Ke ka Tsela Efe re Tla Buseletsa Jehova?
HA MOTHO e mong a re bontša thahasello ea ’nete, e mofuthu, mohlomong a bile a etsa ho hong ho itseng molemong oa rōna, re itšoara joang? Mosa le moea oa ho fana hangata li hlahisa karabelo, na ha ho joalo? Boikutlo ba rōna ke bofe ka Molimo oa rōna, Jehova, bakeng sa mosa oa hae o lerato oa ka mehla ho rōna?
Ho bonolo haholo, ha re phathahantsoe ke likhatello tsa bophelo ba letsatsi le letsatsi, ho nka habobebe molemo oa Jehova, ka linako tse ling re be re itšoare joalokaha eka kannete re ne re se na teboho. Ka lebaka leo, ke hantle ha re imamela ho se hokae le ho nahanisisa ka potso ea mopesaleme: “Ke tla buseletsa Morena [Jehova] ka’ng, bakeng sa melemo eohle eo a nketselitseng eona?” (Pesaleme ea 116:12, TLP) Re tla arabela ka litsela life?
Melemo e Tsoang ho Jehova
Ka ntle ho mpho ea Jehova ea Lentsoe la hae Bibele, re ka be re ntse re lahlehile hakaakang! Banna le basali ba sebete ba makholong a lilemo a fetileng ba ile ba bea bophelo ba bona kotsing e le hore ba ka ba le buka ena le ho e bala, ’me joale re utloisisa lebaka la sena. Batho ba Molimo ka mehla ba ’nile ba leboha bakeng sa Lengolo le bulutsoeng, ba tseba hore na le na le molemo o moholo hakaakang “oa ho ruta, oa ho kholisa, oa ho laea, le oa ho hōlisa ka khōlo ea ho loka.”—2 Timothea 3:16.
Leha ho le joalo, rea tseba hore ‘hore re rutehele ruri mesebetsing eohle e molemo,’ re hloka ho fetang ho ba le tsebo e ka hloohong feela ea Bibele. (2 Timothea 3:17) Ke ka matla a moea o halalelang oa Molimo re fumanang molemo bophelong ba rōna, ’me ’nete ena e tlisoa tlhokomelong ea rōna ke lipontšo tse ipiletsang tsa Jehova ka moprofeta oa hae Esaia: “’Me joale, Morena Jehova o nthomile le moea oa hae. Ho itsoe ke Jehova, Molopolli oa hao, Mohalaleli oa Iseraele: ’Na Jehova, Molimo oa hao, ke u ruta se u tšoanelang, ke u tsamaisa ka tsela eo u tšoanetseng ho tsamaea ka eona. Oho! hoja u ka lemoha litaelo tsa ka! khotso ea hao e ka ’na ea phalla joale ka nōka; ho loka ha hao ho ka tlala joale ka maqhubu a leoatle.” (Esaia 48:16-18) Ka moea oa hae o halalelang, ’moho le Lentsoe la hae, Jehova o re tataisa hore re iphumantše molemo, ’me phello ke khotso le ho loka.
Ho feta moo, matla a sebetsang a Jehova a sebetsa ka thata molemong oa rōna hobane ho hlonngoe tšiea, mokhatlo o hlophisitsoeng oa lefatšeng, oo moea o halalelang o sebetsang ka oona. Ho 1 Ba-Korinthe khaolo ea 12, Pauluse o tšoantša phutheho ea Bokreste le ’mele ’me o bolela tjena temaneng ea 7: “’Me ponahatso ea Moea e neoa e mong le e mong, e tle e be molemo oa bohle.” O tsoela pele ho bontša hore na re ka fumana molemo joang ka ho ba karolo ea mokhatlo o hlophisitsoeng oa lefatšeng oa Molimo.
Ho e ka bang lilemo tse hlano ka mor’ a hore a ngole mantsoe ao, o ile a ngola lengolo la hae le eang ho phutheho ea Efese leo ho lona a neng a bua ka ho eketsehileng ka melemo e fumanoang ka ho ba le kamano le tokisetso eo ea lefatšeng. Le hoja seo a se boletseng se ne se sebetsa pele ho Bakreste ba tlotsitsoeng, na bao ba “bongata bo boholo ba batho” kajeno ha ba ‘hlophisetsoa ho etsa mosebetsi oa bolisa,’ ba fetoha ho ba ‘banna ba fihletseng khōlo e phethehileng’ ea moea, ba tsitsitseng tumelong, ‘e se e se masea,’ ’me ‘ka lerato ba hōla nthong tsohle ho Kreste, eo e leng hloho’? (Tšenolo 7:9; Ba-Efese 4:12-16, NW) Kaofela ha rōna re na le lebaka le letle la ho leboha.
