Susumeletsanang Leratong le Mesebetsing e Molemo—Ka ho Etsa Joang?

“A re nahanelaneng e le hore re susumeletsane leratong le mesebetsing e molemo, . . . re khothatsane, ’me le etse joalo haholo kaha le bona letsatsi le atamela.”—BA-HEBERU 10:24, 25, NW.

 1, 2. (a) Ke hobane’ng ha e ne e le habohlokoa hore Bakreste ba pele ba fumane matšeliso le khothatso ha ba bokana hammoho? (b) Ke keletso efe ea Pauluse e ileng ea lebisa tlhokomelo tlhokahalong ea ho bokana hammoho?

BA NE ba kopana ka sephiring, ba ikentse seqhoqho ka moo ho notletsoeng. Kantle, kotsi e ne e ba nanarela ka mahohle. Jesu, Moeta-pele oa bona, o ne a sa tsoa bolaoa pontšeng, ’me o ne a ile a lemosa balateli ba hae hore tšoaro ea bona e ne e sa tl’o fapana le ea hae. (Johanne 15:20; 20:19) Empa ha ba ntse ba buela tlaase ka moratuoa oa bona Jesu, ho ba hammoho ho tlameha ebe bonyane ho ne ho etsa hore ba ikutloe ba sireletsehile haholoanyane.

² Ha lilemo li ntse li feta, Bakreste ba ile ba thulana le liteko tsa mefuta eohle le mahloriso. Ho tšoana le barutuoa bao ba pele, ba ile ba fumana matšeliso le khothatso ka ho kopana hammoho. Kahoo, moapostola Pauluse o ile a ngola ho Ba-Heberu 10:24, 25 (NW): “A re nahanelaneng e le hore re susumeletsane leratong le mesebetsing e molemo, re sa lese ho bokana ha rōna hammoho, joalokaha ba bang ba e-na le mokhoa ona, empa re khothatsane, ’me le etse joalo haholo kaha le bona letsatsi le atamela.”

 3. Ke hobane’ng ha u ka re Ba-Heberu 10:24, 25 hase feela taelo ea hore Bakreste ba bokane hammoho?

³ Mantsoe ao ha a felle feela taelong ea hore ho ’ne ho kopanoe hammoho. A fana ka tekanyetso e bululetsoeng ke Molimo bakeng sa liboka tsohle tsa Bokreste—’me ha e le hantle, bakeng sa ketsahalo efe kapa efe ea ha Bakreste ba bokane hammoho. Kajeno ho feta leha e le neng, ha re bona ka ho hlaka ho atamela ha letsatsi la Jehova, likhatello le likotsi tsa tsamaiso ena e khopo li etsa hore e be tlamo hore liboka tsa rōna li be joaloka setšabelo, e leng mohloli oa matla le khothatso ho bohle. Re ka etsa’ng ho tiisa hore ho ba joalo? Ha re hlahlobeng mantsoe a Pauluse ka hloko, re botsa lipotso tse tharo tse ka sehloohong: Ho ‘nahanelana’ ho bolela eng? Ho ‘susumeletsana leratong le mesebetsing e molemo’ ho bolela eng? Ea ho qetela, re ka ‘khothatsana’ joang linakong tsee tse thata?

‘Nahanelanang’

 4. Ho ‘nahanelana’ ho bolela eng?

⁴ Ha Pauluse a ne a phehella Bakreste hore ba ‘nahanelane,’ o ile a sebelisa leetsi la Segerike ka·ta·no·eʹo, leo e leng sebōpeho se fetisang moelelo o matla oa poleloana e tloaelehileng, “ho bona.” Theological Dictionary of the New Testament e re le bolela “ho lebisa mohopolo oohle oa motho nthong e itseng.” Ho ea ka W. E. Vine, le ka boetse la bolela “ho utloisisa ka botlalo, ho nahana ka hloko.” Ka hona ha Bakreste ba ‘nahanelana,’ ha ba bone bokaholimo feela empa ba sebelisa matla ’ohle a bona a kelello ’me ba leka ho bona botebo ba taba.—Bapisa le Ba-Heberu 3:1.

 5. Tse ling tsa litšobotsi tsa motho tse ka ’nang tsa kubuteha ke life, hona ke hobaneng ha re lokela ho nahana ka tsona?

