Ba Inehetse—Ho Mang?

“Tseo tsohle Jehova a li boletseng, re tla li etsa le ho li utloa.”—EXODA 24:7.

 1, 2. (a) Batho ba bang ba inehetse ho eng? (b) Na boinehelo bo lekanyelitsoe feela ho bao e leng litho tsa bolumeli?

KA February 1945, bakhanni ba lifofane ba Zero-fighter ea Yatabe Flying Corps ea Japane ba ne ba bokane ka holong e ’ngoe. E mong le e mong o ile a fuoa sekhechana sa pampiri seo ho sona a lokelang ho ngola hore na o tla ithaopela ho ba setho sa lebotho la tlhaselo la ho bjaramanya sefofane sa libomo ka ho shoela ho ba lireng. Ofisiri e ’ngoe e neng e le teng ka nako eo e re: “Ke ile ka nahana hore ke pitso ea ka ea hore ke itele nakong ea ha sechaba se le maqakabetsing. Ke susumelletsehile maikutlong hore ke iketse ea fumanehang, ke ile ka ithaopela thōmo eo.” O ile a koetlisetsoa ho sebelisa le ho khanna Ohka (sefofane sa rokete sa ho ipolaea) le ho se soahlamanya sekepeng sa ntoa sa sera. Leha ho le joalo, ntoa e ile ea lala pele a e-ba le monyetla oa ho etsa joalo ’me kahoo a shoela naha ea habo le moemphera oa hae. Ha Japane e hlōloa ntoeng, tumelo ea hae ho moemphera e ile ea fela.

² Ka nako e ’ngoe, ba bangata Japane ba ne ba inehetse ho moemphera, eo ba neng ba lumela hore ke molimo ea phelang. Linaheng tse ling, ho ’nile ha e-ba le lintho tseo ho ineheloang ho tsona ebile li ntse li le teng. Ba limilione ba inehetse ho Maria, Buddha, kapa melimo e meng—eo hangata e emeloang ke litšoantšo tse rapeloang. Ba susumelitsoe ke bokheleke bo amang maikutlo, ba bang ba tšollela chelete ea bona eo ba e fumaneng ka thata ho baevangeli ba TV ka tšehetso ea pelo eohle e tšoanang le boinehelo. Ka mor’a ntoa, Majapane a saretsoeng a ile a batla ntho e ncha eo a ka nehelang bophelo ba ’ona ho eona. Ho ba bang, ntho eo e bile mosebetsi. Bochabela kapa Bophirimela, ba bangata ba inehela ho bokelleng maruo. Bacha ba etsa hore bophelo ba bona bo likolohe libining tse itseng, tseo ba etsisang mokhoa oa tsona oa bophelo. Palo e khōlō kajeno e-ea ithapela, ba etsa litakatso tsa bona ntho eo ba inehelang ho eona. (Ba-Filippi 3:19; 2 Timothea 3:2) Empa na lintho tse joalo kapa batho ba joalo ba hlile ba tšoaneloa ke hore motho a inehele ho bona ka moea oohle?

 3. Lintho tse ling tseo ho ineheloang ho tsona li ipakile li se na thuso joang?

³ Ha ba tobane le lintho tsa sebele, barapeli ba litšoantšo hangata ba felloa ke tšepo. Ho inehela litšoantšong ho fella ka pherekano ha barapeli ba tsona ba hlokomela hore litšoantšo tsa bona e mpa feela e le “mosebetsi oa matsoho a batho.” (Pesaleme ea 115:4) Ha ho pepesoa mahlabisa-lihlong a baevangeli ba hlahelletseng ka mahetla, batho ba tšepahalang ba ikutloa ba phoqiloe. Ha moruo o “qekang” o oa, basebetsi ba ferekana kelellong ha ba iphumana lethathamong la ba behelletsoeng ka thōko. Ho theoha ha moruo morao tjena ho ile ha hlokofatsa barapeli ba Mamona haholo. Likoloto tseo ba bileng le tsona ka tšepo ea ho etsa chelete e ngata e bile moroalo ka tebello e fokolang ea hore li tla lefshoa. (Mattheu 6:24) Ha likhalala tsa ’mino oa rock tse rapeloang le ba bang ba thabisang batho ba e-shoa kapa ba felloa ke botumo, barapeli ba bona ba sala ba lahliloe kherehloa. ’Me ba ’nileng ba tsamaea tseleng ea ho ikhotsofatsa hangata ba kotula litholoana tse babang.—Ba-Galata 6:7.

