo e ’ngoe kaofela ea tsamaiso ena e khopo, ba tla phela ka ho sa feleng lefatšeng le lecha le lokileng.
17 Tumellanong le Tšenolo 14:6, 7, hona joale moloko oa batho o utloa molaetsa o lemosang oa kahlolo o boleloang ke Lipaki tsa Jehova tlas’a tataiso ea mangeloi. Linaheng tse fetang 230 selemong se fetileng, Lipaki tse ka bang limilione tse hlano li ile tsa phatlalatsa litaba tse molemo tsa ’Muso oa Molimo le hora ea hae ea kahlolo. Hore li rute batho ba bang bakeng sa ho pholoha, Lipaki li ile tsa etela kamehla mahaeng a batho, tsa tsamaisa lithuto tsa Bibele tse sa lefelloeng. Ka tsela ena selemo le selemo ba makholo a likete ba ithuta ho lekaneng hore ba tšabe Molimo oa ’nete ka kelello, ba nehele bophelo ba bona ho eena, ’me ba kolobetsoe. Ke ho thabisang hakaakang hore ebe ba joalo ba se ba tšaba Molimo oa ’nete!—Luka 1:49-51; Liketso 9:31; bapisa le Ba-Heberu 11:7.
18. Ke eng se bontšang hore mangeloi a kopanela boboleling ba rōna?
18 Na ke ’nete hore mangeloi a kopanela mosebetsing oo oa boboleli? Ha e le hantle, ka sebele ho bonahala e le ho hlakileng hore hangata tataiso ea mangeloi e ’nile ea tlisa Lipaki tsa Jehova lehaeng leo ho lona soule e itseng e tepeletseng e neng e laba-labela, e bile e rapella, thuso ea moea! Ka mohlala, ba babeli ba Lipaki tsa Jehova ba neng ba tsamaea le ngoana e monyenyane ba ne ba ntse ba bolela litaba tse molemo sehleke-hlekeng sa Caribbean. Ha motšehare o atamela, batho bao ba babeli ba baholo ba ile ba etsa qeto ea ho emisa moo letsatsing leo. Empa ngoana o ne a lakatsa ka ho sa tloaelehang ho etela ntlong e latelang. Ha a bona hore batho ba baholo ba ne ba sa rate ho etsa joalo ka nako eo, o ile a tsamaea a le mong ’me a kokota. Mofumahatsana e mong o ile a bula monyako. Ha batho ba baholo ba bona sena, ba ile ba ea ’me ba buisana le eena. O ile a ba memela hore ba kene, a hlalosa hore hona nakong ea ha a utloa ho kokotoa monyako, o ne a ntse a rapela hore Molimo a romele Lipaki ho eena hore li tl’o mo ruta Bibele. Ho ile ha etsoa litokisetso bakeng sa thuto ea Bibele.
19. Ke eng seo re ka se supang e le molemo oa ho tšaba Molimo?
19 Ha re ntse re nehelana ka botšepehi ka molaetsa oa Molimo oa kahlolo, re boetse re ruta ka melao-taelo ea hae e lokileng. Ha melao-taelo ena e sebelisoa bophelong ba batho, phello e ba litlhohonolofatso tsa nama hammoho le tsa moea. Ka mohlala, Bibele e hlakile haholo ho nyatseng ha eona boitšoaro bohle bo bobe ba likamano tsa botona le botšehali. (Ba-Roma 1:26, 27, 32) Kajeno litekanyetso tsa bomolimo li hlokomolohuoa ka ho pharaletseng lefatšeng. Phello ke efe? Manyalo aa senyeha. Botlokotsebe boa eketseha. Mafu a tšoaetsanoang ka likamano tsa botona le botšehali a qhoalisang, a seng a fetohile seoa lekholong lena la bo20 la lilemo, aa hasana. Ka sebele, lefu le tšosang la AIDS le hasoa haholo-holo ka boitšoaro bo bobe ba likamano tsa botona le botšehali. Empa na tšabo e nang le tlhompho ea Molimo ha e-ea ipaka e le tšireletso e khōlō bakeng sa barapeli ba ’nete?—2 Ba-Korinthe 7:1; Ba-Filippi 2:12; bona le Liketso 15:28, 29.
