Litšupiso Tsa Bukana ea Seboka sa Bophelo le Tšebeletso ea Rona
LA 3-LA 9 AUGUST
MATLOTLO A TSOANG BIBELENG | EXODA 13-14
“Emang le Tiile ’me le Bone Poloko ea Jehova”
(Exoda 14:13, 14) Joale Moshe a re ho sechaba: “Le se ke la tšoha. Emang le tiile ’me le bone poloko ea Jehova, eo a tla le etsetsa eona kajeno. Etsoe Baegepeta bao le ba bonang kajeno le ke ke la ba bona hape, che, le ka mohla. 14 Jehova o tla le loanela, ’me le tla khutsa.”
Moshe—O ne a E-na le Tumelo
E ka ’na eaba Moshe o ne a sa tsebe hore Molimo o ne a le mothating oa ho arola Leoatle le Lefubelu ’me a pholose Baiseraele. Leha ho le joalo, Moshe o ne a kholisehile hore Molimo o tla etsa ho hong ho sireletsa batho ba Hae. Moshe o ne a batla hore Baiseraele ba habo ba be le tumelo e tšoanang. Bibele e re: “Moshe a re ho sechaba: ‘Le se ke la tšoha. Emang le tiile ’me le bone poloko ea Jehova, eo a tla le etsetsa eona kajeno.’ ” (Exoda 14:13) Na Moshe o ile a khona ho thusa Baiseraele ba habo hore ba be le tumelo e matla? Ho joalo, kaha Bibele ha e bue ka Moshe feela empa e bua le ka Baiseraele bohle, ha e re: “Ka tumelo ba ile ba feta har’a Leoatle le Lefubelu joalokaha eka ke moo ho omileng.” (Baheberu 11:29) Tumelo ea Moshe ha ea ka ea tsoela eena feela molemo empa e ile ea thusa le bohle ba ileng ba bontša tumelo joaloka eena.
(Exoda 14:21, 22) Joale Moshe a otlolla letsoho la hae holim’a leoatle; eaba Jehova o qala ho khutlisetsa leoatle morao ka moea o matla oa bochabela bosiu bohle le ho fetola boliba ba leoatle mobu o omileng, ’me metsi a aroloa. 22 Qetellong bara ba Iseraele ba tšela bohareng ba leoatle moo ho omileng, ha metsi e le lebota ho bona ka letsohong la bona le letona le le letšehali.
O Matla ’Ohle Empa oa re Qenehela
13 Bala Exoda 14:19-22. Ak’u inahanele feela u se u le e mong oa Baiseraele joale le qabeletsoe pakeng tsa Leoatle le Lefubelu le lebotho la Faro le ntseng le le lelekisa. Ha u re mahlo tloha u bona leru le letšo le ema pakeng tsa lona le Baegepeta le ba sira hore ba se ke ba le bona empa ka lehlakoreng la lona le entse khanya e kholo. Ha u sa maketse, u bona Moshe a otlollela letsoho leoatleng ebe ho ba le moea o matla o arolang leoatle. Ntho e u makatsang ke hore uena le sechaba sohle le kena ka leoatleng le itsamaela hantle. Mohlolo o mong ke hore mona moo le tsamaeang teng ho omme ngo! ha ho na le qanthananyana feela.
(Exoda 14:26-28) Qetellong Jehova a re ho Moshe: “Otlolla letsoho holim’a leoatle, hore metsi a khutlele holim’a Baegepeta, likoloing tsa bona tsa ntoa le ho banna ba bona ba palameng lipere.” 27 Hang-hang Moshe a otlolla letsoho holim’a leoatle, ’me leoatle la qala ho khutlela boemong ba lona bo tloaelehileng ha e se e tla ba hoseng. Nakong ena eohle Baegepeta ba ne ba baleha hore ba se ke ba teana le lona, empa Jehova a lihela Baegepeta ka har’a leoatle. 28 Metsi a ’na a khutla. Qetellong a koahela likoloi tsa ntoa le banna ba palameng lipere ba mabotho ’ohle a sesole a Faro le ba ileng ba kena leoatleng ka mor’a bona. Ha ho le ea mong oa bona ea ileng a sala.
U se ke Ua Lebala Jehova
Ha Baegepeta ba ntse ba sokolisoa ke likoloi tsa bona tsa ntoa tse robehileng, Baiseraele bohle ba ile ba fihla lebopong le ka bochabela la leoatle. Joale, Moshe o ile a otlollela letsoho la hae holim’a Leoatle le Lefubelu. Ka nako eo, Jehova o ile a etsa hore metsi a neng a entse lekhalo a boele a kopane. Ka molumo o moholo metsi a mangata a ile a koahela Faro le bahlabani ba hae, ’me a ba khama. Ha ho le ea mong oa lira tseo ea ileng a pholoha. Baiseraele ba ne ba lokolohile!—Ex. 14:26-28; Pes. 136:13-15.
Ketsahalo ena e ile ea tšosa lichaba tsa tikoloho eo ka nako e telele. (Ex. 15:14-16) Lilemo tse 40 hamorao, Rahaba oa Jeriko o ile a re ho banna ba babeli ba Baiseraele: “Ho le tšaba ho re oetse holimo, . . . etsoe re utloile kamoo Jehova a ileng a pshesa metsi a Leoatle le Lefubelu ka pel’a lona ha le tsoa Egepeta.” (Josh. 2:9, 10) Esita le lichaba tseo tsa bahetene li ne li sa lebala kamoo Jehova a ileng a pholosa batho ba hae kateng. Ho hlakile hore Baiseraele ba ne ba bile ba e-na le mabaka a mangata le ho feta a ho mo hopola.
Batlisisa Matlotlo a Patiloeng
(Exoda 13:17) Eitse ha Faro a tlohela sechaba hore se tsamaee Molimo ha aa ka a se tsamaisa ka tsela ea naha ea Bafilista leha e ne e le haufi, etsoe Molimo o ile a re: “Mohlomong sechaba se tla ikutloa se soabile ha se bona ntoa ’me ka sebele se tla khutlela Egepeta.”
it-1-E 1117
Litsela Tse Kholo
Haesale ho tloha mehleng ea khale litsela tse kholo, tse akarelletsang le tseo bo-rakhoebo ba neng ba tsamaea ho tsona li kopanya metse e fapaneng ea Palestina. (Nu 20:17-19; 21:21, 22; 22:5, 21-23; Jos 2:22; Bhl 21:19; 1Sa 6:9, 12; 13:17, 18; sheba le TSELA EA MORENA.) ’Mila oo ho neng ho nkoa hore o moholo o ne o tloha Egepeta o ea metseng ea Gaza le Ashkelone e Palestina, ebe hanyane ka hanyane o kobehela leboea bochabela o leba Megido. O ne o tsoela pele ho fihla Hazore ka leboea ho Leoatle la Galilea, o be o fetele le Damaseka. Tsela ena e neng e tsamaea le Filistia e ne e le eona e khutšoane ha motho a tloha Egepeta a ea Naheng e Tšepisitsoeng. Empa ka mosa Jehova o ile a re Baiseraele ba tsoe ka tsela e ’ngoe e seng eo e le hore ba qobe ho tšoengoa ke Filistia.—Ex 13:17.
(Exoda 14:2) “Bua le bara ba Iseraele, hore ba khutle ’me ba hlome liahelo ka pel’a Pihahirothe pakeng tsa Migdole le leoatle ka pel’a Baale-zefone. Le tla hloma litente ka pel’a eona pel’a leoatle.
it-1-E 782 ¶2-3
Ho Falla ha Baiseraele
Leoatle le Lefubelu le ile la aroloa hokae e le hore Baiseraele ba tle ba tsebe ho tšela?