⁵ Ho hlokahala re hopole hore seo motho a leng sona ha se senoloe feela ka ponahalo, mesebetsi, kapa botho ba hae. (1 Samuele 16:7) Hangata ponahalo ea ho ba bonolo e kubuta maikutlo a tebileng kapa botho ba ho qabola bo thabisang ba bang. Ho hong hape, limelo li fapana haholo. Ba bang ba fetile litekong tse bohloko bophelong ba bona; ba bang hona joale ba mameletse maemo ao re neng re tla fumana ho le thata ho nahana ka ’ona. Ke hangata hakaakang ho tenehela ha rōna sebōpeho se itseng sa moena kapa khaitseli ho felang ha re tseba haholoanyane ka semelo sa hae kapa maemo.—Liproverbia 19:11.

 6. Tse ling tsa litsela tseo re ka tsebanang hamolemo ka tsona ke life, ’me ho ka ’na ha fella ka molemo ofe?

⁶ Ho hlakile hore sena ha se bolele hore re lokela ho iketsa bo-ntšunye-khare litabeng tsa botho tsa motho e mong. (1 Ba-Thessalonika 4:11) Leha ho le joalo, ka sebele re ka bontšana thahasellano ea botho. Hona ho bolela ho fetang feela ho lumelisana Holong ea ’Muso. Ke hobane’ng ha u sa qoolle e mong eo u ratang ho mo tseba hamolemo ebe u ikemisetsa hore ka metsotso e se mekae u tla qoqa le eena pele kapa ka mor’a liboka? Ho ka ba molemo haholo ho ba “mafolo-folo ho amohela baeti” ka ho memela motsoalle a le mong kapa e ’meli lapeng ha hao ho tla ja lijonyana tse bobebe. (Ba-Roma 12:13) Bontša thahasello. Mamela. Ho botsa feela hore na motho o ile a tseba Jehova joang ’me a mo rata ho ka senola ho hongata. Leha ho le joalo, u ka ithuta ho eketsehileng hape ka hore le sebetse hammoho tšebeletsong ea ntlo le ntlo. Ho nahanelana ka litsela tse joalo ho tla re thusa ho hōlisa ho ameha kannete e mong ka e mong kapa ho ipeha maemong a ba bang.—Ba-Filippi 2:4; 1 Petrose 3:8.

‘Le Susumetsane’

 7. (a) Thuto ea Jesu e ne e ama batho joang? (b) Ke eng e neng e etsa hore thuto ea hae e be e matla hakaale?

⁷ Ha re nahanelana, re ba boemong bo molemo ba ho susumetsana le ba ho phehellana ho nkeng khato. Baholo ba Bakreste ke bona haholo ba phethang karolo ea bohlokoa ntlheng ena. Mabapi le nako ea ha Jesu a ne a bua phatlalatsa, rea bala: “Matšoele a tsota thuto ea hae.” (Mattheu 7:28) Ketsahalong e ’ngoe esita le masole a neng a romiloe ho ea mo tšoara a ile a tloha a re: “Ha ho e-so ho be motho ea buang joalo ka motho eo, le ka mohla o le mong.” (Johanne 7:46) Ke eng se neng se etsa hore thuto ea Jesu e be e matla hakaale? Ho bua ka ho bonahatsa ho nkeha maikutlo? Che; Jesu o ne a bua ka seriti. Empa kamehla o ne a haba ho finyella lipelo tsa bamameli ba hae. Kaha o ne a nahanela batho, o ne a tseba hantle hore na a ka ba susumetsa joang. O ne a sebelisa litšoantšo tse hlakileng, tse bonolo tse neng li tšoantša lintho tsa ’nete tsa bophelo ba letsatsi le letsatsi. (Mattheu 13:34) Ka ho tšoanang, ba phethahatsang likabelo libokeng tsa rōna ba lokela ho etsisa Jesu ka ho fana ka lipuo tse mofuthu, tse bonahatsang cheseho, tse susumetsang. Joaloka Jesu, re ka ikitlaelletsa ho fumana litšoantšo tse tšoanelang bamameli ba rōna ’me re finyelle lipelo tsa bona.