Liphello Tsa ho Tšaba Molimo Hona Joale
20. Ke eng se bontšang hore ba bang ba tseba ka botumo bo botle ba Lipaki tsa Jehova?
20 Ho na le litlhohonolofatso tse ngata ho ba tšabang Molimo le ba latelang melao-taelo ea hae. Nahana ka ketsahalo e bontšang ho hlokomeloa ho ntseng ho eketseha ha ’nete ea hore Lipaki tsa Jehova li bōpa mokhatlo oa baena o nang le khotso oa Bakreste ba nang le boitšoaro bo lokileng. Lipaki tse ngata, tseo e neng e le baemeli ba tlileng kopanong ea machaba Amerika Boroa, li ne li lula hoteleng eo ka bosiu bo bong e ileng ea boela ea sebelisoa bakeng sa ’moka oo e seng oa Lipaki oo ho oona mopresidente oa sechaba a neng a tla fana ka puo. Ha sehlopha sa lefapha la tšireletso se kenya mopresidente ka potlako ka har’a lift, Paki e ’ngoe e neng e sa tsebe hore na ke mang ea neng a le ka har’a lift e ile ea kena, e leng ho ileng ha makatsa banna ba lefapha la tšireletso! Ha e hlokomela seo e se entseng, Paki eo e ile ea kōpa tšoarelo bakeng sa ho itšunya-tšunya hoo. E ile ea ba bontša beche ea eona ea kopano e e tsebahatsang e le Paki ’me ea re hase tšokelo ho mopresidente. A bososela, molebeli o ile a re: “Haeba batho bohle ba ne ba tšoana le Lipaki tsa Jehova, re ne re ke ke ra hloka mofuta ona oa tšireletso.”—Esaia 2:2-4.
21. Ke litsela life tsa ho nka khato tse bulehetseng batho kajeno?
21 Ona ke mofuta oa batho bao hona joale Jehova a ba bokellang le ho ba lokisetsa ho ‘tsoa mahlomoleng a maholo’ a tla felisa tsamaiso ena. (Tšenolo 7:9, 10, 14) Ho pholoha ho joalo ha e na ho ba taba e tla etsahala ka tšohanyetso. Hore motho e be mopholohi, o tlameha ho tšaba Jehova, ho mo hlokomela e le ’Musi ea loketseng, le ho inehela ho eena. Leha ho le joalo, ’nete ke hore ba bangata ha ba na ho hlaolela mofuta oa tšabo o tla etsa hore ba tšoanelehe ho fumana tšireletso. (Pesaleme ea 2:1-6) Ho latela bopaki bohle bo leng teng, ’Musi ea khethiloeng oa Jehova, Jesu Kreste, o ’nile a busa e le Morena ho tloha selemong sa bohlokoa sa 1914. Sena se bolela hore nako e setseng e fela ka potlako bakeng sa hore batho ka bomong ba hōlise le ho bonahatsa tšabo e hloekileng ea Jehova. Ho ntse ho le joalo, ’Mōpi oa rōna o lumella batho ka bomong, esita le ba boemong bo matla, hore ba arabele: “Joale he, marena, hlalefang; le lōna, baahloli ba lefatše, le eletsoe! Sebeletsang Jehova ka tšabo, ’me le thabe le ntse le thothomela! Akang Mora, a se tl’o halefa, ’me la timela tseleng ea lōna, hobane bohale ba hae bo se bo tla tuka. Ho lehlohonolo bohle ba beileng tšepo ea bona ho eena!”—Pesaleme ea 2:7-12.
22. Ke eng seo bokamoso bo se tšoereng bakeng sa ba tšabang Molimo hona joale?
22 E se eka re ka ba har’a ba tla rorisa ’Mōpi oa rōna joaloka Ea re lopolotseng. Leha ho le joalo, sena se biletsa hore re tšabe Molimo oa ’nete hona joale! (Bapisa le Pesaleme ea 2:11; Ba-Heberu 12:28; 1 Petrose 1:17.) Re tlameha ho tsoela pele ho ithuta melao-taelo ea hae e lokileng le ho e mamela. Pina ea Moshe le ea Konyana, e tlalehiloeng ho Tšenolo 15:3, 4 e tla fihla sehlohlolong ha Jehova a felisa bokhopo bohle ka ho feletseng lefatšeng ’me a qala ho phekola motho le lehae la hae la lefatše liphellong tse silafatsang tsa sebe. Joale, ka lipelo tsohle tsa rōna, re tla bina: “E meholo, ea babatseha, mesebetsi ea hao, Morena Molimo o matla ’ohle! Oho, Morena oa lichaba, litsela tsa hao li lokile hakakang, ke ’nete feela! Ea sa tl’o u tšaba ke ha e le mang, Morena? Ea sa tl’o tlotlisa lebitso la hao ke mang?”
Na U sa Hopola?
◻ Ke hobane’ng ha Jehova a lokeloa ke tšabo ea rōna e hloekileng?
◻ Ke eng se ileng sa bonahatsoa ke lintho tseo Molimo a ileng a li finyella Leoatleng le Lefubelu?
◻ Ke melemo efe e tlisoang ke tšabo ea rōna e nang le tlhompho ho Jehova?
◻ Ba tšabang Molimo oa ’nete hona joale ba letetsoe ke bokamoso bofe?