Ho ka ’na ha boleloa hore ka mor’a hore Baiseraele ba fihle Ethame “moeling oa lefeella” nakong ea ha ba le karolong ea bobeli ea leeto la bona, Molimo o ile a laela Moshe hore Baiseraele “ba khutle ’me ba hlome liahelo ka pel’a Pihahirothe . . . pel’a leoatle.” Ho khutla hona ha Baiseraele ho ne ho tla etsa hore Faro a lumele hore “ba hlahlathela ka ho ferekana.” (Ex 13:20; 14:1-3) Litsebi tse ratang tsela ea el Haj li bolela hore poleloana ea Seheberu e bolelang “ho khutla” ha e bolele feela ho tjekela ka lehlakoreng le leng empa e bolela ho khutlela morao, u nka tsela e ’ngoe e tla u fihlisa moo u eang teng. Ba bolela hore ka mor’a hore Baiseraele ba fihle ka leboea ho Kou ea Suez, ba ile ba khutlela morao eaba ba ea ka bochabela ho Jebel ʽAtaqah, eleng sebaka se kopanyang lithaba tse moeling o ka leboea ho Kou eo. Sehlopha se seholo hakaalo joaloka sena sa Baiseraele, se ne se ke ke sa khona ho tsoa habonolo haeba lira tsa bona li ne ka ba lelekisa li hlaha ka leboea hobane li ne li tla koala litsela tsa bona tsa ho tsoa ebe li ba qobella ka leoatleng.
Meetlo ea Bajuda ba lekholong la pele la lilemo le eona e bontša maikutlo a tšoanang le a litsebi tsena. (Bona PIHAHIROTHE.) Empa taba ea bohlokoa ke hore ntho ena eo litsebi li buang ka eona, e lumellana hantle le Bibele le hoja litsebi tse ling li sa lumellane le maikutlo ana. (Ex 14:9-16) Ho bonahala eka moo Baiseraele ba ileng ba tšela teng e ne e le hojana le tlhoro ea Kou ea Leoatle le Lefubelu, moo Faro le lebotho la hae ba neng ba ke ke ba khona ho ba lika-liketsa habonolo ka har’a Kou eo eaba ba hlaha Baiseraele ka lehlakoreng le leng.—Ex 14:22, 23.
’Malo oa Bibele
(Exoda 13:1-20) Jehova a bua ka ho eketsehileng le Moshe, a re: 2 “Halaletsang bakeng sa ka letsibolo le leng le le leng le letona le bulang popelo e ’ngoe le e ’ngoe har’a bara ba Iseraele, har’a batho le liphoofolo. Ke la ka.” 3 Moshe a tsoela pele ho re ho sechaba: “Ho ke ho hopoloe letsatsi lena leo ka lona le tsoileng Egepeta, ntlong ea makhoba, hobane Jehova o le ntšitse teng ka letsoho le matla. Kahoo ho se ke ha jeoa letho le lomositsoeng. 4 Kajeno le tsoa ka khoeli ea Abibe. 5 Etlare ha Jehova a le tlisitse naheng ea Bakanana le Bahethe le Baamore le Baheve le Bajebuse, eo a hlapanyelitseng baholo-holo ba lona hore o tla le fa eona, naha e phallang lebese le mahe a linotši, joale le tla etsa tšebeletso ena ka khoeli ena. 6 Le tla ja mahobe a sa lomosoang ka matsatsi a supileng, ’me ka letsatsi la bosupa ke mokete oa Jehova. 7 Mahobe a sa lomosoang a tla jeoa ka matsatsi a supileng; ho se ke ha bonoa letho le lomositsoeng ho lona, ’me ho se ke ha bonoa ho lona hlama e bolila meeling eohle ea lona. 8 Ka letsatsi leo u tla bolella mora oa hao, u re, ‘Ke ka lebaka la seo Jehova a nkentseng sona ha ke tsoa Egepeta.’ 9 E tla ba pontšo letsohong la hao ’me e be sehopotso pakeng tsa mahlo a hao, e le hore molao oa Jehova o ka ba molomong oa hao; hobane Jehova o u ntšitse Egepeta ka letsoho le matla. 10 U tla boloka taelo ena e hlomamisitsoeng ka nako ea eona e behiloeng selemo le selemo. 11 “Etlare ha Jehova a u tlisa naheng ea Bakanana, feela joalokaha a hlapanyelitse uena le baholo-holo ba hao, ’me ha a u fa eona, 12 joale u tla nehela ho Jehova e mong le e mong ea bulang popelo, le letsibolo le leng le le leng, la namane ea phoofolo, leo e tla ba la hao. Tse tona ke tsa Jehova. 13 U tla lopolla letsibolo le leng le le leng la esele ka nku, ’me haeba u sa le lopolle, joale u tla le roba molala. U tla lopolla letsibolo le leng le le leng la motho har’a bara ba hao. 14 “Etlare haeba mora oa hao a u botsa hamorao, a re, ‘See se bolela’ng?’ joale u tla re ho eena, ‘Jehova o re ntšitse Egepeta, ntlong ea makhoba, ka letsoho le matla. 15 Faro a bontša manganga mabapi le hore a re tlohele hore re tsamaee, eaba Jehova o bolaea letsibolo le leng le le leng naheng ea Egepeta, ho tloha ho letsibolo la motho ho ea ho letsibolo la phoofolo. Ke ka lebaka leo ke etsetsang Jehova sehlabelo ka bohle ba batona ba bulang popelo, ’me ke lopolla letsibolo le leng le le leng la bara ba ka.’ 16 E tla ba pontšo letsohong la hao le lebanta le roaloang phatleng pakeng tsa mahlo a hao, hobane Jehova o re ntšitse Egepeta ka letsoho le matla.” 17 Eitse ha Faro a tlohela sechaba hore se tsamaee Molimo ha aa ka a se tsamaisa ka tsela ea naha ea Bafilista leha e ne e le haufi, etsoe Molimo o ile a re: “Mohlomong sechaba se tla ikutloa se soabile ha se bona ntoa ’me ka sebele se tla khutlela Egepeta.” 18 Kahoo Molimo a etsa hore sechaba se potolohe ka tsela ea lefeella la Leoatle le Lefubelu. Empa bara ba Iseraele ba ile ba nyoloha naheng ea Egepeta ka tlhophiso ea ntoa. 19 Moshe o ne a nkile masapo a Josefa, hobane o ne a hlapantšitse bara ba Iseraele ka tieo, a re: “Ruri Molimo o tla lebisa tlhokomelo ea hae ho lona, ’me le tla nka masapo a ka ha le tloha mona.” 20 Ba tloha Sukothe ’me ba hloma liahelo Ethame moeling oa lefeella.
LA 10-LA 16 AUGUST
MATLOTLO A TSOANG BIBELENG | EXODA 15-16
“Rorisang Jehova ka ho Bina”
(Exoda 15:1, 2) Ka nako eo Moshe le bara ba Iseraele ba qala ho binela Jehova pina ena ’me ba bua se latelang: “E-re ke binele Jehova, kaha o phahame haholo. O lahletse pere le mopalami oa eona ka leoatleng. 2 Matla a ka le bonatla ba ka ke Jah, etsoe ke poloko ea ka. Enoa ke Molimo oa ka, ’me ke tla mo roka; ke Molimo oa Ntate, ’me ke tla mo phahamisetsa holimo.
Ke Hobane’ng ha U Lokela ho Tšaba Molimo oa ’Nete Hona Joale?
11 Ho timetsa ha Jehova mabotho a sesole a Egepeta ho ile ha mo phahamisa mahlong a barapeli ba hae ’me ha etsa hore lebitso la hae le tsebahale ka ho pharaletseng. (Joshua 2:9, 10; 4:23, 24) E, lebitso la hae le ile la phahamisetsoa ka holimo ho melimo ea Egepeta e se nang matla, ea bohata, e ileng ea ipaka e sa khone ho lopolla barapeli ba eona. Ho tšepa ha ’ona melimo ea ’ona le motho ea shoang le matla a sesole ho ile ha lebisa ho soetseheng ho bohloko. (Pesaleme ea 146:3) Ha ho makatse hore ebe Baiseraele ba ile ba susumelletseha ho bina lithoriso tse bontšang tšabo e hloekileng ea Molimo ea phelang, eo ka bonatla a lopollang batho ba hae!
(Exoda 15:11) Ke mang har’a melimo ea joaloka uena, Jehova? Ke mang ea joaloka uena, ea matla khalalelong? Ea lokelang ho tšajoa ka lipina tsa thoriso, Ea etsang limakatso.
(Exoda 15:18) Jehova o tla busa e le morena ho isa nakong e sa lekanyetsoang, esita le ka ho sa feleng.
Ke Hobane’ng ha U Lokela ho Tšaba Molimo oa ’Nete Hona Joale?