 8. Jesu o ne a susumetsa joang ka mohlala, ’me re ka mo etsisa joang ntlheng ee?

⁸ Ha re sebeletsa Molimo oa rōna, kaofela ha rōna re ka susumetsana ka mohlala oo re o behang. Jesu ka sebele o ile a susumetsa bamameli ba hae. O ne a rata mosebetsi oa tšebeletso ea Bokreste ’me o ile a phahamisa tšebeletso. O itse e ne e tšoana le lijo ho eena. (Johanne 4:34; Ba-Roma 11:13) Cheseho e joalo e ka tšoaetsanoa. Na le uena u ka etsa hore ka ho tšoanang thabo ea hao tšebeletsong e bonahale? Le hoja ka hloko u qoba mokhoa oa ho bua ka boithoriso, abelana liphihlelo tsa hao tse monate le ba bang ka phuthehong. Ha u mema ba bang hore ba sebetse le uena, bona haeba u ka ba thusa ho fumana thabo ea sebele ha ba bua le ba bang ka ’Mōpi oa rōna e Moholo, Jehova.—Liproverbia 25:25.

 9. (a) Mekhoa e meng ea ho susumetsa ba bang eo re batlang ho e qoba ke efe, hona hobane’ng? (b) Ke eng e lokelang ho re susumelletsa ho thusa ba bang tšebeletsong ea Jehova?

⁹ Leha ho le joalo, u be seli hore u se ke ua susumetsa ba bang ka tsela e fosahetseng. Ka mohlala, re sa hlokomele re ka ’na ra ba etsa hore ba ikutloe ba le molato ka hore ebe ha ba etse ho eketsehileng. Re sa rera re ka ’na ra ba hlabisa lihlong ka ho ba bapisa hampe le ba bang ba bonahalang ba le mafolo-folo haholoanyane, kapa re ka ’na ra beha litekanyetso tse sa tenyetseheng eaba ba sa li finyelleng rea ba khesa. Mokhoa leha e le ofe ho ena, ka nakoana o ka ’na oa susumeletsa ba bang ho nka khato, empa Pauluse ha aa ka a ngola hore, ‘Le susumeletsane ho ikutloeng motho a le molato, le mesebetsing e molemo.’ Che, re tlameha ho susumeletsana leratong, joale ho tla latela mesebetsi e etsoang ka sepheo se setle. Ha ho ea lokelang ho susumetsoa haholo ke ho nahana hore na ba bang ka phuthehong ba tla nahana eng ka eena haeba a sa finyelle hantle se lebeletsoeng.—Bapisa le 2 Ba-Korinthe 9:6, 7.

10. Ke hobane’ng ha re lokela ho hopola hore ha rea lokela ho busa holim’a tumelo ea ba bang?

¹⁰ Ho susumetsana ha ho bolele ho laolana. Le hoja moapostola Pauluse a ne a e-na le matla a mangata a ho laela ao a neng a a filoe ke Molimo, ka boikokobetso o ile a hopotsa phutheho ea Korinthe: ‘Ha re na puso holim’a tumelo ea lōna.’ (2 Ba-Korinthe 1:24) Haeba joaloka eena ka boikokobetso re hlokomela hore hase mosebetsi oa rōna ho lekanyetsa hore na ba bang ba lokela ho etsa ho hokae tšebeletsong ea Jehova, kapa ho laola matsoalo a bona liqetong tse ling tsa botho, re tla qoba ho ‘iketsa ba lokileng ka ho fetisisa,’ ba hlonameng, ba sa tenyetseheng, ba nang le maikutlo a seng matle, kapa ba sekametseng ho buseng. (Moeklesia 7:16) Litšobotsi tse joalo ha li susumetse; lia hatella.

11. Ke eng e ileng ea susumeletsa hore ho ntšoe menehelo mehleng ea ho hahoa ha tabernakele Iseraeleng, ’me seo e ka ba ’nete joang mehleng ea rōna?

