Ho Ntša Mpa—Le “Mohloli oa Bophelo”
KAJENO, ka tsoelopele ea boqapi ba mahlale, lingaka li khona ho bolela habonolo bong ba lesea le hōlang ka pōpelong. Empa ke mang ea ka bolelang botho ba lona? Ke mang ea ka bonang matla a lona a kamoso joaloka motho ea phelang? (Genese 2:7) Ke Jehova Molimo feela, hobane ke eena “mohloli oa bophelo.” (Pesaleme ea 36:9, NW) Hlokomela mehlala e latelang ea Mangolo.
Melao ea bopatriaka ea lefa e ne e nea ngoana oa letsibolo tokelo ea pele. Leha ho le joalo, ha Rebeka, mosali oa Isaaka, a ne a emola mafahla, Molimo oa ’molella hore: “E moholo o tla sebeletsa e monyenyane.” Bophelo ba bana ba bona ba babeli, Esau le Jakobo, ba tiisa hore Jehova o tsebile botho ba bona nako e telele pele ba tsoaloa.—Genese 25:22, 23.
Makholo a lilemo hamorao, lengeloi la bolella Zakaria moprista hore mosali oa hae, Elizabetha, o tla ba le mora ea tla bitsoa Johanne. Ebile tokelo ho mora enoa, eo hamorao a tsebiloeng e le Johanne Mokolobetsi, ho lokisetsa Jesu, Messia, tsela. Boikokobetso ba monahano bo ne bo hlokahala bakeng sa mosebetsi ona, joalokaha Molimo o tsebile seo hantle.—Luka 1:8-17.
Lesea le Ntseng le Hōla ka Pōpelong—Le Bohlokoa Hakae?
bMorena Davida o lumetse: ‘Uena [Jehova] o mpolokile ke patehile ka mpeng ea ’mè.... Mahlo a hao a bone le qaleho ea ka, ’me likarolo tsohle tsa eona li ile tsa ngoloa bukeng ea hao.’ Ho bile joalo ka e mong le e mong oa rōna.—Pesaleme ea 139:13-16, NW.
Kemolo e ’ngoe le e ’ngoe ea motho e bohlokoa ho “mohloli oa bophelo,” Jehova Molimo. Molao oa Moshe o hlakisa bohlokoa ba sena ho Exoda 21:22, 23, NW. “Haeba ho etsahala hore banna ba loane ’me ba ntše mosali oa moimana kotsi..., haeba ho ka hlaha kotsi e isang lefung, ke moo u tla lefa moea ka moea.” Liphetolelo tse ling tsa Bibele li etsa hore ho bonahale e se e eka molaong ona taba-taba e ne e le se etsahallang ’mè e seng lesea le ka pōpelong. Leha ho le joalo, temana ea mathomo ea Seheberu, e bua ka kotsi ea lefu la ’mè kapa ngoana ea ka pōpelong.
Monahano oa Bakreste ba Pele
Kamor’a lefu la baapostola ba Jesu Kreste lekholong la pele la lilemo, batho ba bangata ba eketsa lithuto tsa bona. Bangoli bao ba ne ba sa bululeloa joaloka bangoli ba Bibele, empa litlaleho tsa bona lia thahasellisa kaha li bontša maikutlo a bolumeli a neng a atile tabeng ena ea bohlokoa. Litemana tse ’maloa tse qotsitsoeng ke tsena.
The Letter of Barnabas, khaolo 19:5 (C.100-132 C.E.)
“U se ke ua bolaea lesea ka ho ntša mpa; kapa ho le bolaea kamor’a tsoalo.”
The Didache, kapa The Teaching of the Twelve Apostles (c.150 C.E.)
“Ena ke Tsela ea Bophelo: . . . U ke ke ua bolaea lesea le ka pōpelong kapa ho bolaea lesea le sa tsoa tsoaloa.”
Tertullian: Apology khaolo 9:8. (C.197 CE.)
“Empa ho rōna ho bolaea ho thibetsoe ka hohle-hohle. Ha rea lumelloa ho bolaea esita le lesea le ka pōpelong, ha feela mali a ntse a phalla. Ho thibela ho tsoaloa ha ngoana ke polao e reriloeng. Ha ho etse phapang hore na motho o bolaea ngoana ea seng a tsoetsoe kapa u kena-kenana le ho tsoaloa ha hae. Eo e tlang ho ba motho e se e ntse e le eena.”
Basil: Letter to Amphilochius (347 C.E.)
“Ea bolaileng lesea le ka pōpelong ka boomo o lokela ho lefa molato oa polao. Mabaka leha e le afe a ho tseka hore na lesea le ne le se le bōpiloe kapa che ha re a amohele.”
Pono ea Bokreste
Mpa e ka itsoela kapa ea senyeha ka baka la ho se phethahale hoa botho kapa kotsi. Mpa e ntšoang ka morero hore feela ho qojoe ngoana ea sa batluoeng, ke taba e fapaneng. Ho latela Mangolo, joalokaha re bone, ke ho bolaea ha ka boomo.
Ke mang “ea anehileng lefatše le limela tsa lona; ea nehileng batho ba ho lona phefumoloho, le moea ho ba tsamaeang teng”? Hase motho empa ke Mohloli oa bophelo bohle, Jehova Molimo. (Esaia 42:5) Matla ao re a filoeng ke Molimo oa rōna a ho fetisetsa bophelo ho bana ba rōna ke monyetla o babatsehang oo ho tšoana le lintho tsohle “motho ka mong ho rōna a tla ikarabela ho Molimo bakeng sa tsa hae.”—Ba-Roma 14:12.
[Lebokose le leqepheng la 14]
Kemolo e Thabisang
Ka 1973 Molula-Qhooa, oa Senyesemane, motsoalle oa makasine oa Tsoha! o ne o na le sehlooho se sekhutšoanyane se buang ka pono ea Bibele ka ho ntša mpa. Liithuti tse peli tse ncha li ile tsa se bala. Ngoanana o ne a imile, ’me eena le ntate ba lumellana ka ho ntša mpa. Empa sehlooho seo sa ba nahanisa. Ka baka leo, ba qeta ka hore ngoana a mpe a hlahe.
Morao tjena monna eo o ile a kopana hape le Lipaki tsa Jehova,’me re: “Ke hlompha libuka tsa lōna tsa Bibele haholo. Ke ka lebaka la sehlooho sa lōna se sisinyang kelello kajeno ’na le mosali oa ka re leng batsoali ba motlōtlō ba morali ea rateheng ea lilemo li 13!”
Ho ne ho putsa haholo ho bona ho nka keletso ea Mangolo
[Moo Setšoantšo se Nkiloeng Teng leqepheng la 15]
H. Armstrong Roberts