 4. Batho ba susumetsoa ke eng ho nehela bophelo ba bona linthong tse se nang thuso?

⁴ Batho ba susumetsoa ke eng ho inehela linthong tse joalo tsa lefeela? Ka tekanyo e khōlō, ke moea oa lefatše le tlas’a Satane Diabolose. (Ba-Efese 2:2, 3) Tšusumetso ea moea ona e bonoa ka litsela tse sa tšoaneng. Motho e mong a ka ’na a laoloa ke neano ea lelapa e ’nileng ea neheletsanoa e tsoa ho baholo-holo ba hae. Thuto le khōliso li ka ’na tsa susumetsa monahano ka matla. Moea mosebetsing o ka ’na oa khannela hore “bahlabani ba ikopantseng” ba lemalle mosebetsi e leng ho ka ’nang ha sokela bophelo. Ho lakatsa ho ba le ho eketsehileng ho hlahisoa ke boikutlo ba lefatše ba ho rata lintho tse bonahalang. Lipelo tsa ba bangata li senyehile, li ba susumelletsa ho inehela litakatsong tsa bona tsa boithati. Ba hlōleha ho hlahloba hore na lintho tsena tseo ba li lelekisang li lokeloa ke boinehelo bo joalo kapa che.

Sechaba se Inehetseng

 5. Ke boinehelo bofe ho Jehova bo ileng ba etsoa lilemong tse fetang 3 500 tse fetileng?

⁵ Lilemo tse fetang 3 500 tse fetileng, sechaba se seng sa batho se ile sa fumana se seng sa bohlokoahali seo ho ka ineheloang ho sona. Se ile sa inehela ho Molimo ea phahameng ka ho fetisisa, Jehova. E le sehlopha, sechaba sa Iseraele se ile sa bolela boinehelo ba sona ho Molimo lehoatateng la Sinai.

 6. Lebitso la Molimo le ne le lokela ho ba le bohlokoa bofe ho Baiseraele?

⁶ Ke eng se ileng sa susumetsa Baiseraele hore ba nke bohato ka tsela ee? Ha ba ne ba le bokhobeng Egepeta, Jehova o ile a roma Moshe ho ea ba lokolla. Moshe o ile a botsa hore na o lokela ho khetholla Molimo ea neng a mo romile joang, ’me Molimo o ile a itšenola e le “ke tla ipaka ho ba seo ke tla ipaka ho ba sona.” O ile a laela Moshe hore a re ho bara ba Iseraele: “Ke tla ipaka ho ba o nthomile ho lōna.” (Exoda 3:13, 14, NW) Polelo ena e bontša hore Jehova e ba eng kapa eng e hlokahalang e le hore a ka phethahatsa merero ea hae. O ne a tla itšenola e le Mophethahatsi oa litšepiso ka tsela eo baholo-holo ba Baiseraele ba sa kang ba e tseba.—Exoda 6:2, 3.

 7, 8. Baiseraele ba ne ba e-na le bopaki bofe ba hore Jehova e ne e le Molimo eo ba tšoanelang ho inehela ho eena?

⁷ Baiseraele ba ile ba bona mahlomola a naha ea Egepeta le batho ba eona a bakiloeng ke Likotlo tse Leshome. (Pesaleme ea 78:44-51) Joale, mohlomong ba ka holimo ho limilione tse tharo ba bona, ho kopanyelletsa basali le bana, ba ile ba tlama thoto ’me ba tsoa naheng ea Goshene ka bosiu bo le bong, e leng bohato bo tsotehang ka bobona. (Exoda 12:37, 38) Hape, Leoatleng le Lefubelu, Jehova o ile a itšenola e le “mohale” ha a pholosa batho ba hae makhotleng a sesole a Faro ka ho arola leoatle ho lumella Baiseraele ho tšela ’me hamorao ka ho le koala le ka ho khamisa Baegepeta ba ba phalletseng metsi. Ka lebaka leo, “Iseraele a bona matla a maholo ao Jehova a a bonahalitseng ho ba-Egepeta, ’me sechaba sa tšaba Jehova, sa lumela Jehova.”—Exoda 14:31; 15:3; Pesaleme ea 136:10-15.