Kamanong e haufi haholo le phutheho ea Bokreste ke mohlanka ea khabane ea bohlale, eo mosebetsi oa hae, ho re fepa moeeng, hona joale e leng bopaki bo bong ba hore Jehova o re fumantša molemo. (Mattheu 24:45, 46) Hona joale re nakong e hlileng ea boleloa pele ea boteng ba Morena. Na “mohlanka” o ntse a etsa mosebetsi oa hae? Ho sa tsotellehe ho ba lerootho ha ‘mehla ena ea qetello,’ na re tletse tšepo? Na re na le morero oa sebele bophelong? (2 Timothea 3:1-5; Ba-Roma 5:5; 1 Timothea 4:10) E! ’Me tšepo ea rōna hase khakanyo tjee feela empa kholiseho e tiileng e hahiloeng holim’a tumelo, eo hape e theiloeng bopaking bo tiileng.—Ba-Heberu 11:1.
Ka ho totobetseng he, Jehova, Mofani e Moholo oa rōna, o re file lintho tse ngata haholo tseo re ka li lebohang. Ka ho utloahalang ho latela potso:
Ke Tla Buseletsa Jehova Eng?
Pele, re tlameha ho hlokomela hore Jehova ha a hloke letho ho rōna. Ke eena ea reng: “Silevera ke ea ka, le gauda ke ea ka,” feela joaloka “makhomo a fulang lithabeng ka likete.” (Haggai 2:8; Pesaleme ea 50:10; Jobo 41:11) Sena se bolela hore le ka tsela leha e le efe re ke ke ra “reka” mohau oa Jehova; leha ho le joalo re khothaletsoa ho mo etsetsa limpho tsa boithatelo. (Bapisa 1 Likronike 29:14.) Leha ho le joalo, ho na le maemo a itseng, ao ho ’ona re lumelletsoeng ho fa Jehova limpho.
“Ke tla khahlanyetsa Jehova ka’ng, ke iname pel’a Molimo o phahameng? Na ke tla mo khahlanyetsa ka licheso le ka manamane a selemo se le seng? Na Jehova o tla khahloa ke pheleu tse likete, ke mashome a likete a linōka tsa oli? A ke tla ntša mora oa ka oa letsibolo bakeng sa bokhopo ba ka, ke ntše ea tsoileng maleng a ka bakeng sa sebe sa moea oa ka na? Uena motho, u tsebisitsoe se leng molemo, le seo Jehova a se batlang ho uena, ke hore u etse se lokileng, u rate bokhabane, le ho tsamaea ka boikokobetso le Molimo oa hao.”—Mikea 6:6-8.
Mona re ithuta hore lintho tseo Jehova a li hlokang ka mehla lia utloahala, ’me ka mehla lia fumaneha. Ho phaella moo, Jehova o ile a qolla boemo bo hlokahalang pele e le hore kamano ea rōna le Jehova le ngoan’abo rōna e tlameha ho ba e nepahetseng bakeng sa limpho tsa rōna hore li tle li amoheloe. (Mattheu 5:23, 24) Ha re se re ralile motheo o nepahetseng, joale re ka bona hore kaofela ha rōna re na le seo re ka se fang Jehova, re ananela molemo oa hae ho rōna.
Re ka Sebelisa Seo re Nang le Sona Joang?
Ho nka nako, boiteko, ’me ka nako e ’ngoe chelete, empa ke tokelo e kaakang ho emela Jehova mosebetsing oa boboleli! Sehlabelo sena sa poko ke ntho e ’ngoe eo kaofela ha rōna re ka e fang Jehova. Ena ke tsela eo moholo e mong oa pula-maliboho ea nang le bana ba bararo ba banyenyane a ileng a ikutloa ka eona:
“Ho nka karolo tokelong ea tšebeletso ea nako e tletseng ho lokela sehlabelo leha e le sefe sa botho—’me ho feta moo—hobane ke tsela e sebetsang ka ho fetisisa ea ho fana ka thoriso ho Ntate oa rōna oa leholimo. Hape, ho ’nolofaletsa ka tekanyo eitseng ho mo leboha bakeng sa mosa oa hae o sa tšoanelang oo a mpontšang oona ka ho toba.”
Mosali oa hae oa phaella: “Ke tokelo ea sebele ho thusa monna oa ka ho bula maliboho. Ho nolofaletsa lelapa lohle ho ba le karolo e khōloanyane tšebeletsong, ’me ho bona letsoho le lerato la Jehova le re fa seo re se hlokang moeeng le linthong tse bonahalang ho re etsa hore re batle ho mo rorisa haholoanyane.”