¹¹ Re batla hore boiteko bohle tšebeletsong ea Jehova bo etsoe ka moea o tšoanang le oa Iseraeleng ea boholo-holo ha ho ne ho hlokoa menehelo ea ho haha tabernakele. Exoda 35:21 e re: “Motho ka mong ea elelitsoeng ke pelo ea hae le bohle ba pelo li ithatetseng, ba fihla ba tlisetsa Jehova likabelo [tsa] ho sebetsa.” Ha baa ka ba qobelloa ke ho hong ho kantle empa ba ile ba khannoa ke matla a ka hare, ho tloha pelong. Ha e le hantle, mona Seheberu se bua ka mokhoa o tobileng hore “e mong le e mong eo pelo ea hae e ileng ea mo hlasimolla” o ile a etsa limpho tse joalo. (Mongolo o tšekaletseng ke oa rōna.) Ho feta moo, a re lekeng ho hlasimollana lipelo neng le neng ha re le hammoho. Moea oa Jehova o ka etsa ho setseng.

‘Khothatsanang’

12. (a) Meelelo e meng ea lentsoe la Segerike le fetoleloang e le ‘ho khothatsa’ ke efe? (b) Metsoalle ea Jobo e ile ea hlōleha joang ho mo khothatsa? (c) Ke hobane’ng ha re lokela ho lesa ho ahlolana?

¹² Ha Pauluse a ne a ngola hore re lokela ‘ho khothatsana,’ o ile a sebelisa sebōpeho sa lentsoe la Segerike pa·ra·ka·leʹo, le ka boetseng la bolela ‘ho matlafatsa, ho tšelisa.’ Phetolelong ea Septuagint ea Segerike, lentsoe lona lena le ile la sebelisoa ho Jobo 29:25, moo Jobo a ileng a hlalosoa e le ea tšelisang ba llang. Ho fapana le hoo, ha Jobo ka boeena a ne a le tekong e matla, ha aa ka a fumana khothatso e joalo. “Batšelisi” ba hae ba bararo ba ne ba tšoarehile haholo ka ho mo ahlola le ho mo khalemela hoo ba ileng ba hlōleha ho mo utloisisa kapa ho ipeha boemong ba hae. Ha e le hantle, lipuong tsohle tsa bona, ha baa ka ba bitsa Jobo ka lebitso leha e le hang feela. (Bapisa le Jobo 33:1, 31.) Ho totobetse hore ba ile ba mo talima haholo e le khathatso ho feta ho mo talima e le motho. Hase feela Jobo a ileng a ba tsota ka ho tsieleha: “Hoja boemo ba ka e n’e le ba lōna”! (Jobo 16:4, Bibele—Phetolelo e Ncha) Hoa tšoana kajeno, haeba u batla ho khothatsa e mong, ipehe boemong ba hae! U se ke ua ahlola. Joalokaha Ba-Roma 14:4 e bolela, “u mang, ha u ahlola mofo oa e mong? Leha a ka ema, leha a ka oa, ho na le monghali oa hae; athe o tla ema, hobane Molimo o na le matla a ho mo emisa.”

13, 14. (a) Ho hlokahala hore re kholise baena le bo-khaitseli ba rōna ka ’nete efe ea motheo e le hore re ba tšelise? (b) Daniele o ile a matlafatsoa joang ke lengeloi?

¹³ Sebōpeho se seng sa pa·ra·ka·leʹo le lereho le amanang le eona se fetoleloa e le ‘ho tšelisa’ ho 2 Ba-Thessalonika 2:16, 17: “’Me Morena oa rōna Jesu Kreste, eena ka sebele, le Molimo, ntat’a rōna, o re ratileng, o re fileng ka mohau oa oona tšeliso e sa feleng le tšepo e molemo, o tšelise lipelo tsa lōna, ’me o le tiise lipolelong tsohle le mesebetsing eohle e molemo!” Hlokomela hore Pauluse o amahanya khopolo ea hore lipelo tsa rōna li tšelisoe le ’nete ea motheo ea hore Jehova oa re rata. Ka hona re ka khothatsana le ho tšelisana ka ho tiisa ’nete eo ea bohlokoa.

¹⁴ Ketsahalong e ’ngoe moprofeta Daniele o ne a ferekane haholo ka mor’a ho bona pono e tšosang hoo a ileng a re: “Ka ba ka felloa ke matla, ’me sefahleho sa ka sa hloenya, ka omella.” Jehova o ile a romela lengeloi le ileng la hopotsa Daniele ka makhetlo a mangata hore ke “ea ratoang” mahlong a Molimo. Phello ea e-ba efe? Daniele o ile a re ho lengeloi leo: “U mphile matla.”—Daniele 10:8, 11, 19.