⁸ Joalokaha eka ba ntse ba haelloa ke bopaki ba hore na lebitso la Molimo le bolela eng, Baiseraele ba ile ba korotlela Jehova le moemeli oa hae Moshe ka ho haella ha lijo le metsi. Jehova a romela likoekoe, a nesa manna, a ba a etsa hore metsi a phorosele a tsoa lefikeng, Meriba. (Exoda 16:2-5, 12-15, 31; 17:2-7) Jehova o boetse a pholosa Baiseraele tlhaselong ea Baamaleke. (Exoda 17:8-13) Ha ho ka tsela eo Baiseraele ba neng ba ka latola seo Jehova a ileng a se bolella Moshe hamorao: “Jehova, Jehova, Molimo o mohau, o lereko, o liehang ho halefa, o tletseng mohau le ’nete, o hauhelang meloko e likete, o tšoarelang motho bokhopo le boikhantšo le sebe.” (Exoda 34:6, 7) Ka sebele, Jehova o ile a ipaka e le ea tšoaneloang ke hore ba inehele ho eena.

 9. Ke hobane’ng ha Jehova a ile a fa Baiseraele monyetla oa ho bontša boinehelo ba bona ba ho mo sebeletsa, hona ba ile ba arabela joang?

⁹ Le hoja Jehova a ne a e-na le tokelo ea ho ba mong’a Baiseraele hobane a ba lopollotse Egepeta, eena, joaloka Molimo ea mosa le ea mohau, o ile a ba fa monyetla oa hore ka boithatelo ba bontše hore ba lakatsa ho mo sebeletsa. (Deuteronoma 7:7, 8; 30:15-20) O boetse a hlalosa litekanyetso bakeng sa selekane se pakeng tsa hae le Baiseraele. (Exoda 19:3-8; 20:1–23:33) Ha litekanyetso tsena li phetoa ke Moshe, Baiseraele ba ile ba re: “Tseo tsohle Jehova a li boletseng, re tla li etsa le ho li utloa.” (Exoda 24:3-7) Ka boikhethelo ba bona, ba ile ba fetoha sechaba se inehetseng ho Morena ’Musi Jehova.

Kananelo e Lebisa Boinehelong

10. Boinehelo ba rōna ho Jehova bo lokela ho thehoa holim’a eng?

¹⁰ Jehova, ’Mōpi, o tsoela pele ho tšoaneloa ke hore re inehele ho eena ka moea oohle. (Malakia 3:6; Mattheu 22:37; Tšenolo 4:11) Leha ho le joalo, boinehelo ba rōna ha boa lokela ho thehoa holim’a tumelo e se nang mabaka, maikutlo a fetang, kapa ho hatelloa ke ba bang—esita le batsoali. Bo tlameha ho thehoa tsebong e nepahetseng ea ’nete ka Jehova le kananelo bakeng sa seo Jehova a re etselitseng sona. (Ba-Roma 10:2, NW; Ba-Kolosse 1:9, 10; 1 Timothea 2:4) Feela joalokaha Jehova a ile a fa Baiseraele monyetla oa hore ka boithatelo ba bontše boinehelo ba bona, kahoo le rōna o re fa monyetla oa hore ka boithatelo re inehele ’me re etse boinehelo boo phatlalatsa.—1 Petrose 3:21.

