Ho Ntšoa Hoa Mpa
Tlhaloso: Hona ke ho leleka ka popelong ngoana ea e-song ho be le hona hore a ka phela kantle ho popelo. Mpa e intšang kapa ho senyeheloa ho hlahisoa ke ho se phethahale hoa botho kapa ke kotsi. Mpa e ntšoang ka morero hore feela ho qojoe ho hlaha hoa ngoana ea sa batloeng ke ho bolaea motho ka boomo.
Moqali oa bophelo ba motho o lokela ho ama pono ea rōna joang tabeng ee?
Lik. 17:28: “Ke ka eena [Molimo] re utloang, re sisinyehang, re leng teng.”
Pes. 36:9: “Seliba sa bophelo se ho uena [Jehova Molimo].”
Ba-Roma 14:12: “Motho ka mong ho rōna o tla ikarabela ho Molimo bakeng sa tsa hae.”
Na Jehova o talima bophelo ba ngoana e le ba bohlokoa leha a qala ho hōla hoba a emoloe?
Pes. 139:12-16: “U [Jehova] ntohile popelong ea ’mè. . . . Mahlo a hao a bone moloho oa tsona; matsatsi a ka a ngoliloe kaofela hammoho bukeng ea hao.”
Na ho na le mohla Molimo o kileng oa bolela hore motho o tla ikarabella bakeng sa ho ntša ngoana ea e-song ho tsoaloe kotsi?
Ex. 21:22, 23, NW: “Haeba banna ba ka loana ’me ba hla ba ntša mosali oa moimana kotsi ’me bana ba hae ba hlaha empa ho sa hlahe kotsi e isang lefung, joang kapa joang eo o tla lefa litšenyehelo ho latela hore na mong a mosali o batla hakae; ’me o tla li lefa pel’a baahloli. Empa haeba ho ka hlaha kotsi e isang lefung, ke moo u tla lefa moea ka moea.” (Liphetolelo tse ling li etsa hore ho hlahe eka molaong ona oa Iseraele taba-taba e ne e le se etsahallang ’mè, e seng lesea le ka popelong. Leha ho le joalo, temana ea mathomo ea Seheberu, e bua ka kotsi e bolaeang ho ngoana ea ka popelong kapa ho ’mè oa ngoana.)
Ho bolaea motho ka boomo ka lebaka le sa lumelloang ke Molimo ho tebile hakae?
Gen. 9:6: “Ea tšollang mali a motho, le a hae mali a tla tšolloa ke motho; hobane Molimo o entse motho ka setšoantšo sa oona.”
1 Joh. 3:15: “Ha ho ’molai eo bophelo bo sa feleng bo lutseng ho eena.”
Ex. 20:13: “U se ke ua bolaea.”
Na pono ea ngaka ea hore ho lumella kemaro hore e phethe nako ea eona ho ka ba kotsi bophelong ba ’mè e lokafatsa ho ntša mpa?
Pono ea lingaka ka nako e ’ngoe e fosahetse. Na ekaba ho nepahetseng ho bolaea motho e mong hobane motho eo a ka ’na a ntša motho e mong kotsi? Haeba nakong ea pelehi ho tlameha hore ho khethoe pakeng tsa bophelo ba ’mè le ba ngoana, ho ho batho ba amehang hore ba khethe. Leha ho le joalo, tsoelopele mekhoeng ea bongaka linaheng tse ngata e entse hore boemo bona bo hlahe seoelo.
Haeba e Mong a Re—
‘Empa ke na le tokelo ea ho etsa qeto litabeng tse amang ’mele oa ka’
U ka ’na ua arabela: ‘Kea utloisisa hore na u ikutloa joang. Hangata kajeno litokelo tsa rōna li hatakeloa ke ba bang; ba bangata ho hang ha ba tsotelle hore na batho ba bang ba hlaheloa ke eng. Empa Bibele e fana ka litataiso tse ka re sireletsang. Leha ho le joalo, ho rua melemo, re tlameha hore re amohele le boikarabelo.’ ’Me mohlomong u ka eketsa: (1) ‘Bo-’mè ba bangata ba lahliloe ke bo-ntate ba ba etselitseng bana ba bona. Empa lapeng leo ho lona monna le mosali ba phelang ka litekanyetso tsa Bibele, monna o tla rata mosali oa hae le bana ka sebele ’me a lule le bona ka botšepehi le ho ba hlokomela. (1 Tim. 5:8; Ba-Ef. 5:28-31)’ (2) ‘Haeba rōna ka borōna re tla fumana lerato le hlompho tsa mofuta oo, le rōna re lokela ho sebelisa litekanyetso tsa Bibele boikutlong ba rōna malebana le litho tsa malapa a rōna. Bibele e re re lokela ho talima bana bao re ba tsoalang joang? (Pes. 127:3; bapisa Esaia 49:15.)’