15 Hoja ebe re ne re eme le Moshe ka ho sireletsehileng, ka sebele re ka be re ile ra susumelletseha ho bina: “Ke mang har’a melimo ea tšoanang le uena, Uena Jehova? Ke mang ea tšoanang le uena, u ipakang u le matla khalalelong? Ea lokelang ho tšajoa ka lipina tsa thoriso, Ea etsang mehlolo.” (Exoda 15:11, NW) Maikutlo a joalo a ’nile a phetoa ho pholletsa le makholo a lilemo ho tloha ka nako eo. Bukeng ea ho qetela ea Bibele, moapostola Johanne o hlalosa sehlopha sa bahlanka ba tšepahalang ba tlotsitsoeng ba Molimo: “Ba bina sefela sa Moshe, mohlanka oa Molimo, le sefela sa Konyana.” Pina ee e kholo ke efe? “E meholo, ea babatseha, mesebetsi ea hao, Morena Molimo o matla ’ohle! Oho, Morena oa lichaba, litsela tsa hao li lokile hakakang, ke ’nete feela! Ea sa tl’o u tšaba ke ha e le mang, Morena? Ea sa tl’o tlotlisa lebitso la hao ke mang? Hobane ea halalelang ke uena u ’notši.”—Tšenolo 15:2-4.
16 Kahoo le kajeno ho na le barapeli ba lokolotsoeng ba ananelang, e seng feela mesebetsi ea Molimo ea popo, empa le melao-taelo ea hae. Batho ba tsoang lichabeng tsohle ba lokolotsoe moeeng, ba arotsoe lefatšeng lena le silafetseng hobane ba hlokomela ’me ba sebelisa melao-taelo e lokileng ea Molimo. Selemo le selemo, ba makholo a likete ba baleha lefatšeng lena le senyehileng hore ba tl’o lula le mokhatlo o hlophisitsoeng o hloekileng, o lokileng oa barapeli ba Jehova. Kapele, ka mor’a hore ho lihuoe likahlolo tsa Molimo tse bohale khahlanong le bolumeli ba bohata le karolo e ’ngoe kaofela ea tsamaiso ena e khopo, ba tla phela ka ho sa feleng lefatšeng le lecha le lokileng.
(Exoda 15:20, 21).Eaba Miriame moprofeta oa mosali, khaitseli ea Arone, o nka moropa o monyenyane letsohong la hae; ’me basali bohle ba qala ho tsoa le eena ka meropa e menyenyane ’me ba etsa metjeko. 21 Miriame a ’na a arabela banna: “Binelang Jehova, kaha o phahame haholo. O lahletse pere le mopalami oa eona ka leoatleng.”
it-2 E 454 ¶1
’Mino
Hangata tsela eo ho neng ho binoa ka eona Iseraele e ne e tla ba hore lihlopha tse peli tsa libini li bina mela e tšoanang ea pina empa e le ka linako tse fapaneng kapa ho bine motho a le mong ebe u arabeloa ke sehlopha sa libini. Ka Bibeleng ho boleloa hore ho bina joalo ke ho “arabela.” (Ex 15:21; 1Sa 18:6, 7) Mokhoa ona oa ho bina o bonahala hantle ka tsela eo lipesaleme tse ling li ngotsoeng ka eona, mohlala, Pesaleme ea 136. Tlhaloso ea lipina tse peli tse kholo tsa thoriso tse neng li binoa mehleng ea Nehemia le tse neng li binoa ha ho neheloa lerako la Jerusalema, li bontša hore batho bao ba ne ba bina ka tsela ena.—Ne 12:31, 38, 40-42; sheba PINA.
it-2 E 698
Moprofeta oa mosali
Miriame ke eena mosali oa pele eo Bibele e buileng ka eena e le moprofeta. E ka ’na eaba Molimo o ile a fetisa molaetsa kapa melaetsa ea hae ka Miriame mohlomong ka ho bina. (Ex 15:20, 21) Ke kahoo Miriame le Arone ba ileng ba re ka Moshe: “Na [Jehova] ha aa bua le ka rona?” (Nu 12:2) Moprofeta Mikea o ile a re Jehova o rometse “Moshe, Arone le Miriame” ho Baiseraele ha a ne a ba ntša Egepeta. (Mik 6:4) Le hoja Miriame a ne a na le tlotla e ikhethang ea ho buisana le Molimo, empa setsoalle sa Molimo le Moshe e ne e le sona se matla haholo ha se bapisoa le sa Miriame le Molimo. Miriame o ile a fumana kotlo e boima e tsoang ho Jehova ha joale matla a se a mo mathela hloohong.—Nu 12:1-15.
Batlisisa Matlotlo a Patiloeng
(Exoda 16:13) Tumellanong le hoo ka shoalane likoekoe tsa qala ho hlaha ’me tsa koahela liahelo, ’me hoseng phoka e ne e letse ho potoloha liahelo.
Re U Lome Tsebe?
Ke hobane’ng ha Molimo a ile a khetha ho fepa Baiseraele likoekoe ha ba le lefelleng?
Ka mor’a hore Baiseraele ba tsoe Egepeta, Molimo o ile a ba fepa likoekoe tse ngata ka makhetlo a mabeli.—Exoda 16:13; Numere 11:31.
Likoekoe ke linonyana tse nyenyane, tse ka bang bolelele ba lisenthimithara tse 18 ’me boima ba tsona e ka ba ligrama tse 100. Li qhotsetsa libakeng tse ngata tsa Asia bophirimela hammoho le Europe. Kaha ke linonyana tse fallang, li qeta mariha Afrika Leboea le Arabia. Nakong eo linonyana tsena li fallang, li haola le mabopo a ka bochabela a Leoatle la Mediterranean ebe li feta Hloahloeng ea Sinai.
Ho latela The New Westminster Dictionary of the Bible, likoekoe “li fofa ka lebelo ebile e le ka bokhabane, ’me li nka monyetla ha moea o fokela moo li eang teng; empa ha o se o fokela hosele, kapa ha linonyana tsena li khathala ka lebaka la ho fofa nako e telele, kaofela ha tsona li ka oela fatše, moo li lulang li tsielehile.” Pele li tsoela pele ka leeto la tsona, li lokela ho lula moo letsatsi le le leng kapa a mabeli, kahoo ho bonolo hore litsomi li li tšoase. Mathoasong a lekholo la bo20 la lilemo, Egepeta e ne e romela nama ea likoekoe tse limilione tse tharo linaheng tse ling selemo le selemo.
Makhetlong a mabeli ao ka ’ona Baiseraele ba ileng ba feptjoa likoekoe, e ne e le nakong ea selemo. Le hoja likoekoe li ne li atisa ho feta tikolohong ea Sinai ka tsona linako tseo, ke Jehova ea entseng hore ‘moea o foke ka matla’ hore o khannele linonyana tsena kampong ea Baiseraele.—Numere 11:31.
(Exoda 16:32-34) Joale Moshe a re: “Lena ke lentsoe leo Jehova a le laetseng, ‘Bo tlatseng ka tekanyo ea omere e le ho hong ho lokelang ho bolokoa melokong eohle ea lona, e le hore ba bone bohobe boo ke entseng hore le bo je lefeelleng ha ke ne ke le ntša naheng ea Egepeta.’ ” 33 Kahoo Moshe a re ho Arone: “Nka nkho ’me ka har’a eona u tšele manna a tletseng omere u a behe ka pel’a Jehova e le ho hong ho lokelang ho bolokoa melokong eohle ea lona.” 34 Feela joalokaha Jehova a ne a laetse Moshe, Arone a a beha pel’a Bopaki e le ho hong ho lokelang ho bolokoa.
