Lipotso tse Tsoang ho Babali
◼ Ke hobane’ng ha Molao oa Molimo o ne o re monna oa Moiseraele ea bileng le likamano tsa botona le botšehali le moroetsana ea sa lebeletsoang o ne a lokela ho mo nyala ’me ho se mohla a ka mo hlalang?
Ho Exoda 22:16, 17 le ho Deuteronoma 22:28, 29, re fumana molao ona, oo ba bang ba boletseng hore o bonahala o se na kutloelo-bohloko basaling. Ha e le hantle, o ne o khothalletsa tekanyetso e phahameng ea boitšoaro ho banna le ho basali.
Deuteronoma khaolo ea 22 e fane ka melao e fapa-fapaneng ea lelapa. Ka mohlala, e ne e sebetsana le boemo ba monna ea neng a se a sa rate mosali oa hae ’me a bolela hore e ne e se moroetsana. E boetse e fane ka melao ea Molimo ka bofebe le ho beta. Joale rea bala:
“Etlare ha monna a fumana moroetsana ea sa lebeletsoang, ’me a ’meta, a robala le eena, ’me ba bonoa; monna ea robetseng le eena o tla nea ntat’a moroetsana lishekele tse mashome a mahlano tsa silefera, ’me moroetsana e tla ba mosali oa hae, kahobane o mo tlotlolotse; ’me a ke ke a mo lahla, ha a ntse a phela.”—Deuteronoma 22:28, 29.
Ena e ne e le taba ea ho thetsoa ka ho hatelloa le/kapa bohlola. Haeba monna ea se nang boitšoaro a ne a ikutloa a lokolohile ho ba le likamano tsa botona le botšehali le moroetsana, moroetsana eo e ne e tla ba eena ea ka sehloohong ea lahleheloang. Ntle le hore o ne a ka ’na a ba le ngoana ea tsoetsoeng ka bohlola, ho ba bohlokoa ha hae e le monyaluoa ho ne ho felile, kaha Baiseraele ba bangata ba ne ba ka ’na ba se ke ba batla ho mo nyala ha feela e ne e se e se moroetsana. Leha ho le joalo, ke eng ho neng ho ka sitisa monna ho iketsetsa borata ka moroetsana. Molao oa Molimo ‘o halalelang, o lokileng, o molemo’ o ne o tla ho etsa.—Ba-Roma 7:12.
Molao oa Moshe o ne o e-na le tokisetso e lumellang monna ho hlala mosali oa hae ka mabaka a itseng. (Deuteronoma 22:13-19; 24:1; Mattheu 19:7, 8) Empa seo re se balang ho Exoda 22:16, 17 le ho Deuteronoma 22:28, 29 se bontša hore ka mor’a bohlola bo entsoeng pele ho lenyalo ho ne ho se ho se na boikhethelo ba ho hlala. Ka hona, sena se ka ’na sa etsa hore monna (kapa moroetsana) a hanele teko ea ho kopanela bohloleng. Monna o ne a ke ke a ikutloa hore, ‘O motle ’me o-oa rateha, kahoo ke tla ba le nako e monate le eena le hoja e se oa mofuta oo ke neng ke tla o nyala.’ Ho e-na le hoo, molao ona o ne o tla thibela boitšoaro bo bobe ka ho etsa hore mang le mang eo e neng e tla ba mofosi a jare liphello tsa nako eohle tsa bohlola—a tlameha ho phela le motho eo e mong bophelo bohle ba hae.
Molao o boetse oa fokotsa bothata ba bana ba matšeo. Molimo o ile oa laela: “Ea tsoetsoeng ka bohlola a ke ke a kena phuthehong ea Jehova.” (Deuteronoma 23:2) Kahoo haeba monna ea thetsitseng moroetsana a ne a lokela ho mo nyala, bohlola ba bona bo ne bo ke ke ba fella ka hore ho be le bana ba tsoetsoeng ka bohlola har’a Baiseraele.
Bonneteng, Bakreste ba phela tikolohong ea batho e fapaneng le ea Baiseraele ba boholo-holo. Ha re tlas’a litaelo tsa Molao oa Moshe, ho akarelletsa le molao ona o hlokang hore batho ba babeli ba kopanetseng bohloleng bo joalo ba nyalane. Leha ho le joalo, re ke ke ra ikutloa hore ho kopanela bohloleng ba pele ho lenyalo ke ntho e sa reng letho. Bakreste ba lokela ho nahana ka ho teba ka liphello tsa nako eohle, feela joalokaha molao ona o ile oa susumelletsa Baiseraele ho etsa joalo.
Ho thetsa motho ea seng lenyalong ho senya tokelo ea motho eo ea ho kena lenyalong la Bokreste e le moroetsana ea hloekileng kapa mohlankana. Bohlola ba pele ho lenyalo bo boetse bo ama litokelo tsa motho leha e le ofe ea ka ’nang a fetoha molekane oa motho eo, ke hore, tokelo ea motho eo ea ho nyala Mokreste ea hloekileng. Ka holim’a tsohle, bohlola bo tlameha ho qojoa hobane Molimo o re bo fosahetse; ke sebe. Ka ho loketseng moapostola o ile a ngola: “Ho rata ha Molimo ke hore le halalele, le hore le tšabe bofebe [“bohlola,” NW].”—1 Ba-Thessalonika 4:3-6; Ba-Heberu 13:4.