Mokhatlo oa Watch Tower o abile Libibele le libuka tsa Bibele motheong oa boithatelo ka lilemo tse ka holimo ho lekholo ’me o li hatisitse mechineng ea oona ea khatiso ho tloha ka 1920. Nako le boiteko tsa baithaopi ba sebetsang Bethele ho hlahisa litokollo tsena tsohle tseo re nang le tsona kajeno, ’moho le tsa bahoeletsi ba phutheho le bo-pula-maliboho ho li isa ho batho, ha e le hantle, li fetoha, mpho e eketsehileng mosebetsing oa bohlokoahali oa boboleli.—Mattheu 24:14.
Hape, Bakreste ba linaheng tse tsitsitseng haholoanyane moruong ba thabela ho tseba hore limpho tsa bona tse mosa tsa chelete, tseo ba li romelang ofising ea lekala ea Mokhatlo oa Watch Tower e naheng ea habo bona, li nolofaletsa baena ba bona ba bangata likarolong tse ling tsa lefatše ho sebelisa nako eohle ea bona boboleling le ho etseng barutuoa. Baromuoa ba tsoang Sekolong sa Bibele sa Watchtower sa Gileade, balebeli ba potoloho le ba setereke, le bo-pula-maliboho ba khethehileng kaofela ba thusoa ke menehelo ena ea boithatelo ho tsoela pele tšebeletsong ea bona ea nako e tletseng.
Mohlomong ha ho bonolo hore u ka sebeletsa Bethele kapa u le setho sa Lenaneo la Machaba la Basebetsi ba Khaho ba Baithaopi. Empa e ka ’na eaba u na le lichelete tse ka tšehetsang bao ba tšoarehileng mosebetsing ona empa ba haelloa ke lichelete tse “eketsehileng” ho ba boloka ho oona. Thuso e leka-lekanyang maemo e ka etsoa, joalokaha ho boleloa ho 2 Ba-Korinthe 8:14. Mangolo a neng a tsamaea le menehelo e joalo a ’nile a akarelletsa taba e latelang ho tsoa ho khaitseli e mong ea hōlileng ea ileng a ngola:
“Ke leboha haholo bakeng sa mahlohonolo ’ohle ao Jehova a mphang ’ona, ’me ke rapella ka mehla mesebetsi ea kaho le mokhatlo o hlophisitsoeng.”
Khaitseli e mong o itse: “Ke lakatsa ha cheletana ena e nyenyane e etsa molemo o mong o itseng litabeng tsa puso ea Molimo ho feta hore e lule bankeng e tla tla e e-oa haufinyane!”
Moena e mong o ile a itlhalosa ka mantsoe ana: “Ho re eletsa ha Jehova ho sebelisa lintho tsa rōna ho mo tlotlisa ke tsela e ’ngoe ea tšireletso ea sebele khoebong e meharo, eo e leng ‘lehlakore la boraro’ la tsamaiso e khopo ea lintho ea Satane. Ke nka monyetla ona ho bolela kamoo ke thabileng kateng hore e be ke nehelane ka ho hong ho potlakisoeng ha keketseho eo Jehova a re fileng eona, ’me ke mo leboha ha a ’nolofalelitse ho sebelisoa.”
Limpho Tse Tsoang ho ba Hōlileng le ba Bacha
Hoa khothatsa ho bala ka boikemisetso bo tšepahalang ba ba hōlileng bao, le hoja ba e-na le tšepo ea ho pholoha bofelo ba tsamaiso ena, ka ho etsa kabo e loketseng ea lefa, ba etsang bonnete ba hore mosebetsi oa ’Muso o una molemo, haeba ba ka shoa. Lipolelo tse ling tse ileng tsa amoheloa ho tsoa ho bao lefa le siiloeng ho bona bakeng sa ho le aba, tse hlalosang boikutlo bo botle ba bafani ba joalo ba mafa, li akarelletsa:
“E ne e le motho ea mosa haholo ho e mong le e mong, bophelong ba hae bohle . . . o ne a rata Jehova le pōpo ea hae.”
“Ka mehla, lithahasello tsa ’Muso e ne e le tsona tseo a amehileng ka tsona pele.”
“O fumane moputso oa hae oa leholimo ka mor’a lilemo tse 70 tsa tšebeletso e tšepahalang . . . ka mehla o ne a batla ho ntšetsa pele ’nete ka thepa ea hae.”