Lipotso Tse Tsoang ho Babali
Nakoana ka mor’a hore ba lopolloe Egepeta, Baiseraele ba ile ba qala ho korotla ka lijo. Kahoo Jehova o ile a ba fa manna. (Exoda 12:17, 18; 16:1-5) Nakong eo, Moshe o ile a laela Arone a re: “Nka nkho ’me ka har’a eona u tšele manna a tletseng omere u a behe ka pel’a Jehova e le ho hong ho lokelang ho bolokoa melokong eohle ea lona.” Tlaleho eo e re: “Feela joalokaha Jehova a ne a laetse Moshe, Arone a a beha pel’a Bopaki [e leng ka moo ho bolokoang litokomane tsa bohlokoa] e le ho hong ho lokelang ho bolokoa.” (Exoda 16:33, 34) Le hoja ho se na pelaelo ea hore Arone o ile a bokella manna ’me a a tšela ka nkhong nakong eo, nkho eo e ile ea behoa ka pel’a Bopaki ka mor’a hore Moshe a etse Areka ’me a behe matlapa ka har’a eona.
’Malo oa Bibele
(Exoda 16:1-18) Hamorao ba tloha Elime, ’me qetellong phutheho eohle ea bara ba Iseraele ea fihla lefeelleng la Sine, le pakeng tsa Elime le Sinai, ka letsatsi la leshome le metso e mehlano la khoeli ea bobeli ka mor’a hore ba tsoe naheng ea Egepeta. 2 Phutheho eohle ea bara ba Iseraele ea qala ho korotlela Moshe le Arone lefeelleng. 3 Bara ba Iseraele ba ’na ba re ho bona: “Hoja ra bolaoa ke letsoho la Jehova naheng ea Egepeta ha re ne re lutse pel’a lipitsa tsa nama, ha re ne re ja bohobe ho fihlela re khotše, hobane le re tlisitse lefeelleng lena hore phutheho ena eohle e bolaoe ke tlala.” 4 Joale Jehova a re ho Moshe: “Bonang! ke le nesetsa bohobe bo tsoang maholimong; sechaba se tla tsoa ’me e mong le e mong a nke ho mo lekaneng letsatsi le letsatsi, e le hore nka se leka hore na ebe se tla tsamaea molaong oa ka kapa che. 5 Ka letsatsi la botšelela se tla lokisa hoo se tla ho tlisa, ’me e tla ba habeli ho hoo se ntseng se ho nka letsatsi le letsatsi.” 6 Kahoo Moshe le Arone ba re ho bara bohle ba Iseraele: “Ka sebele ka shoalane le tla tseba hore ke Jehova ea le ntšitseng naheng ea Egepeta. 7 Hoseng le tla bona khanya ea Jehova, hobane o utloile ho korotlela ha lona Jehova. ’Me rona re eng hore le re korotlele?” 8 Moshe a tsoela pele: “Ho tla ba joalo ka shoalane ha Jehova a le fa nama hore le e je ’me hoseng a le fa bohobe ho fihlela le khotše, hobane Jehova o utloile ho mo korotlela ha lona. ’Me re eng? Ha le korotlele rona, empa le korotlela Jehova.” 9 Moshe a tsoela pele ho re ho Arone: “E-re ho phutheho eohle ea bara ba Iseraele, ‘Atamelang ka pel’a Jehova, hobane o utloile ho korotla ha lona.’ ” 10 Joale eare hang ha Arone a buile le phutheho eohle ea bara ba Iseraele, ba reteleha ’me ba sheba nģ’a lefeelleng, ’me bonang! khanya ea Jehova ea bonahala lerung. 11 Eaba Jehova o bua ka ho eketsehileng le Moshe, o re: 12 “Ke utloile ho korotla ha bara ba Iseraele. Bua le bona, u re, ‘Pakeng tsa lishoalane tse peli le tla ja nama ’me hoseng le tla khora bohobe; ’me ka sebele le tla tseba hore ke ’na Jehova Molimo oa lona.’ ” 13 Tumellanong le hoo ka shoalane likoekoe tsa qala ho hlaha ’me tsa koahela liahelo, ’me hoseng phoka e ne e letse ho potoloha liahelo. 14 Ka mor’a nako phoka e letseng ea fetoha mouoane ’me bonang! holim’a lefeella ho ne ho e-na le ntho e makhekhebu, e tšesaane joaloka serame holim’a lefatše. 15 Ha bara ba Iseraele ba e bona, ba qala ho buisana ba re: “Ke eng?” Etsoe ba ne ba sa tsebe hore na ke eng. Kahoo Moshe a re ho bona: “Ke bohobe boo Jehova a le fileng bona hore le bo je. 16 Lena ke lentsoe leo Jehova a le laetseng, ‘Nkang bo bong ba bona, e mong le e mong ka ho lekana ho ja ha hae. Le tla nka tekanyo ea omere bakeng sa motho ka mong ho ea ka palo ea meea eo e mong le e mong oa lona a nang le eona ka tenteng ea hae.’ ” 17 Eaba bara ba Iseraele ba qala ho etsa joalo; ba qala ho bo thonaka, ba bang ba bokella bo bongata ’me ba bang ba bokella bo bonyenyane. 18 Ha ba bo lekanya ka omere, ea neng a bokeletse bo bongata ha aa ka a ba le bo setseng ’me ea neng a bokeletse bo bonyenyane ha aa ka a ba le khaello. E mong le e mong a bo thonaka ka ho lekana ho ja ha hae.
LA 17-LA 23 AUGUST
MATLOTLO A TSOANG BIBELENG | EXODA 17-18
“Banna ba Ikokobelitseng ba Koetlisa ba Bang le ho ba Abela Mosebetsi”
(Exoda 18:17, 18) Mohoe oa Moshe a re ho eena: “Tsela eo u etsang ka eona ha e ntle. 18 Ruri u tla khathala, uena le sechaba sena se nang le uena, hobane mosebetsi ona ke mojaro o moholo haholo bakeng sa hao. U ke ke ua khona ho o etsa u le mong.
Moshe—O ne a le Lerato
Moshe o ne a rata Baiseraele ba habo. Ba ne ba tseba hore Jehova o ne a sebelisa Moshe ho tataisa batho ba hae, kahoo ba ne ba tlisa mathata a bona a fapa-fapaneng ho Moshe. Bibele e re: “Sechaba sa ’na sa ema ka pel’a Moshe ho tloha hoseng ho fihlela mantsiboea.” (Exoda 18:13-16) Nahana feela hore na e tlameha ebe Moshe o ne a khathala hakaakang, kaha o ne a qeta lihora tse ngata a mametse Baiseraele ha ba ntse ba rolela mathata a bona ho eena. Empa kaha Moshe o ne a rata batho, o ne a thabela ho ba thusa.
(Exoda 18:21, 22) Empa u lokela ho khetha har’a sechaba sohle banna ba nang le bokhoni, ba tšabang Molimo, banna ba tšepahalang, ba hloileng phaello e sa lokang; ’me u ba behe hore ba se okamele e le balaoli ba ba likete, balaoli ba ba mashome a mahlano le balaoli ba ba mashome. 22 Ba ahlole sechaba ketsahalong e ’ngoe le e ’ngoe e loketseng; ’me nyeoe e ’ngoe le e ’ngoe e kholo ba e tlise ho uena, empa nyeoe e ’ngoe le e ’ngoe e nyenyane ba e sebetse e le baahloli. Kahoo ipebofaletse, ’me ba jare mojaro le uena.
Ho Tšepa ba Bang ke Habohlokoa Hore Motho a Thabele Bophelo
Bao e ne e le banna ba ileng ba bonahatsa litšobotsi tse itseng tsa bomolimo pele ba khetheloa maemo ao a ho tšeptjoa. Ba ne ba se ba ipakile hore ba tšaba Molimo; ba ne ba hlompha ’Mopi ka ho loketseng ’me ba tšaba ho mo khopisa. Ho e mong le e mong ho ne ho hlakile hore banna bana ba ne ba etsa sohle se matleng a bona ho boloka melao ea Molimo. Ba ne ba hloile phaello e sa lokang, e leng se neng se bontša hore ba na le matla a boitšoaro a neng a ka ba thibela ho senngoa ke matla. Ba ne ba ke ke ba tsoa batho tlaase e le hore ba ntšetse pele lithahasello tsa bona kapa tsa beng ka bona kapa metsoalle.
(Exoda 18:24, 25) Kapele-pele Moshe a mamela lentsoe la mohoe oa hae ’me a etsa sohle seo a se buileng. 25 Moshe a qala ho khetha banna ba nang le bokhoni har’a Baiseraele bohle ’me a ba fa maemo hore e be lihlooho tsa sechaba, e be balaoli ba ba likete, balaoli ba ba makholo, balaoli ba ba mashome a mahlano le balaoli ba ba mashome.
