Watchtower ONLINE LIBRARY

Na Joaloka Molimo U Nka Bophelo e le ba Bohlokoa?

“Le Ipoloke Leratong la Molimo”
- 5, 6. Molao oa Moshe o ile oa bontša joang hore mali aa halalela ebile ke a bohlokoa? (Bona le lebokose le leqepheng la 78.)
  
  ⁵ Linnete tsena tse peli tsa bohlokoa li ne li bonahala Molaong oa Moshe. Levitike 17:10, 11 e re: “Motho leha e le ofe . . . ea jang mali a mofuta leha e le ofe, ka sebele ke tla tjamela moea o jang mali, ’me ruri ke tla mo felisa har’a batho ba habo. Etsoe moea oa nama o maling, ’me ke a behile aletareng hore le koahele libe tsa meea ea lōna, hobane mali a koahela libe ka lebaka la moea o ho ’ona.”a—Bona lebokose le nang le sehlooho se reng “Matla a Koahelang Libe a Mali,” leqepheng la 76.
  
  MATLA A KOAHELANG LIBE A MALI
  
  Lentsoeng la Molimo, ho nkoa hore mali a lekana le bophelo. Kahoo, Iseraele ea boholo-holo, ho e-na le hore moetsalibe a ahloloe hobane a ne a fositse litaelo tsa Jehova, o ne a ka nyehela sehlabelo sa phoofolo aletareng ea Molimo. (Levitike 4:27-31) Sehlabelo sena se ne se koahela libe tsa hae, le hoja e ne e e-ba ka nakoana feela.
  
  Tsela eo ‘ho koahela’ ho sebelisoang ka eona ka Bibeleng, ho fetisa khopolo ea “ho fapanyetsana” kapa “ho khurumetsa,” joalokaha ka mohlala, sekoahelo se nepahetseng se ne se tla koahela setšelo hantle. Ha e le hantle, ha ho phoofolo e neng e ka “koahela” kapa ea khurumetsa libe tsa batho ka tsela e phethahetseng. Leha ho le joalo, mahlabelo a liphoofolo e ile ea e-ba seriti sa sehlabelo se phethahetseng se koahelang libe seo e neng e le hona se tla tla.—Baheberu 10:1, 4.
  
  Ho koaheloa hoo ha libe ho ile ha etsoa “ka ho nyeheloa ha ’mele oa Jesu Kreste hang le ka ho ke keng ha phetoa.” (Baheberu 10:10) Bophelo bo phethahetseng ba Kreste, bo neng bo tšoantšetsoa ke “mali a [hae a] bohlokoa, a joaloka a konyana e se nang sekoli le e se nang letheba,” a ne a lekana hantle le bophelo boo Adama a ileng a bo lahla. (1 Petrose 1:19) Kahoo, ka tsela e ntle haholo le e lerato, toka e ile ea phethoa eaba re ba le monyetla oa “topollo e sa feleng.”—Baheberu 9:11, 12; Johanne 3:16; Tšenolo 7:14.

Na Joaloka Molimo U Nka Bophelo e le ba Bohlokoa?

“Le Ipoloke Leratong la Molimo”
- a Tabeng ea polelo ea Molimo e reng, “moea oa nama o maling,” koranta e bitsoang Scientific American e re: “Le hoja ho ka boleloa hore mali a sebelisitsoe ka tsela ea tšoantšetso mona, polelo eo ke ’nete: mofuta o mong le o mong oa sele ea mali oa hlokahala hore bophelo bo be teng.”