11. Ho ithuta ha rōna Bibele ho senotse eng ka Jehova?

¹¹ Ka ho ithuta Bibele, re tla tseba Molimo e le motho. Lentsoe la hae le re thusa ho lemoha litšobotsi tsa hae joalokaha li bonahalitsoe pōpong. (Pesaleme ea 19:1-4) Re ka bona Lentsoeng la hae hore hase Boraro-bo-bong ba mohlolo bo ke keng ba utloisisoa. Ha a hlōloe ke lintoa ’me kahoo ha aa tlameha ho latola Bomolimo ba hae. (Exoda 15:11; 1 Ba-Korinthe 8:5, 6; Tšenolo 11:17, 18) Kaha o phethahalitse litšepiso tsa hae, re hopotsoa seo lebitso la hae le babatsehang, Jehova, le se emelang. Ke Moreri e Moholo. (Genese 2:4, NW, mongolo o botlaaseng ba leqephe; Pesaleme ea 83:18; Esaia 46:9-11) Ka ho ithuta Bibele, re tla utloisisa ka ho hlakileng kamoo a tšepahalang kateng le kamoo a ka tšeptjoang kateng.—Deuteronoma 7:9; Pesaleme ea 19:7, 9; 111:7.

12. (a) Re hoheloa ke eng ho Jehova? (b) Liphihlelo tsa sebele bophelong tse tlalehiloeng ka Bibeleng li susumelletsa motho joang hore a batle ho sebeletsa Jehova? (c) U ikutloa joang ka ho sebeletsa Jehova?

¹² Se hlileng se re hohellang ho Jehova ke botho ba hae bo lerato. Bibele e bontša kamoo a leng lerato, a tšoarelang, a bileng a leng mohau kateng ha a sebetsana le batho. Nahana ka kamoo a ileng a atlehisa Jobo kateng ka mor’a hore Jobo ka botšepehi a boloke botšepehi ba hae. Phihlelo ea Jobo e totobatsa hore “[Jehova] o tletse mohau le lereko.” (Jakobo 5:11; Jobo 42:12-17) Nahana ka kamoo Jehova a ileng a sebetsana le Davida kateng ha a febile a bile a bolaile. E, Jehova o ikemiselitse ho tšoarela esita le libe tse tebileng ha moetsalibe a mo atamela ka “pelo e robehileng, e hlomohileng.” (Pesaleme ea 51:3-11, 17) Nahana ka tsela eo Jehova a ileng a sebetsana le Saule oa Tarese kateng, eo pele e neng e le mohlorisi ea ikemiselitseng oa batho ba Molimo. Mehlala ena e totobatsa mohau oa Molimo le ho ikemisetsa ho sebelisa ba bakileng ka bolokolohi. (1 Ba-Korinthe 15:9; 1 Timothea 1:15, 16) Pauluse o ile a ikutloa hore a ka beha bophelo ba hae kotsing ka ho sebeletsa Molimo enoa ea lerato. (Ba-Roma 14:8) Na u ikutloa ka tsela e tšoanang?

13. Ke pontšo efe e khōlō ea lerato ka lehlakoreng la Jehova e susumetsang batho ba pelo li lokileng hore ba inehele ho eena?

¹³ Jehova o ile a lokisetsa hore Baiseraele ba bolokehe botlamuoeng Egepeta, hape o lokiselitse mokhoa oa ho re pholosa botlamuoeng ba sebe le lefu—sehlabelo sa thekollo sa Jesu Kreste. (Johanne 3:16) Pauluse o re: “Moo Molimo o totisitseng lerato la oona ho rōna teng, ke ka hore, re sa le baetsalibe, Kreste o bile a shoa sebakeng sa rōna.” (Ba-Roma 5:8) Tokisetso ena e lerato e susumetsa ba pelo li lokileng hore ba inehele ho Jehova ka Jesu Kreste. ‘Hobane lerato la Kreste le re tlamile; re tsoe re lumetse hoba, e mong ha a shoetse bohle, bohle le bona ba shoele; ’me o shoele bakeng sa bohle hore ba phelang ba se hlole ba iphelela, ba mpe ba phelele ea shoeleng, a ba a tsoha bakeng sa bona.’—2 Ba-Korinthe 5:14, 15; Ba-Roma 8:35-39.