Botšepehi bo Tataisa ba Lokileng
Moshe le eena o ne a inyenyefatsa a bile a ikokobetsa. Ha a ne a khathetse ka lebaka la ho rarolla mathata a ba bang, mohoe oa hae, Jethro, o ile a etsa tlhahiso ea tharollo e sebetsang: Hore a arolelane boikarabelo le banna ba bang ba tšoanelehang. A lemoha mefokolo ea hae, Moshe ka bohlale o ile a amohela tlhahiso ena. (Exoda 18:17-26; Numere 12:3) Monna ea inyenyefatsang ha a leqe ho abela ba bang matla, ebile ha a tšabe hore ka tsela e itseng o lahleheloa ke matla ka ho abela banna ba bang ba tšoanelehang boikarabelo bo loketseng. (Numere 11:16, 17, 26-29) Ho e-na le hoo, o labalabela ho ba thusa hore ba hatele pele moeeng. (1 Timothea 4:15) Na le rona ha rea lokela ho ba joalo?
Batlisisa Matlotlo a Patiloeng
(Exoda 17:11-13) Eitse hang ha Moshe a phahamisa letsoho, Baiseraele ba ba phahamela; empa hang ha a theola letsoho, Baamaleke ba ba phahamela. 12 Ha matsoho a Moshe a se a khathetse, joale ba nka lejoe ’me ba le beha ka tlas’a hae, eaba o lula holim’a lona; Arone le Hure ba tšehetsa matsoho a hae, e mong ka lehlakoreng lena ’me e mong ka lehlakoreng lane, hoo matsoho a hae a ileng a ema nģa e le ’ngoe ho fihlela letsatsi le likela. 13 Kahoo Joshua a hlola Amaleke le sechaba sa hae ka bohale ba sabole.
‘Matsoho a Hao a se ke a Tepella’
14 Arone le Hure ba ile ba tšehetsa matsoho a Moshe nakong ea ntoa. Le rona re ka batla litsela tsa ho tšehetsa le ho thusa ba bang ka phuthehong. Re ka thusa bo-mang? Re ka thusa ba seng ba holile, ba kulang, ba hanyetsoang ke ba malapa, ba jeoang ke bolutu, kapa ba shoetsoeng ke baratuoa ba bona. Re ka boetse ra matlafatsa bacha bao lefatše le ba susumelletsang hore ba etse lintho tse fosahetseng kapa ba hahamalle thuto e phahameng haesita le maruo. (1 Bathes. 3:1-3; 5:11, 14) Batla litsela tseo u ka bontšang ba bang hore u ba thahasella e le kannete ha le le Holong ea ’Muso, tšebeletsong ea tšimo, ha le le lijong kapa ha le ntse le buisana ka fono.
(Exoda 17:14) Joale Jehova a re ho Moshe: “Ngola sena e le sehopotso bukeng ’me u bue ka sona moo Joshua a ntseng a utloa, ‘Ke tla hlakola ho hopoloa ha Amaleke ka ho feletseng tlas’a maholimo.’ ”
it-1-E 406
Libuka Tsa Bibele
Ka lebaka la bopaki bo teng, ha ho pelaelo hore libuka tseo Moshe a li ngotseng li bululetsoe ke Molimo, lia halalela ebile li tataisetsa batho borapeling bo nepahetseng. Moshe ha se eena ea ikhethetseng hore e be moeta-pele le molaoli oa Baiseraele. Ebile qalong o ile a hana ha ho thoe a etse joalo. (Ex 3:10, 11; 4:10-14) Molimo o ile a fa Moshe matla a hore a etse mehlolo e meholo, hoo esita le baprista ba Faro ba sebelisang boselamose ba ileng ba qobelleha ho lumela hore lintho tseo Moshe a neng a li etsa li tsoa ho Molimo. (Ex 4:1-9; 8:16-19) Kahoo Moshe ha se eena ea iketselitseng qeto ea hore e tla ba mongoli le sebui se hloahloa. Empa kaha o ne a mamela litaelo tsa Molimo, o ile a mo fa moea o halalelang e le hore a ka khona ho bua le ho ngola likarolo tse ling tsa Bibele.—Ex 17:14.
’Malo oa Bibele
(Exoda 17:1-16) Phutheho eohle ea bara ba Iseraele ea tloha lefeelleng la Sine ka mekhahlelo, eo ba ileng ba e etsa ho ea ka taelo ea Jehova, ’me ba qala ho hloma liahelo Refidime. Empa ho ne ho se metsi ao sechaba se ka a noang. 2 Sechaba sa qala ho qabana le Moshe ’me sa re: “Re fe metsi re noe.” Empa Moshe a re ho sona: “Ke hobane’ng ha le qabana le ’na? Ke hobane’ng ha le ntse le leka Jehova?” 3 Sechaba sa tsoela pele ho nyoreloa metsi moo, ’me sechaba sa ’na sa korotlela Moshe sa re: “Ke hobane’ng ha u re ntšitse Egepeta hore u bolaee rona le bara ba rona le liphoofolo tsa rona tse ruiloeng ka lenyora?” 4 Qetellong Moshe a hoeletsa ho Jehova, a re: “Ke tla etsa’ng ka sechaba see? Ho se ho se hokae ’me se tla ntlepetsa ka majoe!” 5 Joale Jehova a re ho Moshe: “Fetela ka pel’a sechaba ’me u nke banna ba bang ba baholo ba Iseraele le molamu oa hao oo u ileng ua otla Noka ea Nile ka oona. O tšoare ka letsoho ’me u tsamaee. 6 Bona! Ke eme ka pel’a hao moo lefikeng la Horebe. U otle lefika, ’me metsi a tla tsoa ho lona, ’me sechaba se a noe.” Ka mor’a moo Moshe a etsa joalo mahlong a banna ba baholo ba Iseraele. 7 Kahoo a reha sebaka seo lebitso la Masa le Meriba, ka lebaka la ho qabana ha bara ba Iseraele le ka lebaka la ho leka ha bona Jehova, ba re: “Na Jehova o har’a rona kapa che?” 8 Baamaleke ba tla ’me ba loantša Baiseraele Refidime. 9 Eaba Moshe o re ho Joshua: “Re khethele banna ’me u tsoe, u loantše Baamaleke. Hosasane ke tla ema holim’a leralla, ke tšoere molamu oa Molimo oa ’nete letsohong.” 10 Joale Joshua a etsa feela joalokaha Moshe a ne a mo boleletse, e le hore a loantše Baamaleke; ’me Moshe, Arone le Hure ba nyolohela holim’a leralla. 11 Eitse hang ha Moshe a phahamisa letsoho, Baiseraele ba ba phahamela; empa hang ha a theola letsoho, Baamaleke ba ba phahamela. 12 Ha matsoho a Moshe a se a khathetse, joale ba nka lejoe ’me ba le beha ka tlas’a hae, eaba o lula holim’a lona; Arone le Hure ba tšehetsa matsoho a hae, e mong ka lehlakoreng lena ’me e mong ka lehlakoreng lane, hoo matsoho a hae a ileng a ema nģa e le ’ngoe ho fihlela letsatsi le likela. 13 Kahoo Joshua a hlola Amaleke le sechaba sa hae ka bohale ba sabole. 14 Joale Jehova a re ho Moshe: “Ngola sena e le sehopotso bukeng ’me u bue ka sona moo Joshua a ntseng a utloa, ‘Ke tla hlakola ho hopoloa ha Amaleke ka ho feletseng tlas’a maholimo.’ ” 15 Moshe a haha aletare ’me a e reha lebitso la Jehova-nisi, 16 a re: “Kahobane letsoho le khahlanong le terone ea Jah, Jehova o tla loantša Amaleke ho tloha molokong o mong ho ea ho o mong.”
LA 24-LA 30 AUGUST
MATLOTLO A TSOANG BIBELENG | EXODA 19-20
“Melao e Leshome e u Ama Joang?”