Re boetse re thabela ho utloa ho tsoa ho ba bacha, ba ikemiselitseng ho fana ka lintho tsa bona tse bonahalang bakeng sa mosebetsi oa Jehova. Lengolo le leng le ileng la amoheloa ofising ea Mokhatlo e Brithani le ne le e-tsoa ho mohoeletsi ea lilemong tsa sekolo. O ile a pheta hore o ne a fumane moputso oa pele tlhōlisanong ea moqoqo o ngoloang. O ile a kenya ka lengolong chelete eo eohle ea moputso. Litokollo tsa Mokhatlo e ne e le tsona mohloli feela oa boitsebiso ba moqoqo oa hae ka “Boitlamo ba Bokreste,” ka hona o ile a ikutloa hore ka ho loketseng chelete eo e lokela ho ea ho Jehova.
Ka mor’ a ho botsoa hore na ke eng seo a tla se buseletsa Jehova, mongoli oa Pesaleme ea 116 o tsoela pele ka ho re litemaneng 13 le 14 : “Ke tla emisa senoelo sa topollo, ke rapele lebitso la Jehova; ke tla phetha likano tsa ka ho Jehova, pontšeng ea sechaba sa hae kaofela. ” Re ananela mpho ea bohlokoahali ea topollo e tsoang ho Jehova ka Mora oa hae, re ikutloa re susumetseha, joalokaha ho entse mopesaleme, ho itšetleha ka Eena le ho boloka litšepiso tsa rōna ho Eena.
Jehova o re fumantšitse molemo haholo, ’me leha e le eng feela eo re ka e etsang re mo buseletsa e bonahala e le nyenyane haholo ha ho bapisoa. Ke ho loketseng hakaakang, he, hore e le pontšo ea teboho, re etse sohle seo re ka se khonang, ka litsela tsohle! “Ke tla u hlahisetsa sehlabelo sa teboho, ke rapele lebitso la Jehova.”—Pesaleme ea 116:17.
[Lebokose le leqepheng la 26]
KAMOO BA BANG BA TLATSETSANG MOSEBETSING OA ’MUSO
◻ LIMPHO: Limpho tsa boithatelo tsa chelete li ka ’na tsa romeloa ka ho toba ho Watch Tower Bible and Tract Society of Pennsylvania, 25 Columbia Heights, Brooklyn, New York 11201, kapa ofising ea lekala ea Mokhatlo e sebakeng sa heno. Litša, ha esita le mabenyane kapa thepa e ’ngoe ea bohlokoa, le tsona li ka fanoa. Lengolo le lekhutšoanyane le bolelang hore thepa e joalo ke mpho e tobileng le lokela ho tsamaea le menehelo ena.
◻ TOKISETSO-EA-MPHO-E-SEKHEQE: Chelete e ka ’na ea fuoa Mokhatlo oa Watch Tower hore o e boloke, ka tokisetso ea hore haeba ho na le tlhokahalo ea botho, e tla khutlisetsoa ho mofani.
◻ INSURANCE: Mokhatlo oa Watch Tower o ka ’na oa ngolisoa e le oona mojalefa oa insurance ea bophelo kapa oa tokisetso ea ha motho a tlohela mosebetsi kapa penshele. Mokhatlo o lokela ho tsebisoa ka tokisetso leha e le efe e joalo.
◻ LICHELETE TSE BEILOENG TLHOKOMELONG: Lichelete tse bolokiloeng bankeng li ka beoa tlhokomelong bakeng sa Mokhatlo. Haeba sena se etsoa, ka kōpo tsebisa Mokhatlo. Thepa ea mofuta ofe le ofe, chelete eo motho a tšepisitsoeng ho e lefuoa neng-neng nakong e tlang, le tsona li ka fanoa tlas’a tokisetso ea hore li fumantše mofani molemo nakong ea ha a sa ntse a phela. Mokhoa ona o felisa litšenyehelo le maemo a ho se tsitse ha kabo ea lefa, empa o tiisa hore Mokhatlo o amohela thepa ha mong a eona a e-shoa.
◻ LIKABO TSA LEFA: Thepa kapa chelete li ka ’na tsa fuoa Mokhatlo oa Watch Tower e le lefa ka tumello e feletseng ea molao oa kabo ea lefa. Kopi e lokela ho romelloa ho Mokhatlo. Bakeng sa Afrika Boroa likabo tsa lefa li lokela ho etsetsoa Lipaki tsa Jehova tsa Afrika Boroa.
Bakeng sa boitsebiso bo eketsehileng le keletso malebana le taba tse joalo, ngolla Ofisi ea Ramatlotlo, Watch Tower Bible and Tract Society of Pennsylvania, 25 Columbia Heights, Brooklyn, New York 11201, kapa ofising ea lekala ea Mokhatlo e sebakeng sa heno.