15. Baholo le balebeli ba tsamaeang ba lokela ho leka-lekanya pabatso le khalemelo joang?

¹⁵ Tsela e ’ngoe ea ho khothatsa ba bang ke ena. Ba babatse! Ho bonolo haholo ho oela moeeng oa ho nyatsa-nyatsa, oa ho se utloele bohloko. Ke ’nete hore ho na le linako tseo ka tsona khalemelo e ka ’nang ea hlokahala, haholo e etsoang ke baholo le balebeli ba tsamaeang. Empa ho ka ba molemo ha ba hopoloa ka khothatso ea bona e mofuthu ho e-na le ho hopoloa ka ho ba le boikutlo ba ho tšoaea liphoso.

16. (a) Ha ho khothatsoa ba tepeletseng maikutlo, ke hobane’ng ha ho sa lekana ho ba phehella feela hore ba etse ho eketsehileng tšebeletsong ea Jehova? (b) Jehova o ile a thusa Elia joang ha a ne a tepeletse maikutlo?

¹⁶ Ba tepeletseng maikutlo ke bona ba hlokang khothatso ka ho khethehileng, ’me joaloka Bakreste-’moho le bona, Jehova o lebeletse hore re be mohloli oa thuso—haholo haeba re le baholo. (Liproverbia 21:13) Re ka etsa’ng? Karabo e ka ’na ea se be bonolo hakaalo joaloka ho ba bolella hore ba etse ho hoholoanyane tšebeletsong ea Jehova. Hobane’ng? Hobane ba ka ’na ba ba le maikutlo a hore ba tepeletse maikutlong hobane ba sa etse se lekaneng. Hangata ha ho joalo. Ka nako e ’ngoe moprofeta Elia o ne a tepeletse maikutlo hoo a neng a batla ho shoa; empa sena se ile sa tla ka nako ea ha a ne a tšoarehile haholo tšebeletsong ea hae ho Jehova. Jehova o ile a sebetsana le eena joang? O ile a romela lengeloi hore le mo fe thuso e sebetsang. Elia o ile a phetlela Jehova sefuba sa hae, a senola hore o ne a ikutloa e se oa bohlokoa joaloka baholo-holo ba hae ba shoeleng, hore mosebetsi oa hae e ne e bile oa lefeela, le hore o ne a le mong ka ho feletseng. Jehova o ile a mo mamela le ho mo tšelisa ka lipontšo tse tšosang tsa matla a Hae le ka kholiso ea hore ho hang o ne a se mong le hore mosebetsi oo a neng a o qalile o ne o tla phethoa. Jehova o ile a boela a tšepisa Elia hore o tla mo fa molekane eo a tla mo koetlisa ea neng a tla mo hlahlama qetellong.—1 Marena 19:1-21.

17. Moholo a ka khothatsa motho ea inyatsa-nyatsang haholo joang?

¹⁷ Ke khothatso e kaakang! E se eka ka ho tšoanang re ka khothatsa ba har’a rōna ba khathatsehileng maikutlong. Batla ho ba utloisisa ka ho mamela! (Jakobo 1:19) Fana ka matšeliso a Mangolo a tšoanelang litlhoko tsa bona ka bomong. (Liproverbia 25:11; 1 Ba-Thessalonika 5:14) E le ho tšelisa ba inyatsa-nyatsang haholo, ka mosa baholo ba ka fana ka bopaki ba Mangolo ba hore Jehova oa ba rata o bile o ba nka e le ba bohlokoa.a Ho bua ka taba ea thekollo e ka ba mokhoa o matla oa ho khothatsa ba ikutloang e se ba bohlokoa. Ea tšoenyehileng ka lebaka la sebe se itseng sa nakong e fetileng a ka ’na a hloka ho bontšoa hore thekollo e mo hloekisitse haeba a bakile kannete ’me a sokolohile mokhoeng leha e le ofe o joalo.—Esaia 1:18.