(Exoda 20:3-7) U se ke ua ba le melimo e meng khahlanong le sefahleho sa ka. 4 “U se ke ua iketsetsa setšoantšo se betliloeng kapa sebopeho se tšoanang le ntho leha e le efe e holimo maholimong kapa e tlaase lefatšeng kapa e metsing ka tlas’a lefatše. 5 U se ke ua li inamela kapa ua hlohlelletsoa hore u li sebeletse, hobane ’na Jehova Molimo oa hao ke Molimo ea batlang boinehelo bo khethehileng, ea tlisang kotlo bakeng sa liphoso tsa bo-ntate ho bara, ho moloko oa boraro le ho moloko oa bone, oa ba ntlhoileng; 6 empa ke bontša mosa o lerato ho isa molokong oa sekete oa ba nthatang ’me ba boloka litaelo tsa ka. 7 “U se ke ua sebelisa lebitso la Jehova Molimo oa hao ka tsela eo e seng ea bohlokoa, etsoe Jehova a ke ke a tlohela ea sebelisang lebitso la hae ka tsela eo e seng ea bohlokoa a sa fuoe kotlo.
Melao e Leshome e Bolela’ng ho Uena?
Melao ea pele e mene e totobatsa boikarabelo ba rona ho Jehova. (Oa Pele) Ke Molimo o ntseng o batla boinehelo bo ikhethang. (Mattheu 4:10) (Oa Bobeli) Ha ho le ea mong ho barapeli ba hae ea lokelang ho sebelisa litšoantšo. (1 Johanne 5:21) (Oa Boraro) Ho sebelisa ha rona lebitso la Molimo e lokela ho ba ho loketseng le ho fanang ka seriti, le ka mohla e se be ho hlomphollang. (Johanne 17:26; Ba-Roma 10:13) (Oa Bone) Bophelo bohle ba rona bo lokela ho likoloha linthong tse halalelang. Sena se re nolofaletsa ho phomola, kapa ‘ho ba le sabatha,’ tseleng ea ho inka re lokile.—Ba-Heberu 4:9, 10.
(Exoda 20:8-11) “Ka ho hopola letsatsi la sabatha hore u le nke le halalela, 9 u tla etsa tšebeletso ’me u etse mosebetsi oa hao ka matsatsi a tšeletseng. 10 Empa letsatsi la bosupa ke sabatha ea Jehova Molimo oa hao. U se ke ua etsa mosebetsi leha e le ofe, uena leha e le mora oa hao kapa morali oa hao, lekhoba la hao kapa lekhabunyane la hao kapa phoofolo ea hao e ruiloeng kapa mojaki oa hao ea ka har’a liheke tsa hao. 11 Etsoe ka matsatsi a tšeletseng Jehova o ile a etsa maholimo le lefatše, leoatle le ntho e ’ngoe le e ’ngoe e ho tsona, ’me a phomola ka letsatsi la bosupa. Ke ka lebaka leo Jehova a ileng a hlohonolofatsa letsatsi la sabatha ’me a le halaletsa.
(Exoda 20:12-17) “Hlompha ntat’ao le ’m’ao e le hore matsatsi a hao a ka ba malelele holim’a lefatše leo Jehova Molimo oa hao a u fang lona. 13 “U se ke ua bolaea. 14 “U se ke ua feba. 15 “U se ke ua utsoa. 16 “U se ke ua paka ka bohata ha u le paki khahlanong le oa heno. 17 “U se ke ua lakatsa ntlo ea oa heno. U se ke ua lakatsa mosali oa oa heno, leha e le lekhoba la hae kapa lekhabunyane la hae kapa poho ea hae kapa esele ea hae kapa ntho leha e le efe ea oa heno.”
Melao e Leshome e Bolela’ng ho Uena?
(Oa Bohlano) Ho utloa ha bana batsoali ba bona ho tsoela pele ho sebeletsa e le tšiea ea bonngoe ba lelapa, ho tlisang mahlohonolo a Jehova. ’Me ke tšepo e tsotehang hakaakang eo ‘molao oo oa pele o nang le pallo’ o fanang ka eona! Hase feela hore “u tle u be le lehlohonolo” empa ke hore hape “u phele halelele lefatšeng.” (Ba-Efese 6:1-3) Erekaha joale re phela “mehleng ea qetello” ea tsamaiso ena e khopo e teng, kutlo e joalo ea bomolimo e fa batho ba bacha tebello ea ho se hlole ba e-shoa.—2 Timothea 3:1; Johanne 11:26.
Lerato ho moahisani oa rona le tla re thibela ho ba ntša kotsi ka liketso tsa bokhopo tse kang (Oa Botšelela) ho bolaea, (Oa Bosupa) ho feba, (Oa Borobeli) ho utsoa, le (Oa Borobong) ho etsa lipolelo tsa bohata. (1 Johanne 3:10-12; Ba-Heberu 13:4; Ba-Efese 4:28; Mattheu 5:37; Liproverbia 6:16-19) Empa ho thoe’ng ka merero ea rona? Molao (Oa Leshome), o khahlanong le ho lakatsa lintho tsa ba bang, o re hopotsa hore Jehova o hloka hore boikemisetso ba rona e be bo lokileng mahlong a hae ka mehla.—Liproverbia 21:2.
Batlisisa Matlotlo a Patiloeng
(Exoda 19:5, 6) Joale haeba le tla mamela lentsoe la ka ka tieo ’me ruri le boloke selekane sa ka, joale ka sebele le tla fetoha thepa ea ka e khethehileng har’a lichaba tse ling tsohle, hobane lefatše lohle ke la ka. 6 Le tla fetoha ’muso oa baprista le sechaba se halalelang ho ’na.’ Ana ke mantsoe ao u tla a bolella bara ba Iseraele.”
it-2-E 687 ¶1-2
Moprista
Boprista ba Bokreste. Jehova o ile a tšepisa Baiseraele hore hafeela ba ka boloka selekane sa hae, ba ne ba “tla fetoha ’muso oa baprista le sechaba se halalelang” ho eena. (Ex 19:6) Leha ho le joalo, boprista ba leloko la Arone bo ne bo lokela ho tsoela pele ho fihlela moprista ea moholo, ea neng a emeloa ke baprista bao a fihla. (Heb 8:4, 5) Boprista ba Arone bo ne bo tla tsoela pele bo le teng ho fihlela Selekane sa Molao se fela ’me joale ho qala selekane se secha. (Heb 7:11-14; 8:6, 7, 13) Qalong, Jehova o ne a lokiselitse hore e be Baiseraele feela bao e neng e tla ba baprista ba tla sebeletsa ’Musong oa hae, empa ha nako e ntse e ea, o ile a kenyeletsa le Balichaba.—Lik 10:34, 35; 15:14; Bar 10:21.
Har’a sechaba sohle sa Bajuda, ke batho ba seng bakae feela ba ileng ba amohela Jesu Kreste, eaba ba bang bona ba hloleha ho ba baprista ba sebele ba ’Muso oa Molimo le ho ba sechaba se halalelang. (Bar 11:7, 20) Kaha joale Baiseraele ha baa ka ba tšepahala ho Molimo, o ile a sebelisa moprofeta Hosea hore a ba eletse lilemo tse mashome pele ho moo a re: “Kahobane u lahlile tsebo, le ’na ke tla u lahla hore u se ke ua sebeletsa u le moprista ho ’na; ’me kahobane u ntse u lebala molao oa Molimo oa hao, le ’na ke tla lebala bara ba hao.” (Ho 4:6) Ka tsela e tšoanang, Jesu o ile a re ho baeta-pele ba Bajuda: “ ’Muso oa Molimo o tla nkuoa ho lona ’me o fuoe sechaba se hlahisang litholoana tsa oona.” (Mat 21:43) Leha ho le joalo, ha Jesu a le lefatšeng o ile a hlokomela hore boprista ba leloko la Arone bo ntse bo tsoela pele, ke kahoo eitseng haa qeta ho folisa batho ba neng ba e-na le lepera a ileng a re ba ee ho baprista ebe ba etsa mahlabelo.—Mat 8:4; Mar 1:44; Lu 17:14
(Exoda 20:4, 5) U se ke ua iketsetsa setšoantšo se betliloeng, leha e le setšoantšo se le seng sa tse holimo maholimong, leha e le sa tse tlase lefatšeng, leha e le sa tse metsing ka tlase ho lefatše. 5 U se ke ua li khumamela, u se ke ua li sebeletsa: hobane ’na Jehova, Molimo oa hao, ke Molimo o boulelang, o otlang bana ka bokhopo ba batsoali ba bona ho isa molokong oa boraro le oa bone oa ba ntlhoeang;
Lintlha-kholo Tsa Buka ea Exoda
20:5—Ho tla joang hore ebe Jehova o tlisa “kotlo bakeng sa liphoso tsa bo-ntate” ho meloko e tlang? Ha motho a se a holile, o ahloloa ho latela boitšoaro le boikutlo ba hae. Empa ha sechaba sa Iseraele se ne se fetohela borapeling ba litšoantšo, meloko e neng e tla latela ea sechaba sena e ile ea latsoa liphello tse babang tsa bofetoheli boo. Esita le Baiseraele ba tšepahalang ba ile ba utloa liphello tsa bona, kaha bohlakana-hloana ba sechaba sena ba lintho tsa bolumeli bo ile ba ba thatafaletsa ho lula ba tšepahala.