14. Na ho tseba litšebelisano tsa Jehova feela ho lekane ho re susumelletsa ho nehela bophelo ba rōna ho eena? Hlalosa.

¹⁴ Ho ntse ho le joalo, ho ba le tsebo ka botho ba Jehova le litšebelisano tsa hae le moloko oa batho ha hoa lekana. Kananelo ea botho ho Jehova e tlameha ho hlaoleloa. Hoo ho ka etsoa joang? Ka ho sebelisa Lentsoe la Molimo bophelong ba rōna le ho iponela hore melao-motheo e fumanoang ho lona e hlile e-ea sebetsa. (Esaia 48:17) Re tlameha ho ikutloa hore Jehova o re pholositse qhafutsong ea lefatše lena le khopo le tlas’a puso ea Satane. (Bapisa le 1 Ba-Korinthe 6:11.) Boikitlaetsong ba rōna bo matla ba ho etsa se nepahetseng, re ithuta ho itšetleha ka Jehova, ’me rea iponela ka borōna hore Jehova ke Molimo ea phelang, “ea utloang merapelo.” (Pesaleme ea 62:8; 65:2) Kapele re ikutloa re le haufi-ufi le eena ’me re khona ho mo bolella maikutlo a rōna a ka hare-hare. Maikutlo a mofuthu a ho rata Jehova aa hōla ka ho rōna. Ha ho pelaelo hore sena se tla re khannela hore re nehele bophelo ba rōna ho eena.

15. Ke eng se ileng sa susumelletsa monna e mong, eo pele a neng a inehetse mosebetsing, ho sebeletsa Jehova?

¹⁵ Ba bangata ba tsebile Molimo enoa ea lerato, Jehova, ’me ba nehetse bophelo ba bona ho mo sebeletseng. Ka mohlala nahana ka setsebi sa motlakase se neng se e-na le khoebo e atlehang. Ho ne ho e-na le linako tseo a neng a qala mosebetsi hoseng ’me a sebetse letšehare lohle ho fihlela bosiu, a fihla hae ka hora ea bohlano hoseng ha le hlahlamang. Ka mor’a ho phomola ka nako e ka etsang hora, o ne a ee a ee mosebetsing o latelang. Oa hopola: “Ke ne ke inehetse mosebetsing oa ka.” Ha mosali oa hae a qala ho ithuta Bibele, o ile a kopanela le eena. O re: “Melimo eohle eo ke neng ke e tseba ho fihlela ka nako eo e ne e emetse feela ho sebeletsoa, e sa re etsetse letho le molemo. Empa Jehova o ile a nka bohato pele ’me a romela Mora oa hae ea tsoetsoeng a ’notsi lefatšeng ka boitelo bo boholo ba botho.” (1 Johanne 4:10, 19) Ka likhoeli tse leshome, monna enoa o ile a inehela ho Jehova. Ka morao ho moo, o ile a tsepamisa mohopolo oa hae ho sebeletseng Molimo ea phelang. O ile a kenela tšebeletso ea nako e tletseng ’me a fallela moo tlhokahalo e leng khōloanyane ho ea sebeletsa teng. Eena, joaloka baapostola, ‘o ile a tlohela tsohle ’me a latela Jesu.’ (Mattheu 19:27) Ka mor’a likhoeli tse peli, eena le mosali oa hae ba ile ba bitsetsoa ho ea sebeletsa lekaleng la Watch Tower Bible and Tract Society naheng eo ba neng ba lula ho eona, e le hore a ka thusa ka mosebetsi oa motlakase. Ka lilemo tse fetang 20, o ’nile a sebetsa lekaleng lena, a etsa mosebetsi oo a o ratang—a sa itšebeletse empa a sebeletsa Jehova.

Etsa Boinehelo ba Hao Phatlalatsa

16. Ke mehato efe eo motho a lokelang ho e nka ha a inehela ho Jehova?

¹⁶ Ka mor’a ho ithuta Bibele nakoana, ba banyenyane le ba baholo ba tla ananela Jehova le seo a ba etselitseng sona. Sena se tla ba susumelletsa ho inehela ho Molimo. E ka ’na eaba u e mong oa bana. U ka inehela ho Jehova joang? Ka mor’a ho fumana tsebo e nepahetseng Bibeleng, u lokela ho nka bohato tumellanong le tsebo eo ’me u bontše tumelo ho Jehova le Jesu Kreste. (Johanne 17:3) Baka ’me u sokolohe tseleng leha e le efe e fetileng ea boetsalibe. (Liketso 3:19) Joale u tla ba boemong ba boinehelo, u bo etsa ka mantsoe a tiileng a thapelo ho Jehova. Ha ho pelaelo hore thapelo ena e tla siea phello e sa feleng kelellong ea hao, hobane e tla ba qalo ea kamano e ncha le Jehova.