18. Thuto ea thekollo e lokela ho sebelisoa joang ho khothatsa ea ileng a hlaseloa, mohlomong ka ho betoa?

¹⁸ Ho hlakile hore moholo o ne a tla nahana ka taba ena e khethehileng e le hore a ka sebelisa thuto eo ka nepo. Nahana mohlala ona: Sehlabelo sa thekollo sa Kreste se ile sa tšoantšetsoa ka mahlabelo a liphoofolo a Molao oa Moshe, a neng a hlokoa bakeng sa pheko ea libe tsohle. (Levitike 4:27, 28) Leha ho le joalo, ho ne ho sa qaqisoa hore motho ea betiloeng o ne a lokela ho etsa nyehelo e joalo. Molao o ne o re ba ‘se ke ba etsa letho’ ho mo otla. (Deuteronoma 22:25-27) Kahoo kajeno, haeba khaitseli a ile a hlaseloa eaba oa betoa ’me hona ho mo baketse hore a ikutloe a le litšila ’me e se oa bohlokoa, na e ka ba ho loketseng ho hatisa hore o hloka thekollo ho mo hlatsoa sebe seo? Ha ho joalo ho hang. Ha aa ka a etsa sebe ka ho hlaseloa. Ke ea betang ea entseng sebe le ea hlokang ho hloekisoa. Leha ho le joalo, lerato le bontšoang ke Jehova le Kreste ka ho fana ka thekollo le ka sebelisoa e le bopaki ba hore mahlong a Molimo ha aa silafatsoa ke sebe sa motho e mong empa hore ke oa bohlokoa ho Jehova le hore o lutse leratong la hae.—Bapisa le Mareka 7:18-23; 1 Johanne 4:16.

19. Ke hobane’ng ha re sa lokela ho lebella hore ho bokana hohle le baena ba rōna le bo-khaitseli e tla ba ho khothatsang, empa boikemisetso ba rōna e lokela ho ba bofe?

¹⁹ E, ho sa tsotellehe hore na boemo ba motho bophelong ke bofe, ho sa tsotellehe hore na ke maemo afe a bohloko a ka fifatsang bophelo ba hae ba nako e fetileng, o tšoanela ho nolofalloa ke ho fumana khothatso phuthehong ea batho ba Jehova. ’Me ho tla ba joalo haeba ka bomong re loanela ho nahanelana, ho susumetsana, le ho khothatsana neng le neng ha re bokana hammoho. Leha ho le joalo, kaha ha rea phethahala, kaofela re hlōleha ho etsa joalo ka linako tse ling. Ka ho ke keng ha qojoa rea soetsana ’me re bile re utloisana bohloko nako le nako. Leka hore u se ke ua beha mohopolo likhaellong tsa ba bang ntlheng ena. Haeba u beha mohopolo mefokolong, u ipeha kotsing ea ho ba ea nyatsa-nyatsang phutheho ho tlōla ’me u ka ba ua oela lerabeng lona leo Pauluse a neng a chesehela haholo ho re thusa ho le qoba la ho furalla ho bokana ha rōna hammoho. E se eka seo se ke ke sa etsahala le ka mohla! Ha tsamaiso ena ea khale e ntse e fetoha e kotsi le e hatellang haholo, a re ikemisetseng ka tieo ho etsa seo re ka se khonang hore ho bokana ha rōna libokeng e be ho hahang—haholo-holo ha re bona letsatsi la Jehova le atamela!

[Mongolo o botlaaseng ba leqephe]

U ne U Tla Araba Joang?

◻ Ke hobane’ng ha e le habohlokoa hore liboka tsa rōna le ho bokana hammoho matsatsing aa a ho qetela e be tse khothatsang?

◻ Ho nahanelana ho bolela eng?

◻ Ho susumetsana ho bolela eng?

◻ Ho khothatsana ho akarelletsa eng?

◻ Ba tepeletseng maikutlo le ba lipelo li sithabetseng ba ka khothatsoa joang?

[Setšoantšo se leqepheng la 16]

Ho amohela baeti ka mofuthu ho re thusa hore re tsebane hamolemo

[Setšoantšo se leqepheng la 18]

Ha Elia a ne a tepeletse maikutlo, Jehova ka mosa o ile a mo tšelisa