’Malo oa Bibele
(Exoda 19:1-19) Ka khoeli ea boraro ka mor’a hore bara ba Iseraele ba tsoe naheng ea Egepeta, ka letsatsi lona leo, ba fihla lefeelleng la Sinai. 2 Ba tloha Refidime ’me ba ea lefeelleng la Sinai ba hloma liahelo lefeelleng; ’me Baiseraele ba hloma liahelo moo ka pel’a thaba. 3 Moshe a nyolohela ho Molimo oa ’nete, ’me Jehova a qala ho mo bitsa a le thabeng, a re: “Sena ke seo u tla se bolella ntlo ea Jakobo le ho se bolella bara ba Iseraele, 4 ‘Le bone seo ke se entseng ho Baegepeta, e le hore nka le jara ka mapheo a lintsu ka le tlisa ho ’na. 5 Joale haeba le tla mamela lentsoe la ka ka tieo ’me ruri le boloke selekane sa ka, joale ka sebele le tla fetoha thepa ea ka e khethehileng har’a lichaba tse ling tsohle, hobane lefatše lohle ke la ka. 6 Le tla fetoha ’muso oa baprista le sechaba se halalelang ho ’na.’ Ana ke mantsoe ao u tla a bolella bara ba Iseraele.” 7 Kahoo Moshe a tla eaba o bitsa banna ba baholo ba sechaba ’me o beha ka pel’a bona mantsoe ’ohle ao Jehova a neng a mo laetse ’ona. 8 Ka mor’a moo sechaba sohle sa araba ka tumellano sa re: “Sohle seo Jehova a se buileng re ikemiselitse ho se etsa.” Kapele-pele Moshe a khutlisetsa mantsoe a sechaba ho Jehova. 9 Eaba Jehova o re ho Moshe: “Bona! Ke tla ho uena ka leru le letšo, e le hore sechaba se utloe ha ke bua le uena, le hore se behe tumelo le ho uena ho isa nakong e sa lekanyetsoang.” Joale Moshe a tlalehela Jehova mantsoe a sechaba. 10 Jehova a tsoela pele ho re ho Moshe: “E-ea ho sechaba, ’me u se halaletse kajeno le hosasane, ’me se hlatsoe liaparo tsa sona. 11 Se itokisetse letsatsi la boraro, hobane ka letsatsi la boraro Jehova o tla theohela holim’a Thaba ea Sinai ka pel’a mahlo a sechaba sohle. 12 U sehele sechaba meeli ka hohle, u re, ‘Itebeleng hore le se ke la nyolohela thabeng, ’me le se ke la ama moeli oa eona. Ka sebele mang kapa mang ea amang thaba o tla bolaoa. 13 Ha ho letsoho le tla mo ama, hobane ka sebele o tla tlepetsoa ka majoe kapa ka sebele o tla fuloa ka metsu. Ebang ke phoofolo kapa motho, a ke ke a phela.’ Ha ho letsoa lenaka la pheleu ba nyolohele thabeng.” 14 Joale Moshe a theoha thabeng a ea ho sechaba, ’me a qala ho halaletsa sechaba; eaba se hlatsoa liaparo tsa sona tsa ka holimo. 15 Tumellanong le hoo a re ho sechaba: “Itokiseng ka matsatsi a mararo. Le se ke la atamela mosali.” 16 Ka letsatsi la boraro ha e e-ba hoseng lialuma le mahalima tsa qala ho ba teng, le leru le leholo holim’a thaba le molumo o moholo haholo oa lenaka, hoo sechaba sohle se liahelong se ileng sa qala ho thothomela. 17 Joale Moshe a ntša sechaba liahelong ho ea kopana le Molimo oa ’nete, ’me sa qala ho ema botlaaseng ba thaba. 18 Thaba ea Sinai ea kubella mosi ka hohle, ka lebaka la hore Jehova o ne a theohetse ho eona ka mollo; mosi oa eona oa ’na oa nyoloha joaloka mosi oa sebopi, ’me thaba eohle e ne e thothomela haholo. 19 Ha molumo oa lenaka o ntse o e-ba matla haholo, Moshe a qala ho bua, ’me Molimo oa ’nete a qala ho mo araba ka lentsoe.
LA 31 AUGUST–LA 6 SEPTEMBER
MATLOTLO A TSOANG BIBELENG | EXODA 21-22
“Nka Bophelo bo le Bohlokoa Joaloka Jehova”
(Exoda 21:20) “Haeba motho a otla lekhoba la hae kapa lekhabunyane la hae ka molamu ’me le shoela letsohong la hae, ruri le tla pheteletsoa.
it-1-E 271
Ho Shapa
Moheberu ea neng a na le lekhoba, o ne a lumeletsoe hore a ka shapa lekhoba la hae la monna kapa la mosali ka thupa haeba le sa mo mamele kapa e le lerabele. Empa haeba lekhoba le ne le ka shoa ka lebaka la ho shapuoa, mong’a lona o ne a tla fuoa kotlo. Empa haeba lekhoba le ne le ka shoa ka mor’a letsatsi kapa a mabeli ka mor’a hore le shapuoe, e ne e le bopaki ba hore mong’a lona o ne a se na morero oa ho le bolaea. Molao o ne o lumella mong’a lekhoba ho shapa lekhoba la hae kaha o le rekile ka “chelete ea hae.” Kaha lekhoba e ne e le thepa ea bohlokoa ho mong’a lona, o ne a ke ke a batla hore a lahleheloe ke thepa eo. Hape haeba lekhoba le ne le ka shoa ka mor’a letsatsi kapa ho feta, ho ne ho ke ke ha hlaka hantle hore na le shoele ka lebaka la ho shapuoa kapa ka lebaka la mathata a mang. Mong’a lekhoba o ne a ke ke a fumana kotlo haeba lekhoba le shoa ka mor’a letsatsi kapa a mabeli le shapuoe.—Ex 21:20, 21.
(Exoda 21:22, 23) “Haeba banna ba loana ’me ba ntša mosali oa moimana kotsi ’me bana ba hae ba fela ba tsoa empa ho sa hlahe kotsi e bolaeang, ruri o tla lefisoa litšenyehelo ho ea ka seo mong’a mosali eo a tla mo batla sona; a fane ka sona ka baahloli. 23 Empa haeba ho ka hlaha kotsi e bolaeang, joale u tla fana ka moea bakeng sa moea,
Na Joaloka Molimo U Nka Bophelo e le ba Bohlokoa?
16 Esita le bophelo ba ngoana ea e-s’o tsoaloe ke ba bohlokoa ho Molimo. Iseraele ea boholo-holo, haeba motho a ne a ka lematsa mosali oa moimana eaba mosali eo oa shoa kapa lesea la hae lea shoa, Molimo o ne a nka hore motho ea molato ke ’molai, ’me motho eo o ne a tlameha ho lefa “moea bakeng sa moea.” (Exoda 21:22, 23) Joale, nahana hore na Jehova o ikutloa joang ha a bona masea a se nang palo, a e-s’o tsoaloe, a bolaoa ka boomo selemo le selemo ka ho ntšoa ha limpa, a mangata a ’ona a bolaoa ka lebaka la boikhabi le boitšoaro bo bobe.