17. (a) Ke hobane’ng ha baholo ba hlahloba lipotso tse lokiselitsoeng le ba sa tsoa inehela bocha? (b) Ke bohato bofe ba bohlokoa bo lokelang ho nkuoa hang ka mor’a hore motho a inehele, hona e le ka morero ofe?

¹⁷ Feela joalokaha Moshe a ile a hlalosetsa Baiseraele litekanyetso tsa ho kena kamanong ea selekane le Jehova, baholo liphuthehong tsa Lipaki tsa Jehova ba thusa ba sa tsoa etsa boinehelo hore ba hlahlobe hantle hore na ho ameha eng. Ba sebelisa lipotso tse lokiselitsoeng ho tiisa hore e mong le e mong o utloisisa ka botlalo lithuto tsa motheo tsa Bibele le hore oa hlokomela hore na se akarelletsoang ke’ng ka ho ba Paki ea Jehova. Joale, ketsahalo ea ho phatlalatsa boinehelo ke e loketseng haholo. Ka tlhaho, motho ea sa tsoa inehela o labalabela ho tsebisa ba bang hore o se a e-na le kamano ena e khethehileng le Jehova. (Bapisa le Jeremia 9:24.) Sena ka nepo se etsoa ka ho kolobetsoa metsing tšoantšetsong ea boinehelo. Ho qoelisoa metsing le ho phahamisoa ho tšoantšetsa hore o-oa shoa tseleng ea hae ea pele ea bophelo ea ho ipatla le hore o tsosetsoa tseleng e ncha ea bophelo, ea ho etsa thato ea Molimo. Hase sakramente, leha e le hore ke tloaelo e tšoanang le tšebeletso ea Shinto ea misogi eo ho eona ho nkoang hore motho o hlatsoitsoe ka metsi.a Ho e-na le hoo, kolobetso ke polelo ea phatlalatsa ea boinehelo bo seng bo entsoe ka thapelo.

18. Ke hobane’ng ha re ka kholiseha hore boinehelo ba rōna e ke ke ea e-ba ba lefeela?

¹⁸ Ketsahalo ena e tebileng ke phihlelo e ke keng ea lebaloa, e hopotsa mohlanka oa Molimo ka kamano e sa feleng eo joale a nang le eona le Jehova. Ho fapana le boinehelo boo mokhanni oa sefofane sa lebotho la tlhaselo la ho bjaramanya sefofane sa libomo ka ho shoela ho ba lireng a bo etselitseng naha ea habo le moemphera, ho inehela ho Jehova ka tsela ena e ke ke ea e-ba ha lefeela, hobane ke Molimo ea matla ’ohle ea sa feleng ea phethang sohle seo a se qalileng. Eena, ’me e le eena feela, o lokeloa ke boinehelo ba rōna ba moea oohle.—Esaia 55:9-11.

19. Sehloohong se latelang ho tla tšohloa eng?

¹⁹ Leha ho le joalo, ho ameha ho eketsehileng boinehelong. Ka mohlala, boinehelo bo ama bophelo ba rōna ba letsatsi le letsatsi joang? Sena se tla tšohloa sehloohong se latelang.

[Mongolo o botlaaseng ba leqephe]

Na U sa Hopola?

◻ Ke hobane’ng ha boinehelo kamoo bo etsoang kateng lefatšeng bo fella ka ho nyahama?

◻ Ke eng e ileng ea susumelletsa Baiseraele hore ba inehele ho Jehova?

◻ Re susumetsoa ke eng ho inehela ho Jehova kajeno?

◻ Re inehela ho Molimo joang?

◻ Bohlokoa ba kolobetso ea metsing ke bofe?

[Setšoantšo se leqepheng la 10]

Iseraele e inehela ho Jehova Sinai