(Exoda 21:28, 29) “Haeba poho e hlaba monna kapa mosali ’me a shoa, ruri poho eo e lokela ho tlepetsoa ka majoe, empa nama ea eona e se ke ea jeoa; mong’a poho o lokolohile kotlong. 29 Empa haeba pele ho moo poho eo e ne e tloaetse ho hlaba ’me mong’a eona a filoe temoso empa a sa ka a e lebela, ’me e bolaile monna kapa mosali, poho e lokela ho tlepetsoa ka majoe ’me le mong’a eona o lokela ho bolaoa.
Jehova o Batla Hore ‘U Sireletsehe’
Likotlo tsa Molao ona li ne li boetse li sebetsa tabeng ea likotsi tse bakoang ke liphoofolo tse ruuoang. Haeba poho e ne e ka hlaba motho ea ba ea mo bolaea, mong’a eona o ne a lokela ho bolaea poho eo e le hore ho sireletsoe batho ba bang. Kaha o ne a ke ke a ja nama ea eona kapa a e rekisetsa batho ba bang hore ba e je, ho bolaea phoofolo eo e ne e le tahlehelo e kholo. Empa ho ne ho etsoa joang haeba mong’a poho a ne a sa e behe leihlo ka mor’a hore e lematse motho? Haeba poho eona eo e ne e ka bolaea motho hamorao, poho le mong’a eona ba ne ba bolaoa. Molao oo o ne o etsa hore mang kapa mang ea neng a sa hlokomele liphoofolo tsa hae a nahane ka thata.—Ex. 21:28, 29.
Batlisisa Matlotlo a Patiloeng
(Exoda 21:5, 6) Empa haeba ka ho tsitlella lekhoba le re, ‘Ruri ke rata mong’a ka, mosali oa ka le bara ba ka; ha ke batle ho tsamaea joaloka ea lokolotsoeng,’ 6 joale mong’a lona a le atametse ho Molimo oa ’nete ’me a le emise pel’a lemati kapa kosene ea monyako; mong’a lona a le phunye tsebe ka elese, ’me le fetohe lekhoba la hae ho isa nakong e sa lekanyetsoang.
Ke Hobane’ng ha U Lokela ho Inehela ho Jehova?
4 Boinehelo ba Bokreste hase taba e nyenyane. Hase boitlamo feela tjee. Joale, ebe ho inehela ho re tsoela molemo joang? Ka mohlala, a re ke re tšohleng hore na boitlamo bo tlisa melemo joang likamanong tsa batho. Mohlala o mong ke setsoalle. E le hore u rue molemo oa ho ba le motsoalle, u tlameha ho amohela hore setsoalle se tsamaea le boikarabelo. Boitlamo boa ameha tabeng ena—u ikutloa u tlameha ho tsotella motsoalle oa hao. Setsoalle se seng se ikhethang ka ho fetisisa se hlalositsoeng ka Bibeleng, ke sa Davida le Jonathane. Ba bile ba hlaba selekane sa setsoalle. (Bala 1 Samuele 17:57; 18:1, 3.) Le hoja setsoalle sa mofuta oo se sa ata, hangata setsoalle sea tiea ha metsoalle e itlamme e mong ka e mong.—Liprov. 17:17; 18:24
5 Molao oo Molimo a neng a o file Baiseraele o hlalosa kamano e ’ngoe eo ho eona batho ba ileng ba rua molemo ka hore ebe ba ile ba etsa boitlamo. Haeba lekhoba le ne le batla tšireletso ea hore le se ke la tloha ha mong’a lona ea lokileng, lona le mong’a lona ba ne ba lokela ho etsa tumellano ea mocha-o-chele le e ba tlamang. Molao o re: “Haeba ka ho tsitlella lekhoba le re, ‘Ruri ke rata mong’a ka, mosali oa ka le bara ba ka; ha ke batle ho tsamaea joaloka ea lokolotsoeng,’ joale mong’a lona a le atametse ho Molimo oa ’nete ’me a le emise pel’a lemati kapa kosene ea monyako; mong’a lona a le phunye tsebe ka elese, ’me le fetohe lekhoba la hae ho isa nakong e sa lekanyetsoang.”—Ex. 21:5, 6.
(Exoda 21:14) Haeba motho a halefela oa habo ho isa ntlheng ea hore a mo bolaee ka bolotsana, u tla mo tlosa aletareng ea ka hore a shoe.
it-1-E 1143
Lenaka
E ka ’na eaba tlaleho e ho Exoda 21:14 e bontša hore le moprista o ne a ka bolaoa haeba a bolaile motho. Hape, ho tšoara manaka a aletare ho ne ho ke ke ha sireletsa motho hore a bolaoe haeba feela a bolaile motho ka boomo.—Bapisa le 1Ma 2:28-34.
’Malo oa Bibele
(Exoda 21:1-21) “Tsena ke liqeto tsa boahloli tseo u tla li beha ka pel’a bona: 2 “Haeba u reka lekhoba la Moheberu, e tla ba lekhoba ka lilemo tse tšeletseng, empa ka sa bosupa le tla tsoa joaloka le lokolotsoeng ntle ho tefiso. 3 Haeba le kene le le leng, le tla tsoa le le leng. Haeba le e-na le mosali, joale mosali oa lona o tla tsoa le lona. 4 Haeba mong’a lona a le file mosali ’me a le tsoaletse bara kapa barali, mosali le bana ba lona e tla ba ba mong’a lona ’me le tla tsoa le le leng. 5 Empa haeba ka ho tsitlella lekhoba le re, ‘Ruri ke rata mong’a ka, mosali oa ka le bara ba ka; ha ke batle ho tsamaea joaloka ea lokolotsoeng,’ 6 joale mong’a lona a le atametse ho Molimo oa ’nete ’me a le emise pel’a lemati kapa kosene ea monyako; mong’a lona a le phunye tsebe ka elese, ’me le fetohe lekhoba la hae ho isa nakong e sa lekanyetsoang. 7 “Haeba monna a rekisa morali oa hae hore e be lekhabunyane, a ke ke a tsoa ka tsela eo makhoba a tsoang ka eona. 8 Haeba a sa khahlise mahlong a mong’a hae hoo a sa mo khetheng hore a fetohe serethe empa a etsa hore a lopolloe, a ke ke a ba le tokelo ea ho mo rekisetsa basele ha a sebetsana le eena ka bolotsana. 9 Haeba a mo khethela mora oa hae, o tla mo etsa ho ea ka tokelo e loketseng ea barali. 10 Haeba a ka inkela mosali e mong, lintho tsa hae tsa ho iphelisa, liaparo tsa hae le tokelo ea hae ea lenyalo li se ke tsa fokotsoa. 11 Haeba a ke ke a mo fa lintho tsena tse tharo, joale a tsoe mahala, ntle ho chelete. 12 “Ea otlang motho hoo a bileng a shoang ruri o tla bolaoa. 13 Empa haeba motho a sa lalla ’me Molimo oa ’nete a lumella hore ho etsahale letsohong la hae, joale ke u lokisetsa sebaka seo a tla balehela ho sona. 14 Haeba motho a halefela oa habo ho isa ntlheng ea hore a mo bolaee ka bolotsana, u tla mo tlosa aletareng ea ka hore a shoe. 15 Ea otlang ntat’ae le ’m’ae ruri o tla bolaoa. 16 “Ea koetelang motho ’me a mo rekisa kapa a fumanoa letsohong la hae ruri o tla bolaoa. 17 “Ea rohakang ntat’ae le ’m’ae ruri o tla bolaoa. 18 “Haeba batho ba tsekisana ’me e mong a otla oa habo ka lejoe kapa ka mohoma ’me a sa shoe empa a robala betheng ea hae; 19 haeba a ka ema ’me a ea ka ntle ka setšehetso sa hae, joale ea mo otlileng o tla lokoloha kotlong; o tla etsa puseletso feela bakeng sa nako e lahlehileng mosebetsing oa eo ho fihlela a etsa hore a fole ka ho feletseng. 20 “Haeba motho a otla lekhoba la hae kapa lekhabunyane la hae ka molamu ’me le shoela letsohong la hae, ruri le tla pheteletsoa. 21 Leha ho le joalo, haeba le lieha ka letsatsi kapa ka matsatsi a mabeli, le se ke la pheteletsoa, hobane ke chelete ea hae.